សំណួរពីយុវវ័យ
ហេតុអ្វីចាំបាច់ចូលរួមកិច្ចប្រជុំនៅឯសាលប្រជុំ?
រៀងរាល់សប្ដាហ៍ សាក្សីព្រះយេហូវ៉ាមានកិច្ចប្រជុំពីរដងនៅឯកន្លែងដែលពួកគេគោរពប្រណិប័តន៍ព្រះ ហៅថាសាលប្រជុំ។ តើពួកគេធ្វើអ្វីនៅទីនោះ ហើយតើប្អូនអាចទទួលប្រយោជន៍យ៉ាងណាពីការចូលរួមកិច្ចប្រជុំ?
តើមានកម្មវិធីអ្វីខ្លះនៅសាលប្រជុំ?
សាលប្រជុំជាមជ្ឈមណ្ឌលសម្រាប់សិក្សា ដែលផ្ដោតសំខាន់ទៅលើការអប់រំពីគម្ពីរ។ កិច្ចប្រជុំនៅទីនោះអាចជួយប្អូន:
ឲ្យរៀនសេចក្ដីពិតអំពីព្រះ
ឲ្យយល់អំពីអត្ថន័យនៃព្រឹត្តិការណ៍ផ្សេងៗដែលកើតឡើងនៅសព្វថ្ងៃ
ឲ្យទៅជាមនុស្សប្រសើរជាង
ឲ្យរកបានមិត្តភក្តិល្អ
តើប្អូនដឹងទេ? កន្លែងប្រជុំរបស់សាក្សីព្រះយេហូវ៉ាបានត្រូវហៅថាសាលប្រជុំ ដោយសារនៅទីនោះច្រើនតែមានការពិគ្រោះ ឬការពិភាក្សាអំពីរាជាណាចក្ររបស់ព្រះ។—ម៉ាថាយ ៦:៩, ១០; ២៤:១៤; លូកា ៤:៤៣
ហេតុអ្វីប្អូនគួរចូលរួម?
ព័ត៌មាននៅឯកិច្ចប្រជុំនឹងជួយប្អូន។ ការពិគ្រោះអំពីគោលការណ៍គម្ពីរនៅឯកិច្ចប្រជុំរបស់សាក្សីព្រះយេហូវ៉ានឹងជួយប្អូន«ឲ្យបានប្រាជ្ញា»។ (សុភាសិត ៤:៥) នេះមានន័យថាគម្ពីរបរិសុទ្ធពិតជាអាចជួយប្អូនឲ្យធ្វើការសម្រេចចិត្តល្អក្នុងជីវិត ហើយក៏អាចជួយប្អូនឲ្យរកឃើញចម្លើយចំពោះសំណួរសំខាន់ៗដូចជា៖
ជាឧទាហរណ៍ មានការថ្លែងសុន្ទរកថាខ្លះនៅឯកិច្ចប្រជុំចុងសប្ដាហ៍របស់យើង ដែលមានចំណងជើងដូចជា៖
ហេតុអ្វីត្រូវឲ្យគម្ពីរដឹកនាំផ្លូវ?
តើយើងអាចរកជំនួយនៅឯណាពេលមានទុក្ខលំបាក?
តើរាជាណាចក្ររបស់ព្រះកំពុងធ្វើអ្វីខ្លះសម្រាប់យើងនៅសព្វថ្ងៃនេះ?
ប្អូនស្រីប៊្រេនដារៀបរាប់ថា៖«សិស្សរួមថ្នាក់ខ្ញុំម្នាក់បានមកចូលរួមកិច្ចប្រជុំ។ គាត់អង្គុយជាមួយនឹងក្រុមគ្រួសារយើង ហើយយើងបានឲ្យគាត់មើលសៀវភៅជាមួយគ្នា។ ក្រោយចប់កិច្ចប្រជុំ គាត់បានប្រាប់ខ្ញុំថា គាត់ពិតជាចាប់អារម្មណ៍យ៉ាងខ្លាំងចំពោះចម្លើយរបស់អ្នកដែលចូលរួមឆ្លើយនៅកិច្ចប្រជុំ។ គាត់ក៏បាននិយាយដែរថា នៅវិហាររបស់គាត់មិនមានសៀវភៅសិក្សាដូចពួកយើងទេ»។
តើប្អូនដឹងទេ? ការចូលរួមកិច្ចប្រជុំនៅឯសាលប្រជុំគឺឥតគិតថ្លៃ ហើយគ្មានការរៃអង្គាសប្រាក់ទេ។
ការសេពគប់សំណេះសំណាលគ្នានឹងលើកទឹកចិត្តប្អូន។ គម្ពីរប្រាប់មូលហេតុមួយដែលគ្រិស្តសាសនិកគួរប្រជុំគ្នា គឺដើម្បី«លើកទឹកចិត្តគ្នាទៅវិញទៅមក»។ (ហេប្រឺ ១០:២៤, ២៥) ការសេពគប់ល្អជាមួយអស់អ្នកដែលស្រឡាញ់ព្រះ និងដែលចាត់ទុកអ្នកឯទៀតថាសំខាន់ជាងខ្លួន នោះធ្វើឲ្យមានកម្លាំងចិត្តនិងមានអារម្មណ៍ស្រស់ស្រាយក្នុងពិភពលោកដែលគិតតែពីប្រយោជន៍ផ្ទាល់ខ្លួន។
ប្អូនស្រីអេលីហ្សារៀបរាប់ថា៖«បន្ទាប់ពីរវល់ពេញមួយថ្ងៃ ខ្ញុំហត់នឿយនិងអស់កម្លាំងណាស់ តែមនុស្សនៅសាលប្រជុំតែងធ្វើឲ្យខ្ញុំមានអារម្មណ៍ធូរស្រាល។ នៅតាមផ្លូវត្រឡប់មកផ្ទះវិញ ខ្ញុំមានអារម្មណ៍សប្បាយចិត្ត ហើយអាចត្រៀមខ្លួនសម្រាប់ថ្ងៃស្អែកបាន»។
តើប្អូនដឹងទេ? សាក្សីព្រះយេហូវ៉ានៅទូទាំងពិភពលោក មានក្រុមជំនុំជាង១២០.០០០ ហើយមានកិច្ចប្រជុំនៅជាង៦០.០០០កន្លែង។ រៀងរាល់ឆ្នាំ ជាមធ្យមសាលប្រជុំប្រហែល១.៥០០បានត្រូវសាងសង់ឡើង ដោយសារអ្នកចូលរួមកិច្ចប្រជុំមានចំនួនកាន់តែច្រើន។ a
a ដើម្បីស្គាល់កន្លែងកិច្ចប្រជុំ សូមចូលទៅកាន់ទំព័រ«កិច្ចប្រជុំក្រុមជំនុំរបស់សាក្សីព្រះយេហូវ៉ា» រួចចុចពាក្យ«រកទីតាំងនៅតំបន់លោកអ្នក»។