မၤတၢ် ၇:၁-၆၀
၇ ဘၣ်ဆၣ် ပှၤလုၢ်တၢ်ခိၣ် အဒိၣ်ကတၢၢ် တဲဝဲလၢ “တၢ်ဂ့ၢ်တဖၣ်န့ၣ် မ့ၢ်အမ့ၢ်ဧါ.”
၂ စီၤစတ့းဖၣ် တဲဆၢက့ၤဝဲလၢ “ဒီပုၢ်ဝဲၢ်ခွါတဖၣ် ဒီးပၢ်သ့ၣ်ဧၢ, ကနၣ်တက့ၢ်. ဖဲပဖုဖးဒိၣ် စီၤအၤဘြၤဟၣ်အိၣ်လၢ ကီၢ်မ့းစပတၤမံ ဒီးတချုးလၢ အလဲၤအိၣ်လၢ ဝ့ၢ်ဟၤရၣ်အခါ+ ကစၢ်ယွၤ လၢအပှဲၤဒီး တၢ်လၤကပီၤတဂၤန့ၣ် အိၣ်ဖျါထီၣ်လၢ အမဲာ်ညါလီၤ.
၃ ကစၢ်ယွၤတဲအီၤလၢ ‘ဟးထီၣ်လၢ နထံနကီၢ် ဒီးလၢနဘူးနတံၢ်အကျါ ဒီးလဲၤလၢ ကီၢ်တဘ့ၣ်လၢ ယကဒုးနဲၣ်နၤတက့ၢ်.’+
၄ ဒီးအဝဲ ဟးထီၣ်ကွံာ်ဝဲလၢ ပှၤက့ၤစ့းဖိအထံကီၢ် ဒီးလဲၤအိၣ်ဝဲလၢ ဝ့ၢ်ဟၤရၣ်လီၤ. ဒီးဖဲအပၢ် သံဝံၤအလီၢ်ခံ+ ကစၢ်ယွၤ ဆှၢအီၤဒ်သိး အကလဲၤသုးအသးလၢ ကီၢ်တဘ့ၣ်လၢ သုအိၣ်လၢအပူၤ ခဲအံၤလီၤ.+
၅ ဘၣ်ဆၣ် ကစၢ်ယွၤ တဟ့ၣ်လီၤအီၤ ဟီၣ်ခိၣ်လီၢ် ဒ်တၢ်န့ၢ်သါအသိး နီတက့ဘၣ်, တၢ်လီၢ်ထဲသိးဒီး အခီၣ်လီၢ်တခါမး တဟ့ၣ်ဝဲဘၣ်. ဒီးအဖိ တအိၣ်ဒံးဘၣ် သနာ်က့ ကစၢ်ယွၤအၢၣ်လီၤအီၤလၢ အကဟ့ၣ်လီၤအီၤ ကီၢ်တဘ့ၣ်အံၤ ဒ်သိး အကကဲထီၣ်အတၢ် ဒီးအချံအသၣ်အတၢ် အဂီၢ်လီၤ.+
၆ တကးဒံးဘၣ် ကစၢ်ယွၤတဲအီၤလၢ အချံအသၣ် ကကဲထီၣ်ပှၤထံဂၤကီၢ်ဂၤဖိတဖၣ် လၢထံကီၢ်တဘ့ၣ်လၢ အတမ့ၢ် အဝဲသ့ၣ် အတၢ်ဘၣ်အပူၤလီၤ. ဒီးပှၤကဒုးကဲထီၣ် အဝဲသ့ၣ်လၢကုၢ် ဒီးကမၤနးမၤဖှီၣ် အဝဲသ့ၣ် အနံၣ် ၄၀၀ လီၤ.+
၇ ဘၣ်ဆၣ် ကစၢ်ယွၤ တဲဝဲလၢ ‘ယကစံၣ်ညီၣ် ပှၤတကလုာ်လၢ အဒုးကဲကုၢ်အဝဲသ့ၣ်+ ဒီးတၢ်န့ၣ်တဖၣ် ဝံၤအလီၢ်ခံ အဝဲသ့ၣ် ကဟးထီၣ်ကွံာ်ဖဲန့ၣ် ဒီးကဘူၣ်ထီၣ် ဘါထီၣ်ယၤ ဖဲတၢ်လီၢ် အဝဲအံၤလီၤ.’+
၈ “ဒီးကစၢ်ယွၤ မၤတၢ်အၢၣ်လီၤအီလီၤဒီး စီၤအၤဘြၤဟၣ် ဘၣ်ဃးဒီး တၢ်ကူးတရံးလီၤ.+ ဒီးအဝဲကဲထီၣ် စီၤအံၤစဲးအပၢ်+ ဒီးအကူးတရံးစီၤအံၤစဲးလၢ ဃိးသီတသီလီၤ.+ ဒီးစီၤအံၤစဲးကဲထီၣ်ဝဲ စီၤယၤကိာ်အပၢ် ဒီးစီၤယၤကိာ်န့ၣ် အဖိခွါအိၣ် ၁၂ ဂၤ ဒီးအဝဲသ့ၣ်ကဲထီၣ်ဝဲ ပှၤ ၁၂ ဒူၣ်အခိၣ်လီၤ.
