ហេតុអ្វីឪពុកម្ដាយខ្ញុំមិនអនុញ្ញាតឲ្យខ្ញុំមានពេលសប្បាយខ្លះ?
សូមស្រមៃគិតអំពីរឿងដូចខាងក្រោមនេះ:
ប្អូនចង់ទៅចូលរួមពិធីជប់លៀងមួយ ប៉ុន្តែប្អូនមិនប្រាកដថាឪពុកម្ដាយរបស់ប្អូននឹងអនុញ្ញាតឲ្យទៅឬអត់។ តើជម្រើសមួយណាដែលប្អូននឹងជ្រើសរើស?
១. មិនសួរហើយទៅតែម្ដង
មូលហេតុដែលប្អូនប្រហែលជាគិតដូច្នេះ: ដោយសារប្អូនចង់ឲ្យមិត្តភក្ដិប្អូនកោតស្ងើចថាប្អូនជាមនុស្សឯករាជ្យ។ ប្រហែលជាប្អូនគិតថា ប្អូនមានប្រាជ្ញាច្រើនជាងឪពុកម្ដាយឬក៏ប្អូនមិនសូវឲ្យតម្លៃចំពោះទស្សនៈរបស់ពួកគាត់។—សុភាសិត ១៤:១៨
លទ្ធផល: មិត្តរបស់ប្អូនប្រហែលជានឹងកោតស្ងើចប្អូនមែន ប៉ុន្តែ ពួកគេក៏នឹងរៀនអ្វីមួយអំពីប្អូនដែរ ថាប្អូនគឺជាមនុស្សមិនស្មោះត្រង់។ បើសិនជាប្អូនកុហក ឬក៏បោកប្រាស់ឪពុកម្ដាយប្អូន នោះប្អូនក៏ប្រហែលជានឹងបោកប្រាស់មិត្តរបស់ប្អូនដែរ។ ហើយបើឪពុកម្ដាយរបស់ប្អូនដឹង ពួកគេនឹងមានអារម្មណ៍ឈឺចិត្ត ហើយទំនងជាលែងអនុញ្ញាតឲ្យប្អូនចេញទៅក្រៅទៀត!—សុភាសិត ១២:១៥
២. មិនសួរហើយមិនទៅ
មូលហេតុដែលប្អូនប្រហែលជាគិតដូច្នេះ: ប្អូនគិតអំពីការអញ្ជើញនោះ ហើយសម្រេចចិត្តថាកម្មវិធីនោះមិនសាកសមនឹងគោលការណ៍របស់ប្អូន ហើយថាការអញ្ជើញនោះប្រហែលជាធ្វើឲ្យប្អូនមានការសេពគប់មិនល្អ។ (កូរិនថូសទី១ ១៥:៣៣; ភីលីព ៤:៨) ម្យ៉ាងវិញទៀត ប្អូនប្រហែលជាចង់ទៅ ប៉ុន្តែប្អូនគ្មានចិត្តក្លាហានសុំការអនុញ្ញាតពីឪពុកម្ដាយ។
លទ្ធផល: បើសិនជាប្អូនមិនទៅដោយសារប្អូនដឹងថានោះមិនល្អ ប្អូនប្រហែលជានឹងអាចផ្ដល់ចម្លើយយ៉ាងមានទំនុកចិត្តដល់អ្នកដែលអញ្ជើញនោះ។ ប៉ុន្តែ បើសិនជាប្អូនមិនទៅគ្រាន់តែដោយសារខ្វះចិត្តក្លាហានក្នុងការសុំការអនុញ្ញាតពីឪពុកម្ដាយ ចុងក្រោយប្អូនប្រហែលជាអង្គុយនៅផ្ទះទាំងមានអារម្មណ៍ថាខ្លួនប៉ុណ្ណោះដែលគ្មានឱកាសសប្បាយដូចគេ។
៣. សួរហើយចាំចម្លើយ
មូលហេតុដែលប្អូនប្រហែលជាគិតដូច្នេះ: ប្អូនទទួលស្គាល់សិទ្ធអំណាចរបស់ឪពុកម្ដាយ ហើយគោរពការសម្រេចចិត្តរបស់ពួកគាត់។ (កូឡុស ៣:២០) ប្អូនស្រឡាញ់ឪពុកម្ដាយរបស់ប្អូន ហើយមិនចង់ធ្វើឲ្យពួកគាត់ឈឺចិត្តដោយធ្វើអ្វីមួយលួចលាក់ពីក្រោយខ្នងពួកគាត់ទេ។ (សុភាសិត ១០:១) ប្អូនក៏ប្រហែលជាមានឱកាសប្រាប់មូលហេតុដល់ពួកគាត់ដែរ។
លទ្ធផល: ឪពុកម្ដាយរបស់ប្អូននឹងមានអារម្មណ៍ថា ប្អូនស្រឡាញ់និងគោរពពួកគាត់។ ហើយពួកគាត់ប្រហែលជានឹងយល់ព្រម បើពួកគាត់ចាត់ទុកការស្នើសុំរបស់ប្អូនថាសមហេតុផល។
ហេតុអ្វីឪពុកម្ដាយរបស់ប្អូនប្រហែលជាមិនយល់ព្រម?
