សំណួរពីយុវវ័យ
ការស្វែងយល់ចិត្តគ្នា ភាគទី២: តើខ្ញុំគួរដឹងអ្វីខ្លះអំឡុងពេលស្វែងយល់ចិត្តគ្នា?
អ្នកចាប់អារម្មណ៍បុគ្គលម្នាក់ដែលអ្នកបានជួប ហើយទាំងពីរនាក់សម្រេចចិត្តទាក់ទងគ្នាដើម្បីមើលថា តើទាំងពីរនាក់ស៊ីគ្នាឬអត់។ ដូច្នេះ ពេលដែលទំនាក់ទំនងនោះជឿនទៅមុខ តើមានអ្វីខ្លះដែលអ្នកគួរដឹង?
ក្នុងអត្ថបទនេះ យើងនឹងពិចារណា៖
ត្រូវដឹងថាអ្នកទាំងពីរគួរនិយាយគ្នាដោយឥតលាក់លៀម
ពេលអ្នកនិងគាត់ចំណាយពេលជាមួយគ្នាកាន់តែច្រើន នោះអ្នកទាំងពីរនឹងស្គាល់គ្នាកាន់តែច្បាស់ ហើយអ្នកនឹងស្គាល់គាត់ថែមទៀត ដោយសង្កេតមើលការប្រព្រឹត្តរបស់គាត់។
ប៉ុន្តែ មានអ្វីមួយចំនួនដែលអ្នកទាំងពីរគួរនិយាយគ្នាដោយឥតលាក់លៀម។ ពេលអ្នកធ្វើដូច្នេះ សូមសម្រេចចិត្តដោយផ្អែកទៅលើស្ថានភាពជាក់ស្ដែងមិនមែនផ្អែកទៅលើអារម្មណ៍របស់អ្នកទេ។
អ្នកទាំងពីរគួរពិភាក្សាគ្នាអំពីរឿងដូចជា៖
លុយកាក់។ តើអ្នកកំពុងជាប់បំណុលទេ? តើពេលខ្លះអ្នកពិបាកទប់ចិត្តក្នុងការចំណាយទេ? បើអ្នកទាំងពីររៀបការ តើអ្នកទាំងពីរនឹងសម្រេចចិត្តយ៉ាងណាចំពោះប្រាក់ចំណូលនិងប្រាក់ចំណាយ?
សុខភាព។ តើអ្នកមានសុខភាពល្អទេ? តើអ្នកធ្លាប់មានបញ្ហាសុខភាពធ្ងន់ធ្ងរទេ?
គោលដៅ។ តើអ្នកចង់សម្រេចគោលដៅអ្វីខ្លះ? តើអ្នកទាំងពីរមានគោលដៅស្រដៀងគ្នាទេ? ក្រោយពីរៀបការ បើមានស្ថានភាពផ្លាស់ប្ដូរដែលធ្វើឲ្យអ្នកពិបាកសម្រេចគោលដៅផ្សេងៗ តើអ្នកនៅតែសប្បាយទេ?
ក្រុមគ្រួសារ។ សព្វថ្ងៃ តើអ្នកមានភារកិច្ចមើលថែសមាជិកក្រុមគ្រួសារណាម្នាក់ទេ? តើអ្នកគិតថាអ្នកនឹងមានភារកិច្ចនេះនៅថ្ងៃអនាគតទេ? តើអ្នកចង់បានកូនទេ? បើចង់មែន ចង់បានប៉ុន្មាននាក់?
ពេលពិចារណារឿងទាំងនោះ សូមនិយាយគ្នាដោយស្មោះត្រង់និងឥតលាក់លៀម។ សូមកុំបិទបាំងឬបំផ្លើសការពិតដើម្បីឲ្យខ្លួនមើលទៅអស្ចារ្យនោះឡើយ។—ហេប្រឺ ១៣:១៨
សូមគិតអំពីនេះ៖ តើអ្នកគួរដឹងអ្វីខ្លះអំពីបុគ្គលដែលអ្នកកំពុងស្វែងយល់ចិត្តគ្នា? តើគាត់គួរដឹងអ្វីខ្លះអំពីអ្នក? តើអ្នកបានត្រៀមខ្លួនហើយឬនៅដើម្បីនិយាយដោយស្មោះត្រង់ បើអ្នកទាំងពីរសម្រេចចិត្តរៀបការ?
