•  mujhe kasrat kyon karni chahiye?

•  main kasrat kyon nahin kar paata?

•  main achhi tarah kasrat kaise kar sakta hoon?

•  sahi nazariya rakhiye.

•  aapke hamumra kya kehte hain?

kai deshon mein, naujavan zyadatar kaam baithe-baithe karte hain aur bahot kam chalte-firte hain jiska bura asar unki sehat par padta hai. pavitra shastra mein bhi likha hai, “shareer ki kasrat faaydemand hoti hai.” (1 timuthiyus 4:8) zara in baaton par dhyan deejiye.

• kasrat karne se aap achha mehsoos kareinge. jab hum chalte-firte hain ya kasrat karte hain, to hamara dimag endorphin naam ka ek rasayan chhodta hai jiski vajah se hum shaant reh paate hain aur achha mehsoos karte hain. kuch log kehte hain ki kasrat karne se hum had-se-zyada nirash nahin hote.

  “subah-subah daud lagane se mera mood achha rehta hai aur mera din bhi achha guzarta hai. main bahot-se kaam kar paati hoon aur khush rehti hoon.”—regina.

• kasrat karne se aapki sehat achhi rahegi. har din kasrat karne se aapka shareer mazboot hoga, aap swasth raheinge aur aapka aatm-vishvas bhi badhega.

  “ek saal pehle tak main ek pull-up (unchai par lage dande ko pakadkar khud ko oopar uthana jab tak aapka munh us dande tak naa aa jaaye) bhi nahin kar paati thi. lekin aaj main das pull-up ek-saath kar sakti hoon. is tarah main apne shareer ka khayal rakhti hoon.”—olivia.

• kasrat karne se aap apni jaan bacha paayenge. lagatar kasrat karne se hamara dil aur shareer donon hi achhi tarah kaam kar paate hain. halki-fulki kasrat karne se hamare dil mein khoon pahunchanevali nasein band nahin hoti. nason ka band hona ya sikudna aaj logon ki maut ka ek aam kaaran hai.

  “jab hum har din achhe se kasrat karte hain to dikhate hain ki hum parmeshvar ke diye shareer ki kadar karte hain.”—jessica.

sau baat ki ek baat: lagatar kasrat karne ke bahot faayde hote hain. isse hum aaj bhi swasth rehte hain aur bhavishya mein bhi swasth raheinge. tonya naam ki ek ladki kehti hai, “kabhi-kabhi mere paas kasrat na karne ke bahot-se bahane hote hain, fir bhi jab main kasrat karti hoon to mujhe kabhi afsos nahin hota. aapko bhi sair par jaane ya daud lagane ka kabhi afsos nahin hoga.”

iski bahot-si vajah ho sakti hain. jaise, shaayad aap sochein:

• main pehle se hi sehatmand hoon. “mujhe lagta hai ki jab log javan hote hain to woh sochte hain ki sehat se judi pareshaniyaan sirf buzurgon ko hoti hain aur woh to swasth hain isliye unhein kabhi koi beemari nahin hogi.”—sophia.

• mujhe samay nahin milta. “main bahot vyast rehti hoon. mujhe khaane aur sone ke liye bhi alag se samay nikaalna padta hai. aise mein kasrat karne ke liye samay nikaalna bahot mushkil hai.”—clarissa.

• main gym nahin jaata. “sehatmand rehne ke liye hum gym jaate hain jiske liye hamein har maheene paise dene hote hain aur is tarah hamara bahot saara paisa kharch ho jaata hai.”—gina.

zara sochiye:

aisi kaun-si baat hai jiski vajah se aap kasrat nahin kar paate? mehnat keejiye taaki aap us rukavat ko paar kar sakein.

• in sujhavon ko apnakar aap achhi tarah kasrat kar sakte hain. khud apni sehat ka dhyan rakhiye.—galatiyon 6:5.

• kasrat na karne ke bahane mat banaiye. (sabhopdeshak 11:4) jaise, kasrat karne ke liye aapko gym jaane ki zaroorat nahin hai. aap roz ghar par hi aisi koi kasrat kar sakte hain jismein aapko maza aata hai.

• alag-alag tarah ki kasrat karne ke liye doosron se madad leejiye.—neetivachan 20:18.

• ek achha schedule banaiye. chhote-chhote lakshya rakhiye aur jinhein aap poora kar lete hain unhein likhiye. isse aap lagatar kasrat karte raheinge.—neetivachan 21:5.

• ho sake to kisi ke saath kasrat keejiye kyonki aapka dost aapko har din kasrat karne ke liye kahega tab bhi jab aapka man nahin hoga.—sabhopdeshak 4:9, 10.

• is baat ko samjhiye ki aap chook sakte hain. lekin haar mat maaniye aur kasrat karte rahiye.—neetivachan 24:10.

 bible kehti hai ki hum sabhi ko fir chahe hum ladka hon ya ladki “har baat mein sanyam baratna” chahiye. (1 timuthiyus 3:2, 11) isliye had-se-zyada kasrat mat keejiye. jo log aisa karte hain un par iska ulta asar hota hai. julia naam ki ek ladki kehti hai, “koi bhi ladki aise ladke ko pasand nahin karti jo dikhne mein to achha hai lekin apne dimag ka istemal nahin karta.”

un salahon se bhi saavdhan rahiye jo aapko had-se-zyada kasrat karne ka badhava deti hain kyonki isse aapko chot lag sakti hai aur zindagi ki “zyada ahmiyat rakhnevali baaton” se bhi aapka dhyan bhatak sakta hai.—filippiyon 1:10.

iske alava, agar aap doosron ki tarah dikhne ki koshish kareinge to aap nirash ho sakte hain. vera naam ki ek ladki kehti hai, “mainne dekha hai ki bahot-si ladkiyaan un logon ki tasveerein ikattha karti hain jinki tarah woh dikhna chahti hain. jab bhi woh nirash hoti hain to woh un tasveeron ko dekhti hain aur unse apni tulna karne lagti hain. lekin aisa karke woh aur bhi nirash ho jaati hain. isliye sehatmand rehne ke liye mehnat keejiye, na ki sundar dikhne ke liye.”