Bolela ka dilo tšeo di go tshwenyago. Botša batswadi ba gago kamoo o nyamilego goba o gakanegilego ka gona. Mohlomongwe ba tla kgona go go hlalosetša seo se diregago, ka go re’alo seo sa fokotša go tshwenyega ga gago.

 Ge e ba batswadi ba gago ba sa kgone go go nea thekgo yeo o e nyakago, o ka kgona go bolela le mogwera yo a godilego tsebong wa mo ntšhetša sa mafahleng.—Diema 17:17.

 Go feta tšohle, o ka theetšwa ke Tatago wa legodimong, yena “Mokwi wa thapelo.” (Psalme 65:2) Mo tšhollele seo se lego ka pelong ya gago, ‘ka gobane o a go hlokomela.’—1 Petro 5:7.

 O se ke wa boloka sekgopi. Daniel yoo batswadi ba gagwe ba ilego ba hlalana ge a be a na le nywaga e šupago o re: “Batswadi ba ka ba be ba na le boithati. Ruri ga se ba ka ba nagana ka rena le kamoo seo ba se dirilego se bego se tla re kgoma ka gona.”

 Daniel a ka be a ile a welwa ke kotsi efe ge nkabe a ile a gana go kgaotša go befelwa le go boloka sekgopi?—Go go thuša go hwetša karabo: Bala Diema 29:22.

 Ke ka baka la’ng e ka ba mo gobotse gore Daniel a leke go lebalela batswadi ba gagwe bakeng sa bohloko bjoo ba mo kwešitšego bjona?—Go go thuša go hwetša karabo: Bala Baefeso 4:31, 32.

 Phema mekgwa yeo e tlago go go gobatša. Denny o gopola gore: “Ke be ke se ka thaba e bile ke gateletšegile ge batswadi ba ka ba be ba hlalana. Ke ile ka thoma go ba le mathata sekolong gomme ngwageng o mongwe ka se ke ka atlega dithutong tša ka. Ka morago ga moo ... ka fetoga rametlae wa ka klaseng ka ba ka lwa le batho ba bantši.”

 O nagana gore Denny o be a leka go dira’ng ka go ba rametlae wa ka klaseng goba ka go ba ntwadumela?

 Molao wa motheo wo o lego go Bagalatia 6:7 o ka thuša bjang batho ba go swana le bo Denny gore ba pheme mekgwa yeo e ka ba gobatšago?

 Go gobala maikwelong go tšea nako go fola. Lega go le bjalo, ge bophelo bja gago bo thoma go boela sekeng, o tla thoma go ikwa gabotse gape.