Marcos 4:1-41
-
TIʼ BAʼAXOʼOB CHÍIKAʼAN LE REINOOʼ (1-34)
-
Le máak ku paakʼaloʼ (1-9)
-
Suuk u comparartik le baʼax ku kaʼansikoʼ (10-12)
-
Ku tsolik u tsikbalil le máak ku paakʼaloʼ (13-20)
-
Lámparaeʼ maʼ tu tsʼaʼabal yáanal xaak (21-23)
-
Jeʼex u pʼiis máakeʼ bey kun pʼisbiloʼ (24, 25)
-
Le kéen wenek le máax ku paakʼaloʼ (26-29)
-
U semillail mostaza (30-32)
-
Ku comparartik le baʼax ku kaʼansikoʼ (33, 34)
-
-
Ku jetsʼik junpʼéel kʼaʼamkach iikʼ (35-41)
4 Jesúseʼ káaj u kaʼansaj tu kaʼatéen tu jáal le kʼáaʼnáaboʼ. Tu yiknaleʼ tu muchʼuba jach yaʼabkach máakoʼob. Letiʼ túuneʼ naʼak kutal tiʼ junpʼéel barcoeʼ ka tu jutsʼuba junpʼíit ichil le jaʼoʼ, tuláakal le yaʼabkach máakoʼoboʼ tiʼ pʼáatoʼob tu jáal le jaʼoʼ.+
2 Ka túun káaj u tsikbaltiktiʼob jujunpʼéel baʼaloʼob+ utiaʼal u kaʼansiktiʼob yaʼab baʼaloʼob, tu yaʼalajtiʼob:+
3 «Uʼuyeʼex lelaʼ: juntúul máakeʼ jóokʼ paakʼal.+
4 Le táan u bin u paakʼaloʼ jujunpʼéel semillaʼobeʼ lúuboʼob teʼ bejoʼ, taal túun le chʼíichʼoʼoboʼ ka tu lukʼoʼob.
5 Uláakʼ semillaʼobeʼ lúuboʼob ich tuunichoʼob, tuʼux maʼ yaʼab luʼum yaniʼ, leloʼobaʼ séeb úuchik u jóokʼloʼob tumen maʼ taam u luʼumiliʼ.+
6 Chéen baʼaleʼ ka jóokʼ le Kʼiinoʼ tóokaʼaboʼobeʼ ka tijoʼob tumen maʼ taamchaj u mootsoʼobiʼ.
7 Uláakʼ semillaʼobeʼ lúuboʼob ich kʼiʼixoʼob, chéen baʼaleʼ nuukchaj le kʼiʼixoʼoboʼ ka tu pechʼoʼob le paakʼaloʼoboʼ, ka tsʼoʼokeʼ maʼ yanchaj u yichoʼobiʼ.+
8 Chéen baʼaleʼ uláakʼ semillaʼobeʼ lúuboʼob yóokʼol maʼalob luʼum, jóokʼoʼob yéetel nuukchajoʼob, ka joʼopʼ u yichankiloʼob, yaneʼ tu tsʼáaj 30 u pʼéelel u yich, uláakʼeʼ 60 yéetel uláakʼeʼ 100».+
9 Jesúseʼ tu yaʼalaj xan lelaʼ: «Le máax yaan u xikineʼ u yuʼub baʼax kin waʼalik».+
10 Le ka bin le yaʼabkach máakoʼoboʼ, le 12 apóstoloʼob yéetel le máaxoʼob pʼáatoʼoboʼ káaj u kʼáatkoʼob tiʼ Jesús baʼax u kʼáat u yaʼal le baʼaxoʼob tu tsikbaltoʼ.*+
11 Letiʼeʼ tu yaʼalajtiʼob: «Tiʼ teʼexeʼ tsʼoʼok u tsʼaʼabal a wojéelteʼex le baʼax taʼakaʼan*+ yaan yil yéetel u Reino Diosoʼ, chéen baʼaleʼ le u maasil máakoʼoboʼ chéen ku yuʼubikoʼob le baʼaxoʼob kin tsikbaltikoʼ.+
12 Bey túunoʼ kex táan u paakatoʼobeʼ maʼ tu yilkoʼob mix baʼal, yéetel kex táan u yuʼubikoʼob baʼax ku yaʼalaʼaleʼ maʼ tu naʼatkoʼob baʼax u kʼáat u yaʼale. Letiʼobeʼ maʼ tu kʼexik u tuukuloʼob utiaʼal ka perdonartaʼakoʼob».+
13 Tsʼoʼoleʼ tu yaʼalajtiʼob: «Wa maʼ kʼuchuk a naʼateʼex le baʼax tsʼoʼok in tsikbaltikteʼexaʼ,* ¿bix túun ken a naʼatileʼex le uláakʼ baʼaxoʼob ken in tsikbaltteʼexoʼ?
