1, 2. (a) Kon un bishitante deskonosí a kumindá Maria? (b) Dikon esaki tabata un momento krusial den bida di Maria?

MARIA a hisa kara i asombrá el a keda wak e bishitante ku a kana drenta su kas. E persona akí no a puntra pa su tata ni su mama. Ta serka dje el a bini! E no por tabata di Názarèt; esei Maria tabata sa sigur. Den un pueblo chikitu asin’akí, un hende deskonosí ta yama atenshon mesora, i esun akí tur hende lo a ripará sigur. Pa kolmo, el a kumindá Maria na un manera masha straño, bisando: “Bon dia, abo ku ta sumamente bendishoná, Yehova ta ku bo.”—Lesa Lukas 1:26-28.

² Asina Beibel ta laga nos sera konosí ku Maria, yu muhé di Heli, di e stat Názarèt na Galilea. Esaki tabata un momento krusial den su bida. E tabata komprometé pa kasa ku un karpinté ku yama Hose, kende no tabata un hòmber riku, pero sí un hòmber ku hopi fe den Dios. Pues, probablemente Maria tabatin un bon idea kon su bida lo bai ta: Lo el a hiba un bida simpel; lo el a apoyá su kasá i yud’é kria nan yunan. Pero diripiente, el a hañ’é ku e bishitante akí ku a bin bis’é ku Dios tabatin un tarea spesial p’e, un responsabilidat ku lo a kambia su bida por kompleto.

3, 4. Kiko nos tin ku pone un banda pa nos por komprondé ken Maria tabata, i riba kiko nos tin ku konsentrá?

³ Hopi hende ta haña straño ku Beibel no ta konta nos mashá di Maria. Apénas Beibel ta bisa nos algu di su famia, ménos ainda di su personalidat i nada nada di su aparensia. Ma e poko ku e Palabra di Dios ta bisa di Maria ta hopi signifikativo.

⁴ Pa nos por komprondé ken Maria tabata, nos mester deshasí promé di e ideanan ku religionnan a siña nan siguidónan tokante dje. Pues, laga nos lubidá e tantísimo imágennan i kuadronan religioso ku hende a traha di dje. Laga nos pone un banda tambe e doktrinanan religioso super kompliká ku a duna e muhé humilde akí títulonan elevá manera “Mama di Dios” i “Reina di Shelu.” Na lugá di e kosnan ei, nos lo konsentrá riba loke Beibel  realmente ta bisa di Maria. Esaki lo duna nos informashon balioso tokante su fe i tambe kon nos por imitá su ehèmpel.

5. (a) Kiko nos ta siña tokante Maria for di e manera ku el a reakshoná riba e kumindamentu di angel Gabriel? (b) Ki lès masha importante nos por siña for di Maria?

⁵ Maria su bishitante no tabata un simpel hende, sino angel Gabriel. Ora el a yama Maria “sumamente bendishoná,” Maria a bira “tur aribabou” i a purba di komprondé ta kiko e kumindamentu akí por a nifiká. (Luk. 1:29) Sumamente bendishoná dor di ken? Maria no a ferwagt di haña bendishon spesial serka hende. Ma e angel tabata papia di e bendishon di Yehova Dios. Esei sí tabata importante pa Maria, pero e no a asumí orguyosamente ku ya e tabatin Dios su aprobashon i bendishon. E ehèmpel di e hóben Maria ta siña nos un lès masha importante: Nos mester hasi nos bèst pa haña Dios su aprobashon, i no asumí orguyosamente ku ya nos tin esei kaba. Dios ta oponé hende orguyoso, pero e ta stima i apoyá hende humilde.—Sant. 4:6.

6. Ki privilegio e angel a ofresé Maria?

⁶ Maria tabata bai tin mester di e humildat ei, pasobra e angel a ofres’é un privilegio inimaginabel: Lo el a haña un yu ku lo a bira e persona di mas importante den historia. Gabriel a splik’é: “Yehova Dios lo dun’é e trono di su tata David, i lo e reina komo Rei pa semper riba e kas di Yakòb, i lo no tin fin na su Reino.” (Luk. 1:32, 33) Sin duda, Maria tabata sa ku mas ku mil aña promé Dios a primintí David ku un di su desendientenan lo goberná pa semper. (2 Sam. 7:12, 13) Pues, su yu lo a bira e Mesías ku e pueblo di Dios tabatin siglonan ta warda riba dje!

7. (a) Kiko e pregunta di Maria a revelá tokante dje? (b) Kiko hóbennan djawe por siña for di Maria?

