Salmo 72:1-20
Kona-ba Salomão.
72 Oh Maromak, hanorin liurai kona-ba Ita-nia desizaun sira,No haraik Ita-nia hahalok loos ba liurai nia oan-mane.+
2 Haʼu harohan katak nia sei defende Ita-nia povu nia kazu ho hahalok loos,No defende ema kiʼik nia kazu ho justisa.+
3 Haʼu harohan katak foho sira lori dame ba povu,No katak foho-oan sira lori hahalok loos.
4 Haʼu harohan katak nia sei defende* ema kiʼik sira iha povu nia leet,No salva ema kiak nia oan sira,No mós harahun sira neʼebé hamatak ema.+
5 Sira sei hamtaʼuk Ita durante loro-matan sei iha helaNo durante fulan sei iha hela,Husi jerasaun ba jerasaun.+
6 Nia sei sai hanesan udan neʼebé tun ba duʼut neʼebé foin tesi,Hanesan udan-been neʼebé habokon rai.+
7 Iha ninia tempu, ema laran-loos sei buras,+No dame sei sai barak+ toʼo fulan la iha tan.*
8 Nia sei ukun* husi tasi ida toʼo tasi selukNo husi Mota* toʼo rai hotu iha mundu tomak.+
9 Sira neʼebé hela iha rai-fuik maran sei hakruʼuk iha ninia oin,No ninia inimigu sira sei lambe rai-rahun.+
10 Liurai sira husi Tarsis no husi illa sira sei selu impostu+
No liurai sira husi Sabá no Sebá sei fó prezente ba nia.+
11 Liurai hotu sei hakruʼuk iha ninia oin,No nasaun hotu sei serbí nia.
12 Tanba nia sei salva ema kiak neʼebé halerik atu husu ajuda,No nia sei salva ema kiʼik no mós sira hotu neʼebé la iha ema atu ajuda sira.
13 Nia sei hanoin ema kiʼik no ema kiak,No nia sei salva ema kiak nia moris.
14 Nia sei salva* sira husi ema neʼebé hanehan sira no husi violénsia,No sira-nia raan sei sai nuʼudar buat folin-boot tuir ninia haree.
15 Haʼu harohan katak nia bele moris no simu osan-mean husi Sabá.+
No katak ema halo orasaun beibeik kona-ba niaNo hahiʼi nia durante loron tomak.
16 Sei iha ai-han barak iha rai;+Foho-tutun sira sei nakonu ho ai-han.
Liurai nia toʼos sei fó rezultadu barak hanesan iha Líbanu,+No povu iha sidade sira sei buras hanesan ai-horis sira iha rai.+
17 Haʼu harohan katak liurai nia naran sei iha ba nafatin,+No katak ninia naran sai boot liután durante loro-matan sei iha hela.
Haʼu harohan katak povu sira sei hetan bensaun liuhusi nia,+No nasaun hotu fó sai katak nia kontente.
18 Haʼu harohan katak Maromak Jeová, Izraél nia Maromak, sei simu hahiʼi,+Nia mesak deʼit mak halo buat kmanek sira.+
19 Haʼu harohan katak ninia naran neʼebé kmanek sei simu hahiʼi ba nafatin,+No katak ninia glória sai nakonu iha mundu tomak.+
Amen no Amen.
20 Jessé nia oan-mane David nia orasaun sira remata iha neʼe.+
Nota-rodapé
^ Orj., “tesi-lia ba”.
^ Ka “sai barak ba nafatin”.
^ Ka “sei iha povu”.
^ Neʼe katak Mota Eufrates.
^ Ka “sosa fali”.
