សំណួរពីយុវវ័យ

តើខ្ញុំគួរធ្វើយ៉ាងណាពេលខូចចិត្តព្រោះស្នេហា?

លេង

ប្អូនស្ទីវើនបានរៀបរាប់ថា៖«ក្រោយពីខ្ញុំនិងសង្សារបែកគ្នា ខ្ញុំឈឺចុកចាប់ពើតផ្សាខ្លាំងណាស់។ នេះគឺជាការឈឺចាប់បំផុតក្នុងជីវិតខ្ញុំ»។

តើប្អូនធ្លាប់មានអារម្មណ៍ដូចនេះទេ? បើធ្លាប់មែន អត្ថបទនេះអាចជួយប្អូនបាន។

អារម្មណ៍ដែលប្អូនអាចមាន

ការបែកបាក់ស្នេហាធ្វើឲ្យឈឺចាប់ទាំងសងខាង។

បើប្អូនជាអ្នកសុំបែក ប្អូនប្រហែលយល់អារម្មណ៍របស់ចាស្មីន ដែលរៀបរាប់ថា៖«ការធ្វើឲ្យបុគ្គលដែលយើងស្រឡាញ់ឈឺចិត្ត គឺធ្វើឲ្យខ្ញុំមានអារម្មណ៍បន្ទោសខ្លួនណាស់ ហើយខ្ញុំសង្ឃឹមថារឿងដូចនោះមិនកើតឡើងម្ដងទៀតទេ»។
បើប្អូនត្រូវគេសុំបែក ប្អូនប្រហែលជាយល់មូលហេតុដែលអ្នកខ្លះប្រាប់ថាបទពិសោធន៍នោះដូចជាស្លាប់ទាំងរស់។ ប្អូនស្រីជេនណិតបានប្រាប់ថា៖«តាមពិត ខ្ញុំបានឆ្លងកាត់ការឈឺចាប់នេះ ហើយខ្ញុំមានអារម្មណ៍ខឹង ធ្លាក់ទឹកចិត្ត ត្រូវគេបដិសេធ ហើយក៏ធ្លាប់សុំត្រូវគ្នាវិញដែរ។ ដូច្នេះ ជិតមួយឆ្នាំឯណោះទើបខ្ញុំធ្វើចិត្តបាន»។

សរុបសេចក្ដី៖ ការបែកបាក់ស្នេហាធ្វើឲ្យចិត្តរបស់យើងខ្ទេចខ្ទាំនិងអស់សង្ឃឹម។ ដូចអ្នកសរសេរគម្ពីរម្នាក់បានប្រាប់ថា៖«ចិត្តខ្ទេចខ្ទាំធ្វើឲ្យអស់កម្លាំងរលីង»។—សុភាសិត ១៧:២២

អ្វីដែលប្អូនអាចធ្វើ

និយាយជាមួយអ្នកដែលគួរឲ្យទុកចិត្តនិងមានគំនិតចាស់ទុំ។ គម្ពីរចែងថា៖«មិត្តពិតបង្ហាញសេចក្ដីស្រឡាញ់គ្រប់ពេលវេលា ហើយគាត់ប្រៀបដូចជាបងប្អូនដែលកើតមក ដើម្បីជួយគ្នានៅពេលមានទុក្ខលំបាក»។ (សុភាសិត ១៧:១៧) ពេលប្អូនប្រាប់អារម្មណ៍របស់ប្អូនអស់ពីចិត្តទៅឪពុកម្ដាយឬមិត្តភក្ដិដែលមានគំនិតចាស់ទុំ នោះអាចជួយប្អូនឲ្យមានទស្សនៈផ្សេងចំពោះរឿងនេះ។

ប្អូនជេនណិតបានរៀបរាប់ថា៖«អស់ប៉ុន្មានខែខ្ញុំបានផ្ដាច់ខ្លួនពីអ្នកឯទៀត ហើយមិនចង់ប្រាប់អារម្មណ៍ដល់អ្នកណាទេ។ ប៉ុន្តែ ពេលខ្ញុំទទួលជំនួយពីមិត្តភក្ដិ ហើយបើកចិត្តប្រាប់អារម្មណ៍ខ្ញុំដល់គាត់ ខ្ញុំបានធូរចិត្តខ្លាំងណាស់»។
ទាញមេរៀនពីអ្វីដែលបានកើតឡើង។ សុភាសិតមួយទៀតក្នុងគម្ពីរបានចែងថា៖«ចូរខំឲ្យបានប្រាជ្ញានិងការយល់ដឹង»។ (សុភាសិត ៤:៥ ) បទពិសោធន៍ឈឺចាប់នេះអាចជួយយើងឲ្យស្គាល់ខ្លួនឯងច្បាស់ជាង និងដឹងរបៀបដែលយើងអាចយកឈ្នះការខកចិត្ត។

ប្អូនស្ទីវើនបានរៀបរាប់ថា៖«ក្រោយខ្ញុំបែកបាក់ស្នេហា មិត្តម្នាក់បានសួរខ្ញុំថា៖‹តើឯងបានទាញមេរៀនអ្វីពីទំនាក់ទំនងនេះ? តើបទពិសោធន៍នេះអាចជួយឯងយ៉ាងណាពេលឯងមានសង្សារថ្មី?›»។
អធិដ្ឋាន។ គម្ពីរចែងថា៖«ចូរផ្ទេរបន្ទុកទៅព្រះយេហូវ៉ា នោះលោកនឹងជួយអ្នក»។ (ចម្រៀងសរសើរព្រះ ៥៥:២២) សេចក្ដីអធិដ្ឋានអាចជួយយើងធ្វើចិត្តបានឡើងវិញ ហើយមានទស្សនៈទូលាយជាងចំពោះការបែកបាក់ស្នេហា។

ប្អូនស្រីម៉ាស្យាបានរៀបរាប់ថា៖«សូមអធិដ្ឋានជាទៀងទាត់ ព្រោះព្រះយេហូវ៉ាយល់ពីការឈឺចាប់របស់អ្នក ហើយលោកស្គាល់ពីស្ថានភាពរបស់អ្នកច្បាស់ជាងអ្នកទៅទៀត»។
សូមជួយអ្នកឯទៀត។ គម្ពីរចែងថា៖«ចូរបន្តយកចិត្តទុកដាក់ចំពោះអ្នកឯទៀត មិនត្រូវគិតតែអំពីរឿងផ្ទាល់ខ្លួនប៉ុណ្ណោះទេ»។ (ភីលីព ២:៤) ពេលអ្នកជួយអ្នកឯទៀតកាន់តែច្រើន នោះអារម្មណ៍ឈឺចាប់នឹងឆាប់រសាយ ហើយអ្នកនឹងមានទស្សនៈផ្សេងចំពោះរឿងបែកបាក់ស្នេហា។

ប្អូនស្រីអេវលិនបានរៀបរាប់ថា៖«ការបែកគ្នាគឺប្រៀបដូចជាទីបញ្ចប់នៃពិភពលោក ហើយវាឈឺជាងការឈឺចាប់ខាងរូបកាយទៅទៀត។ ប៉ុន្តែ ខ្ញុំឃើញថាវាអាចធូរស្រាលឡើងបាន គ្រាន់តែត្រូវការពេលឲ្យវាជាសះស្បើយ»។