សំណួរពីយុវវ័យ
តើការស្រឡាញ់ភេទដូចគ្នាជាការខុសទេ?
ប្អូនប្រុសឈ្មោះដាវីឌ អាយុ២៣ឆ្នាំ និយាយថា៖«ពេលខ្ញុំជាយុវវ័យ អ្វីមួយដែលពិបាកបំផុតសម្រាប់ខ្ញុំ គឺខ្ញុំចូលចិត្តបុរសភេទដូចគ្នា។ ខ្ញុំធ្លាប់គិតថានោះជាអារម្មណ៍ដែលមានតែមួយភ្លែតប៉ុណ្ណោះ ប៉ុន្តែមិនមែនទេ»។
ដាវីឌជាគ្រិស្តសាសនិកម្នាក់ គាត់ចង់ធ្វើអ្វីដែលព្រះពេញចិត្ត។ ប៉ុន្តែ តើគាត់អាចធ្វើឲ្យព្រះពេញចិត្តទេ បើគាត់ចូលចិត្តមនុស្សភេទដូចគ្នា? តើព្រះមានអារម្មណ៍យ៉ាងណាចំពោះមនុស្សដែលស្រឡាញ់ភេទដូចគ្នា?
តើគម្ពីរចែងយ៉ាងណា?
មនុស្សដែលមានវប្បធម៌ឬរស់នៅសម័យខុសគ្នា ប្រហែលជាមានទស្សនៈផ្សេងគ្នាចំពោះការស្រឡាញ់ភេទដូចគ្នា។ ប៉ុន្តែ គ្រិស្តសាសនិកពិតមិនព្រមឲ្យគេ«បក់ផាត់ទៅនេះទៅនោះដោយខ្យល់នៃសេចក្ដីបង្រៀនគ្រប់បែបយ៉ាង» ឬធ្វើតាមចិត្តគំនិតដែលគេពេញនិយមនោះទេ។ (អេភេសូរ ៤:១៤) ផ្ទុយទៅវិញ ស្ដីអំពីការស្រឡាញ់មនុស្សភេទដូចគ្នា(និងរឿងផ្សេងទៀតដែរ) គ្រិស្តសាសនិកមានទស្សនៈនិងចិត្តគំនិតដែលផ្នែកលើខ្នាតតម្រាក្នុងគម្ពីរ។
ខ្នាតតម្រាក្នុងគម្ពីរបានចែងយ៉ាងច្បាស់លាស់អំពីការស្រឡាញ់ភេទដូចគ្នា ឬរួមដំណេកជាមួយមនុស្សភេទដូចគ្នា។ គម្ពីរដែលជាបណ្ដាំរបស់ព្រះចែងថា៖
«អ្នករាល់គ្នាមិនត្រូវរួមដំណេកជាមួយនឹងបុរស ដូចរួមដំណេកជាមួយនឹងស្ត្រីឡើយ»។—ច្បាប់លេវី ១៨:២២
«ព្រះបានទុកឲ្យពួកគេប្រព្រឹត្តអំពើស្មោកគ្រោកតាមចិត្តប៉ងប្រាថ្នារបស់ពួកគេ។ . . . ព្រះទុកឲ្យពួកគេបំពេញចំណង់ដ៏គួរស្អប់ខ្ពើមខាងផ្លូវភេទ ព្រោះពួកស្រីៗក្នុងចំណោមពួកគេបានលះបង់ការរួមភេទតាមធម្មជាតិ ទៅប្រព្រឹត្តផ្ទុយពីធម្មជាតិវិញ»។—រ៉ូម ១:២៤, ២៦
«កុំច្រឡំឲ្យសោះ! អ្នកដែលប្រព្រឹត្តអំពើប្រាសចាកសីលធម៌ខាងផ្លូវភេទ អ្នកដែលគោរពបូជារូបព្រះ អ្នកផិតក្បត់ បុរសដែលសុខចិត្តបម្រើបុរសឯទៀតខាងផ្លូវភេទ បុរសដែលរួមដំណេកជាមួយនឹងបុរសឯទៀត ពួកចោរ មនុស្សលោភលន់ អ្នកប្រមឹកស្រា អ្នកជេរប្រមាថ និងអ្នកគំរាមយកទ្រព្យ នឹងមិនទទួលរាជាណាចក្ររបស់ព្រះជាមត៌កឡើយ»។—កូរិនថូសទី១ ៦:៩, ១០
តាមពិតខ្នាតតម្រារបស់ព្រះគឺសម្រាប់មនុស្សទាំងអស់ មិនថាពួកគេចូលចិត្តភេទដូចគ្នាឬស្រឡាញ់ភេទដូចគ្នាទេ។ ហេតុនេះ មនុស្សគ្រប់រូបត្រូវខំព្យាយាមយ៉ាងខ្លាំងក្នុងការគ្រប់គ្រងអារម្មណ៍របស់ខ្លួន ដើម្បីកុំធ្វើអ្វីដែលព្រះមិនពេញចិត្ត។—កូឡុស ៣:៥
តើនេះមានន័យថា . . .?
