Lalai 55:1-23
Kɛhã lalatsɔɔlɔ lɛ; atswa kpãa saŋku kɛlá. Maskil.* David nɔ.
55 Ao Nyɔŋmɔ, bo misɔlemɔ lɛ toi,+Kaaku ohiɛ ofɔ̃ fai ni mikpaa bo koni ona mi mɔbɔ lɛ nɔ.*+
2 Bo mi toi jogbaŋŋ, ni ohere mi nɔ.+
Mihaomɔi lɛ hãaa mihe ajɔ mi,+Ni mifee basaa
3 Yɛ nɔ ni mihenyɛlɔ lɛ kɛɔ lɛ hewɔKɛ bɔ ni mɔ fɔŋ lɛ haoɔ mi lɛ hewɔ.
Ejaakɛ amɛkɛ naagbai shwieɔ minɔ,Ni amɛbɛɔ mi amɛwoɔ amɛmli kɛ mlifu.+
4 Mitsui werɛ eho ehe yɛ mimli,+Ni gbele he gbeyeishemɔ emɔ mi.+
5 Gbeyei mɔɔ mi, ni mitsui fãa,Ni mihe kpokpoɔ waa.
6 Mikɛɔ daa akɛ: “Miná ni miyɛ fiji tamɔ okpo!
Kulɛ mafiliki kɛya ni mayahi he ko ni yɔɔ shweshweeshwe.
7 Naa! Kulɛ mafiliki kɛya shɔŋŋ.+
Kulɛ mayahi ŋa lɛ nɔ.+ (Sela)
8 Kulɛ mafee oya mayaba abo yɛ he koKɛje kɔɔyɔɔ ni tswaa waa lɛ naa, kɛje ahum lɛ naa.”
9 Ao Yehowa, futumɔ amɛyiŋ, ni ofite amɛyiŋtoi lɛ,*+Ejaakɛ awuiyeli kɛ béi sɔŋŋ minaa yɛ maŋ lɛ mli.
10 Jetsɛremɔ kɛ jenamɔ fɛɛ lɛ amɛnyiɛɔ maŋ lɛ gbogboi lɛ anɔ;Malemɔ kɛ naagbai sɔŋŋ yɔɔ mli.+
11 Nifitemɔ yɛ maŋ lɛ mli;Yiwaa kɛ lakamɔ shiii henaabuamɔhe lɛ kɔkɔɔkɔ.+
12 Ejaakɛ jeee henyɛlɔ ko ji mɔ ni wieɔ eshiɔ mi lɛ;+Kulɛ makɔ lɛ nakai.
Jeee mɔ ko ni nyɛɔ mi ni ete shi ewo mi lɛ;Kulɛ matee mihe yɛ ehiɛ.
13 Shi bo, gbɔmɔ tamɔ mi nɔŋŋ,*+Mi diɛŋtsɛ mihe gbɔmɔ ni mile waa.+
14 Kulɛ nanemɛi kpaakpa ji wɔ;Wɔfataa mɛi babaoo ahe kɛnyiɛɔ kɛyaa Nyɔŋmɔ shĩa lɛ.
15 Amɛhiɛ akpãtã!+
Amɛkpeleke shi kɛya Gbonyobu* lɛ mli hiɛkãalɔi;Ejaakɛ efɔŋ kɛ amɛ yɛ ni eyɛ amɛmli.
16 Mi lɛ, mabo matsɛ Nyɔŋmɔ,Ni Yehowa baahere miyiwala.+
17 Mihaoɔ ni mikɛ̃mɔɔ* gbɛkɛ kɛ leebi kɛ shwane,+Ni enuɔ migbee.+
18 Ebaajie* mi kɛje mɛi ni kɛ mi nɔɔ lɛ adɛŋ ni ebaahã mitoiŋ ajɔ mi,*Ejaakɛ mɛi ni ete shi amɛwo mi lɛ ayi fa.+
19 Nyɔŋmɔ, mɔ ni ta maŋtsɛ sɛi nɔ kɛjɛ blema tɔ̃ɔ lɛ+Baanu ni ebaahã amɛ hetoo.+ (Sela)
Ejaakɛ amɛsheee Nyɔŋmɔ gbeyei,+Ni amɛsumɔɔɔ ni amɛtsakeɔ.
20 Etutua* mɛi ni toiŋjɔlɛ yɔɔ ekɛ amɛteŋ lɛ;+Eku ekpaŋmɔ lɛ mli.+
21 Ewiemɔi yɛ trotro fe bɔta,+Shi béi yɛ etsui mli.
Ewiemɔi hãa mɔ he jɔɔ lɛ fe mu,Shi amɛji klantei ni naa ba.+
22 Shɛ ojatsu lɛ ofɔ̃ Yehowa nɔ,+Ni ebaaye ebua bo.+
Ehãŋ jalɔ agbee shi* kɔkɔɔkɔ.+
23 Shi bo, Ao Nyɔŋmɔ, bo obaahã amɛkpeleke shi kɛya bu ni mli kwɔ waa lɛ mli.+
Mɛi ni eye lá yi sɔ̃ kɛ mɛi ni lakaa mɛi lɛ yeŋ amɛwala gbii lɛ fã po.+
Shi mi lɛ, mikɛ mihiɛ baafɔ̃ onɔ.
Shishigbɛ Niŋmaa
^ Kwɛmɔ Wiemɔi Titrii Amligbalamɔ lɛ.
^ Loo “Kɛ́ misɔle koni oye obua mi lɛ, kaatee ohe.”
^ Hebri sht. ŋm., “ni ogbala amɛlilɛi mli.”
^ Loo “gbɔmɔ ni kɛ mi yeɔ egbɔ.”
^ Hebri mli lɛ, “Sheol,” ni ji, mfonirifeemɔŋ gbonyobu kome kɛhã adesai. Kwɛmɔ Wiemɔi Titrii Amligbalamɔ lɛ.
^ Loo “miyeɔ ŋkɔmɔ.”
^ Hebri sht. ŋm., “Ebaakpɔ̃.”
^ Loo “ebaahã misusuma toiŋ ajɔ lɛ.”
^ Ni ji, mɔ ni tsutsu ko lɛ eji enaanyo ni awie ehe yɛ kuku 13 kɛ 14 lɛ.
^ Loo “adidãa.”
