Le gateetee!

 Therešo: Maemong a mantši, go kgahlegela motho wa bong bjo bo swanago le bja gago gantši e fo ba mogato o fetago.

 Se ke seo ngwanenyana yo a bitšwago Lisette wa nywaga e 16 yoo a kilego a kgahlegela ngwanenyana yo mongwe a se lemogilego. O re: “Dithutong tša ka tša sekolong tša thutaphedi (Biology), ke ile ka ithuta gore nakong ya nywaga ya mahlalagadi, dihomoune di ka fetofetoga kudu. Ke tloga ke nagana gore ge e ba bafsa ba bantši ba be ba tseba ka mo go oketšegilego ka mebele ya bona, ba be ba tla kwešiša gore go kgahlegela batho ba bong bjo bo swanago e ka ba selo sa nakwana, e bile ba ka se ikwe ba gapeletšega go ratana le batho ba bong bjo bo swanago le bja bona.”

 Eupša go thwe’ng ge e ba go kgahlegela ga gago batho ba bong bjo bo swanago le bja gago go bonagala e se feela mogato o fetago? Na Modimo o sehlogo ka go botša motho yo a kgahlegelago batho ba bong bjo bo swanago le bja gagwe gore a pheme mokgwa woo?

 Ge e ba o arabile potšišo ya mafelelo ka ee, o swanetše go tseba gore go bea mabaka mo go bjalo go theilwe ponong e fošagetšego ya gore batho ba swanetše go latela maikwelo a bona a thobalano. Beibele e nea batho seriti ka go ba kgonthišetša gore ba ka kgetha go se kgotsofatše dikganyogo tša bona tšeo di sa swanelago tša thobalano.—Bakolose 3:5.

 Ga se gore Beibele ga e na tekatekano. E fo ba e laela bao ba kgahlegelago batho ba bong bjo bo swanago le bja bona gore ba dire se se swanago le seo se letetšwego go bao ba kgahlegelago batho ba bong bjo bo sa swanego le bja bona—gore ba ‘tšhabe bootswa.’ (1 Bakorinthe 6:18) Ge e le gabotse, dimilione tša batho bao ba kgahlegelago batho ba bong bjo bo fapanego le bja bona bao ba ratago go latela ditekanyetšo tša Beibele ba bontšha boitshwaro go sa šetšwe diteko le ge e le dife tšeo ba ka lebeletšanago le tšona. Bao ba nago le dikganyogo tša go ratana le batho ba bong bjo bo swanago le bja bona ba ka dira se se swanago ge e ba ba tloga ba nyaka go kgahliša Modimo.—Doiteronomio 30:19.