សំណួរពីយុវវ័យ
តើគម្ពីរអាចជួយខ្ញុំយ៉ាងដូចម្ដេច? ភាគទី២: ធ្វើឲ្យការអានគម្ពីរជាអ្វីដែលសប្បាយរីករាយ
ប្អូនប្រុសវ័យជំទង់ម្នាក់ឈ្មោះវីលរៀបរាប់ថា៖«ការអានគម្ពីរអាចជាអ្វីដែលគួរឲ្យធុញ បើអ្នកមិនដឹងរបៀបអានត្រឹមត្រូវ»។
តើប្អូនចង់ដឹងអំពីវិធីពិសេសដែលធ្វើឲ្យការអានគម្ពីរជាអ្វីដែលសប្បាយរីករាយឬទេ? អត្ថបទនេះនឹងជួយប្អូន។
ធ្វើឲ្យបទគម្ពីររស់រវើក
សូមជក់ចិត្តនឹងអ្វីដែលប្អូនអាន។ ប្អូនអាចធ្វើតាមយោបល់នេះ៖
១. ជ្រើសរើសកំណត់ហេតុគម្ពីរមួយដែលប្អូនចង់សិក្សា។ ប្អូនអាចជ្រើសរើសព្រឹត្តិការណ៍មួយពីសៀវភៅដំណឹងល្អ ឬប្អូនអាចជ្រើសរើសកំណត់ហេតុមួយពីអំណានគម្ពីរបែបល្ខោននិយាយ ដែលមាននៅក្នុងjw.org/km។
២. អានកំណត់ហេតុដែលប្អូនបានជ្រើសរើស។ ប្អូនអាចអានដោយខ្លួនឯង ឬអានឮៗជាមួយនឹងមិត្តភក្តិឬក្រុមគ្រួសារ។ ប្អូនអាចជ្រើសរើសអ្នកណាម្នាក់ឲ្យធ្វើជាអ្នកពោល ហើយឲ្យអ្នកឯទៀតដើរតួផ្សេងៗ។
៣. សាកធ្វើតាមយោបល់ដូចតទៅនេះ៖
គូររូបអំពីព្រឹត្តិការណ៍ដែលប្អូនអាន ឬគូររូបតាមលំដាប់ព្រឹត្តិការណ៍ដែលបានកើតឡើង។ សូមប្រើកំណត់ខ្លីៗដើម្បីពណ៌នាអំពីអ្វីដែលកំពុងកើតឡើងក្នុងឈុតនីមួយៗ។
គូរតារាង។ ជាឧទាហរណ៍ ពេលប្អូនអានអំពីបុគ្គលស្មោះត្រង់ណាម្នាក់ សូមគូរភ្ជាប់គុណសម្បត្តិរបស់គាត់ជាមួយនឹងអ្វីដែលគាត់បានធ្វើ ព្រមទាំងពរដែលគាត់បានទទួល។
ធ្វើឲ្យកំណត់ហេតុទៅជារឿងថ្មី។ សូមនិយាយព្រឹត្តិការណ៍នោះតាមទស្សនៈផ្សេងៗ ហើយរួមបញ្ចូល«បទសម្ភាសន៍»ជាមួយនឹងតួសំខាន់ៗ និងអស់អ្នកដែលមានវត្តមាននៅក្នុងហេតុការណ៍នោះ។
បើតួអង្គមួយក្នុងកំណត់ហេតុបានសម្រេចចិត្តមិនត្រឹមត្រូវ សូមស្រមៃគិតអំពីលទ្ធផលផ្សេងទៀត។ ជាឧទាហរណ៍ ពេលពេត្រុសបដិសេធមិនទទួលស្គាល់លោកយេស៊ូ។ (ម៉ាកុស ១៤:៦៦-៧២) តើពេត្រុសអាចប្រព្រឹត្តប្រសើរជាងយ៉ាងណាក្នុងស្ថានភាពនោះ?
