Vei Ira na Iperiu 10:1-39
10 Na Lawa e iyaloyalo ga+ ni ka vinaka ena yaco mai,+ e sega ni vatukana dina. O koya gona, na isoro vata ga e dau cabora na bete e veiyabaki e sega nira taucoko kina o ira na qarava na Kalou.+
2 Ke ra taucoko kina, ena sega ni tarovi na vakacaboisoro, se vakaevei? Nira na sega ni vakila tale na ivalavala ca o ira na veiqaravi tabu tiko nira sa vakasavasavataki vakadua.
3 Ia na kena cabori e veiyabaki na isoro,+ era na nanuma kina nira se ivalavala ca tiko ga,
4 ni sega ni kauta tani rawa na ivalavala ca na dra ni bulumakau tagane kei na dra ni me.
5 O koya gona, ni lako mai vuravura o koya, e kaya: “‘Oni sega ni vinakata na isoro kei na isolisoli, ia oni vakarautaka vei au e dua na yago.
6 Oni sega ni vakadonuya na isoro kama kei na isoro ni ivalavala ca.’+
7 Au qai kaya: ‘Raica! Au lako mai (e volai ena ivolavivigi na ka e baleti au) meu cakava na lomamuni, na Kalou.’”+
8 A kaya taumada: “Oni sega ni vinakata se vakadonuya na isoro, na isolisoli, na isoro kama, kei na isoro ni ivalavala ca”—na isoro e cabori me vaka e vakaroti ena Lawa—
9 sa qai kaya: “Raica! Au lako mai meu cakava na lomamuni.”+ E kauta tani o koya na imatai me tauyavutaka na kena ikarua.
10 Ena “inaki”+ ya eda sa vakasavasavataki kina ena kena cabori vakadua ga na yago i Jisu Karisito.+
11 Ena tu tale ga ena nona itutu e veisiga na bete yadua me veiqaravi tabu,*+ me cabora wasoma e dua vata ga na isoro,+ na isoro kece qori ena sega ni kauta tani vakadua na ivalavala ca.+
12 Ena vuku ni ivalavala ca, e cabora kina o koya qo e dua ga na isoro e tawamudu na kena yaga, sa qai dabe ena ligaimatau ni Kalou,+
13 me waraka tiko mai na gauna ya mera vakamalumalumutaki mada na kena meca mera itutu ni yavana.+
14 Na cabori gona ni dua ga na isoro e vakataucokotaki+ ira na sa vakasavasavataki, me tawamudu.
15 E vakadinadinataka tale ga vei keda na yalo tabu, ni a kaya taumada:
16 “‘Qo na veiyalayalati au na veiyalayalati kina kei ira ni oti na siga ya,’ e kaya o Jiova.* ‘Au na tugana na noqu lawa e lomadra, au na vola tale ga ena nodra vakasama.’”+
17 E qai kaya e muri: “Au na sega ni nanuma tale na nodra ivalavala ca kei na nodra talaidredre.”+
18 Ia ni sa vosoti qori, sa na sega ni gadrevi na isoro ni ivalavala ca.
19 O koya gona raveitacini, me vaka nida doudou* meda curu ina loqi tabu+ ena vuku ni dra i Jisu,
20 ni dolava vei keda na sala vou e basika ina bula ni a lakosivia na ilati,+ ya na lewena,
21 ni dua ga na noda bete cecere e lewa na vale ni Kalou,+
22 meda torova gona na Kalou ena lomada dina kei na vakabauta e dei, ni sa kureitaki na lomada me vakasavasavataki mai na lewaeloma e ca+ qai vakasilimi na yagoda ena wai savasava.+
23 Meda gumatua tiko ga ni tukuna yani na noda inuinui, meda kua ni yavalati,+ ni dau dina o koya e yalataka.
24 Meda dau veinanumi nida veivakauqeti ena loloma kei na caka vinaka,+
25 meda kua ni biuta na noda soqoni vata+ me vaka e nodra ivalavala eso, ia meda veivakayaloqaqataki,+ io me vakalevu nida raica ni sa voleka mai na siga.+
26 Ke da nakita gona meda valavala ca nida sa kila na ivakavuvuli dina,+ sa na sega tale ni dua na isoro me cabori ena vuku ni noda ivalavala ca,+
27 eda sa na waraka ga ena rere na veilewai kei na cudru katakata me vakarusai ira na saqata na Kalou.+
28 Ena vakamatei o koya e beca na Lawa e vola o Mosese, ena sega ni lomani ke rua se tolu na kena ivakadinadina.+
29 Me vakacava na bibi ni itotogi oni nanuma me tau vei koya e butuka na Luve ni Kalou, e vakawaletaka tale ga na yaga ni dra ni veiyalayalati+ a vakasavasavataki kina, o koya e vakacudruya, e beca tale ga na yalo ni Kalou e salavata kei na nona loloma soli wale?+
30 Eda kila ni a kaya na Kalou: “E noqu na veisausaumi, au na sauma” e kaya tale: “Ena lewai ira na nona tamata o Jiova.”*+
31 E rerevaki sara ga meda lutu ena liga ni Kalou bula.
32 Ia moni dau nanuma na veisiga sa oti oni a vakararamataki kina,+ oni vosota e levu na rarawa ena ka dredre oni sotava,
33 so na gauna oni vakalialiai e matanalevu, oni vakamaduataki me vaka ga oni tiko ena valenisarasara, so tale na gauna oni wili vata kei ira era sotava tiko na ka kece qori.
34 Ni oni nanumi ira na tiko e valeniveivesu, oni lomavakacegu ga ni kovei na nomuni iyau,+ ni oni kila ni tiko na nomuni ivotavota e vinaka cake qai tawamudu.+
35 O koya gona, ni kua ni soro, ni vosa tiko ga ena doudou ni levu sara na kena isau.+
36 Ni yaga me tiko vei kemuni na vosota,+ moni cakava rawa kina na loma ni Kalou, ena qai nomuni na ka e yalataki.
37 Ena “dua na gauna lekaleka,”+ “ena qai yaco mai o koya e lako tiko mai, ena sega ni berabera.”+
38 “Ia ena bula na noqu tamata yalododonu ena vuku ni nona vakabauta,”+ “ke suka tale, au sa na sega ni taleitaki koya.”+
39 Ia o keda eda sega ni suka tale ina rusa,+ eda vakabauta ga meda vakabulai kina.