⁷ Ademas, e angel a bisa Maria ku su yu “lo ser yamá Yu di e Haltísimo.” Kon un hende muhé por a duna lus na e Yu di Dios? Es mas, kon Maria por a haña un yu? E tabata komprometé ku Hose, pero ainda nan no a kasa. P’esei Maria a puntra e angel frankamente: “Kon por ta, siendo ku nunka mi no a tene relashon ku ningun hòmber?” (Luk. 1:34) Tuma nota ku pa Maria no tabata un bèrgwensa ku e tabata bírgen. Al kontrario, e tabata orguyoso di esei. Awendia, hopi hóben ta ansioso pa pèrdè nan birginidat,  i nan ta hasi bofon di esnan ku sí ta balorá nan birginidat. Un kos ta sigur, mundu a kambia hopi, pero Yehova sí nò. (Mal. 3:6) Meskos ku den tempu di Maria, Yehova tin masha apresio pa hende ku ta tene nan mes na su normanan moral.—Lesa Hebreonan 13:4.

8. Kon Maria, siendo imperfekto, por a duna lus na un yu perfekto?

⁸ Maria tabata un fiel sirbidó di Dios, pero e tabata imperfekto. Pues, kon e por a duna lus na e Yu di Dios, un yu perfekto? Gabriel a splik’é: “Spiritu santu lo baha riba bo, i poder di e Haltísimo lo tapa bo. Pa e motibu ei tambe, e yu ku nase lo ser yamá santu i Yu di Dios.” (Luk. 1:35) “Santu” ta nifiká limpi, puru, sagrado. Normalmente, hende ta pasa e kondishon impuru i pekaminoso ku nan tin pa nan yunan. Pero den e kaso akí, Yehova lo a realisá un milager sin presedente. Lo el a transferí e bida di su Yu for di shelu pa e barika di Maria. Anto lo el a usa su spiritu santu, òf forsa aktivo, pa “tapa” Maria, protehando e yu asina di tur rastro di piká. Maria a kere loke e angel a primintié? Kon el a reakshoná?

9. (a) Dikon hende no tin motibu pa duda e relato tokante Maria? (b) Kon Gabriel a fortalesé e fe di Maria?

⁹ Hopi hende, inkluso teólogonan di kristiandat, tin problema pa kere ku un bírgen por a duna lus. Apesar di tur nan siñansa, tin un simpel bèrdat ku nan no por kapta. Gabriel a ekspres’é asin’akí: “Nada ku Dios bisa no ta imposibel.” (Luk. 1:37) Maria no a duda den e palabranan di Gabriel, pasobra e tabata un mucha muhé ku hopi fe. Pero esei no ke men ku el a kere tur kos pa loko. Meskos ku kualke persona ku ta usa su sintí, Maria tabatin mester di prueba komo base pa su fe. I Gabriel tabata prepará pa dun’é mas prueba. El a menshoná Elisabèt, un famia di Maria, ku tur hende tabata sa ku no por a haña yu i ku awor ya tabata un señora di edat. Milagrosamente Dios a laga Elisabèt sali na estado.

10. Dikon e situashon no tabata niun tiki fásil pa Maria?

¹⁰ Kiko Maria lo a hasi awor? E tabatin un tarea pa kumpli kuné i sufisiente prueba ku Dios lo bai hasi tur loke Gabriel a bisa. Pero maske pa Maria tabata un gran privilegio di por duna lus na e Yu di Dios, e situashon akí no tabata niun tiki fásil p’e. Pa kuminsá, e mester a pensa riba su kompromiso ku Hose. Hose lo a kasa kuné tòg ora lo el a haña sa ku e tabata na estado? Ademas, e responsabilidat riba su mes so kaba tabata abrumador. Lo e tabatin ku karga den su barika e bida ku Dios a konsiderá esun di mas presioso: su Yu stimá! Despues lo e mester a sòru p’e ora e  tabata un bebi indefenso i proteh’é di e mundu malbado i kruel akí. Ki un responsabilidat pisá!

11, 12. (a) Kon asta hòmbernan balente ku tabata sirbi Dios fielmente a yega di reakshoná ora Dios a duna nan tareanan difísil? (b) Kiko e kontesta ku Maria a duna Gabriel a revelá?

