សៀវភៅម៉ាថាយ ២៤:១-៥១
-
សញ្ញាសម្គាល់នៃវត្តមានរបស់គ្រិស្ត (១-៥១)
២៤ ក្រោយមក ពេលលោកយេស៊ូកំពុងចាកចេញពីវិហារ នោះអ្នកកាន់តាមលោកបានចូលមកជិត ដើម្បីបង្ហាញសំណង់ផ្សេងៗនៃវិហារ។
២ លោកយេស៊ូមានប្រសាសន៍ទៅពួកគាត់ថា៖ «តើអ្នករាល់គ្នាឃើញអ្វីៗទាំងនេះទេ? ខ្ញុំប្រាប់អ្នករាល់គ្នាការពិតថា ថ្មទាំងអស់នៅទីនេះនឹងត្រូវទម្លាក់ដល់ដី ហើយនឹងគ្មានថ្មណានៅត្រួតលើថ្មណាទៀតទេ»។+
៣ ពេលដែលលោកកំពុងអង្គុយនៅលើភ្នំដើមអូលីវ នោះអ្នកកាន់តាមលោកបានមកឯលោកដោយឡែកពីគេ រួចសួរថា៖ «សូមប្រាប់យើង តើការទាំងនេះនឹងកើតឡើងនៅពេលណា? ហើយតើអ្វីជាសញ្ញាសម្គាល់ដែលបញ្ជាក់វត្តមាន*របស់លោក+ និងគ្រាចុងបញ្ចប់នៃរបៀបរបបពិភពលោក?»។*+
៤ លោកយេស៊ូតបឆ្លើយទៅពួកគាត់ថា៖ «ចូរប្រយ័ត្ន កុំឲ្យអ្នកណាបំភាន់អ្នករាល់គ្នាឡើយ+
៥ ព្រោះមនុស្សជាច្រើននឹងមកដោយអាងឈ្មោះខ្ញុំ* ហើយបំភាន់មនុស្សជាច្រើន ដោយពោលថា៖ ‹ខ្ញុំជាគ្រិស្ត›។+
៦ អ្នកនឹងឮសូរសង្គ្រាម ហើយនឹងឮគេនិយាយអំពីសង្គ្រាម តែកុំភ័យស្លុតឡើយ ព្រោះការទាំងនេះត្រូវតែកើតឡើង។ ក៏ប៉ុន្តែ ទីបញ្ចប់មិនទាន់មកដល់នៅឡើយទេ។+
៧ «ព្រោះប្រជាជាតិមួយនឹងលើកទ័ពទៅច្បាំងនឹងប្រជាជាតិមួយ ហើយរាជាណាចក្រមួយនឹងលើកទ័ពទៅច្បាំងនឹងរាជាណាចក្រមួយ+ ក៏នឹងមានការអត់ឃ្លាន+ ថែមទាំងមានរញ្ជួយដីពីកន្លែងមួយទៅកន្លែងមួយទៀតផង។+
៨ ការទាំងអស់នេះគឺជាការចាប់ផ្ដើមនៃគ្រាលំបាក។*
៩ «រួចមក មនុស្សនឹងបញ្ជូនអ្នករាល់គ្នាឲ្យទៅរងទុក្ខវេទនា+ ក៏នឹងសម្លាប់អ្នករាល់គ្នា+ ហើយប្រជាជាតិទាំងឡាយនឹងស្អប់អ្នករាល់គ្នា ដោយសារអ្នករាល់គ្នាកាន់តាមខ្ញុំ។+
១០ នៅពេលនោះដែរ មនុស្សជាច្រើននឹងជំពប់ដួល ក្បត់គ្នា ហើយស្អប់គ្នាទៅវិញទៅមក។
១១ ម្យ៉ាងទៀត អ្នកប្រកាសទំនាយមិនពិតជាច្រើននាក់ នឹងលេចមកបំភាន់មនុស្សជាច្រើន។+
១២ បន្ថែមទៅទៀត ដោយសារការប្រឆាំងច្បាប់នឹងមានកាន់តែច្រើនឡើង នោះសេចក្ដីស្រឡាញ់របស់មនុស្សភាគច្រើននឹងរសាយទៅ។