សូមគិតមូលហេតុមួយ: ជាឧទាហរណ៍ បើប្អូនចង់ហែលទឹកប្អូនទំនងជាចង់ហែលនៅកន្លែងដែលមានឆ្មាំសមុទ្រ។ ហេតុអ្វី? ដោយសារខណៈពេលដែលប្អូនកំពុងហែលទឹកសប្បាយ ប្អូនពិបាកកត់សម្គាល់អំពីគ្រោះថ្នាក់។ ប៉ុន្តែ ឆ្មាំសមុទ្រអាចដឹងទុកជាមុនអំពីគ្រោះថ្នាក់ដែលអាចកើតមានឡើង។ ស្រដៀងគ្នាដែរ ដោយសារឪពុកម្ដាយរបស់ប្អូនមានប្រាជ្ញានិងបទពិសោធន៍ច្រើនជាង ដូច្នេះពួកគាត់ប្រហែលជាអាចដឹងអំពីគ្រោះថ្នាក់ផ្សេងៗដែលប្អូនមិនដឹង។ ដូចឆ្មាំសមុទ្រ មិនមែនឪពុកម្ដាយប្អូនមិនចង់ឲ្យប្អូនសប្បាយទេ ប៉ុន្តែគោលបំណងពួកគាត់ចង់ជួយប្អូនឲ្យជៀសវាងពីគ្រោះថ្នាក់ផ្សេងៗដែលអាចបណ្ដាលឲ្យប្អូនលែងមានភាពសប្បាយទៀត។
មូលហេតុមួយទៀត: ឪពុកម្ដាយរបស់ប្អូនពិតជាចង់ការពារប្អូនខ្លាំងណាស់។ សេចក្ដីស្រឡាញ់នឹងជំរុញពួកគាត់ឲ្យយល់ព្រមនៅពេលដែលអាចធ្វើបាន ហើយបដិសេធនៅពេលដែលពួកគាត់ដឹងថាត្រូវធ្វើដូច្នេះ។ ពេលដែលប្អូនសុំការអនុញ្ញាតពីពួកគាត់ដើម្បីធ្វើអ្វីមួយ ពួកគាត់នឹងសួរខ្លួនឯងថាបើពួកគាត់យល់ស្របតាមការស្នើសុំនោះ តើនឹងមានលទ្ធផលអ្វីនៅពេលក្រោយ។ ពួកគាត់នឹងយល់ព្រមចំពោះខ្លួនឯងនិងប្អូន លុះត្រាតែពួកគាត់ដឹងប្រាកដថាមិនមានផលអាក្រក់កើតឡើងចំពោះប្អូន។
តើតាមរបៀបណាប្អូនអាចមានឱកាសច្រើនជាងដើម្បីទទួលការអនុញ្ញាត
អ្វីដែលប្អូនអាចធ្វើ
ចូរនិយាយការពិត: សូមសួរខ្លួនឯង: ‹ហេតុអ្វីខ្ញុំពិតជាចង់ទៅ? តើការចូលរួមនោះជាការកំសាន្តដែលធ្វើឲ្យខ្ញុំសប្បាយបំផុត ឬគ្រាន់តែដោយសារខ្ញុំចង់ធ្វើតាមមិត្តស្រករគ្នាប៉ុណ្ណោះ? ឬព្រោះតែមានបុគ្គលដែលខ្ញុំចាប់អារម្មណ៍នឹងនៅទីនោះដែរ?