សំណួរពីយុវវ័យ
តើការជេរពិតជាអាក្រក់ខ្លាំងឬ?
ប្អូនប្រុសគ្រិស្តតូហ្វើដែលមានអាយុ១៧ឆ្នាំបានរៀបរាប់ថា៖«ខ្ញុំតែងតែលឺពាក្យជេរជារឿយៗ ដូច្នេះខ្ញុំមិនភ្ញាក់ផ្អើលទេ ដោយសារនេះស្ដាប់ទៅជារឿងធម្មតាទៅហើយសម្រាប់ខ្ញុំ»។
ប្អូនស្រីរេបិកាដែលមានអាយុ១៩ឆ្នាំបាននិយាយថា៖«ពេលខ្ញុំនៅក្មេង ខ្ញុំតែងតែប្រើពាក្យជេរ នេះពិតជាងាយស្រួលក្នុងការមានទម្លាប់អាក្រក់នេះ ប៉ុន្តែវាពិតជាពិបាកក្នុងការបំបាត់ចោលទម្លាប់នេះ»។
សំណួរចម្លើយ
តើអ្នកមានប្រតិកម្មយ៉ាងណាពេលឮអ្នកឯទៀតប្រើពាក្យជេរ?
ខ្ញុំមិនមិនភ្ញាក់ផ្អើលទេ ព្រោះនេះជារឿងធម្មតាហើយសម្រាប់ខ្ញុំ។
ពេលខ្លះខ្ញុំទើសចិត្តដែរ ប៉ុន្តែខ្ញុំទទួលយកបាន។
ខ្ញុំមិនចូលចិត្តពាក្យជេរទាល់តែសោះ ហើយខ្ញុំពិបាកទទួលយកណាស់។
តើអ្នកប្រើពាក្យជេរច្រើនប៉ុណ្ណា?
មិនធ្លាប់
ម្ដងម្កាល
ជាញឹកញយ
តាមទស្សនៈរបស់អ្នក តើអ្នកគិតថាការប្រើពាក្យអាក្រក់ជារឿងតូចតាចឬជារឿងធ្ងន់ធ្ងរ?
ជារឿងតូចតាច
ជារឿងធ្ងន់ធ្ងរ
មូលហេតុដែលរឿងនេះសំខាន់
តើអ្នកគិតថាការប្រើពាក្យជេរជារឿងធ្ងន់ធ្ងរទេ? អ្នកប្រហែលជានិយាយថា៖‹មិនមែនជារឿងធ្ងន់ធ្ងរទេ ដោយសារនៅក្នុងពិភពលោកមានបញ្ហាធ្ងន់ធ្ងរជាងនេះជាច្រើនដែលយើងត្រូវព្រួយបារម្ភ ម្យ៉ាងទៀតអ្នកណាក៏ជេរដែរ!›។ ប៉ុន្តែ តើការគិតបែបនេះត្រឹមត្រូវទេ?
មានមនុស្សជាច្រើនបានបដិសេធមិនប្រើពាក្យសម្ដីអាក្រក់ ព្រោះពួកគេមានមូលហេតុត្រឹមត្រូវដែលអ្នកឯទៀតមិនធ្លាប់គិត។ ជាឧទាហរណ៍:
ការប្រើពាក្យអាក្រក់អាចបង្ហាញឲ្យឃើញថាអ្នកជាមនុស្សបែបណា។ ពាក្យសម្ដីដែលអ្នកនិយាយបង្ហាញពីអ្វីដែលមាននៅក្នុងចិត្តរបស់អ្នក។ ការប្រើពាក្យសម្ដីអាក្រក់អាចបង្ហាញថាអ្នកជាមនុស្សដែលមិនចេះគិតអំពីអារម្មណ៍របស់អ្នកឯទៀត។ តើអ្នកជាមនុស្សបែបនេះឬ?
