Dihlatse tša Jehofa di Lebelela Bjang Taba ya Tlhalo?

BAPALA

Re latela seo Beibele e se bolelago ka lenyalo le tlhalo. Modimo o hlamile lenyalo gore e be tlamo ya ka mo go sa felego magareng ga monna le mosadi. Lebaka le nnoši leo Mangwalo a dumelelago motho go hlala ke ge monna goba mosadi wa gagwe a bile le thobalano le motho yo mongwe.—Mateo 19:5, 6, 9.

Na Dihlatse di thuša banyalani bao ba nago le mathata manyalong a bona?

Ee, di dira seo ka ditsela tše di latelago tše mmalwa:

Dikgatišo. Dikgatišo tše gantši o hwetša di na le ditaba tšeo di ka matlafatšago manyalo, gaešita le manyalo ao go bonagalago a ka se loke. Ka mohlala, bala dihlogo tše di rego “Go Kgomarela Tlemo Lenyalong la Lena,” “Kamoo o ka Lebalelago,” le seo se rego “Go Tsošološa go Botana.”
Diboka. Ge re le dibokeng tša rena, dikopanong tše dikgolo le tše dinyenyane, re ahlaahla keletšo ya Beibele yeo e ka holago banyalani.
Bagolo. Bagolo ba phuthego ba thuša banyalani ka go lebanya, ba ba bontšha mangwalo a bjalo ka Baefeso 5:22-25.

Na bagolo ba phuthego ba nea tumelelo ya gore Hlatse e itšego e hlale?

Aowa. Le ge bagolo ba ka kgopelwa go thuša banyalani ka mathata a bona, ga ba na tshwanelo ya go botša banyalani bao seo ba swanetšego go se dira. (Bagalatia 6:5) Lega go le bjalo, motho yo a kgethago go hlala a se na mabaka a Mangwalo a ka se swanelege go hwetša ditokelo tše di kgethegilego ka phuthegong le gona Mangwalo ga a mo dumelele go nyala goba go nyalwa gape.—1 Timotheo 3:1, 5, 12.

Dihlatse tša Jehofa di lebelela bjang taba ya karogano?

Beibele e kgothaletša banyalani go tšwela pele ba dula gotee le ge maemo a le thata. (1 Bakorinthe 7:10-16) Mathata a mantši a ka rarollwa ka go rapela go tšwa pelong, go diriša melao ya motheo ya Beibele le go bontšha lerato.—1 Bakorinthe 13:4-8; Bagalatia 5:22.

Lega go le bjalo, maemong a mangwe a thata kudu ao a swanago le a latelago, Bakriste ba bangwe ba ile ba dira phetho ya go arogana le balekane ba bona:

Go se nyake go hlokomela lapa.—1 Timotheo 5:8.
Go tlaišwa kudu mmeleng.—Psalme 11:5.
Ge tswalano ya gago le Modimo e le kotsing. Ka mohlala, molekane a ka leka go gapeletša Hlatse go roba melao ya Modimo ka tsela e itšego, gomme molekane yo a lego bothateng a ka phetha ka gore karogano ke tsela e nnoši ya ‘go kwa Modimo go e na le go kwa batho.’—Ditiro 5:29.