› សូមប្រាប់ការពិតទៅកាន់ឪពុកម្ដាយរបស់ប្អូន។ ពួកគាត់ក៏ធ្លាប់ឆ្លងកាត់គ្រាយុវវ័យដែរ ហើយពួកគាត់ស្គាល់ប្អូនច្បាស់។ ដូច្នេះពួកគាត់ទំនងជានឹងដឹងមូលហេតុពិតប្រាកដដែលប្អូនចង់ទៅ ទោះជាប្អូនមិនប្រាប់ក៏ដោយ។ តែបើប្អូនប្រាប់ការពិត ពួកគាត់នឹងសប្បាយចំពោះភាពស្មោះត្រង់របស់ប្អូន ហើយប្អូននឹងទទួលផលប្រយោជន៍ពីប្រាជ្ញារបស់ពួកគាត់។ (សុភាសិត ៧:១, ២) ម្យ៉ាងវិញទៀត បើសិនជាប្អូនមិនស្មោះត្រង់ ប្អូននឹងទៅជាមនុស្សដែលគេលែងទុកចិត្ត ហើយនេះនឹងធ្វើឲ្យប្អូនបាត់បង់ឱកាសទទួលការអនុញ្ញាត។
ការចេះលៃពេលឲ្យបានល្អ: សូមកុំសួរពួកគាត់នៅពេលដែលពួកគាត់ទើបតែត្រលប់ពីធ្វើការ ឬក៏ពេលដែលពួកគាត់កំពុងគិតអំពីបញ្ហាផ្សេង។ សូមសួរពួកគាត់នៅពេលដែលពួកគាត់មានអារម្មណ៍ស្រួល។ ប៉ុន្តែសូមកុំចាំរហូតជិតដល់ពេលទើបសួរ ហើយបង្ខំឲ្យពួកគាត់ផ្ដល់ចម្លើយភ្លាមៗ។ ឪពុកម្ដាយរបស់ប្អូននឹងមិនសប្បាយចិត្តទេ ពេលធ្វើការសម្រេចចិត្តដោយប្រញាប់ប្រញាល់។ សូមសួរឲ្យបានលឿនដើម្បីពួកគាត់អាចមានពេលគិត។
សូមរៀបចំពាក្យ: សូមនិយាយឲ្យប្រាកដ។ សូមពន្យល់យ៉ាងច្បាស់អំពីអ្វីដែលប្អូនចង់ធ្វើ។ ឪពុកម្ដាយរបស់ប្អូននឹងមិនមានអារម្មណ៍ស្រួលទេពេលប្អូនឆ្លើយថា «ខ្ញុំអត់ដឹងទេ» ជាពិសេសនៅពេលដែលពួកគាត់សួរប្អូនថា៖«តើអ្នកណាខ្លះនឹងចូលរួម?» «តើនឹងមានមនុស្សដែលមានវ័យចាស់ជាងទទួលខុសត្រូវក្នុងកម្មវិធីនោះឬទេ?» ឬ «តើពេលណាប្អូននឹងត្រលប់មកផ្ទះវិញ?»
សូមមានទស្សនៈត្រឹមត្រូវ: កុំចាត់ទុកឪពុកម្ដាយរបស់ប្អូនដូចជាសត្រូវឡើយ។ តែសូមចាត់ទុកពួកគាត់ជាក្រុមតែមួយ ព្រោះពួកគាត់មិនមែនសត្រូវរបស់ប្អូនទេ តែជាអ្នកជួយប្អូនវិញ។ បើសិនជាប្អូនចាត់ទុកឪពុកម្ដាយប្រៀបដូចជាមិត្ត ប្អូនទំនងជានិយាយជាមួយនឹងពួកគាត់ដោយប្រើពាក្យសប្បុរសហើយពួកគាត់ក៏ស្រួលអនុញ្ញាតឲ្យប្អូនទៅដែរ។
សូមបង្ហាញឪពុកម្ដាយរបស់ប្អូនថាប្អូនមានភាពចាស់ទុំគ្រប់គ្រាន់ដើម្បីទទួលយកការសម្រេចចិត្តរបស់ពួកគាត់និងគោរពតាមការសម្រេចចិត្តនោះ។ បើសិនជាប្អូនធ្វើដូច្នេះ ពួកគាត់នឹងគិតថាប្អូនមានទំនួលខុសត្រូវ ហើយនេះនឹងស្រួលឲ្យពួកគាត់យល់ព្រមតាមសំណូមពររបស់ប្អូនជាង។