Vei Ira mai Roma 1:1-32
1 O yau o Paula, na dauveiqaravi i Karisito Jisu, au kacivi meu yapositolo, au lesi* meu tukuna na itukutuku vinaka ni Kalou+
2 a yalataka tu mai ena gusudra na nona parofita me vaka e volai ena iVolatabu.
3 Na itukutuku qo e baleti Luvena, o koya a sucu vakatamata ena kawa i Tevita.+
4 Ia ena kaukaua ni yalo tabu e okati kina me Luve ni Kalou+ yalosavasava ena nona vakaturi mai na mate,+ o Jisu Karisito na noda Turaga.
5 Ena vukuna e soli kina vei keda na loloma soli wale kei na cakacaka vakayapositolo,+ mera vakabauta qai talairawarawa kina vua na lewe ni veimatanitu kece+ ena vuku ni yacana,
6 na veimatanitu tale ga qori oni a kacivi mai kina moni nei Jisu Karisito—
7 vei kemuni kece na tiko e Roma e lomani kemuni na Kalou, oni kacivi tale ga moni yalosavasava:
Me sobuti kemuni mada ga na loloma soli wale kei na vakacegu ni Kalou na Tamada kei na Turaga o Jisu Karisito.
8 Meu tekivu mada ena noqu vakavinavinaka vua na noqu Kalou ena yaca i Jisu Karisito me baleti kemuni kece, ni sa tukuni e vuravura taucoko na nomuni vakabauta.
9 Ni noqu ivakadinadina na Kalou, o koya au dau cabora vua mai vu ni lomaqu na noqu veiqaravi tabu me salavata kei na itukutuku vinaka me baleti Luvena, niu sega ni cegu na cavuti kemuni ena noqu masu.+
10 Au dau kerea meu lako yani vei kemuni ke loma ni Kalou vei au.
11 Au diva meu raici kemuni meu bau vota vei kemuni eso na isolisoli vakayalo moni vakaukauataki kina,
12 se meda veivakayaloqaqataki+ ena vuku ni noda vakabauta, oya na nomuni vakabauta kei na noqu tale ga.
13 Au sega ni vinakata moni lecava raveitacini niu dau saga meu lako yani vei kemuni—ia au tarovi tiko me yacova mai qo—niu vinakata me vua na noqu cakacaka vei kemuni, me vaka vei ira na lewe ni veimatanitu.
14 Niu dinau tu vei ira na kai Kirisi kei ira na vulagi,* vei ira na vuku kei ira na sega ni vuku.
15 Koya gona, e gu na yaloqu meu tukuna tale ga na itukutuku vinaka vei kemuni mai Roma.+
16 Au sega ni maduataka na itukutuku vinaka,+ baleta qo ga na kaukaua e veivakabulai kina na Kalou vei ira kece era vakabauta,+ e liu vei ira na Jiu+ qai tarava vei ira na kai Kirisi.+
17 Na itukutuku vinaka tale ga qo e vakatakilai kina na yalododonu ni Kalou vei ira na vakabauta,+ e mani vaqaqacotaki kina na nodra vakabauta. Me vaka e volai: “Ia ena bula na yalododonu ena vuku ni nona vakabauta.”+
18 Ni sa vakaraitaki mai lomalagi na cudru ni Kalou+ ena nodra veibeci kei na nodra ivalavala dukadukali na tamata era tabonaka tiko vakatawadodonu na ka dina,+
19 nira sa kila na ka kece e rawa ni kilai me baleta na Kalou, ni sa vakatakila vei ira na Kalou.+
20 Tekivu mai na gauna a buli kina na vuravura e kilai na veika tawarairai me baleti koya, ya na nona kaukaua e sega ni vakaiyalayala,+ vaka kina ni o koya dina ga na Kalou,+ e kilai qori ena veika e buli,+ e sega kina na nodra iulubale.
21 Era kila na Kalou, era sega ga ni vakalagilagi koya ena nona itutu vaKalou se vakavinavinakataki koya. Era vakasamataka na ka tawayaga, qai butobuto na lomadra ena levu ni nodra sesewa.+
22 Era kaya nira vuku, ia era lialia,
23 era sega ni vakalagilagia na Kalou e sega ni rusa rawa, era qai vakalagilagia na ivakatakarakara me vaka na tamata e rusa rawarawa, na manumanuvuka, na manumanu yavaiva, kei na manumanu qasi.+
24 Ena vuku gona ni gagadre ni lomadra, e laivi ira kina na Kalou mera vakayacora na ivalavala dukadukali me beci kina na yagodra.
25 Era sosomitaka na dina ni Kalou ena ka lasu, era qarava qai cabora na veiqaravi tabu ina kabuli, sega vua na Dauveibuli, o koya e dodonu me vakacaucautaki me tawamudu. Emeni.
26 Oya na vuna e laivi ira kina na Kalou mera vakaceguya na nodra garogaro vakasisila,+ nira vakatanitaka na nodra yalewa na veiyacovi e dodonu ra qai muria na kena e sega ni dodonu.+
27 O ira tale ga na tagane, era muduka na veiyacovi dodonu kei ira na yalewa qai waqa na nodra veigarovi, na tagane kei na tagane,+ era cakava na ka e vakasisila, ena sauti ira kina na ca ni nodra ivalavala.+
28 Ena nodra sega ni via kila na ka dina me baleta na Kalou, e laivi ira kina na Kalou ena ituvaki dukadukali ni nodra vakasama mera cakava na ka e sega ni vinaka.+
29 Era qai vakasinaiti ena ka kece e sega ni dodonu,+ na ka e torosobu, na kocokoco,+ kei na ka ca, era sinai ena veivuvutaki,+ na laba,+ na veivakaisini, na lawaki,+ na lomaca,+ na vakasolokakana,*
30 na vakaucaca,+ na nona cati na Kalou, na veibeci, na dokadoka, na qaciqacia, na dau vakatubuca, na nodra talaidredre vei ira na itubutubu,+
31 na lecaika,+ na yalayala lasu, sa yali nodra veilomani vakaveiwekani, sa sega na nodra loloma.
32 O ira qo era kila vinaka na lewadodonu ni Kalou—nira na vakamatei o ira kece era cakava tiko na ka va qo+—era sega wale ga ni cakava, ia era tokoni ira tale ga na cakava tiko.