តើនេះមានន័យថាគម្ពីរលើកស្ទួយចិត្តគំនិតឲ្យស្អប់មនុស្សដែលស្រឡាញ់ភេទដូចគ្នាឬទេ?
មិនមែនទេ។ គម្ពីរមិនដែលលើកស្ទួយឬបង្រៀនមនុស្សឲ្យស្អប់អ្នកដែលស្រឡាញ់ភេទដូចគ្នា ឬមនុស្សខ្ទើយឡើយ។ ផ្ទុយទៅវិញ គម្ពីរបង្រៀនយើងឲ្យ‹ខំប្រឹងមានសន្តិភាពជាមួយនឹងមនុស្សទាំងអស់› ទោះជាពួកគេមានរបៀបរស់នៅបែបណាក៏ដោយ។ (ហេប្រឺ ១២:១៤) ដូច្នេះ ប្រសិនបើអ្នកណាធ្វើបាបគេ ឬនិយាយបញ្ឈឺចិត្តគេ ឬបង្កឲ្យមានការស្អប់ខ្ពើម ឬធ្វើអ្វីក៏ដោយដែលជាការប្រមាថមើលងាយដល់មនុស្សដែលស្រឡាញ់ភេទដូចគ្នា អ្នកនោះគឺប្រព្រឹត្តផ្ទុយពីគម្ពីរហើយ។
តើនេះមានន័យថាគ្រិស្តសាសនិកគួរប្រឆាំងច្បាប់រដ្ឋដែលអនុញ្ញាតឲ្យមនុស្សភេទដូចគ្នារៀបការឬទេ?
គម្ពីរបង្ហាញថាខ្នាតតម្រារបស់ព្រះស្ដីអំពីអាពាហ៍ពិពាហ៍ គឺបុរសម្នាក់ត្រូវរៀបការជាមួយនឹងស្ត្រីម្នាក់។ (ម៉ាថាយ ១៩:៤-៦) ក៏ប៉ុន្តែ ច្បាប់ស្ដីអំពីការរៀបការរវាងមនុស្សភេទដូចគ្នា គឺទាក់ទងនឹងរឿងនយោបាយ មិនទាក់ទងនឹងរឿងសីលធម៌ទេ។ គម្ពីរប្រាប់គ្រិស្តសាសនិកឲ្យរក្សាអព្យាក្រឹតភាពក្នុងរឿងនយោបាយ។ (យ៉ូហាន ១៨:៣៦) ម្ល៉ោះហើយ គ្រិស្តសាសនិកមិនគាំទ្រឬប្រឆាំងនឹងច្បាប់រដ្ឋអំពីអាពាហ៍ពិពាហ៍រវាងមនុស្សភេទដូចគ្នា ឬការស្រឡាញ់មនុស្សភេទដូចគ្នានោះឡើយ។
ចុះបើ . . .?
ចុះបើមនុស្សម្នាក់ដែលមានជីវិតស្រឡាញ់ភេទដូចគ្នា តើគាត់អាចកែប្រែបានទេ?
គាត់អាចកែប្រែបាន។ តាមពិតនៅសតវត្សរ៍ទី១ មនុស្សខ្លះដែលមានជីវិតបែបនោះ ពួកគេបានកែប្រែមែន! បន្ទាប់ពីគម្ពីរចែងថាមនុស្សដែលរួមភេទជាមួយនឹងមនុស្សភេទដូចគ្នា នឹងមិនទទួលរាជាណាចក្ររបស់ព្រះជាមត៌កឡើយ គម្ពីរក៏ចែងទៀតថា៖«អ្នករាល់គ្នាខ្លះធ្លាប់ជាមនុស្សបែបនោះ»។—កូរិនថូសទី១ ៦:១១
តើនេះមានន័យថាអ្នកដែលឈប់រួមភេទជាមួយនឹងមនុស្សភេទដូចគ្នា នឹងលែងមានអារម្មណ៍ចង់មានជីវិតដូចពីមុនឬទេ? មិនមែនទេ។ គម្ពីរចែងថា៖«ចូរបំពាក់ខ្លួនដោយបុគ្គលិកលក្ខណៈថ្មី ដែលកំពុងត្រូវកែប្រែឲ្យថ្មីតាមរយៈចំណេះត្រឹមត្រូវ»។ (កូឡុស ៣:១០) ដូច្នេះ មនុស្សដែលធ្លាប់រួមភេទជាមួយនឹងមនុស្សភេទដូចគ្នា គាត់ត្រូវបន្តកែប្រែខ្លួនជានិច្ច។
ចុះបើមនុស្សដែលចង់ធ្វើតាមខ្នាតតម្រារបស់ព្រះ នៅតែមានអារម្មណ៍ស្រឡាញ់ភេទដូចគ្នា?
