“jab main taiyar ho rahi hoti hoon, tab main gaane chalati hoon. jaise hi main kaar mein baithti hoon, main gaane chala deti hoon. jab main ghar par aaram karti hoon, safai karti hoon yahaan tak ki jab main padhti hoon, tab bhi main gaane sunti hoon. main hamesha gaane sunti rehti hoon.”—carla.

kya aapko bhi gaanon ka utna hi shauk hai, jitna ki carla ko hai? agar haan, to is lekh se aap seekh paayenge ki aap kaise sangeet se sirf faayda paa sakte hain, uske khatron se bach sakte hain aur sahi kism ka sangeet chun sakte hain.

•  faayde

•  khatre

•  aapke hamumra kya kehte hain

sangeet sunne ki tulna khaana khaane se ki jaa sakti hai. donon hi maamlon mein, sahi cheez sahi maatra mein hona hi aapke liye achha hai. aaiye dekhein kaise:

• sangeet sunne se aap achha mehsoos kar sakte hain.

  “agar mera din kharab jaa raha ho, to main apne manpasand gaane chalata hoon jinhein sunte hi meri tabeeyat khush ho jaati hai.”—mark.

• sangeet aapki purani yaadein taaza kar sakta hai.

  “kuch gaane mere zahan mein beete vakt ki koi meethi yaad taaza kar dete hain, isliye main jab bhi woh gaane sunti hoon mera dil khush ho jaata hai.”—sheila

• sangeet aapko ekta ke mazboot bandhan mein baandh sakta hai.

  “main yahova ke sakshiyon ke ek antarrashtreeya adhiveshan mein thi aur jab vahaan maujood sabhi ne milkar aakhiri gaana gaya, to meri aankhon mein aansoo aa gaye. hum alag-alag bhasha bolnevale log the, magar sangeet ne hum sabko ekta ki dori mein baandh diya.”—tammy

• sangeet aapko achhe gun paida karne mein madad kar sakta hai.

  “jab hum koi saaz bajana seekhte hain to hum niyamon ka paalan karna aur sabra se kaam lena seekhte hain. sangeet aisi kala hai jise seekhne mein vakt lagta hai, koi raaton-raat nahin seekh sakta. ise achhi tarah seekhne ka ek hi tareeka hai, baar-baar praiktis karna.”—anna.

kya aap jaante hain? bible ki sabse badi kitab, bhajnon ki kitab hai. yah 150 geeton se bani hai.

kuch tarah ka sangeet, sade huye khaane ki tarah zahreela ho sakta hai. aaiye dekhein kyon.

• kai gaanon ke bol aise hote hain ki unmein khulkar sex ki baat ki jaati hai.

  “aisa lagta hai ki sabhi mashhoor gaane sirf sex ke baare mein hain. ab woh aisi baaton ko chhipane ki koshish bhi nahin karte.”—hannah

  bible kehti hai: “tumhare beech vyabhichar aur kisi bhi tarah ki ashuddhta ya laalach ka zikra tak na ho.” (ifisiyon 5:3) khud se poochhiye, ‘kya main aisa sangeet sunta hoon jis vajah se main is salah ko nahin maan paata?’

• kuch tarah ka sangeet aapke man ko udas kar sakta hai.

  “kabhi-kabhi main raat ko bistar par aisa sangeet sunti hoon, jiski vajah se mera man nirash karnevali baaton par sochta rehta hai aur ye baatein mujh par haavi ho jaati hain. dard bhara sangeet sunne se mere man mein maayoos karnevale khyal aate hain.”—tammy

  bible kehti hai: “sab se adhik apne man ki raksha kar.” (neeti. 4:23) khud se poochhiye, ‘kya main aisa sangeet sunta hoon jisse mera man sirf nirash karnevali baaton par sochta rehta hai?’

• kuch tarah ka sangeet aapke andar gussa bhadka sakta hai.

  “aisa sangeet mere liye khatarnak ho sakta hai jise sunne se mere andar gussa aur nafrat bhar jaaye aur main khud se ghin karne lagoon. mainne saaf dekha hai ki aise gaane sunne ke baad mera mood bilkul badal jaata hai. mere parivar ne bhi is baat par gaur kiya hai.”—john.

  bible kehti hai: “in sab baaton ko khud se poori tarah door karo, jaise krodh, gussa, burai, gaali-galauj aur munh se ashleel baatein kehna.” (kulussiyon 3:8) khud se poochhiye, ‘main jis tarah ka sangeet sunta hoon uski vajah se kya main gussail ho jaata hoon, yahaan tak ki aisa kathor ho jaata hoon ki doosron ki bhaavnaon ko bhi nahin samajh paata?’

sau baat ki ek baat. soch-samajhkar sangeet chuniye. jooli naam ki ladki aisa hi karne ki koshish karti hai. woh kehti hai, “main aksar apne gaanon ki soochi ki jaanch karti hoon aur aise har gaane ko dileet kar deti hoon jo mujhe nahin sunna chahiye.” woh aage kehti hai, “aisa karna hamesha aasan nahin hota, lekin main jaanti hoon ki yahi sahi hai.”

tara naam ki ek ladki bhi kuch aisa hi karna seekh rahi hai. woh kehti hai, “kabhi-kabhi radio par aise gaane aate hain, jinki dhun bahot badhiya hoti hai lekin jab main unke bol sunti hoon to mujhe ehsas hota hai ki mujhe station badal dena chahiye. aisa karna bahot mushkil hota hai, maano kisi zaykedar mithai ka bas ek tukda chakhne ke baad use feinkna pad raha ho! lekin agar mere andar itni taakat hogi ki main sex par bana koi gaana sunne se inkar kar doon, to mere andar shaadi se pehle sex karne ki aazmaish ko thukrane ki bhi taakat hogi. main is baat ko kam nahin aankti ki main jo sangeet sunti hoon, uska mujh par kitna asar ho sakta hai.”