14 Le máax ku paakʼaloʼ ku pakʼik u tʼaan Dios.+
15 Le semilla ku paʼakʼal tu jáal le bejoʼ letiʼe máaxoʼob uʼuyik u tʼaan Diosoʼ, chéen baʼaleʼ tu séebaʼanileʼ ku taal Satanáseʼ+ ku jóokpaytik le baʼax paʼakʼ tu puksiʼikʼaloʼoboʼ.+
16 Le semilla paʼakʼ ich tuunichoʼoboʼ letiʼe máaxoʼob ku yuʼubikoʼob u tʼaan Dios yéetel ku kʼamkoʼob yéetel kiʼimak óolaloʼ.+
17 Chéen baʼaleʼ tumen maʼ taamchaj u mootsoʼobeʼ ku pʼáatloʼob junpʼíit kʼiin, pero le kéen yanak problemas tiʼob wa le kéen chʼaʼpachtaʼakoʼob tu yoʼolal u tʼaan Dioseʼ ku tʼóochpajloʼob.
18 Le uláakʼ semillaʼoboʼ paʼakʼoʼob ich kʼiʼixoʼob. Leloʼobaʼ letiʼe máaxoʼob tsʼoʼok u yuʼubikoʼob u tʼaan Diosoʼ,+
19 chéen baʼaleʼ u sen chiʼichnakiloʼob+ le yóokʼol kaabaʼ, u tsʼíiboltaʼal ayikʼalil*+ yéetel u tsʼíiboltaʼal+ le u maasil baʼaloʼoboʼ, ku pechʼikoʼob u tʼaan Dios yéetel maʼ tu chaʼikoʼob u yantal u yich.
20 U tsʼookeʼ le semilla paʼakʼ tiʼ maʼalob luʼumoʼ letiʼe máaxoʼob ku yuʼubikoʼob u tʼaan Diosoʼ, ku kʼamkoʼob maʼalob yéetel ku yichankiloʼob, yaneʼ ku tsʼáaik 30 u pʼéelel u yich, uláakʼeʼ 60 yéetel uláakʼeʼ 100».+
21 Tu yaʼalaj xan tiʼob: «¿Máasaʼ maʼatech u tʼaʼabal junpʼéel lámpara utiaʼal tsʼaabil yáanal junpʼéel xaak wa yáanal junpʼéel cama? Baʼaxeʼ ku tsʼaʼabal kaʼanal, ¿máasaʼ?+
22 Tuláakal baʼax taʼakaʼaneʼ yaan u chíikbesaʼal; tuláakal baʼax jach taʼakaʼan tubeeleʼ yaan u kaxtaʼal.+
23 Le máax yaan u xikineʼ u yuʼub baʼax kin waʼalik».+
24 Tu yaʼalaj xan tiʼob: «Chʼenxikinteʼex tubeel baʼax táan a wuʼuyikeʼex u yaʼalaʼal.+ Jeʼel bix a pʼiiseʼexeʼ bey xan kan pʼisbileʼexoʼ yéetel yaan tak u tsʼaʼabalteʼex u maasil.
25 Tumen le máax yaantiʼeʼ yaan u tsʼaʼabal u maasil tiʼ,+ chéen baʼaleʼ le máax minaʼantiʼeʼ tak le bukaʼaj yaantiʼoʼ yaan u luʼsaʼaltiʼ».+
26 Tu yaʼalaj xan tiʼob: «U Reino Dioseʼ bey jeʼex juntúul máak ku kʼíitchʼintik semillaʼob yóokʼol le luʼumoʼ.
27 Kéen áakʼabchajkeʼ le máakoʼ ku bin wenel yéetel kéen sáaschajkeʼ ku líikʼil, le semillaʼob túunoʼ ku jóokʼloʼob yéetel ku sen nojochtaloʼob, ¿bix u yúuchul leloʼ?, le máakoʼ maʼ u yojliʼ.
