Ge e ba

•   o kwata ge o se wa hwetša A molekong o mongwe le o mongwe sekolong

•   o sa nyake go leka go dira dilo tše difsa ka ge o tšhaba gore o tla palelwa

•   o nagana gore ge batho ba go sola ba a go nyatša

 . . . , gona go ra gore karabo ya potšišo yela ya mathomong ke ee. Eupša na go bohlokwa go tseba gore wena o wela legorong lefe tabeng ye?

•  Bothata ke eng ka go nyaka gore dilo di dirwe ka tsela e phethagetšego?

•  O ka thušwa ke eng?

•  Seo dithaka tša gago di se bolelago

 Ga se phošo go nyaka go dira sohle seo o ka se kgonago. Eupša puku ya Perfectionism​—What’s Bad About Being Too Good? e re: “Go nyaka go dira sohle seo o ka se kgonago go fapana kudu le go lwela go dira dilo tšeo di sa kgonegego.” E okeditše ka gore: “Go nyaka gore dilo di dirwe ka tsela e phethagetšego go ka go hlafišetša bophelo, ka gore go no bolela nnete, ga go na motho yo a phethagetšego.”

 Le Beibele e a dumela. E re: “Lefaseng ga go motho yo a lokilego yo a dirago seo se lokilego.” (Mmoledi 7:​20) Ka ge re sa phethagala, ka dinako tše dingwe re ka no se dire dilo gabotse.

 Na o palelwa ke go amogela seo? Ge e ba go le bjalo, gona hlokomela gore go nyaka gore dilo di dirwe ka tsela e phethagetšego go ka go bakela dikotsi dife tše nne.

1.   Kamoo o itebelelago. Batho bao ba nyakago gore dilo di dirwe ka tsela e phethagetšego ba rata go ipotša gore ba nyaka go dira dilo ka tsela e kaonekaone. Seo se feleletša ka manyami. Alicia o re: “Go no bolela nnete, ga go kgonege gore re kgone go dira dilo ka moka. Le gona ge e ba re phela re inyatša ge re paletšwe ke go dira selo se itšego ka tsela e kaonekaone, re tlo feleletša re se sa itshepa. Seo se ka go dira gore o ikwe o gateletšegile.”

2.   Kamoo o arabelago ge o eletšwa. Batho ba go nyaka gore dilo di dirwe ka tsela e phethagetšego ba nagana gore ge motho a ba sola goba a ba eletša go ra gore o a ba nyatša. Jeremy o re: “Ge ke phošollwa ke kwa bohloko kudu.” O ile a ba a re: “Ge o nyaka gore dilo di dirwe ka tsela e phethagetšego o ka se kgone go bona mafokodi a gago gomme seo se tlo dira gore o palelwe ke go amogela thušo.”

3.   Kamoo o lebelelago ba bangwe. Batho ba go nyaka gore dilo di dirwe ka tsela e phethagetšego, gantši ba rata go sola batho ba bangwe, e bile seo ga se makatše. Anna wa mengwaga e 18 o re: “Ge o nyaka go dira dilo okare o phethagetše, o nyaka gore le batho ba bangwe ba dire bjalo. Ge ba palelwa ke go dira bjalo, o nyama kudu.”

4.   Kamoo ba bangwe ba go lebelelago. Ge e ba o nyaka gore batho ba dire dilo ka tsela e phethagetšego, o se ke wa makala ge ba se sa go nyaka kgauswi le bona. Beth o re: “Motho wa go nyaka gore dilo di dirwe ka tsela e phethagetšego o a lapiša. Ga go na motho yo a nyakago go ba kgauswi le motho yo bjalo.”

 Beibele e re: “Anke go lekalekana ga lena go tsebje bathong bohle.” (Bafilipi 4:5) Batho ba go ba le tekatekano ga ba dire dilo tšeo ba tsebago gore ba ka se di kgone, e bile ga se ba letela gore ba bangwe ba dire dilo eka ba phethagetše.

 Nyla o re: “Go šetše go e na le dilo tše dintši tšeo di re imelago. Ka gona go re’ng o itlaiša ka gore o leke go dira dilo eka o phethagetše? Di tla go palela.”

 Beibele e re: ‘Eba le boipoetšo ge o sepela le Modimo wa gago.’ (Mika 6:8) Batho ba go ba le boipoetšo ba tseba moo ba felelago gona. Ga ba dire dilo tše dintši kudu tšeo ba ka se di kgonego, e bile ga ba senye nako ba dira selo seo se ba palelago.

 Hailey o re: “Ge ke nyaka go ikwa gore ke dira mešomo ya ka gabotse, ga ke dire e mentši kudu. Ke tseba mo ke felelago.”

 Beibele e re: “Tšohle tšeo seatla sa gago se kgonago go di dira, di dire ka matla a gago ka moka.” (Mmoledi 9:​10) Go tšwafa go ka se go thuše, o swanetše go šoma ka thata eupša o gopole go ba le tekatekano le boipoetšo.

 Joshua o re: “Ge ke dira mošomo o itšego ke ntšha ka ga tšhwene. Ke a tseba gore nka se o dire ka tsela e phethagetšego, eupša ke a thaba ge ke dirile sohle seo nka se kgonago.”