၉ ဒီးစီၤယိၤသး အဒီပုၢ်ဝဲၢ်ခွါတဖၣ် သးက့ၣ်အီၤ+ ဒီးဆါလီၤကွံာ်အီၤလၢ ကီၢ်အဲၤကူပတူးအပူၤလီၤ.+ ဘၣ်ဆၣ် ကစၢ်ယွၤအိၣ်ဒီးအီၤ+
၁၀ ဒီးမၤပူၤဖျဲးအီၤလၢ အတၢ်နးတၢ်ဖှီၣ် ခဲလၢာ်အပူၤ ဒီးမၤစၢၤအီၤဒ်သိး အကအိၣ်ဒီး တၢ်ကူၣ်သ့ ဒီးဒ်သိးကီၢ်အဲၤကူပတူး အစီၤပၤဖၤရိၤ ကဘၣ်သူၣ်ဘၣ်သးအီၤအဂီၢ်လီၤ. ဒီးဖၤရိၤ ဃုထၢထီၣ်အီၤလၢ ကပၢတၢ်လၢ ကီၢ်အဲၤကူပတူး ဒီးလၢအနီ* ပူၤလီၤ.+
၁၁ ဒီးတၢ်သၣ်ဝံၤလီၤဒိ အိၣ်ထီၣ် သကုၤဆးဒးလၢ ကီၢ်အဲၤကူပတူး ဒီးကီၢ်ကနၤဧၣ်အပူၤ ဒီးအကဲထီၣ်ဝဲ တၢ်နးတၢ်ဖှီၣ်ဖးဒိၣ်လီၤ. ဒီးပမိၢ်ပၢ်ဖံဖု လၢပျၢၤတဖၣ် ကအီၣ်တၢ်အဂီၢ် တၢ်တအိၣ်နီတမံၤဘၣ်.+
၁၂ ဘၣ်ဆၣ် စီၤယၤကိာ် နၢ်ဟူဝဲလၢ တၢ်အီၣ်တၢ်အီ အိၣ်လၢ ကီၢ်အဲၤကူပတူးအပူၤလီၤ. အဃိ အဆှၢလီၤဝဲ ပဖုဖးဒိၣ် လၢပျၢၤတဖၣ် အဆိကတၢၢ်တဘျီလီၤ.+
၁၃ ဖဲခံဘျီတဘျီ အဆၢကတီၢ်န့ၣ် စီၤယိၤသး ဒုးသ့ၣ်ညါ အဒီပုၢ်ဝဲၢ်ခွါတဖၣ် လၢအဝဲမ့ၢ် မတဂၤလဲၣ်လီၤ. ဒီးဖၤရိၤ သ့ၣ်ညါထီၣ်ဝဲ စီၤယိၤသး အဟံၣ်ဖိဃီဖိအဂ့ၢ်လီၤ.+
၁၄ ဒီးစီၤယိၤသး ဆှၢလီၤတၢ်ကစီၣ် ဒီးကိးန့ၢ်အပၢ် စီၤယၤကိာ် ဒီးအဘူးအတံၢ်ခဲလၢာ် လၢတၢ်လီၢ်အဝဲန့ၣ်+ ဒီးပှၤခဲလၢာ်အိၣ်ဝဲ ၇၅ ဂၤလီၤ.+
၁၅ အဃိ စီၤယၤကိာ် လဲၤလီၤအိၣ်ဝဲလၢ ကီၢ်အဲၤကူပတူးအပူၤ+ ဒီးသံဝဲဖဲန့ၣ်လီၤ.+ ဒီးပမိၢ်ပၢ်ဖံဖု လၢပျၢၤတဖၣ် စ့ၢ်ကီး သံဝဲဖဲန့ၣ်လီၤ.+
၁၆ ဒီးပှၤလဲၤစိာ် အဝဲသ့ၣ်အစိၣ်လၢ ဝ့ၢ်ၡက့ၣ် ဒီးပာ်လီၤအီၤလၢ တၢ်သွၣ်ခိၣ်လၢ စီၤအၤဘြၤဟၣ် ပှ့ၤဝဲဒီးစ့လၢ စီၤဃမိၢ် အဖိခွါတဖၣ်အအိၣ်လၢ ဝ့ၢ်ၡက့ၣ်အပူၤလီၤ.+
