1, 2. Deskribí e biahe di Maria, i splika dikon e biahe tabata difísil p’e.

MARIA a purba di sinta un poko mas kómodo riba e buriku. E tabatin basta ora ta kore riba dje. Un poko mas dilanti, Hose tabata guia nan ku paso firme rumbo pa Bètlehèm. Maria a bolbe sinti e yu move den su barika.

² Maria “tabata serka di duna lus,” segun e relato di Beibel. (Luk. 2:5) Segun ku e pareha tabata pasa un kunuku tras di otro, kisas algun di e kunukeronan ku a mira nan a puntra nan mes pakiko un muhé den e kondishon ei tabata biahando. Kiko ­Maria tabata hasi asina leu for di su kas na Názarèt?

3. Ki tarea Maria a risibí, i kiko nos lo bai siña tokante Maria?

³ Tur kos a kuminsá algun luna promé, ora ku e mucha muhé hudiu akí a risibí un tarea úniko den historia humano: bira mama di e futuro Mesías, e Yu di Dios! (Luk. 1:35) Nèt ora ku e dianan pa Maria duna lus tabata yegando, e mester a hasi un biahe. Vários suseso durante e biahe ei a pone su fe na prueba. Laga nos wak kiko a yud’é keda fuerte den sentido spiritual.

4, 5. (a) Dikon Hose ku Maria tabata riba kaminda pa Bètlehèm? (b) E dekreto di Sésar a laga kua profesia kumpli?

⁴ Hose ku Maria no tabata e úniko hendenan di biahe. Emperador Sésar Ougusto a saka un dekreto ku tur habitante di e pais mester a bai nan stat natal pa registrá nan mes den un senso. Kiko Hose a hasi? Segun e relato: “Naturalmente Hose tambe a sali for di Galilea, for di e stat Názarèt, i a bai Hudea, na e stat di David ku yama Bètlehèm, pasobra e tabata di e kas i famia di David.”—Luk. 2:1-4.

⁵ No ta pa kasualidat Sésar a saka e dekreto ei nèt na e tempu ei. Un 700 aña mas promé, un profesia a bisa ku e Mesías lo a nase na Bètlehèm. Awor bon, tabatin un otro stat ku yama Bètlehèm ku a keda apénas 11 kilometer for di Názarèt. Ma e profesia a bisa spesífikamente ku e Mesías lo a bini di “Bètlehèm Efrata.” (Lesa Mikéas 5:2.) Pa un hende yega e pueblito ei for di Názarèt, e mester a biaha un distansia di 130 kilometer, pasando via Samaria, i dor di un área ku hopi seru. Ta e Bètlehèm ei Hose tabatin ku bai pa registrá su mes, pasobra esei tabata e stat natal di Rei David. I tantu Hose komo Maria tabata di e famia di David.

6, 7. (a) Dikon un biahe pa Bètlehèm lo no tabata nada fásil pa Maria? (b) Unabes Maria tabata kasá, kon esei a influensiá su desishonnan? (Wak tambe e nota.)

⁶ I kiko di Maria? El a apoyá Hose su desishon di kumpli ku e dekreto? Maria tabata sa ku e biahe lo tabata hopi pisá p’e. Probablemente tabata kuminsamentu di òktober i lo tabatin mas chèns riba yobida leve, ya ku tabata kasi final di e temporada seku. Ademas, na final di e biahe lo tabatin e parti mas pisá, pasobra Bètlehèm tabata situá riba un seru di mas ku 760 meter haltu. E biahe kasi sigur lo a dura mas largu ku normal, pasobra nan lo tabatin ku para hopi biaha pa Maria por a sosegá. Kualke hende muhé den su kondishon lo a preferá di keda kas, ­kaminda su famia i amigunan por a yud’é ora ku e momento di duna lus yega. Sin duda, e mester tabatin kurashi pa hasi e biahe akí.

⁷ Apesar di tur esei, Lukas a skirbi ku Hose “a bai pa registrá su mes huntu ku Maria.” Tambe e ta bisa ku Hose “a kasa” ku Maria di akuerdo ku e kompromiso matrimonial. (Luk. 2:4, 5) E echo ku Maria tabata kasá ku Hose a hasi un gran diferensia den e desishonnan ku Maria a tuma di e momento ei padilanti. El a konsiderá Hose komo su kabes i a aseptá e papel ku Dios a duna esposa komo ayudante di e esposo. Pues, el a apoyá e desishonnan di Hose fielmente. * Maria tabata dispuesto pa obedesé su kasá den un situashon ku no tabata nada fásil p’e, i asina el a demostrá su fe.