គោលការណ៍គម្ពីរ៖ «ចូរអ្នករាល់គ្នាម្នាក់ៗនិយាយសេចក្ដីពិត»។—អេភេសូរ ៤:២៥
អារៀណាដែលបានរៀបការអស់មួយឆ្នាំហើយ បានរៀបរាប់ថា៖«មនុស្សស្រីប្រហែលជាគិតថា‹តែ៦ខែទេយើងប្រហែលជាភ្ជាប់ពាក្យហើយ› តែមនុស្សប្រុសគិតថាចាំមួយឆ្នាំសិន។ ក្នុងករណីនេះ មនុស្សស្រីប្រហែលជាឈឺចិត្តហើយច្របូកច្របល់ក្នុងចិត្តដោយសារគាត់បានរំពឹងថាសង្សាររបស់គាត់នឹងឆាប់សុំគាត់រៀបការ។ ដូច្នេះ ជាការសំខាន់ដែលអ្នកទាំងពីរយល់គំនិតគ្នាអំពីរឿងនេះ»។
ត្រូវដឹងថាអ្នកទាំងពីរនឹងមានទស្សនៈខុសគ្នា
តាមធម្មតា មនុស្សពីរនាក់មិនអាចដូចគ្នាទាំងស្រុងទេ។ ដូច្នេះ កុំសន្និដ្ឋានថាអ្នកនិងគូសង្សារមានទស្សនៈដូចគ្នាឬយល់ស្របគ្នាចំពោះរឿងទាំងអស់ឡើយ។ មានកត្តាមួយចំនួនអាចមានឥទ្ធិពលទៅលើទស្សនៈរបស់អ្នកទាំងពីរ ដូចជាវប្បធម៌ដែលអ្នកបានធំឡើង ឬការចិញ្ចឹមអប់រំដែលអ្នកទទួលជាដើម។
សូមគិតអំពីនេះ៖ ពេលអ្នកមានការខ្វែងគំនិតគ្នាចំពោះរឿងតូចតាចណាមួយដែលមិនខុសនឹងគោលការណ៍គម្ពីរ តើអ្នកទាំងពីរសុខចិត្តដោះស្រាយបញ្ហានោះដោយសន្តិវិធីឬទេ?
គោលការណ៍គម្ពីរ៖ «ចូរឲ្យមនុស្សទាំងអស់ឃើញថាអ្នករាល់គ្នាជាមនុស្សសមហេតុសមផល»។—ភីលីព ៤:៥
បងម៉ាធីយូដែលបានរៀបការអស់ប្រាំឆ្នាំ បានរៀបរាប់ថា៖«អ្នកប្រហែលជាគិតថា អ្នកទាំងពីរ‹ស៊ីចង្វាក់គ្នា›ខ្លាំងណាស់។ តែអ្នកទាំងពីរនឹងមានការខ្វែងគំនិតគ្នា។ ពិតមែនថាការស៊ីចង្វាក់គ្នាគឺសំខាន់ តែរបៀបដែលអ្នកទាំងពីរដោះស្រាយការខ្វែងគំនិតគ្នាគឺសំខាន់ជាង ជាពិសេសគុណសម្បត្តិដែលម្នាក់ៗបង្ហាញចំពោះគ្នាពេលស្ថិតក្នុងកាលៈទេសៈនោះ»។
ត្រូវដឹងថានឹងមានការតានតឹងចិត្តពេលកំពុងស្វែងយល់ចិត្តគ្នា
ពេលអ្នកទាំងពីរស្វែងយល់ចិត្តគ្នា អ្នកទាំងពីរត្រូវចំណាយពេលច្រើនជាមួយគ្នា ហើយអ្នកប្រហែលជាមានការតានតឹងចិត្តដែរ។ តើអ្វីអាចជួយអ្នក?