១៣ ប៉ុន្តែ អ្នកណាដែលស៊ូទ្រាំរហូតដល់ទីបញ្ចប់ អ្នកនោះនឹងត្រូវសង្គ្រោះ។+
១៤ ដំណឹងល្អនេះអំពីរាជាណាចក្រនឹងត្រូវផ្សព្វផ្សាយនៅគ្រប់ទីអាស្រ័យនៅផែនដី ដើម្បីឲ្យប្រជាជាតិទាំងឡាយបានឮ+ រួចទីបញ្ចប់នឹងមកដល់។
១៥ «ដូច្នេះ នៅពេលដែលអ្នករាល់គ្នាក្រឡេកទៅឃើញអ្វីដ៏គួរឲ្យស្អប់ខ្ពើមដែលនាំឲ្យមានការហិនវិនាស កំពុងឈរនៅកន្លែងបរិសុទ្ធ ដូចទំនាយដែលបានត្រូវប្រកាសតាមរយៈដានីយ៉ែល+ (ចូរអ្នកអានប្រើសមត្ថភាពវែកញែក)
១៦ នោះចូរឲ្យអ្នកដែលនៅតំបន់យូឌាចាប់ផ្ដើមរត់ទៅតំបន់ភ្នំ។+
១៧ អ្នកណាដែលនៅលើដំបូលផ្ទះ មិនត្រូវចុះមកយកទ្រព្យសម្បត្តិចេញពីផ្ទះឡើយ
១៨ ហើយអ្នកណាដែលនៅស្រែចម្ការ ក៏មិនត្រូវត្រឡប់ទៅផ្ទះយកសម្លៀកបំពាក់ក្រៅរបស់ខ្លួនដែរ។
១៩ នៅគ្រានោះ ស្ត្រីដែលមានផ្ទៃពោះនិងស្ត្រីដែលនៅបំបៅកូនត្រូវវេទនាណាស់!
២០ ចូរអធិដ្ឋានជានិច្ច ដើម្បីកុំឲ្យត្រូវរត់គេចខ្លួននៅរដូវរងា ឬនៅថ្ងៃឈប់សម្រាកឡើយ។
២១ ព្រោះនៅគ្រានោះ នឹងមានទុក្ខវេទនាជាខ្លាំង+ ដែលមិនធ្លាប់មានតាំងពីកំណើតពិភពលោករហូតដល់ឥឡូវនេះ ហើយនឹងមិនមានដូច្នោះទៀតឡើយ។+
២២ តាមការពិត ប្រសិនបើព្រះមិនកាត់បន្ថយគ្រានោះឲ្យខ្លីទេ គ្មានអ្នកណានឹងត្រូវសង្គ្រោះឡើយ។ ប៉ុន្តែ ដោយយល់ដល់ពួកអ្នកដែលបានត្រូវរើសតាំង នោះព្រះនឹងកាត់បន្ថយគ្រានោះឲ្យខ្លី។+
២៣ «នៅពេលនោះ បើអ្នកណាប្រាប់អ្នករាល់គ្នាថា៖ ‹មើល! គ្រិស្តនៅទីនេះ!›+ ឬ‹នៅទីនោះ!› កុំជឿឲ្យសោះ។+
២៤ ពីព្រោះនឹងមានអ្នកក្លែងខ្លួនជាគ្រិស្ត និងអ្នកប្រកាសទំនាយមិនពិត+លេចមក ហើយពួកគេនឹងបង្ហាញសញ្ញាសម្គាល់និងធ្វើការអស្ចារ្យយ៉ាងធំ ដើម្បីបំភាន់+ទាំងអ្នកដែលបានត្រូវរើសតាំង ប្រសិនបើអាចបំភាន់បាន។
២៥ មើល! ខ្ញុំបានព្រមានអ្នករាល់គ្នាទុកជាមុនហើយ។
២៦ ដូច្នេះ បើគេប្រាប់អ្នករាល់គ្នាថា៖ ‹មើល! លោកនៅតំបន់ស្ងាត់ជ្រងំ› កុំចេញទៅឡើយ ឬបើគេថា៖ ‹មើល! លោកនៅកន្លែងសម្ងាត់› កុំជឿឲ្យសោះ។+