8. (a) Kiko mas kisas a motivá Maria pa bai Bètlehèm huntu ku Hose? (b) Dikon Maria su ehèmpel ta un gran animashon pa tur hende fiel na Dios?

⁸ Kiko mas lo por a motivá Maria pa obedesé Hose? Beibel no ta bisa si e tabata sa di e profesia ku a bisa ku e Mesías lo a nase na Bètlehèm. Pero por ta masha bon ku esei tabata e kaso, pasobra e profesia ei tabata bon konosí entre e lidernan religioso i asta entre e pueblo en general. (Mat. 2:​1-7; Huan 7:40-42) I Maria tabata konosé e Skritura bon. (Luk. 1:46-55) En todo kaso, Maria a disidí di hasi e biahe, sea pa obedesé su kasá, pa ­someté na un dekreto sivil, pa kumpli ku un profesia di Yehova òf debí na un kombinashon di e faktornan ei. Asina el a laga un bon ehèmpel pa nos. Yehova ta apresiá mashá ora un hende, sea hòmber òf muhé, ta demostrá un aktitut obedesidu i humilde. Anto Maria su ehèmpel ta un gran animashon pa tur persona fiel  na Dios, pasobra den e tempu akí hopi hende no ta konsiderá sumishon un birtut.

9, 10. (a) Riba kiko Maria ku Hose kisas a pensa ora nan tabata aserkando Bètlehèm? (b) Unda Hose ku Maria a pasa nochi, i dikon?

⁹ Maria lo mester a hala un rosea di alivio ora ku por fin el a kuminsá mira Bètlehèm leu ayá. Segun ku nan tabata subi e serunan, nan a pasa vários hòfi di oleifi (oleifi tabata un di e ­último frutanan pa ser kosechá). Kisas Maria ku Hose a pensa riba e historia di Bètlehèm. E tabata un pueblito asina chikitu ku, manera profeta Mikéas a bisa, ni sikiera e tabata ser kontá entre e statnan di Huda. Pero tabata einan ku mas ku mil aña promé personanan manera Boas, Noemí i despues David, a nase.

¹⁰ Ora Maria ku Hose a yega, nan a haña e pueblito yen yen di hende. Hopi a yega promé ku nan pa registrá, i no tabatin lugá pa nan den e lugá di hospedahe. * No a keda nan niun otro opshon ku pasa anochi den un stal. Nos por imaginá kon nèrvioso Hose a bira ora el a mira su kasá kuminsá sinti un doló ku ­nunka promé el a sinti. I e doló tabata bira kada bes mas fuerte. Figura bo, nèt einan su dolónan di parto a kuminsá!

11. (a) Dikon hende muhé di tur parti di mundu por komprondé kiko Maria a pasa aden? (b) Den ki sentido asina Hesus tabata “promé yu”?

¹¹ Hende muhé di tur parti di mundu sa kiko Maria a pasa aden. Un 4.000 aña promé, Yehova a profetisá ku debí na piká heredá, hende muhé lo sufri durante parto. (Gén. 3:16) I no tin nada pa indiká ku Maria tabata un eksepshon. Respetando Maria su privasidat i e manera ku e parto a tuma lugá, Lukas simplemente a bisa ku “el a duna lus na su promé yu, un yu hòmber.” (Luk. 2:7) Sí, su “promé yu” a nase, e promé di por lo ménos shete yu ku Maria a haña. (Mar. 6:3) Pero e yu akí tabata esun di mas spesial. E tabata no solamente Maria su promé yu, sino tambe “e promé di tur kreashon” di Yehova, sí, Dios su Yu unigénito!—Kol. 1:15.

12. Unda Maria a pone e bebi, i dikon realidat tabata otro for di loke ta keda presentá den hopi kuadro, obra teatral i esena di Pasku?

 ¹² Awor e relato ta agregá un detaye hopi konosí: “El a lor’é den paña i pon’é den un pesebre.” (Luk. 2:7) Masha hopi kuadro, obra teatral i esena di Pasku rònt mundu ta presentá esaki di un manera masha sentimental i irealístiko. Pero realidat tabata otro. Pa kuminsá, un pesebre ta un baki ku bestia di krio ta kome aden. Ademas, e famia tabata den un stal, sigur no e lugá di mas higiéniko òf ku holó mas agradabel, ni e tempu ei ni ­aworakí. I frankamente bisá, ningun mayor lo no skohe un lugá asina pa trese su yu na mundu si e tin otro opshon! Normalmente, mayornan ke lo mihó pa nan yunan. Maria ku Hose sigur lo kier a perkurá lo mihó pa e Yu di Dios!

