BAFSA BA A BOTŠIŠA
Beibele e ka Nthuša Bjang?—Karolo 1: Tseba Beibele ya Gago
Briana, yoo a nago le mengwaga e 15 o re: “Ke ile ka leka go bala Beibele, mara ka fetšwa matla ke gore ke e kgolo kudu!”
Na le wena o ikwa ka tsela yeo? Ge e ba go le bjalo, sehlogo se se tla go thuša!
Ke ka baka la’ng o swanetše go bala Beibele?
Na taba ya gore o swanetše go bala Beibele e a go tšwafiša? Ge e ba go le bjalo, o se ke wa ipea molato. O ka bona Beibele e le puku yeo e nago le matlakala a mantši kudu, ya mengwalo e menyenyane e bile e se na diswantšho, gomme wa bona go le kaone gore o bogele thelebišene!
Mara nagana ka taba ye: A re re o hwetša lepokisi le legolo la kgale leo le swerego mahumo a bohlokwa, na o ka se nyake go tseba gore go na le eng ka gare ga lona?
Beibele e swana le lona lepokisi leo. E na le mahumo a mantši a bohlokwa ao a tlago go go dira gore o be bohlale, gomme bohlale bjoo bja go thuša gore
O dire diphetho tše dibotse
O tlwaelane le batswadi ba gago
O hwetše bagwera ba nnete
O kgone go lebeletšana le stress
Go tla bjang gore puku ya kgale ka tsela ye e re hole kudu lehono? Lebaka ke gore ‘Beibele e buduletšwe ke Modimo.’ (2 Timotheo 3:16) Se se ra gore re ka tshepa molaetša wa yona, ka gore o tšwa go Modimo.
Nka bala Beibele bjang?
Tsela e nngwe yeo o ka balago Beibele ka yona ke ka go e bala go tloga mathomong go fihla mafelelong. Seo se tla go thuša gore o tsebe gore ge e le gabotse Beibele e bolela ka eng. Go na le ditsela tše dintši tša go bala Beibele. Nagana ka mehlala ye e mebedi:
O ka bala dipuku tše 66 tša Beibele go ya ka tsela yeo di latelanago ka yona, go tloga go Genesi, go fihla go Kutollo.
O ka bala Beibele go ya ka tsela yeo ditiragalo tša ka Beibeleng di latelanago ka yona.
Seo o ka se Dirago: Bala tatelano ya ditiragalo tša bophelo bja Jesu bja nakong ya ge a le mo lefaseng ka pukwaneng ya Tlhahlo ya go Ithuta Lentšu la Modimo, Karolo 4.
Tsela ya bobedi yeo o ka balago Beibele ka yona ke ka go kgetha pego yeo e sepedišanago le bothata bjo o nago le bjona. Ka mohlala:
Ge e ba o nyaka go ba le bagwera ba nnete, gona bala setori sa Jonathane le Dafida. (1 Samuele, dikgaolo 18-20) E le gore o hwetše dilo tšeo o ka ithutago tšona pegong yeo, diriša letlakala la go itekola leo le rego, “Kamoo o ka Hwetšago Bagwera ba Botegago.”
Ge e ba o nyaka go kgona go ganetša teko, gona bala setori sa Josefa, o kwe gore yena o kgonne bjang go ganetša teko. (Genesi, kgaolo 39) E le gore o hwetše dilo tšeo o ka ithutago tšona pegong yeo, diriša letlakala la go itekola leo le rego, “Kamoo o ka Ganetšago Teko. . . Josefa—Karolo 1” le leo le rego, “O Latofatšwa ka Maaka! Josefa—Karolo 2.”
Ge e ba o nyaka go tseba gore go rapela go ka go thuša bjang, gona bala setori sa Nehemia. (Nehemia, kgaolo 2) E le gore o hwetše dilo tšeo o ka ithutago tšona pegong yeo, diriša letlakala la go itekola leo le rego, “Modimo o Arabile Thapelo ya Gagwe.”
Seo o ka se Dirago: Ge o bala Beibele, netefatša gore moo o lego gona go homotše, gore o se šitišwe ke selo.
Tsela ya boraro yeo o ka balago Beibele ka yona ke ka go kgetha pego e itšego goba psalme e nngwe, gomme o ipotšiše gore e go ama bjang. Ka morago ga go bala, ipotšiše dipotšišo tša go swana le gore:
Ke ka baka la’ng Jehofa a ngwadile taba ye ka Beibeleng?
Taba ye e bontšha gore Jehofa ke Modimo wa mohuta mang, goba o dira dilo bjang?
Nka diriša se ke ithutilego sona bjang bophelong bja ka?
Seo o ka se Dirago: Ipeele letšatši leo o nyakago go thoma go bala Beibele ya gago ka lona.