LIA-MENON

Bíblia Sagrada mak Maromak nia liafuan neʼebé hakerek ba ita hotu. Ita presiza estuda Bíblia atu hatene didiʼak Bíblia nia Autór. (João 17:3; 2 Timóteo 3:16) Iha Bíblia laran, Maromak Jeová fó sai ninia hakarak ba ita ema no kona-ba mundu neʼe.​—Génesis 3:15; Apokalipse 21:3, 4.

La iha livru seluk mak iha kbiit atu ajuda ema nia moris hanesan Bíblia. Bíblia bele ajuda ita atu halo tuir Jeová nia hahalok furak hanesan domin, laran-sadiʼa no laran-diʼak. Bíblia fó esperansa kapás, no esperansa neʼe ajuda ita tahan hasoru susar no terus neʼebé boot. Bíblia mós fó sai hahalok no hanoin husi mundu aat neʼe, neʼebé la tuir Maromak nia hakarak neʼebé perfeitu.—Salmo 119:105; Ebreu 4:12; 1 João 2:15-17.

Bíblia orijinál hakerek iha lian Ebraiku, Aramaiku no Gregu. Ohin loron Bíblia tomak no mós Eskritura Lian Gregu tradús ona iha língua 3.000 liu. Tuir loloos, ema tradús no halo Bíblia barak liu fali livru seluk iha mundu tomak. Ita la hakfodak kona-ba neʼe tanba Bíblia rasik dehan: “Ema sei haklaken liafuan diʼak kona-ba Maromak nia Ukun iha mundu tomak nuʼudar sasin ba nasaun hotu, depois neʼe, mundu nia rohan sei mai.” (Mateus 24:14) “Liafuan diʼak kona-ba Maromak nia Ukun” mak mensajen importante iha Bíblia.

Tanba ami rekoñese katak mensajen iha Bíblia laran mak importante tebes, entaun ami-nia objetivu mak atu tradús ho laran-metin hodi tuir liafuan orijinál iha Eskritura Sagrada no uza liafuan neʼebé fasil atu lee no komprende. Apéndise sira ho títulu “Matadalan kona-ba tradús Bíblia”, “Informasaun iha edisaun neʼe”, no “Oinsá mak Bíblia toʼo mai ita” esplika kona-ba matadalan balu neʼebé ami tuir bainhira halo tradusaun neʼe, no esplika mós informasaun iha edisaun neʼe.

Ema sira neʼebé hadomi no adora Maromak Jeová hakarak tebes atu hetan tradusaun Bíblia neʼebé tuir lian orijinál no fasil atu komprende. (1 Timóteo 2:4) Tan neʼe mak ami halo edisaun neʼe iha lian Tetun, hodi tuir ami-nia objetivu atu halo Bíblia Tradusaun Mundu Foun iha língua barak liután. Ami harohan no hein katak tradusaun neʼe sei ajuda duni ita nuʼudar lee-naʼin doben neʼebé hakaʼas an atu “buka Maromak” no “hetan duni nia”.—Apóstolu 17:27.

Komisaun Bíblia Tradusaun Mundu Foun