២៧ ព្រោះវត្តមាន*របស់កូនមនុស្ស នឹងប្រៀបដូចជាផ្លេកបន្ទោរ ដែលភ្លឺពីទិសខាងកើតដល់ទិសខាងលិច។+
២៨ សាកសពនៅទីណា សត្វឥន្ទ្រីនឹងប្រមូលគ្នានៅទីនោះ។+
២៩ «បន្ទាប់ពីទុក្ខវេទនានៅគ្រានោះចប់ភ្លាម ដួងអាទិត្យនឹងទៅជាងងឹត+ ដួងខែនឹងលែងភ្លឺ ផ្កាយទាំងឡាយនឹងធ្លាក់ពីលើមេឃ ហើយកម្លាំងធម្មជាតិនៅលើមេឃនឹងត្រូវអង្រួន។+
៣០ រួចមក សញ្ញាសម្គាល់របស់កូនមនុស្សនឹងលេចមកនៅលើមេឃ ហើយកុលសម្ព័ន្ធទាំងឡាយនៅផែនដីនឹងគក់ទ្រូងដោយក្ដីទុក្ខព្រួយ+ ហើយពួកគេនឹងឃើញកូនមនុស្ស+មកលើពពកនៅលើមេឃ ទាំងមានឫទ្ធានុភាពនិងសិរីរុងរឿងដ៏អស្ចារ្យ។+
៣១ នៅពេលនោះ លោកនឹងចាត់បណ្ដាទេវតារបស់លោក ព្រមជាមួយនឹងសំឡេងត្រែលាន់ឮយ៉ាងខ្លាំង ហើយបណ្ដាទេវតាទាំងនោះនឹងទៅប្រមូលអ្នកដែលលោកបានរើសតាំងពីទិសខាងជើង ទិសខាងត្បូង ទិសខាងកើត និងទិសខាងលិច ពីជើងមេឃម្ខាងរហូតដល់ជើងមេឃម្ខាង។+
៣២ «ចូរទាញយកមេរៀនពីឧទាហរណ៍អំពីដើមល្វាតូចដូចតទៅនេះ៖ កាលដែលមែកខ្ចីរបស់វាទៅជាទន់ ហើយលាស់ស្លឹក អ្នកដឹងភ្លាមថា រដូវក្ដៅជិតដល់ហើយ។+
៣៣ ដូចគ្នាដែរ កាលដែលអ្នករាល់គ្នាឃើញការទាំងអស់នេះ ចូរដឹងថាកូនមនុស្សនៅជិតមាត់ទ្វារហើយ។+
៣៤ ខ្ញុំប្រាប់អ្នករាល់គ្នាការពិតថា ជំនាន់នេះនឹងមិនកន្លងបាត់ឡើយ ទាល់តែការទាំងអស់នេះកើតឡើង។
៣៥ មេឃនិងផែនដីនឹងកន្លងបាត់ទៅ តែពាក្យរបស់ខ្ញុំនឹងមិនកន្លងបាត់ឡើយ។+
៣៦ «គ្មានអ្នកណាដឹងថ្ងៃនិងម៉ោងនោះឡើយ+ សូម្បីតែបណ្ដាទេវតានៅស្ថានសួគ៌ និងបុត្ររបស់ព្រះក៏មិនជ្រាបដែរ។ មានតែបិតាដែលស្ថិតនៅស្ថានសួគ៌ប៉ុណ្ណោះដែលជ្រាប+
៣៧ ពីព្រោះវត្តមាន*របស់កូនមនុស្ស+ នឹងដូចសម័យណូអេ។+
៣៨ ព្រោះមនុស្សនៅសម័យនោះ មុនទឹកជំនន់មកដល់ ពួកគេកំពុងពិសាអាហារពិសាស្រា រៀបការប្ដីប្រពន្ធ រហូតដល់ថ្ងៃដែលណូអេចូលទៅក្នុងទូកធំនោះ+
៣៩ ហើយពួកគេមិនបានយកចិត្តទុកដាក់សោះ រហូតដល់ទឹកជន់ឡើង កញ្ឆក់យកគេទាំងអស់គ្នាទៅ។+ ពេលកូនមនុស្សមានវត្តមាន ក៏នឹងដូចគ្នាដែរ។
