Ŋmalɛ Krɔŋkrɔŋ lɛ, ni ji Biblia lɛ, ji wolo ni Nyɔŋmɔ hã aŋma ní etsɔɔ nɔ ekɛ wɔ fɛɛ wieɔ. Esa akɛ wɔkase koni wɔle mɔ ni ŋma lɛ jogbaŋŋ. (Yohane 17:3; 2 Timoteo 3:16) Yehowa Nyɔŋmɔ hãa aleɔ yiŋ ni eto ehã adesai kɛ shikpɔŋ lɛ, ni ji amɛshĩa lɛ, yɛ Biblia lɛ mli.—1 Mose 3:15; Kpojiemɔ 21:3, 4.

Wolo ko wolo ko bɛ ni náa mɛi anɔ hewalɛ tamɔ Biblia lɛ. Biblia lɛ woɔ wɔ hewalɛ ní wɔjie Yehowa sui ni ji suɔmɔ, mɔbɔnalɛ, kɛ musuŋtsɔlɛ kpo. Ehãa mɛi náa hiɛnɔkamɔ, ni ewaa amɛ ni amɛfiɔ shi yɛ shihilɛi ni mli wawai po amli. Agbɛnɛ hu, ehãa anaa je nɛŋ nibii ni kɛ Nyɔŋmɔ suɔmɔnaa nii ni hi kɛwula shi lɛ kpãaa gbee lɛ faŋŋ.—Lala 119:105; Hebribii 4:12; 1 Yohane 2:15-17.

Aŋma Biblia lɛ klɛŋklɛŋ kwraa yɛ Hebri, Aramaik, kɛ Greek mli, ni atsɔɔ emuu lɛ fɛɛ loo efã ko shishi kɛtee wiemɔi ni fa fe 3,000 amli. No ji wolo ni atsɔɔ shishi kɛtee wiemɔi babaoo amli, ni aja fe woji krokomɛi fɛɛ yɛ yinɔsane mli. Esaaa akɛ enɛ feɔ wɔ naakpɛɛ. Biblia lɛ gba akɛ: “Abaashiɛ Maŋtsɛyeli lɛ he sane kpakpa nɛɛ [ni ji sane titri ni Biblia lɛ wieɔ he lɛ] yɛ shikpɔŋ lɛ nɔ fɛɛ koni akɛye jeŋmaji lɛ fɛɛ odase, ni no sɛɛ lɛ naagbee lɛ baaba.”—Mateo 24:14.

Akɛni wɔna akɛ Biblia lɛ mli sane lɛ he hiaa waa hewɔ lɛ, oti ni ma wɔhiɛ ji, ní wɔtsɔɔ shishi ni ekɛ bɔ ni aŋma lɛ klɛŋklɛŋ kwraa yɛ Hebri, Aramaik, kɛ Greek mli lɛ anyiɛ pɛpɛɛpɛ, ní agbɛnɛ hu, emli akã shi faŋŋ, ní ekanemɔ hu akawa. Saji Krokomɛi ni yɔɔ sɛɛgbɛ lɛ mli saneyitsei ni ji, “Taomɔ Nii Ni Esa Akɛ Ashɛ He Yɛ Biblia Shishitsɔɔmɔ Mli,” “Nibii Ni Yɔɔ Biblia Nɛɛ Mli,” kɛ “Bɔ Ni Fee Ni Wɔnine Shɛ Biblia Lɛ Nɔ” lɛ wieɔ Biblia shishitsɔɔmɔ mli taomɔ nii komɛi ni akɛtsu nii lɛ ahe, ni amɛtsɔɔ nibii ni yɔɔ Biblia nɛɛ mli lɛ hu amli.

Mɛi ni sumɔɔ Yehowa Nyɔŋmɔ, ní amɛjáa lɛ lɛ, sumɔɔ ni amɛná Nyɔŋmɔ Wiemɔ lɛ shishitsɔɔmɔ ko ni ja, ní shishinumɔ waaa. (1 Timoteo 2:4) Enɛ hewɔ lɛ, wɔtsɔɔ Biblia nɛɛ shishi kɛba Ga mli, ejaakɛ wɔmiisumɔ ni wɔtsɔɔ Jeŋ Hee Shishitsɔɔmɔ lɛ shishi kɛya wiemɔi babaoo amli bɔ ni wɔɔnyɛ. Wɔsumɔɔ bo, ni wɔmiisɔle ní oná Ŋmalɛ Krɔŋkrɔŋ nɛɛ he sɛɛ jogbaŋŋ be ni ‘otaoɔ Nyɔŋmɔ sɛɛ gbɛ, ni ona lɛ lɛɛlɛŋ’ lɛ.—Bɔfoi 17:27.