“Ke tlwaetše sehlotswana sa bagwera ba ka feela, gomme ga ke kgone go kgaogana le bona.”​—Alan.

 “Ga ke na bagwera ba bantši gomme ga ke na bothata le seo. Ga se ka tlwaela go swara ditaba le batho bao ke sa ba tsebego.”​—Sara.

 Na o ikwa ka tsela yeo Alan le Sara ba ikwago ka yona? Na o ikwa o sa lokologe go ba le bagwera ba bangwe ba bafsa ka ge o na le bagwera bao o sa nyakego go arogana le bona?

 Ge e ba o ikwa ka tsela yeo, gona sehlogo se se tla go thuša!

•  Mathata a dihlotswana tša bagwera

•  Seo o ka se dirago

•  Seo dithaka tša gago di se bolelago

 Ga se phošo go ba le bagwera bao o ba ratago bao o sa nyakego go arogana le bona. Go ba le bagwera bao o sa aroganego le bona go dira gore o tsebe gore o wela kae, e bile go dira gore o tsebe gore go na le batho bao ba go ratago ka tsela yeo o lego ka yona, go sa šetšwe diphošo tša gago.

 “Go a thabiša go ba setho sa sehlopha sa batho bao ba go ratago. Ge o le mofsa, o no nyaka go bona ba go amogela.”—Karen, wa mengwaga e 19.

 Na o be o tseba? Baapostola ba Jesu ba 12 e be e le ba bangwe ba bagwera ba gagwe ba bantši, eupša ba bararo ba baapostola bao e lego Petro, Jakobo le Johane, e be e le bagwera ba gagwe ba bagolo.​—Mareka 9:2; Luka 8:​51.

 Lega go le bjalo, go gwerana feela le sehlopha se itšego sa batho bao o ba ratago, gomme o sa nyake go gwerana le batho ba bangwe go ka baka mathata. Ka mohlala:

•   Go ka go thibela gore o se be le bagwera ba bangwe.

   “Go phela feela le bagwera bao ba swanago le wena go ka go thibela go ithuta dilo tše difsa le go tseba batho ba bangwe.”—Evan, wa mengwaga e 21.

•   Go ka dira gore o bonagale eka o a ikgogomoša.

   “Ge o phela feela le sehlopha se itšego sa bagwera ba gago, batho ba ka nagana gore ga o nyake go bolela le batho ba bangwe.”—Sara, wa mengwaga e 17.

•   Go ka dira gore o tlaiše ba bangwe.

   “O ka no se tlaiše batho ba bangwe eupša ge e ba bagwera ba gago ba ba tlaiša, gona o ka no bona seo se lokile e bile se segiša.”​—James, wa mengwaga e 17.

•   Go ka go tsenya mathateng, kudu ge e ba o nyaka go dira sohle se o ka se kgonago gore o be sehlopheng seo.

   “Motho yo a dirago dilo tše mpe mo sehlopheng a ka dira gore sehlopha ka moka ga sona se feleletše se dira dilo tšeo a di dirago.”​—Martina, wa mengwaga e 17.

•   Hlahloba melao yeo o nyakago go phela ka yona.

   Ipotšiše gore: ‘Ke melao efe yeo ke nyakago go phela ka go dumelelana le yona? Na bagwera ba ka ba dira gore go be bonolo goba go be thata go latela melao yeo? Na nka dira sohle se nka se kgonago gore ke se kgaogane le bagwera bao?’

   Molao wa motheo wa Beibele: “Ditlwaelano tše mpe di senya mekgwa e holago.”​—1 Bakorinthe 15:33.

   “Ge sehlopha sa bagwera ba gago se sa phele ka melao yeo o phelago ka yona, o ka ikhwetša o dira dilo tšeo o bego o ka se tsoge o di dirile.”—Ellen, wa mengwaga e 14.

•   Hlahloba dilo tšeo di tlago pele bophelong bja gago.

   Ipotšiše gore: ‘Na nna le bagwera ba ka re ratana kudu moo nka dirago selo le ge e le sefe go šireletša segwera sa rena? Ke tla dira’ng ge e ba mogwera wa ka a dirile phošo?’

   Molao wa motheo wa Beibele: “Ka moka bao ke ba ratago ke a ba kgala le go ba laya.”​—Kutollo 3:​19.

   “Ge yo mongwe wa bagwera ba gago a ka tsena mathateng gomme wa se mo thekge, go ka bonagala eka ga o botege ge o ka botša batho bao ba swanetšego go tseba ka taba yeo a e dirilego.”​—Melanie, wa mengwaga e 22.

•   O se ke wa kgomarela sehlopha setee sa bagwera.

   Ipotšiše gore: ‘Na nka holega ge e ba nka gwerana le batho ba bangwe bao ke sa ba tsebego gabotse?’

   Molao wa motheo wa Beibele: “Le se ke la kgahlegela ditaba tša lena feela, eupša le kgahlegele le tša ba bangwe.”​—Bafilipi 2:4.

   “Bana bao ba sego ba tuma ba ka no ba ba imelwa ke bophelo ka malapeng a gabo bona. Ge o ka tlwaelana le bona, o tla hwetša gore go bose go ba le bona.”—Brian, wa mengwaga e 19.

 Therešo e sa fetogego: Ga se phošo go ba le bagwera bao o sa kgaoganego le bona. Eupša, o ka holega ge o ka ba le bagwera ba bangwe. Beibele e re: “Yo a nwešago ba bangwe meetse ba kgolwa le yena o tla nwešwa meetse a kgolwa.”​—Diema 11:25.