៤០ នៅពេលនោះ នឹងមានបុរសពីរនាក់នៅស្រែចម្ការ ហើយម្នាក់នឹងត្រូវយកទៅ តែម្នាក់ទៀតនឹងត្រូវទុកចោល
៤១ ក៏នឹងមានស្ត្រីពីរនាក់កំពុងកិនម្សៅ ហើយម្នាក់នឹងត្រូវយកទៅ តែម្នាក់ទៀតនឹងត្រូវទុកចោល។+
៤២ ដូច្នេះ ចូរចាំយាម ពីព្រោះអ្នករាល់គ្នាមិនដឹងថាលោកម្ចាស់របស់អ្នកនឹងមកវិញនៅថ្ងៃណាឡើយ។+
៤៣ «ចូរដឹងថា បើម្ចាស់ផ្ទះបានដឹងថាចោរនឹងមកនៅយាមណា*+ នោះម្ចាស់ផ្ទះមុខជាចាំយាមមិនឲ្យចោរចូលផ្ទះគាត់ទេ។+
៤៤ ហេតុនេះ អ្នករាល់គ្នាត្រូវត្រៀមខ្លួនជានិច្ចដូច្នេះដែរ+ ពីព្រោះកូនមនុស្សនឹងមកនៅម៉ោងដែលអ្នករាល់គ្នាមិននឹកស្មាន។
៤៥ «តើអ្នកណាជាខ្ញុំបម្រើដ៏ស្មោះត្រង់ហើយចេះពិចារណា* ដែលម្ចាស់បានតែងតាំងឲ្យមើលការខុសត្រូវលើខ្ញុំបម្រើឯទៀតរបស់លោក ដើម្បីឲ្យអាហារពួកគេបរិភោគនៅពេលត្រឹមត្រូវ?+
៤៦ ខ្ញុំបម្រើនោះមានសុភមង្គលហើយ! ប្រសិនបើម្ចាស់មកដល់ ហើយឃើញថាគាត់កំពុងធ្វើដូច្នោះមែន។+
៤៧ ខ្ញុំប្រាប់អ្នករាល់គ្នាការពិតថា លោកនឹងតែងតាំងគាត់ឲ្យមើលការខុសត្រូវលើទ្រព្យសម្បត្តិទាំងអស់របស់លោក។
៤៨ «ក៏ប៉ុន្តែ ប្រសិនបើខ្ញុំបម្រើនោះអាក្រក់ ហើយគិតក្នុងចិត្តថា៖ ‹ម្ចាស់ខ្ញុំនៅបង្អង់យូរ›+
៤៩ រួចចាប់ផ្ដើមវាយខ្ញុំបម្រើគ្នីគ្នា ហើយស៊ីផឹកជាមួយនឹងមនុស្សប្រមឹកស្រា
៥០ នោះម្ចាស់របស់គាត់នឹងមកវិញនៅថ្ងៃដែលគាត់មិននឹកស្មាន និងនៅម៉ោងដែលគាត់មិនដឹង+
៥១ ហើយម្ចាស់របស់គាត់នឹងដាក់ទោសគាត់យ៉ាងធ្ងន់បំផុត ក៏រាប់បញ្ចូលគាត់ក្នុងចំណោមមនុស្សលាក់ពុត។ នៅទីនោះ គាត់នឹងយំ ហើយសង្កៀតធ្មេញ។+
កំណត់សម្គាល់
^ មើលនិយមន័យពាក្យ«វត្តមាន»
^ ឬ«ចុងបញ្ចប់នៃយុគសម័យ»។ មើលនិយមន័យពាក្យ«របៀបរបបពិភពលោក»
^ នេះសំដៅលើការតាំងខ្លួនជាអ្នកមានឋានៈនិងមានអំណាចរបស់គ្រិស្ត
^ ប្រៀបដូចជាការឈឺចាប់របស់ស្ត្រីពេលសម្រាលកូន
^ មើលនិយមន័យពាក្យ«វត្តមាន»
^ មើលនិយមន័យពាក្យ«វត្តមាន»
^ ឬ«ម៉ោងណានៅពេលយប់»
^ ឬ«មានប្រាជ្ញា»