Na Biblia ntangu bamesadila mpova kimpeve, yalenda monisa nsatu ya ngolo mpe kuzola kusepedisa Nzambi mpe kulonguka kukanisa mutindu yandi kekanisaka. Muntu ya kimpeve kesalaka ngolo samu na kuwizanisa luzingu na yandi na minsiku ya Nzambi mpe yandi kelandaka lutuadusu ya mpeve ya nlongo na Yandi. a—Baroma 8:5; Baefezo 5:1.

 Samu na kutubila muntu ya kimpeve, mbala mingi Biblia kesuasikisaka muntu ya kinsuni na muntu ya kimpeve. Na kifuani, na lusuasanu na muntu ya kimpeve, ‘muntu ya kinsuni kendimaka ve mambu ya mpeve ya Nzambi,’ to malongi ya Nzambi. (1 Bakorinto 2:14-16) Na lusuasanu na bantu ya kimpeve, bantu ya kinsuni kekindisaka ‘kimpala mpe kuzonza’ na kisika ya kukindisa kikadulu ya kukaba mpe kiyenge. (1 Bakorinto 3:1-3) Mpe bantu yina ketubaka luvunu mpe kekabulaka bankundi ya ntima mebokudulua ‘bantu ya kinsuni (nyp), bakele ve na mpeve ya Nzambi.’—Yude 19; Bingana 16:28. b

Na disolo yayi

•  Wapi kimpeve kekatukaka?

•  Samu na yinki kimpeve kele na mfunu?

•  Yinki mutindu munu lenda kudisa kimpeve?

•  Munu fueti vuanda na dibundu mosi samu munu vuanda muntu ya kimpeve?

•  Makanisi ya yimbi bantu kevuandaka na yau samu na kimpeve

•  Baverse ya Biblia yina metubila kimpeve

 Beto kele na dikoki ya kuvuanda bantu ya kimpeve samu beto salamaka na kifuani ya Nzambi. (Kuyantika 1:27) Na yau, yakele diambu ya kukamua ve mutindu mingi ya bantu kebendamaka na bima yina kemonanaka ve mpe bakebakaka yau na valere.

 Beto mebutukaka na dikoki ya kumonisa bikadulu ya Yehova c Nzambi, na kifuani, kiyenge, ntima kiadi, mpe kumanga kupona bilungi. (Yakobo 3:17) Diaka, Nzambi kekumisaka ngolo kimpeve ya bantu yina kesalaka ngolo ya kuzitisa minsiku na yandi.—Bisalu 5:32.

 Kuvuanda muntu ya kimpeve kenataka na ‘luzingu mpe kiyenge.’ (Baroma 8:6) Luzingu mpe kiyenge kele makabu ya Nzambi yina kele na valere mingi kuluta bima mingi yankaka.

•   Luzingu: Nzambi melaka ti yandi kepesa bantu ya kimpeve luzingu ya mvula na mvula.—Yoane 17:3; Bagalatia 6:8.

•   Kiyenge: Kiyenge kintuadi na Nzambi. Bantu yina ketulaka makanisi na bau kaka na bansatu na bau ya kinsuni, bakele bambeni ya Nzambi. (Baroma 8:7) Diaka, Nzambi kepesaka n’sendo na bantu yina kesalaka ngolo samu na kukuma diaka bantu ya kimpeve na ‘kiyenge ya Nzambi yina meluta mayele nionso ya kubakusa mambu.’ (Bafilipi 4:6, 7) Kiyenge ya ntima kesadisaka bau samu bavuanda na luzingu ya kiese.—Matayo 5:3.

•   Longuka mpe zitisa bansiku ya Nzambi. Nge lenda sala yau na kulongukaka Biblia, yina kele na makanisi ya Nzambi yina sonamaka na bantu yina ‘mpeve na nlongo vuandaka tuadisa.’ (2 Piere 1:21) Mambu yina nge kelonguka kesadisa nge samu nge sambila Nzambi ‘na mpeve mpe na kedika,’ nge tuadusua na mpeve ya nlongo na nguizani na luzolo ya Nzambi.—Yoane 4:24.

•   Sambilaka samu na kulomba lusadusu na yandi. (Luka 11:13) Nzambi kesadisa nge na kumonisa bikadulu yina muntu ya kimpeve kevuandaka na yau. (Bagalatia 5:22, 23) Yalenda pesa nge diaka nduenga ya kununga bampasi ya luzingu.—Yakobo 1:5.

•   Vuanda nkundi ya bantu ya kimpeve. Bakekindisa nge samu nge kuma na kimpeve ya ngolo. (Baroma 1:11, 12) Kasi kusala kinkundi na bantu yina kevuandaka na makanisi yina mesuasana na yina ya Nzambi lenda lembisa kimpeve na nge.—Yakobo 4:4.

 Kuvuanda kaka muntu ya dibundu mosi kesalaka ve ti muntu kuma muntu ya kimpeve. Biblia metuba: ‘Kana muntu kekanisaka ti yandi kesambilaka Nzambi kasi yandi keyalaka ve ludimi na yandi, yandi kena kuvuna ntima na yandi mosi, mpe kisambu na yandi kele ya mpamba.’—Yakobo 1:26.

 Atako plina, Biblia memonisa ti bantu ya kimpeve kesambilaka Nzambi na mutindu yina yandi kendimaka. Bakezabaka ti yakele na “mpeve” kaka mosi—Mpeve ya nlongo ya Nzambi. Mpeve yango ketindaka bau na kusambila Nzambi lokola ‘nzutu’ kaka mosi, grupe mosi yina mebongisama mpe yina ketaninaka ‘bumosi ya mpeve na kiyenge yina kesangisaka beto.’—Baefezo 4:1-4.

 Dikanisi ya yimbi: Bisemua nionso kevuandaka na dikoki ya kuvuanda na kimpeve.

 Dikanisi ya kedika: Konso kima yina Nzambi mesalaka kepesaka yandi nkembo. (Nkunga 145:10; Baroma 1:20) Kasi, kaka bisemua ya mayele ya Nzambi nde lenda kuma bantu ya kimpeve. Na lusuasanu na bantu, bibulu kesalaka mambu na nzila ya instinct mpe balenda sala ve kinkundi na Nzambi. Bansatu na bau ya kinsuni nde ketindaka bau na kusala mambu yina bakesalaka. (2 Piere 2:12) Yau yina, Biblia kesuasikisaka muntu ya kimpeve na muntu yina kevuandaka na makanisi mpe kesalaka mambu lokola kibulu.—Yakobo 3:15; Yude 19.