Mofsa yo a bitšwago Elaine o re: “Ge ke bona batho bao ke tsenago le bona sekolo ba na le bagwera ba bantši kudu inthaneteng ke ile ka makala gomme ka nagana gore ba tumile!’ Go bolela nnete, ke be ke ba duma.”

 Na le wena o ile wa ikwa ka tsela ye? Ge e ba go le bjalo, sehlogo se se tlo go thuša gore o se ke wa duma go tuma inthaneteng.

•  Dikotsi ke dife?

•  “Go nagana o kare o tumile”

•  Na go ratwa ke batho ba bantši inthaneteng go bohlokwa?

•  Hlokomela gore o se ke wa bolela dilo tšeo di bonalago eka o ikokobeditše eupša ge e le gabotse o ikgogomoša

 Diema 22:1, e re: “Leina le lebotse le phala mahumo a mantši kudu.” Ka gona ga se phošo go nyaka go ba le botumo bjo bobotse le gore batho ba bangwe ba go rate.

 Ka dinako tše dingwe ga o thabe ka ge o nyaka go amogelwa ke batho kudu moo o feleletšago o nyaka go tuma. Na seo se kotsi? Onya wa mengwaga e 16, o re seo se kotsi:

 “Ke hlwa ke bona batho ba dira dilo tša go makatša gore ba tume go swana le go fofa moagong wa sekolo e le gore ba tume.”

 Bafsa ba bangwe ba tšea dibidio tša bošilo tšeo ba di dirago ke moka ba di bea inthaneteng gore dithaka tša bona di ba bone. Ka mohlala bafsa ba bantši ba tšere bidio ba eja dilo tšeo di nago le mpholo e bile di sa swanela go jewa!

 Beibele e re: “Le se dire selo ka tshele goba ka go ikgopola.”—Bafilipi 2:3.

 Seo o ka naganago ka sona:

•   Na go tuma inthaneteng go bohlokwa go wena?

•   Na o ka bea bophelo bja gago kotsing gore o kgahliše dithaka tša gago le gore di go amogele?

 Ga se ka mehla batho ba dirago dilo tše kotsi gore ba tume. Erica wa mengwaga e 22, o re batho ba bangwe ba diriša ditsela tše di fapanego gore ba tume:

 Batho ba bangwe ba bea dibidio tša bophelo bja bona bja letšatši le letšatši inthaneteng e bile ba dira gore batho ba bangwe ba bone eka ba phela ba na le bagwera ba bona ba bantši. Seo se dira gore ba nagane gore ba tumile.”

 Cara wa mengwaga e 15, o re batho ba bangwe ba dira gore ba bonale eka ba tumile:

 “Ke na le go bona batho ba bea dinepe inthaneteng tšeo di bontšhago eka ba moletlong eupša ge e le gabotse ba le ka gae.”

 Matthew wa mengwaga e 22, o re le yena o ile a dira se se swanago:

 “Nkile ka bea senepe inthaneteng gomme ka ngwala gore ke Mount Evarest le ge ke se ka ka ka ya Asia!”

 Beibele e re: “Re rata go itshwara ka go botega dilong tšohle.”—Baheberu 3:18.

 Seo o ka naganago ka sona:

•   Na ge e ba o diriša social media o bolela maaka gore o tume?

•    Na dinepe tšeo o di beago inthaneteng le dilo tšeo o di bolelago di bontšha seo o lego sona?

 Batho ba bantši ba nagana gore e le gore o tume inthaneteng o swanetše go ba le palo ya batho ba bantši bao ba ratago dilo tšeo o di beago. Matthew yo re boletšego ka yena o re le yena o be a ikwa ka tsela yeo:

 “Ke be ke fela ke botšiša batho gore: ‘O na le balatedi ba bakae inthaneteng?’ goba ka re: ‘Palo e kgolo ya batho bao ba ilego ba rata dilo tšeo o di beilego e bile bokae?’ E le gore ke be le balatedi ba bantši, ke be ke latela batho ba bantši bao ke sa ba tsebego ke nagana gore le bona ba tlo dira se se swanago. Seo se ile sa dira gore ke nyake go tuma inthaneteng.”

 Maria wa mengwaga e 25, o re batho ba bantši ge ba se na balatedi ba bantši e bile dilo tšeo ba di beago di sa ratwe ke batho ba bantši, ba ipona ba se na mohola:

 “Ge ngwanenyana a ka bea senepe sa gagwe gomme sa se ratwe ke batho ba bantši, o nagana gore ga a botse. Go nagana ka tsela yeo ke phošo, eupša batho ba bantši ge ba le boemong bjoo ba ka nagana go swana le yena. Ge e le gabotse o itira dilo tšeo bomphenyašilo ba inthaneteng ba ka ba dirago tšona.”

 Beibele e re: “Anke re se beng ba ikgopolago, re tsošetšana phenkgišano e bile re jelana mona.”—Bagalatia 5:26.

 Seo o ka naganago ka sona:

•   Na social media e dira gore o ipapetše le batho ba bangwe?

•    Na o tshwenyega ka go ba le bagwera ba babotse goba na o tshwenyega ka go ba le balatedi ba bantši?