ជាធម្មតា ពេលអ្នកណាម្នាក់កើតមានអារម្មណ៍ដូច្នោះ គាត់អាចសម្រេចចិត្តបញ្ឈប់អារម្មណ៍នោះ ឬធ្វើអ្វីមួយដើម្បីមិនឲ្យមានអារម្មណ៍នោះបន្តទៀត។ តើតាមរបៀបណា? គម្ពីរចែងថា៖«ចូរឲ្យឫទ្ធានុភាពរបស់ព្រះបន្តដឹកនាំអ្នករាល់គ្នា ហើយអ្នករាល់គ្នានឹងមិនបំពេញតាមសេចក្ដីប៉ងប្រាថ្នានៃរូបកាយឡើយ»។—កាឡាទី ៥:១៦
សូមកត់សម្គាល់ថា ខនោះមិនបាននិយាយថាបុគ្គលដែលធ្លាប់ស្រឡាញ់ភេទដូចគ្នានឹងលែងមានសេចក្ដីប៉ងប្រាថ្នានៃរូបកាយឡើយ។ ផ្ទុយទៅវិញ បុគ្គលនោះឲ្យឫទ្ធានុភាពរបស់ព្រះដឹកនាំគាត់ ដោយសិក្សាគម្ពីរនិងអធិដ្ឋានជាទៀងទាត់។ យ៉ាងនេះ គាត់នឹងមានកម្លាំងដើម្បីតស៊ូយកឈ្នះសេចក្ដីប៉ងប្រាថ្នាទាំងនោះ។
ដាវីឌដែលបានត្រូវរៀបរាប់ខាងលើបានប្រាប់ថា នេះគឺជាការពិត ជាពិសេសក្រោយពីគាត់បានប្រាប់រឿងរបស់ខ្លួនដល់ឪពុកម្ដាយគាត់ដែលជាគ្រិស្តសាសនិក ថែមទាំងធ្វើតាមដំបូន្មានពីគម្ពីរផងដែរ។ ដាវីឌនិយាយថា៖«ខ្ញុំមានអារម្មណ៍ដូចជាបន្ទុកដ៏សែនធ្ងន់បានត្រូវលើកចេញពីស្មារបស់ខ្ញុំ។ បើខ្ញុំប្រាប់ឪពុកម្ដាយឲ្យបានឆាប់ជាងនេះ ខ្ញុំនឹងសប្បាយរីករាយកាន់តែខ្លាំងក្នុងភាពយុវវ័យរបស់ខ្ញុំ»។
សរុបទៅ ពេលយើងធ្វើតាមខ្នាតតម្រាសីលធម៌របស់ព្រះយេហូវ៉ា យើងនឹងមានសុភមង្គលកាន់តែច្រើន។ យើងជឿជាក់ថាខ្នាតតម្រារបស់លោក«គឺសុចរិត ធ្វើឲ្យចិត្តរីករាយ» ហើយ«អ្នកណាដែលបន្តធ្វើតាម អ្នកនោះនឹងបានរង្វាន់ដ៏ធំ»។—ចម្រៀងសរសើរព្រះ ១៩:៨, ១១
លោកអ្នកក៏ប្រហែលជាចូលចិត្តដែរ
សំណួរពីយុវវ័យ
ខ្ញុំមានចិត្តលើមនុស្សភេទដូចខ្ញុំ តើនេះមានន័យថាខ្ញុំស្រឡាញ់ភេទដូចគ្នាឬ?
តើខុសទេដែលមានចំណង់ផ្លូវភេទចំពោះមនុស្សភេទដូចគ្នា? តើប្អូនគួរធ្វើយ៉ាងណា?
