Lalai 31:1-24
Kɛhã lalatsɔɔlɔ lɛ. Lala ni David fo.
31 Ao Yehowa, bo abo mibaa.+
Kaawo mi hiɛgbele gbi ko gbi ko.+
Jiemɔ mi yɛ ojalɛ lɛ hewɔ.+
2 Ba otoi shi ohã mi.*
Ba oya ni obajie mi.+
Tsɔ teemɔhe yɛ gɔŋ nɔ ohã mi,He ko ni yɔɔ shweshweeshwe koni ohere mi.+
3 Ejaakɛ bo ji mitɛsaa kɛ miteemɔhe;+Ogbɛ́i lɛ hewɔ lɛ,+ obaanyiɛ mihiɛ ni otsɔɔ mi gbɛ.+
4 Obaajie mi kɛje yaa ni amɛkɛtsɔ mi tsɔne yɛ teemɔŋ lɛ mli,+Ejaakɛ bo ji mimɔɔ.+
5 Bo odɛŋ mikɛ mimumɔ lɛ woɔ.+
Ao Yehowa, anɔkwale Nyɔŋmɔ,* bo okpɔ̃ mi.+
6 Minyɛɔ mɛi ni jáa amagai ni sɛɛnamɔ ko bɛ amɛhe lɛ,Shi mi lɛ, mikɛ mihiɛ efɔ̃ Yehowa nɔ.
7 Manya waa yɛ osuɔmɔ ni tsakeee lɛ hewɔ,Ejaakɛ ona mimanehulu lɛ;+Ole nɔ ni haoɔ mi waa lɛ.*
8 Okɛ mi woko mihenyɛlɔ lɛ dɛŋ,Shi okɛ mi eyadamɔ he ko ni yɔɔ shweshweeshwe.*
9 Ao Yehowa, naa mi mɔbɔ, ejaakɛ mihao.
Awerɛhoyeli ehã mihiŋmɛi nɔ eha,+ migbɔmɔtso muu lɛ fɛɛ* egbɔjɔ.+
10 Awerɛho sɔŋŋ eyi miwala mli obɔ+Ni miwala afii lɛ hu eyi kɛ kɛ̃ɛmɔ.+
Mitɔmɔ lɛ hewɔ lɛ, mihewalɛ miitã;Miwui lɛ amli hu egbɔjɔ.+
11 Mihenyɛlɔi lɛ fɛɛ yeɔ mihe fɛo,+Titri lɛ, mɛi ni bɛŋkɛ mi kpaakpa lɛ.
Ni mɛi ni le mi lɛ sheɔ mi gbeyei;Kɛ́ amɛna mi yɛ maŋ lɛ mli lɛ, amɛjoɔ foi.+
12 Amɛjie mi kɛje amɛtsui* mli ni amɛhiɛ ekpa minɔ, oookɛɛ migbo;Mitsɔ tamɔ gbɛ́ ni ejwa.
13 Minu nibii gbohii babaoo ni mɛi wieɔ lɛ;Nibii ni yɔɔ gbeyei ebɔle mi.+
Kɛ́ amɛbua amɛhe naa amɛfee ekome amɛwo mi lɛ,Amɛtsɔ̃ɔ ŋaa koni amɛgbe mi.*+
14 Shi mi lɛ, Ao Yehowa, bo onɔ mikɛ mihiɛ efɔ̃.+
Miikɛɛ akɛ: “Bo ji mi-Nyɔŋmɔ.”+
15 Migbii* lɛ yɛ odɛŋ.
Jiemɔ mi kɛje mihenyɛlɔi kɛ mɛi ni waa mi yi lɛ adɛŋ.+
16 Tse ohiɛ ohã otsulɔ.+
Okɛ osuɔmɔ ni tsakeee lɛ ahere mi.
17 Ao Yehowa, kɛ́ mibo mitsɛ bo lɛ, kaawo mi hiɛgbele.+
Hã mɛi fɔji lɛ ahiɛ agboi;+Hã amɛbu amɛnaa yɛ Gbonyobu* lɛ mli.+
18 Hã amale naabui lɛ afee diŋŋ,+Naabui ni kɛ henɔwomɔ wieɔ nibii wuji amɛshiɔ jalɔi ni amɛbuuu amɛ amɛhãaa nɔ ko lɛ.
19 Ekpakpa ni ofeɔ lɛ fa babaoo diɛŋtsɛ!+
Okɛto ohã mɛi ni sheɔ bo gbeyei lɛ,+Ni ojieɔ lɛ kpo otsɔɔ mɛi ni baa bo abo lɛ yɛ gbɔmɛi fɛɛ ahiɛ.+
20 Okɛ amɛ baato teemɔhe ni yɔɔ ohiɛ lɛ+Kɛje mɛi ni tsɔɔ ŋaa lɛ ahiɛ;Okɛ amɛ baato oshihilɛhe lɛKɛje lilɛii ni béɔ lɛ ahiɛ.+
21 Ajie Yehowa yi,Ejaakɛ ejie esuɔmɔ ni tsakeee lɛ kpo yɛ naakpɛɛ gbɛ nɔ etsɔɔ mi+ yɛ maŋ ni awo he ka mli.+
22 Mi lɛ, mitsui fã ni mikɛɛ akɛ:
“Mihiɛ baakpãtã yɛ ohiɛ.”+
Shi be ni mibo mitsɛ bo lɛ, onu mifaikpamɔi kɛhã yelikɛbuamɔ lɛ.+
23 Nyɛsumɔa Yehowa, nyɛ mɛi fɛɛ ni nyɛyeɔ lɛ anɔkwa lɛ!+
Yehowa buɔ anɔkwafoi ahe,+Shi mɔ fɛɛ mɔ ni wóɔ ehe nɔ lɛ, ewoɔ lɛ nyɔmɔ babaoo.+
24 Nyɛfea ekãa ni nyɛwajea nyɛtsui,+Nyɛ mɛi fɛɛ ni nyɛmiimɛ Yehowa.+
Shishigbɛ Niŋmaa
^ Loo “Kotomɔ shi koni obo mi toi.”
^ Loo “Nyɔŋmɔ anɔkwafo.”
^ Loo “misusuma haomɔi lɛ.”
^ Loo “he ko ni da.”
^ Loo “misusuma kɛ mimusu fɛɛ.”
^ Loo “amɛjwɛŋmɔ.”
^ Loo “misusuma.”
^ Hebri sht. ŋm., “Mibei.”
^ Hebri mli lɛ, “Sheol,” ni ji, mfonirifeemɔŋ gbonyobu kome kɛhã adesai. Kwɛmɔ Wiemɔi Titrii Amligbalamɔ lɛ.