၁၇ “ဖဲတၢ်ဆၢကတီၢ်ဘူးထီၣ်လၢ ကစၢ်ယွၤ ကမၤလၢပှဲၤ အတၢ်အၢၣ်လီၤလၢ အတဲတ့ၢ် စီၤအၤဘြၤဟၣ်အခါ ပှၤဂီၢ်မုၢ်တဖၣ် အနီၣ်ဂံၢ်အါထီၣ်ဝဲလၢ ကီၢ်အဲၤကူပတူးအပူၤ အါမးလီၤ.
၁၈ လၢခံန့ၣ် စီၤပၤထီၣ် အသီတဂၤလၢ ကီၢ်အဲၤကူပတူးအပူၤ ဘၣ်ဆၣ် အဝဲတသ့ၣ်ညါ စီၤယိၤသးဘၣ်.+
၁၉ ပှၤတဂၤအံၤ ကူၣ်ထီၣ်တၢ် ဒ်သိးကထီဒါ ပပှၤကလုာ် ဒီးမၤအၢမၤသီ ပမိၢ်ပၢ်ဖံဖု လၢပျၢၤတဖၣ် ဒီးမၢဆူၣ် အဝဲသ့ၣ်လၢ ကပာ်တ့ၢ်ကွံာ်အဖိ လၢအအိၣ်ဖျဲၣ်ထီၣ် သီသီတဖၣ် ဒ်သိးအဝဲသ့ၣ် ကသံဝဲအဂီၢ်လီၤ.+
၂၀ ဖဲန့ၣ်အဆၢကတီၢ် စီၤမိၤၡ့ အိၣ်ဖျဲၣ်ထီၣ်ဝဲ ဒီးလၢကစၢ်ယွၤ အမဲာ်ညါဒၣ်လဲာ် အဝဲဖျါဃံလၤဝဲလီၤ. အမိၢ်အပၢ် ကွၢ်လုၢ်ဒိၣ်ထီၣ်အီၤလၢ အဟံၣ်ပူၤ သၢလါလီၤ.+
၂၁ ဘၣ်ဆၣ် ဖဲအဝဲဘၣ် တၢ်ပာ်တ့ၢ်ကွံာ်အီၤအခါ+ ဖၤရိၤအဖိမုၣ် ဟံးန့ၢ်အီၤဒီး ကွၢ်လုၢ်ဒိၣ်ထီၣ်အီၤ ဒ်အဖိခွါတဂၤအသိးလီၤ.+
၂၂ အဃိ ပှၤသိၣ်လိစီၤမိၤၡ့လၢ ပှၤအဲၤကူပတူးဖိ အတၢ်ကူၣ်ဘၣ်ကူၣ်သ့ ခဲလၢာ် ဒီးအဝဲအိၣ်ဒီး တၢ်သ့တၢ်ဘၣ်လၢ တၢ်ကတိၤဒီး တၢ်ဖံးတၢ်မၤအပူၤ အါမးလီၤ.+
၂၃ “ဖဲစီၤမိၤၡ့ ပှဲၤထီၣ် အနံၣ် ၄၀ အခါ အဝဲဆၢတဲာ်လီၤအသးလၢ ကလဲၤကွၢ် အဒီပုၢ်ဝဲၢ် ပှၤအံၣ်စရ့လးဖိတဖၣ် အတၢ်အိၣ်သးလီၤ.+
၂၄ ဖဲအထံၣ်ဝဲ ပှၤအဲၤကူပတူးဖိတဂၤ မၤဆူးမၤဆါ ပှၤအံၣ်စရ့လးဖိတဂၤ အခါ အဝဲလဲၤမၤစၢၤအီၤ ဒီးမၤဆၢက့ၤတၢ်လၢ ပှၤလၢအဘၣ် တၢ်မၤနၢၤအီၣ်အီၤတဂၤအံၤအဂီၢ် ဒီးမၤသံကွံာ် ပှၤအဲၤကူပတူးဖိ တဂၤလီၤ.