13. (a) Kon Maria ku Hose a hasi lo mihó ku nan tabata por den nan sirkunstansia? (b) Kon mayornan sabí por imitá e ehèmpel di Hose ku Maria?

¹³ Pero nan no a laga e situashon desagradabel ei deskurashá nan. Simplemente nan a hasi lo mihó ku nan tabata por den e sirkunstansia ei. Por ehèmpel, Maria mes a sòru pa e yuchi i a lor’é bon den paña, i despues a pon’é drumi den e pesebre. ­Asina e yu lo a keda bon protehá i kayente. Asta den e situashon desagradabel akí, Maria a kuida su yu mas mihó posibel. Ademas, tantu é komo Hose tabata sa ku e kos di mas importante tabata pa kuid’é den sentido spiritual, esta, siñ’é stima Yehova. (Lesa Deuteronomio 6:6-8.) Mayornan sabí ta pone e mesun prioridatnan ku Hose ku Maria segun ku nan ta lanta nan yunan den e mundu djawe ku no ta wòri mes ku kuenta di sirbi Dios.

14, 15. (a) Dikon e wardadónan tabata ansioso pa mira e yu? (b) Kiko e wardadónan a hasi despues ku nan a mira Hesus den e stal?

¹⁴ Diripiente, un grupo di wardadó di karné a basha drenta e stal i kita e trankilidat ku tabata reina. Nan tabata ansioso pa mira e famia, foral e yu resien nasí. E hòmbernan akí tabata ­masha entusiasmá, i nan kara tabata bria di alegria. Poko promé, nan tabata huntu ku nan tounan den e serunan, pero nan a bini abou purá. * Nan a konta e mayornan sorprendí un kos maravioso ku a kaba di pasa ku nan. Meianochi, diripiente un angel a aparesé na nan. E gloria di Yehova a bria tur rònt di nan, i e angel a bisa nan ku e Kristu, òf Mesías, a kaba di nase na Bètlehèm. Nan lo a haña e yu chikitu einan, lorá den paña i drumí den un pesebre. Despues algu mas espektakular ainda a sosodé: un multitut grandi di angel ku tabata alabá Dios a presentá!—Luk. 2:8-14.

¹⁵ Ku rason e hòmbernan humilde akí a bini Bètlehèm purá! Nan lo mester a keda hopi emoshoná ora nan a haña e yu resien nasí presis manera e angel a deskribié. Nan no a tene e bon notisia pa nan so. “Nan a konta loke e angel a bisa nan . . . I tur hende ku a tende e kosnan ku e wardadónan di karné a konta nan a keda asombrá.” (Luk. 2:17, 18) Aparentemente e lidernan religioso di e tempu ei tabata menospresiá wardadó di karné. Sinembargo, tabata bisto ku Yehova sí a apresiá e hòmbernan humilde i fiel akí. Pero ki efekto e bishita akí tabatin riba Maria?

16. Kon Maria a demostrá ku e tabata un persona ku realmente a meditá, i kiko a yud’é mantené su fe fuerte?

¹⁶ Maria lo mester tabata morto kansá despues di e parto, pero tòg el a skucha atentamente tur loke a ser bisá. I no esei so, “Maria a warda tur e palabranan akí kuidadosamente den su kurason, i el a keda pensa riba kiko nan a nifiká.” (Luk. 2:19) E mucha muhé akí tabata realmente un persona ku a meditá, sí, el a pensa profundamente riba tur loke el a tende. El a komprondé kon importante e mensahe di e angel tabata. Su Dios, Yehova, tabata ke p’e sa ken e yu ku el a haña tabata i ki papel importante lo e bai tin. P’esei Maria a hasi mas ku skucha so. El a warda e palabranan den su kurason, ya asina e por a meditá riba nan bes tras bes den e lunanan i añanan binidero. Sin duda, e meditashon ei tabata e klave ku a yuda Maria mantené su fe fuerte durante henter su bida.—Lesa Hebreonan 11:1.

