សំណួរពីយុវវ័យ

តើគម្ពីរអាចជួយខ្ញុំយ៉ាងដូចម្ដេច? ភាគទី១: សិក្សាគម្ពីរ

លេង

ប៊្រីអាណារៀបរាប់ថា៖«ខ្ញុំព្យាយាមអានគម្ពីរ ប៉ុន្តែខ្ញុំឆាប់ធុញព្រោះវែងពេក!»។

តើប្អូនធ្លាប់មានអារម្មណ៍ដូច្នេះទេ? អត្ថបទនេះអាចជួយប្អូនបាន!

ហេតុអ្វីគួរអានគម្ពីរ?

តើប្អូនគិតថាការអានគម្ពីរជារឿងដែលគួរឲ្យធុញទេ? បើមែន នោះមិនចម្លែកទេ។ ប្អូនប្រហែលជាគិតថាគម្ពីរជាសៀវភៅដែលមានជាងមួយពាន់ទំព័រ ពេញទៅដោយអក្សរតូចៗ និងគ្មានរូបភាព ហើយមិនសប្បាយដូចមើលទូរទស្សន៍និងវីដេអូទេ!

ប៉ុន្តែ សូមគិតដូចនេះ: បើប្អូនបានប្រទះឃើញប្រអប់កំណប់ទ្រព្យដ៏ធំមួយពីបុរាណ តើប្អូនមិនចង់បើកមើលអ្វីដែលមាននៅក្នុងនោះទេឬ?

គម្ពីរប្រៀបដូចជាប្រអប់កំណប់ទ្រព្យនោះ។ គម្ពីរមានប្រាជ្ញាដ៏មានតម្លៃជាច្រើនដែលនឹងជួយប្អូនឲ្យ

ធ្វើការសម្រេចចិត្តល្អ
ចុះសម្រុងនឹងឪពុកម្ដាយ
រកបានមិត្តភក្តិល្អ
បន្ធូរការតានតឹងចិត្ត

ហេតុអ្វីសៀវភៅបុរាណនេះមានប្រយោជន៍សម្រាប់យើងនៅសព្វថ្ងៃ? ដោយសារ«គ្រប់ទាំងបទគម្ពីរបានត្រូវសរសេរក្រោមការដឹកនាំរបស់ព្រះ»។ (ធីម៉ូថេទី២ ៣:១៦) នេះមានន័យថាឱវាទក្នុងគម្ពីរមកពីប្រភពល្អបំផុតដែលប្អូនអាចរកបាន។

គម្ពីរជាប្រអប់កំណប់ទ្រព្យដែលមានប្រាជ្ញាដ៏មានតម្លៃមិនអាចកាត់ថ្លៃបាន

តើខ្ញុំគួរអានគម្ពីរតាមរបៀបណា?

វិធីទី១ គឺអានគម្ពីរពីដើមដល់ចប់។ នោះនឹងជួយប្អូនឲ្យយល់ខ្លឹមសារនៃព័ត៌មានក្នុងគម្ពីរ។ មានវិធីជាច្រើនដើម្បីអានតាមរបៀបនេះ។ សូមពិចារណាឧទាហរណ៍ពីរ៖

ប្អូនអាចអានសៀវភៅទាំង៦៦ក្បាលក្នុងគម្ពីរតាមលំដាប់លំដោយ គឺពីលោកុប្បត្តិដល់ការបើកបង្ហាញ។
ប្អូនអាចអានគម្ពីរតាមលំដាប់ពេលវេលា គឺអានតាមលំដាប់ព្រឹត្តិការណ៍ដែលបានកើតឡើង។

យោបល់: ក្នុងសេចក្ដីពន្យល់បន្ថែម ផ្នែកក៧ នៃសេចក្ដីបកប្រែពិភពលោកថ្មី មានលំដាប់ពេលវេលាអំពីព្រឹត្តិការណ៍សំខាន់ៗក្នុងជីវិតលោកយេស៊ូនៅផែនដី។

វិធីទី២ គឺដោយជ្រើសរើសអានកំណត់ហេតុដែលទាក់ទងនឹងការពិបាកដែលប្អូនកំពុងប្រឈមមុខ។ ជាឧទាហរណ៍៖