¹¹ Beibel ta mustra ku tabatin biaha ku asta hòmbernan balente ku tabata sirbi Dios fielmente a vasilá pa aseptá asignashonnan difísil ku Dios a duna nan. Por ehèmpel, Moises a protestá ku e no tabata papia sufisiente vlòt pa sirbi komo bosero di Dios. (Éks. 4:10) Yeremías a bisa ku e tabata “un mucha,” es desir, muchu yòn pa aseptá e tarea ku Dios a dun’é. (Yer. 1:6) I Yonas a kore limpi bai laga su asignashon! (Yon. 1:3) Kiko Maria lo a hasi?

¹² Maria su palabranan te awe ta impreshoná tur hende di fe i ta reflehá simplesa, humildat i obedensia. El a bisa Gabriel: “Ata mi aki! Yehova su sirbidó! Laga sosodé ku mi manera bo a bisa.” (Luk. 1:38) Maria a konsiderá su mes un simpel sirbidó òf esklabo di Dios; su bida tabata kompletamente den man di su doño. Asina Maria tabata sinti pa ku su Doño, Yehova. E tabata sa ku e tabata safe den man di Yehova, ku Dios ta protehá hende fiel i ku Dios lo a bendishon’é si el a hasi su bèst pa kumpli ku e tarea difísil akí lo mihó ku e tabata por.—Sal. 31:23.

13. Kon Maria su ehèmpel por yuda nos ora Dios ta pidi nos algu ku ta parse difísil òf asta imposibel?

¹³ Tin biaha Dios ta pidi nos hasi kosnan ku por parse difísil, asta imposibel. Sinembargo, den su Palabra e ta sigurá nos hopi biaha ku nos por konfi’é plenamente, sí, pone nos mes den su man, manera Maria a hasi. (Pro. 3:5, 6) Nos ta hasi esei? Si nos hasié, Yehova lo rekompensá nos i esaki ta duna nos mas motibu pa pone fe den dje.

14, 15. (a) Kon Yehova a rekompensá Maria ora el a bai bishitá Elisabèt ku Zakarías? (b) Kiko e palabranan di Maria ku ta pará skirbí na Lukas 1:46-55 ta revelá tokante dje?

¹⁴ Loke Gabriel a bisa tokante Elisabèt a animá Maria mashá. Di tur e muhénan na mundu, ta ken lo por a komprondé su situashon mihó ku Elisabèt? Mesora Maria a disidí di bishit’é i a bai na e region di seru di Huda, un biahe di tres pa kuater dia. Ora el a drenta kas di Elisabèt ku Zakarías, e saserdote, Yehova a rekompens’é ku un prueba mas pa fortalesé su fe. Elisabèt a tende Maria  kumind’é i a sinti mesora ku e yu den su barika a bula di alegria. El a yena ku spiritu santu i a yama Maria “mama di mi Señor.” Dios a revelá na Elisabèt ku e yu di Maria lo a bira su Señor, esta, e Mesías. Ademas, Dios a inspir’é pa elogiá Maria pa su fieldat i obedensia ku e palabranan akí: “Felis ta abo ku a kere.” (Luk. 1:39-45) Sí, tur loke Yehova a primintí Maria lo a bira realidat!

¹⁵ Maria na su turno a papia i loke el a bisa a keda wardá kuidadosamente den e Palabra di Dios. (Lesa Lukas 1:46-55.) Esei ta e spich di mas largu di Maria ku tin pará den Beibel, i e ta revelá hopi di su persona. Por ehèmpel, nos por mira ku Maria tabata un mucha muhé gradisidu. El a alabá Yehova pasobra el a bendishon’é  ku e privilegio di bira mama di e Mesías. Su palabranan ta mustra tambe e profundidat di su fe, pasobra el a referí na Yehova komo esun ku ta humiá hende orguyoso i poderoso, pero ku ta yuda hende pober i humilde ku ta deseá di sirbié. Ademas, loke el a bisa ta duna prueba tambe di kuantu konosementu di Beibel e tabatin. Segun un kálkulo, el a referí mas ku 20 biaha na e Skritura Hebreo! *

16, 17. (a) Kon Maria i su yu a demostrá un aktitut ku nos mester imitá? (b) Maria su bishita serka Elisabèt ta laga nos mira kiko?

¹⁶ Ta bisto ku Maria tabatin kustumber di meditá riba e Palabra di Dios. Ma el a keda humilde i a preferá di usa e palabranan di e Skritura pa ekspresá su mes en bes di bisa algu ku a reflehá su mes punto di bista. E yu ku tabata krese den su barika lo a demostrá ku tempu e mesun humildat. E yu ei a bisa despues: “Loke mi ta siña hende no ta di mi, ma di esun ku a manda mi.” (Huan 7:16) Ta bon pa nos puntra nos mes: ‘Ami ta demostrá e mesun rèspèt ei pa e Palabra di Dios? Òf mi ta preferá mi mes idea- i siñansanan?’ Maria sigur tabatin e aktitut korekto.