28 Le paakʼaloʼ jujunpʼíitil u nojochtal teʼ luʼumoʼ: yáaxeʼ ku yantal u leʼ, tsʼoʼoleʼ ku yantal u yiʼij, tu tsʼookeʼ u yiʼijeʼ ku chuʼupul yéetel u yich.
29 Chéen baʼaleʼ chéen pʼelak u kʼantal u yicheʼ le máakoʼ ku máansik lóobcheʼiʼ tumen tsʼoʼok u kʼuchul u kʼiinil le cosechaoʼ».
30 Tu yaʼalaj xan tiʼob: «¿Tiʼ baʼax chíikaʼan u Reino Dios? ¿Wa baʼax yéetel jeʼel in comparartik utiaʼal in tsolikteʼexeʼ?
31 Le Reinooʼ bey jeʼex junpʼéel u semillail mostazaeʼ. Le ka paʼakʼ teʼ luʼumoʼ letiʼ u maas chichnil tiʼ tuláakal le semillaʼob yaan way luʼumeʼ.+
32 Chéen baʼaleʼ kéen tsʼoʼokok u paʼakʼaleʼ ku jóokʼol yéetel ku maas nojochtal tiʼ tuláakal le janalbeʼen xíiwoʼoboʼ, yéetel ku nuuktal u kʼaboʼob, le oʼolaleʼ le chʼíichʼoʼob ku xikʼnaloʼoboʼ ku páajtal u kajtaloʼob yáanal u boʼoy».
33 Jesúseʼ tu kaʼansajtiʼob u tʼaan Dios yéetel yaʼabkach tsikbaloʼob+ jeʼex leloʼobaʼ, tu kaʼansajtiʼob tak le bukaʼaj ku páajtal u naʼatkoʼobeʼ.
34 U jaajileʼ tuláakal baʼax ku kaʼansiktiʼobeʼ ku comparartik yéetel wa baʼax, chéen baʼaleʼ kéen pʼáatkoʼob kaʼach tu juunaloʼobeʼ ku tsolik tiʼ u discípuloʼob tuláakal.+
35 Le ka áakʼabchaj teʼ kʼiin jeʼeloʼ Jesúseʼ tu yaʼalajtiʼob: «Koʼoneʼex tuláakʼ u tséel le jaʼoʼ».+
36 Le discípuloʼob túunoʼ tu yaʼaloʼob tiʼ le yaʼabkach máakoʼob jeʼel u páajtal u binoʼoboʼ, ka tsʼoʼokeʼ binoʼob yéetel Jesús teʼ barcooʼ. Yaan xan uláakʼ barcoʼob binoʼob tu yéeteloʼobiʼ.+
37 Le táan u binoʼoboʼ káaj junpʼéel sen kʼaʼamkach iikʼ, le jaʼ túunoʼ joʼopʼ u yokol ichil le barcooʼ, jach taʼaytak kaʼach u búulul.+
38 Chéen baʼaleʼ Jesúseʼ tiʼ ku wenel kaʼach teʼ paachiloʼ, u tʼalkúuntmaj u pool yóokʼol le kʼáanjoʼoloʼ. Letiʼob túuneʼ tu yajsoʼobeʼ ka tu yaʼaloʼobtiʼ: «J-Kaʼansaj, ¿maʼ wa ta wilik táan k-búulul?».
39 Líikʼ túun Jesúseʼ ka tu kʼeyaj le iikʼoʼ yéetel tu yaʼalaj tiʼ le kʼáaʼnáaboʼ: «¡Mak a chiʼ! ¡Jetsʼkúuntaba!».+ Le iikʼ túunoʼ chʼéeni, ka pʼáat jach jejetsʼkil tuláakal.
40 Jesúseʼ tu yaʼalajtiʼob: «¿Baʼaxten jach saajkeʼex? ¿Láayliʼ wa minaʼan a fejeʼexeʼ?».
41 Chéen baʼaleʼ letiʼobeʼ jach táaj sajakchajoʼobeʼ ka joʼopʼ u yaʼalikoʼob tu baatsiloʼob: «¿Jach máax le máakaʼ? Tumen tak le iikʼ yéetel le kʼáaʼnáab uʼuyik u tʼaanoʼ».+
Notas
^ Wa «le kettʼaanoʼoboʼ».
^ Wa «le baʼax santo taʼakaʼan».
^ Wa «kettʼaanaʼ».
^ Wa «u tuʼusul máak tumen le ayikʼaliloʼ».