គម្ពីរចែងថា៖«អ្វីៗដែលចេញពីមាត់ នោះចេញពីក្នុងចិត្តមក»។—ម៉ាថាយ ១៥:១៨
ការជេរអាចបណ្ដាលឲ្យអ្នកឯទៀតគិតមិនល្អចំពោះអ្នក។ សៀវភៅ (Cuss Control) រៀបរាប់ថា៖«របៀបដែលយើងនិយាយអាចបង្ហាញថាអ្នកណាគួរជាមិត្តភក្តិរបស់យើង ហើយយើងគួរទទួលការគោរពច្រើនប៉ុណ្ណាពីក្រុមគ្រួសារនិងអ្នករួមការងារ ហើយនេះក៏មានឥទ្ធិពលទៅលើទំនាក់ទំនងរបស់យើងជាមួយនឹងអ្នកឯទៀតដែរ។ ការមានទំនាក់ទងល្អអាចមានឥទ្ធិពលទៅលើការទទួលការងារថ្មី តំណែងថ្មីនិងរបៀបដែលអ្នកឯទៀតប្រព្រឹត្តមកលើយើង»។ សៀវភៅនោះក៏បានប្រាប់ទៀតថា៖«តើអ្នកនឹងមានទំនាក់ទំនងបែបណាជាមួយអ្នកឯទៀត បើអ្នកមិនប្រើពាក្យជេរ?»។
គម្ពីរចែងថា៖«ចូរអ្នករាល់គ្នាបោះបង់ចោល . . . ពាក្យប្រមាថមើលងាយ»។—អេភេសូរ ៤:៣១
ការជេរមិនធ្វើឲ្យអ្នកឯទៀតសរសើរអ្នកទេ។ សៀវភៅរបស់លោក អាឡិច ផាកឃើដែលមានចំណងជើងថា (How Rude!) បានរៀបរាប់ថា៖«បុគ្គលដែលតែងតែជេរនាំឲ្យអ្នកឯទៀតធុញ»។ គាត់បានបន្ថែមទៀតថា៖«ការប្រើពាក្យជេរមិនធ្វើឲ្យបុគ្គលម្នាក់មើលទៅជាអ្នកចេះដឹង កំប្លែង និងមានប្រាជ្ញានោះទេ។ បើសិនជាអ្នកជាមនុស្សដែលនិយាយមិនច្បាស់លាស់ និងមិនចេះគិតមុននឹងនិយាយ នេះនឹងមានឥទ្ធិពលទៅលើរបៀបគិតគូររបស់អ្នក»។
គម្ពីរចែងថា៖«កុំឲ្យពាក្យអាក្រក់ណាមួយចេញពីមាត់អ្នករាល់គ្នាឡើយ»។—អេភេសូរ ៤:២៩
អ្វីដែលអ្នកអាចធ្វើ
កំណត់គោលដៅ។ សូមព្យាយាមឈប់ប្រើពាក្យអាក្រក់ក្នុងរយៈពេលមួយខែឬតិចជាង។ អ្នកគួរតាមដានមើលការរីកចម្រើនរបស់អ្នកនៅលើតារាងឬប្រតិទិន។ ដើម្បីយកឈ្នះទម្លាប់មិនល្អនេះ អ្នកប្រហែលជាត្រូវធ្វើតាមជំហានបន្ថែមទៀតដែរ។ ជាឧទាហរណ៍:
ជៀសវាងការកម្សាន្តណាដែលរួមបញ្ចូលការប្រើពាក្យអាក្រក់។ គម្ពីរចែងថា៖«ការសេពគប់អាក្រក់បង្ខូចការប្រព្រឹត្តល្អ»។ (កូរិនថូសទី១ ១៥:៣៣ កំណត់សម្គាល់) «ការសេពគប់»មិនគ្រាន់តែជាទំនាក់ទំនងរវាងបុគ្គលម្នាក់និងបុគ្គលម្នាក់ទៀតនោះទេ តែនេះក៏រួមបញ្ចូលការកម្សាន្តដែរដូចជា រឿងដែលអ្នកមើល ចម្រៀងដែលអ្នកស្ដាប់ និងហ្គេមវីដេអូដែលអ្នកលេង។ ប្អូនប្រុសខេណិតដែលមានអាយុ១៧ឆ្នាំបាននិយាយថា៖«ពេលខ្លះយើងច្រៀងតាមចម្រៀងដែលយើងចូលចិត្តដោយមិនខ្វល់ថាក្នុងចម្រៀងនោះមានពាក្យជេរទេ ដោយសារតែបទនោះមានភ្លេងពីរោះ»។
ចូរបង្ហាញឲ្យអ្នកឯទៀតឃើញថាអ្នកមានភាពចាស់ទុំ។ បុគ្គលខ្លះប្រើពាក្យជេរដោយសារពួកគេគិតថា នេះធ្វើឲ្យពួកគេមើលទៅជាមនុស្សពេញវ័យ។ ប៉ុន្តែការពិតគឺផ្ទុយពីនេះ។ គម្ពីរចែងថា បុគ្គលដែលមានភាពចាស់ទុំ«ប្រើប្រាស់សមត្ថភាពយល់ដឹង . . . សមត្ថភាពនោះបានត្រូវបង្វឹកបង្ហាត់ដើម្បីសម្គាល់អ្វីដែលខុសនិងអ្វីដែលត្រូវ»។ (ហេប្រឺ ៥:១៤) ពួកគេនឹងមិនកែប្រែខ្នាតតម្រារបស់ខ្លួនដើម្បីធ្វើឲ្យអ្នកឯទៀត«កោតសរសើរ»នោះទេ។
មែនហើយ ពាក្យអាក្រក់បង្ខូចចិត្តគំនិត។ សៀវភៅ (Cuss Control) បានរៀបរាប់ថា ពិភពលោកគឺអាក្រក់ស្រាប់ទៅហើយ «ដូច្នេះពេលមនុស្សប្រើពាក្យអាក្រក់ នោះធ្វើឲ្យពិភពលោកកាន់តែអាក្រក់ថែមទៀត។ ចូររួមចំណែកក្នុងការបំបាត់ពាក្យអាក្រក់។ ធ្វើដូចនេះ អ្នកនឹងមានអារម្មណ៍ល្អជាងអំពីខ្លួនឯង ហើយអ្នកឯទៀតក៏មានអារម្មណ៍ល្អចំពោះអ្នកដែរ»។