¹⁷ Maria a keda mas o ménos tres luna serka Elisabèt. Sin duda, nan a animá otro mashá. (Luk. 1:56) E relato konmovedor di e bishita akí ta laga nos mira ku un amistat por ta un gran bendishon. Si nos ta buska amigu ku di bèrdat ta stima nos Dios, Yehova, nos lo krese den sentido spiritual i nos relashon ku Yehova lo bira mas fuerte. (Pro. 13:20) Finalmente a bira tempu pa Maria bai kas bèk. Kiko Hose lo a bisa ora e haña sa ku e ta na estado?

18. Kiko Maria a konta Hose, i kon Hose a reakshoná?

¹⁸ Maria probablemente no a warda te ora ku hende por a mira ku e tabata na estado pa papia ku Hose. Promé ku el a dun’é e notisia, kisas el a puntra su mes ta kon e hòmber desente akí, temeroso di Dios, lo a reakshoná. En todo kaso, el a bai serka dje i a kont’é tur loke a pasa. Manera nos por imaginá, Hose a keda di shòk. E tabatin gana di kere loke Maria a bis’é, pero tur kos tabata indiká ku Maria a kòrta su orea. Beibel no ta bisa kiko Hose a pensa ni kon el a rasoná, pero sí nos ta lesa ku el a disidí di divorsiá di Maria, pasobra den e tempu ei nan tabata konsiderá un pareha komprometé komo kasá. Pero e no kier a brongosá Maria públikamente òf kousa un eskándalo, p’esei el a disidí di divorsiá di dje den sekreto. (Mat. 1:18, 19) Maria no a rabia pasobra Hose no kier  a ker’é. Mas bien, lo e mester a sintié hopi tristu ku e hòmber ku e tabata stima tabata tur aribabou.

19. Kon Yehova a yuda Hose hasi loke tabata korekto?

¹⁹ Yehova bondadosamente a yuda Hose hasi loke tabata korekto. Den un soño, e angel di Dios a bis’é ku di bèrdat Maria su embaraso tabata un milager. Esei lo mester tabata un gran alivio p’e! E ora ei Hose a disidí di hasi loke Maria tambe a hasi for di prinsipio: sigui e instrukshon di Yehova. El a kasa ku Maria i a prepará pa karga e responsabilidat úniko di kuida e Yu di Yehova.—Mat. 1:20-24.

20, 21. Kiko parehanan kasá i esnan ku tin pensá di kasa por siña for di Maria ku Hose?

²⁰ Tantu hende kasá komo esnan ku tin pensá di kasa por siña for di e ehèmpel di e pareha hóben akí ku a biba un 2.000 aña pasá. Despues, ora Hose a mira kon Maria tabata kumpli ku su debernan di mama, lo e mester a keda kontentu ku el a hasi loke e angel di Yehova a bis’é. Hose a mira e importansia di konfia den Yehova ora di tuma desishon grandi. (Sal. 37:5; Pro. 18:13) I sin duda, el a sigui ta un persona prudente i amabel ora di tuma desishon komo kabes di kas.

²¹ Di otro banda, kiko nos por siña for di e echo ku Maria tabata dispuesto pa kasa ku Hose apesar ku Hose a duda den dje? Aunke na promé instante tabata difísil pa Hose aseptá loke Maria a kont’é, tòg Maria tabata sa di konfi’é i warda riba dje p’e disidí kiko pa hasi, pasobra al final t’e lo tabata e kabes di kas. No tin duda ku Maria a mira e importansia di tene pasenshi, i esaki ta un bon lès pa muhénan kristian awe. I por último, tur loke a pasa lo mester a siña Hose ku Maria e balor di komunikashon franko i sinsero.—Lesa Proverbionan 15:22.

22. Ki fundeshi e matrimonio di Hose ku Maria tabatin, i kiko tabata spera nan?

²² E pareha hóben ei definitivamente a kuminsá nan matrimonio ku e mihó fundeshi posibel. Nan tur dos tabata stima Yehova Dios mas ku tur kos i tabata deseá di agrad’é komo mayornan responsabel i amoroso. Klaru ku bendishonnan mas grandi tabata spera nan, pero tambe problemanan mas grandi. Nan tabatin nan dilanti e tarea di kria Hesus, kende lo a bira e hòmber di mas importante ku mundu a yega di konosé.