សូមមានតុល្យភាព។ សូមកុំផ្ដោតទៅលើការស្វែងយល់ចិត្តគ្នារហូតដល់ភ្លេចភារកិច្ចខ្លួនឬមិត្តភក្ដិឡើយ។ បងអេឡាណឺដែលរៀបការអស់ប្រាំឆ្នាំ បានរៀបរាប់ថា៖«ទោះជាក្រោយអ្នករៀបការ អ្នកនៅតែត្រូវការមិត្តភក្ដិ ហើយពួកគេក៏នៅតែត្រូវការអ្នកដែរ។ ដូច្នេះសូមកុំទុកពួកគេចោលដោយសារតែអ្នកកំពុងស្វែងយល់ចិត្តគ្នាជាមួយអ្នកណាម្នាក់ឡើយ»។
សូមចាំថា ក្រោយរៀបការ អ្នកនឹងត្រូវចំណាយពេលនិងកម្លាំងដើម្បីធ្វើអ្វីជាច្រើនក្នុងជីវិតប្រចាំថ្ងៃ។ ដូច្នេះ ជាការល្អឲ្យអ្នកធ្វើអ្វីទាំងនោះនៅពេលដែលអ្នកកំពុងស្វែងយល់ចិត្តគ្នា។
សូមគិតអំពីនេះ៖ តើអ្នកទាមទារឲ្យគូសង្សាររបស់អ្នកចំណាយពេលនិងយកចិត្តទុកដាក់ចំពោះអ្នកច្រើនពេកទេ? តើអ្នកមានអារម្មណ៍ថាគាត់ទាមទារពីអ្នកហួសហេតុឬ? តើតាមរបៀបណាអ្នកទាំងពីរមិនតម្រូវពីគ្នាហួសហេតុពេករហូតដល់មានអារម្មណ៍នឿយហត់ចំពោះទំនាក់ទំនងនោះ?
គោលការណ៍គម្ពីរ៖ «មានពេលកំណត់សម្រាប់អ្វីៗទាំងអស់ មានពេលសម្រាប់គ្រប់សកម្មភាព»។—អ្នកទូន្មាន ៣:១
បងដានីយ៉ែលដែលបានរៀបការអស់ពីរឆ្នាំ បានរៀបរាប់ថា៖«ពេលស្វែងយល់ចិត្តគ្នា បើពីរនាក់គ្រាន់តែចំណាយពេលដើរលេងប៉ុណ្ណោះ នោះក្រោយរៀបការទាំងពីរនាក់ប្រហែលជាភ្ញាក់ផ្អើលនឹងជីវិតគ្រួសារមិនខាន។ ដូច្នេះ ជាការល្អដែលអ្នកទាំងពីរធ្វើកិច្ចការប្រចាំថ្ងៃជាមួយគ្នា ដូចជាដើរផ្សារ ធ្វើកិច្ចការផ្ទះ និងគោរពប្រណិប័តន៍ព្រះជាមួយគ្នា។ ការធ្វើដូច្នេះអាចជួយពួកគេឲ្យបង្កើតទម្លាប់ធ្វើកិច្ចការប្រចាំថ្ងៃជាមួយគ្នា ហើយនោះនឹងជួយក្នុងជីវិតអាពាហ៍ពិពាហ៍របស់ពួកគេ»។
សូមចាំថា ការស្វែងយល់ចិត្តគ្នាគឺជារយៈពេលដែលយើងមើលចិត្តគ្នាដើម្បីសម្រេចចិត្តថា គួររៀបការឬគួរបែកគ្នា។ នៅក្នុងភាគទី៣នៃអត្ថបទតភាគនេះ នឹងរៀបរាប់អំពីអ្វីដែលអ្នកត្រូវគិតពិចារណាពេលធ្វើការសម្រេចចិត្តនោះ។
លោកអ្នកក៏ប្រហែលជាចូលចិត្តដែរ
សំណួរពីយុវវ័យ
តើខ្ញុំត្រៀមខ្លួនហើយឬនៅក្នុងការស្វែងយល់ចិត្តគ្នា?
ចំណុចប្រាំយ៉ាងដែលជួយអ្នកឲ្យដឹងថាអ្នកត្រៀមខ្លួនហើយឬនៅក្នុងការស្វែងយល់ចិត្តគ្នានិងរៀបការ។
គំនូរជីវចលលើក្ដារខៀន
តើជាស្នេហ៍ពិតឬជាការឈ្លក់វង្វេង?
សូមស្វែងយល់ថាតើអ្វីជាការឈ្លក់វង្វេងនិងអ្វីជាស្នេហ៍ពិត?
ទស្សនៈពីមនុស្សស្រករប្អូន
តើតាមរបៀបណាខ្ញុំអាចយកឈ្នះការបង្ខិតបង្ខំឲ្យរួមភេទមុនរៀបការ?
មានគោលការណ៍គម្ពីរបីដែលអាចជួយប្អូនឲ្យយកឈ្នះការល្បួង។
សំណួរដែលមនុស្សជាច្រើនសួរអំពីសាក្សីព្រះយេហូវ៉ា
តើសាក្សីព្រះយេហូវ៉ាមានច្បាប់ចំពោះការស្វែងយល់ចិត្តគ្នាឬទេ?
តើការស្វែងយល់ចិត្តគ្នាជាការលេងសើច ឬជាអ្វីដែលសំខាន់?