17. Kon nos por imitá e ehèmpel di Maria?

¹⁷ Abo awor, lo bo imitá e ehèmpel di Maria? Yehova a yena e páginanan di Beibel ku bèrdatnan spiritual sumamente importante. Pero nan lo no yuda nos ku nada si nos no presta atenshon na nan. Kon nos por hasi esei? Nos tin ku lesa Beibel ku regularidat, no komo un simpel obra literario sino komo e ­Palabra di Dios. (2 Tim. 3:16) Kaba, meskos ku Maria, nos tin ku warda e palabranan spiritual ei den nos kurason, i keda pensa riba kiko nan ta nifiká. Nos fe lo bira mas fuerte ora nos ta meditá riba loke nos ta lesa den Beibel i ta pensa riba maneranan pa pone e konseho di Yehova mas plenamente na práktika.

18. (a) Kon Maria ku Hose a kumpli ku Lei di Moises ora Hesus tabata bebi? (b) Kiko e ofrenda ku Hose ku Maria a presentá na e tèmpel a revelá tokante nan situashon finansiero?

¹⁸ Ora e bebi tabatin ocho dia, Maria ku Hose a laga sirkunsid’é, manera Lei di Moises a preskribí. I nan a duna e yu e nòmber Hesus, manera e angel a bisa nan. (Luk. 1:31) Despues, ora e yu tabatin 40 dia, nan a hib’é e tèmpel na Herúsalèm, un 10 kilometer leu for di Bètlehèm. Ei nan a presentá e ofrenda di purifikashon ku Lei a stipulá pa hende pober: dos tòrteldùif òf dos palomba pichon. Kisas nan a sinti bèrgwensa ku nan no por a ofresé e lamchi di karné i un palomba pichon òf tòrteldùif manera otro mayornan por a afòrt. Pero asta si tabata asina, nan a kumpli ku Lei lo mihó ku nan tabata por. En todo kaso, nan a haña un tremendo animashon ora nan tabata einan.—Lev. 12:6-8; Luk. 2:21-24.

19. (a) Kon Simeon a duna Maria mas palabra pa e warda den su kurason? (b) Kon Ana a reakshoná ora el a mira Hesus?

¹⁹ Simeon, un hòmber di edat, a aserká nan i a duna Maria mas palabra pa e warda den su kurason. Yehova a primintí e hòmber akí ku lo e mira e Mesías promé ku e muri, i su spiritu santu a revelá na dje ku e bebi Hesus tabata e Salbador primintí. Simeon a spièrta Maria tambe ku un dia lo e sinti un doló fuerte, komo si fuera di un spada largu ku ta pasa dor di su alma. (Luk. 2:25-35) Kisas e palabranan akí, pa duru ku nan tabata, a yuda Maria keda firme ora e momento difísil ei a yega, 33 aña despues. Despues di Simeon, un profeta ku yama Ana a mira e bebi ­Hesus, i el a kuminsá papia tokante dje ku tur hende ku tabata spera e liberashon di Herúsalèm.—Lesa Lukas 2:36-38.

20. Dikon Hose ku Maria a tuma un bon desishon di bai e tèmpel ku Hesus?

²⁰ Hose ku Maria a tuma un bon desishon di bai e kas di Yehova na Herúsalèm ku nan bebi. Asina nan a duna nan yu un bon komienso: pa restu di su bida el a keda bishitá e tèmpel di Yehova fielmente. Na e tèmpel, Hose ku Maria a ofresé Yehova lo mihó ku nan tabatin, i a kambio di esei nan a risibí instrukshon i palabranan di animashon. E dia ei, Maria siguramente a sali for di tèmpel ku un fe mas fuerte i ku su kurason yen di bèrdat spiritual importante pa meditá ariba i pa kompartí ku otro hende.

21. Kon nos por hasi sigur ku nos fe lo sigui bira mas fuerte, meskos ku tabata e kaso ku Maria?

²¹ Ta bunita pa mira ku hopi mayor djawe ta sigui e ­ehèmpel ei. Mayornan Testigu di Yehova ta bai reunion fielmente ku nan yunan. E mayornan ei ta duna loke nan por i ta ofresé palabranan di animashon na nan rumannan den fe. I nan ta sali for di e reunionnan kristian akí mas fuerte, mas felis i yen di kos bon pa kompartí ku otro hende. Ta un goso pa reuní huntu ku nan! Ora nos ta hasi esei, nos lo ripará ku nos fe lo sigui bira mas fuerte, meskos ku tabata e kaso ku Maria.