តើប្អូនចង់មានមិត្តភក្តិដែលប្អូនអាចទុកចិត្តបានឬទេ? សូមអានកំណត់ហេតុអំពីយ៉ូណាថាននិងដាវីឌ។ (សាំយូអែលទី១ ជំពូកទី ១៨-២០) រួចសូមប្រើក្រដាសលំហាត់«របៀបរកបានមិត្តភក្តិស្មោះត្រង់» ដើម្បីរៀនមេរៀនល្អៗពីកំណត់ហេតុនោះ។
តើប្អូនចង់មានជំហររឹងមាំជាងដើម្បីយកឈ្នះការល្បួងឬទេ? សូមអានកំណត់ហេតុអំពីរបៀបដែលយ៉ូសែបបានយកឈ្នះការល្បួង។ (លោកុប្បត្តិ ជំពូកទី ៣៩) រួចសូមប្រើក្រដាសលំហាត់«របៀបយកឈ្នះការល្បួង...យ៉ូសែប ភាគទី១» និង«ការចោទប្រកាន់មិនពិត! យ៉ូសែប ភាគទី២» ដើម្បីរៀនមេរៀនល្អៗពីកំណត់ហេតុនោះ។
តើប្អូនចង់ដឹងទេថាសេចក្ដីអធិដ្ឋានអាចជួយប្អូនយ៉ាងណា? សូមអានបទពិសោធន៍របស់នេហេមា។ (នេហេមា ជំពូកទី ២) រួចសូមប្រើក្រដាសលំហាត់«ព្រះបានតបឆ្លើយសេចក្ដីអធិដ្ឋានរបស់គាត់» ដើម្បីរៀនមេរៀនល្អៗពីកំណត់ហេតុនោះ។

យោបល់: ពេលប្អូនអានគម្ពីរ សូមនៅកន្លែងស្ងាត់ដើម្បីប្អូនស្រួលផ្ចង់អារម្មណ៍។

វិធីទី៣ គឺដោយជ្រើសរើសកំណត់ហេតុណាមួយ ឬជំពូកណាមួយក្នុងសៀវភៅទំនុកតម្កើង រួចសូមអាន បន្ទាប់មករំពឹងគិតអំពីរបៀបដែលប្អូនអាចអនុវត្តតាម។ ក្រោយពីអានរួច សូមសួរខ្លួននូវសំណួរដូចនេះ៖

ហេតុអ្វីព្រះយេហូវ៉ាបញ្ចូលព័ត៌មាននេះក្នុងគម្ពីរ?
តើនេះបង្ហាញអ្វីខ្លះអំពីគុណសម្បត្តិរបស់ព្រះយេហូវ៉ា ឬអំពីរបៀបដែលលោកធ្វើអ្វីមួយ?
តើខ្ញុំអាចធ្វើតាមព័ត៌មាននេះក្នុងជីវិតយ៉ាងដូចម្ដេច?

យោបល់: សូមប្រើសេចក្ដីបកប្រែពិភពលោកថ្មីសម្រាប់សិក្សា ដើម្បីមើលវីដេអូ ផែនទី និងលក្ខណៈផ្សេងទៀតដែលនឹងជួយប្អូនឲ្យយល់កាន់តែច្បាស់អំពីអ្វីដែលប្អូនអាន។

តើមនុស្សស្រករប្អូននិយាយអ្វីខ្លះ?

ខ្លូអេរៀបរាប់ថា៖«ខ្ញុំជ្រើសរើសសៀវភៅដែលខ្ញុំចាប់អារម្មណ៍។ នេះជួយខ្ញុំឲ្យសម្រេចគោលដៅក្នុងការអានគម្ពីរជារៀងរាល់ថ្ងៃ។ ជាឧទាហរណ៍ ខ្ញុំចូលចិត្តសៀវភៅសុភាសិត ព្រោះសៀវភៅនោះមានប្រាជ្ញាដ៏មានតម្លៃដែលលើកទឹកចិត្តខ្ញុំយ៉ាងខ្លាំង»។

ស្ទេផានរៀបរាប់ថា៖«មុនចូលគេង ខ្ញុំព្យាយាមអានមួយឬពីរជំពូកនៃសៀវភៅទំនុកតម្កើង ព្រោះអ្នកសរសេរសៀវភៅនោះមានអារម្មណ៍ស្រដៀងយើង។ នៅចុងថ្ងៃនីមួយៗគឺសំខាន់ណាស់ឲ្យយើងគិតអំពីអ្វីដែលវិជ្ជមាន ហើយការអានសៀវភៅទំនុកតម្កើងពង្រឹងជំនឿខ្ញុំទៅលើព្រះយេហូវ៉ា ជាព្រះនៃការសម្រាលទុក្ខពិតប្រាកដ»។