បើប្អូនមានគំនិតច្នៃប្រឌិត សូមសរសេរសាច់រឿងដោយផ្អែកលើកំណត់ហេតុក្នុងគម្ពីរ។ សូមរួមបញ្ចូលមេរៀនដែលប្អូនអាចរៀនពីកំណត់ហេតុនោះផងដែរ។—រ៉ូម ១៥:៤
ប្អូនអាចធ្វើឲ្យកំណត់ហេតុគម្ពីរហាក់ដូចជាកំពុងកើតឡើងនៅជុំវិញប្អូន!
វិភាគ!
បើប្អូនវិភាគយ៉ាងល្អិតល្អន់ ប្អូនអាចរកឃើញចំណេះដ៏មានតម្លៃក្នុងកំណត់ហេតុ។ ជួនកាល ការគិតពាក្យមួយឬពីរក្នុងកំណត់ហេតុគម្ពីរក៏សំខាន់ដែរ។
ជាឧទាហរណ៍ សូមប្រៀបធៀបម៉ាថាយ ២៨:៧ ជាមួយនឹងម៉ាកុស ១៦:៧។
ហេតុអ្វីម៉ាកុសសរសេរយ៉ាងជាក់លាក់ថាលោកយេស៊ូនឹងលេចមកជួបពួកអ្នកកាន់តាម«និងពេត្រុស»?
តម្រុយ: ម៉ាកុសមិនបានឃើញព្រឹត្តិការណ៍ទាំងនោះដោយផ្ទាល់ភ្នែកទេ។ គាត់ទំនងជាទទួលព័ត៌មានពីពេត្រុស។
ចំណេះវិសេស: ហេតុអ្វីពេត្រុសទទួលកម្លាំងចិត្តឡើងវិញ ពេលឮថាលោកយេស៊ូចង់ជួបគាត់ម្ដងទៀត? (ម៉ាកុស ១៤:៦៦-៧២) តើតាមរបៀបណាលោកយេស៊ូបង្ហាញថាលោកជាមិត្តពិតរបស់ពេត្រុស? តើប្អូនអាចយកតម្រាប់លោកយេស៊ូដោយធ្វើជាមិត្តពិតរបស់អ្នកឯទៀតយ៉ាងដូចម្ដេច?
ពេលប្អូនធ្វើឲ្យបទគម្ពីររស់រវើកនិងវិភាគយ៉ាងល្អិតល្អន់ នោះប្អូននឹងកាន់តែសប្បាយរីករាយក្នុងការអានគម្ពីរ!
លោកអ្នកក៏ប្រហែលជាចូលចិត្តដែរ
សំណួរពីយុវវ័យ
តើគម្ពីរអាចជួយខ្ញុំយ៉ាងដូចម្ដេច? ភាគទី១: សិក្សាគម្ពីរ
បើប្អូនបានប្រទះឃើញប្រអប់កំណប់ទ្រព្យដ៏ធំមួយពីបុរាណ តើប្អូនមិនចង់បើកមើលអ្វីដែលមាននៅក្នុងនោះទេឬ? គម្ពីរប្រៀបដូចជាប្រអប់កំណប់ទ្រព្យនោះ។ គម្ពីរមានប្រាជ្ញាដ៏មានតម្លៃជាច្រើន។
សំណួរពីយុវវ័យ
តើគម្ពីរអាចជួយខ្ញុំយ៉ាងដូចម្ដេច? ភាគទី៣: ចូរទាញប្រយោជន៍ឲ្យបានច្រើនបំផុតពីការអានគម្ពីរ
យោបល់បួនយ៉ាងដែលអាចជួយប្អូនឲ្យទទួលប្រយោជន៍ច្រើនបំផុតពីការអានគម្ពីរ។
ក្មេងជំទង់និងយុវវ័យ
លំហាត់សិក្សាគម្ពីរ
ឯកសារលំហាត់ទាំងនេះបានត្រូវរៀបចំឡើងដើម្បីជួយយុវវ័យឲ្យស្រួលស្រមៃគិតអំពីកំណត់ហេតុក្នុងគម្ពីរ។
