1 Pedro 5:1-14
5 In wéet ancianoileʼex, teneʼ tin wilaj le muʼyajiloʼob tu máansaj Cristooʼ yéetel yaan xan in kʼamik le kiʼichkelmil kun tsʼaabil tiʼ le máaxoʼob yéeyaʼanoʼoboʼ.+ Teneʼ kin kʼubéentik tiʼ le ancianoʼoboʼ:
2 kanáanteʼex le u tamanoʼob Dios+ u kʼubéentmajteʼexoʼ, kanáanteʼex le múuchʼuliloʼ. Chéen baʼaleʼ maʼ a beetkeʼex bey táan a obligartaʼaleʼexeʼ, baʼaxeʼ beeteʼex yéetel kiʼimak óolal.+ Maʼ a beetkeʼex xan tumen a kʼáat a náajalteʼex taakʼin chéen beyoʼ,+ baʼaxeʼ tsʼáa a wóoleʼex meyaj.
3 Mix xan a beetkeʼex utiaʼal a taaskabaʼex nojbaʼalil tu yóokʼol le máaxoʼob u tiaʼaloʼob Diosoʼ,+ baʼaxeʼ eʼeseʼex maʼalob bej tiʼ le tamanoʼoboʼ.+
4 Le kéen chíikbesaʼak túun le maas nojoch j-kanan tamanoʼ+ teʼexeʼ yaan a kʼamkeʼex le kiʼichkelem corona maʼatech u kʼastaloʼ.+
5 Táankelmeʼex, teʼex xaneʼ tsʼáabaʼex yáanal u páajtalil le máaxoʼob maas yaan u jaʼabiloʼoboʼ.*+ Chéen baʼaleʼ cada juntúul tiʼ teʼexeʼ unaj u yeʼesik kabal óolal,* tumen Dioseʼ tiaʼan tu contra le máaxoʼob kaʼanal u yichoʼoboʼ, chéen baʼaleʼ ku yeʼesik u nojoch utsil tiʼ le máaxoʼob kabal u yóoloʼoboʼ.+
6 Le oʼolaleʼ tsʼáabaʼex yáanal u páajtalil u kʼab Dios, utiaʼal ka u nojbaʼalkúunteʼex kéen kʼuchuk u kʼiinil.+
7 Mientras u yúuchul leloʼ pʼateʼex tu kʼab Dios tuláakal le kuuch* chiʼichnakkúuntikeʼexoʼ,+ tumen letiʼeʼ jach taak u yáantkeʼex.+
8 Ilawileʼex maʼ u náayal a wóoleʼex yéetel pʼil a wicheʼex.+ A enemigoʼex le Kʼaasilbaʼaloʼ* táan u máan ta baʼpacheʼex jeʼex juntúul león ku yáakam táan u kaxtik máax u táatsʼlukʼteʼ.+
9 Chéen baʼaleʼ tsʼáabaʼex tu contra+ yéetel muʼukʼaʼanchajak a fejeʼex, tumen a wojleʼexeʼ le baʼax ka muʼyajtikeʼexoʼ láayliʼ letiʼe baʼax ku muʼyajtik tuláakal k-sukuʼunoʼob yanoʼob tuláakal yóokʼol kaaboʼ.+
10 Le kéen tsʼoʼokok a muʼyajeʼex ichil junpʼíit kʼiineʼ, le Dios ku yeʼesik nojoch utsiloʼ, le máax tʼanoʼon tu yoʼolal Cristo utiaʼal ka yanaktoʼon le nojoch páajtalil minaʼan xuʼulultiʼoʼ,+ letiʼ kun kaʼanskeʼex yéetel letiʼ kun beetik a noʼojaʼantaleʼex tubeel. Dioseʼ yaan u beetik a muʼukʼaʼantaleʼex,+ yaan u tsʼáaik a muukʼeʼex+ yéetel yaan u beetik a waʼataleʼex tubeel.
11 Tiʼ letiʼ ka yanak tuláakal páajtalil utiaʼal mantatsʼ. Ka béeyak.*
12 Tu yoʼolal Silvano,*+ juntúul máax jach chúukaʼan u yóol u meyajt Dioseʼ, tsʼoʼok u páajtal in tsʼíibtik tiʼ teʼex le junpʼíit tʼaanoʼobaʼ. Tin tsʼíibtoʼob utiaʼal in líiʼsik a wóoleʼex bey xan utiaʼal in waʼalikteʼexeʼ le nojoch utsil tsʼoʼok a kʼamkeʼexoʼ jach tu jaajil tiʼ Dios u taal. Machabaʼex tubeel tiʼ le nojoch utsilaʼ.
13 Le koʼolel* yaan Babilonia yéeyaʼan jeʼex teʼexoʼ ku túuxtikteʼex saludos bey xan in hijo Marcos.+
14 Saludartabaʼex ta baatsileʼex yéetel junpʼéel tsʼuʼutsʼ, eʼeseʼex a yaabiltmabaʼex.
Teʼex junmúuchʼ yanileʼex yéetel Cristoeʼ ka yanak jeetsʼelil ichileʼex.
Notas
^ Wa «le ancianoʼoboʼ».
^ Wa «u búukbeskuba yéetel kabal óolal».
^ Wa «le problemas».
^ Ich griegoeʼ ku yaʼalaʼal kaʼach «Diablo». Ilawil «Kʼaasilbaʼal», página 2568.
^ Wa «Amén».
^ Wa «Silas».
^ Teʼelaʼ táan u yúuchul tʼaan tiʼ le múuchʼulil yaan Babilonia ku keʼetel yéetel juntúul koʼoleloʼ.
