Ge e ba o phela ka melao ya Beibele e bile o nyaka go ba mogwera wa Modimo, ke ga tlhago gore ga bjale o swanetše go ba o nagana ka go kolobetšwa. O tlo tseba bjang ge e ba o swanelega go kolobetšwa? a

Sehlogong se

•  Ke swanetše go tseba eng?

•  Ke swanetše go dira’ng?

•  Seo dithaka tša gago di se bolelago

 Go itokišeletša go kolobetšwa ga go bolele gore o swanetše go swara dilo tše dingwe ka hlogo go swana le ge motho yo mongwe a eya go ngwala ditlhahlobo sekolong. Eupša o swanetše go diriša “matla a gago a tlhaologanyo” go tiiša tumelo ya gago le go dumela gore seo Beibele e se rutago ke nnete. (Baroma 12:1) Ka mohlala:

•   Na o kgodišegile gore Modimo o gona le gore o swanetše go mo rapela?

   Beibele e re: “Yo a batamelago Modimo o swanetše go dumela gore o gona le gore e ba moputsi wa bao ba mo tsomago ka phišego.”—Baheberu 11:6.

   Ipotšiše gore: ‘Ke ka baka la’ng ke dumela go Modimo?’ (Baheberu 3:4) ‘Ke ka baka la’ng ke swanetše go mo hlankela?’—Kutollo 4:11.

   Na o hloka thušo? Bala sehlogo seo se rego: “Tlholo le Tlhagelelo—Karolo ya Pele: Ke ka Baka La’ng ke Dumela Gore Modimo o Gona?”

•   Na o tshepa gore molaetša wa ka Beibeleng o tšwa go Modimo?

   Beibele e re: “Lengwalo ka moka le buduletšwe ke Modimo gomme le hola ka go ruta, go kgala, go phošolla le go laya ka toko.”—2 Timotheo 3:16.

   Ipotšiše gore: ‘Ke ka baka la’ng ke dumela gore Beibele ga e fo ba puku ya dikgopolo tša batho?’—Jesaya 46:10; 1 Bathesalonika 2:13.

   Na o hloka thušo? Bala sehlogo seo se rego: “Beibele e ka Nthuša Bjang?—Karolo 1: Tseba Beibele ya Gago.”

•   Na o a tshepa gore Jehofa o diriša phuthego ya Bokriste go phethagatša merero ya gagwe?

   Beibele e re: “Go [Modimo] go išwe letago ka phuthego le ka Kriste Jesu melokong yohle go iša mehleng ya neng le neng.”—Baefeso 3:21.

   Ipotšiše gore: ‘Na ke lebelela seo ke ithutago sona ka Beibeleng ge ke le dibokeng tša Bokriste se etšwa go batho goba go Jehofa?’ (Mateo 24:45) ‘Na ke ba gona dibokeng le ge e ba batswadi ba ka ba sa ye (ge e ba ba go dumelela gore o ye)?’—Baheberu 10:24, 25.

   Na o hloka thušo? Bala sehlogo seo se rego: “Ke ka Baka la Eng o Swanetše go ya Holong ya Mmušo ya Dihlatse tša Jehofa?”

 Ga se wa swanela go ba yo a phethagetšego gore o kolobetšwe. Eupša o swanetše go ikemišetša go “furalela se sebe gomme o dire se sebotse.” (Dipsalme 34:14) Ka mohlala:

•   Na o phela ka go dumelelana le melao ya Jehofa?

   Beibele e re: “Ebang le letswalo le lebotse.”—1 Petro 3:16.

   Ipotšiše gore: Na ke bontšhitše gore ‘matla a ka a go hlatha’ a tlwaeditšwe ‘gore a kgethologanye se se nepagetšego le se se fošagetšego’? (Baheberu 5:14) ‘Na nka nagana ka nako yeo nkilego ka ganetša dithaka tša ka ge di be di nkgapeletša go dira selo se sebe? Na ke kgethile bagwera bao ba nkgothaletšago gore ke dire dilo tše dibotse?’—Diema 13:20.

   Na o hloka thušo? Bala sehlogo seo se rego: “Nka Tlwaetša Letswalo la ka Bjang?”

•   Na o a kwešiša gore o ikarabela go Jehofa ka dilo tšeo o di dirago?

   Beibele e re: “Yo mongwe le yo mongwe wa rena o tla ikarabela go Modimo.”—Baroma 14:12.

   Ipotšiše gore: ‘Na ke a botega?’ (Baheberu 13:18) ‘Na ke a dumela ge ke dirile diphošo goba ke a di uta, ke moka ka bea ba bangwe molato?’—Diema 28:13.

   Na o hloka thušo? Bala sehlogo seo se rego: “Nka Lebeletšana Bjang le Diphošo tša ka?”

•   Na o mogwera wa Jehofa?

   Beibele e re: “Batamelang Modimo gomme o tla le batamela.”—Jakobo 4:8.

   Ipotšiše gore: ‘Na ke dira’ng gore ke batamele kgaufsi le Jehofa?’ Ka mohlala, ‘Na ke bala Beibele ga kae?’ (Dipsalme 1:1, 2) ‘Na ke rapela ka mehla?’ (1 Bathesalonika 5:17) ‘Na ke bolela ka eng ge ke rapela? Na bagwera ba ka ke bagwera ba Jehofa?’—Dipsalme 15:1, 4.

   Na o hloka thušo? Bala sehlogo seo se rego: “Beibele e ka Nthuša Bjang?—Karolo 2: Dira Gore ge o Bala Beibele o Ipshine ka Yona” le seo se rego: “Ke ka Baka la Eng ke Swanetše go Rapela?”

 KELETŠO: E le go itokišeletša go kolobetšwa, bala kgaolo 37 ka go puku ya Dipotšišo tša Bafsa—le Dikarabo tše Šomago, Volume 2. Hlokomela letlakala la go itlhahloba go matlakala 308 le 309.