၂၅ အဝဲဆိကမိၣ်ဝဲလၢ အဒီပုၢ်ဝဲၢ်ခွါတဖၣ် ကနၢ်ပၢၢ်ဝဲလၢ ကစၢ်ယွၤ ကအုၣ်က့ၤခီၣ်က့ၤ အဝဲသ့ၣ် ခီဖျိလၢအီၤ ဘၣ်ဆၣ် အဝဲသ့ၣ်တဖၣ်န့ၣ် တနၢ်ပၢၢ်ဝဲဘၣ်.
၂၆ လၢခံတနံၤ ဖဲအလဲၤဝဲလၢ အဝဲသ့ၣ် အအိၣ်အခါ အထံၣ်ဝဲလၢ အဝဲသ့ၣ်ခံဂၤ ထိလိာ်သး အဃိ အဝဲဂုာ်ကျဲးစၢး မၤဃူမၤဖိးအဝဲသ့ၣ် ဒီးတဲဝဲလၢ ‘သုကဲဒီပုၢ်ဝဲၢ်လီၤဒၢး, သုမၤအၢမၤနးလိာ်သး တဂၤဒီးတဂၤ ဘၣ်လဲၣ်.’
၂၇ ဘၣ်ဆၣ်ပှၤလၢ အမၤအၢမၤနးဝဲ အသကိးတဂၤန့ၣ် ဆီၣ်ဖျိးကွံာ် စီၤမိၤၡ့ ဒီးတဲဝဲလၢ ‘မတဂၤ ဃုထၢထီၣ်နၤလၢ နကကဲပခိၣ်ပနၢ် ဒီးပစံၣ်ညီၣ်ကွီၢ်လဲၣ်.
၂၈ မ့ၢ်နအဲၣ်ဒိးမၤသံယၤ ဒ်သိးဒီးနမၤသံ ပှၤအဲၤကူပတူးဖိတဂၤ လၢမဟါတနံၤဟီဧါ.’
၂၉ ဖဲစီၤမိၤၡ့ နၢ်ဟူဝဲဒ်န့ၣ်အခါ အဝဲဃ့ၢ်ကွံာ်ဝဲ ဒီးလဲၤအိၣ်တမှံၤလၢ ကီၢ်မံးဒယၣ်အပူၤလီၤ. ဒီးဖဲန့ၣ် အဝဲထီၣ်ဖိ အဖိခွါခံဂၤလီၤ.+
၃၀ “အနံၣ် ၄၀ ပူၤကွံာ်ဝံၤအလီၢ်ခံ မူခိၣ်ကလူးတဂၤ ဟဲလီၣ်ဖျါထီၣ်အသး လၢအအိၣ် လၢသပှီာ်တၤဆှုၣ် လၢမ့ၣ်အူ ကဲၤဝဲတခိၣ်အပူၤ ဖဲကစၢၢ်စံၤနါ အပှၢ်မုၢ်ကနၢလီၤ.+
၃၁ ဖဲစီၤမိၤၡ့ ထံၣ်ဘၣ်ဝဲအခါ အကမၢကမၣ်ဝဲ ဒိၣ်မးလီၤ. ဘၣ်ဆၣ် ဖဲအဟဲဘူးထီၣ်ဝဲ ဒ်သိး ကကွၢ်ထံကွၢ်ဆးဝဲအခါ အနၢ်ဟူဘၣ် ယဟိဝၤယွၤ* အကလုၢ်လၢ အတဲဝဲလၢ
၃၂ ‘ယမ့ၢ် နမိၢ်ပၢ်ဖံဖု လၢပျၢၤတဖၣ်အယွၤ, စီၤအၤဘြၤဟၣ်, စီၤအံၤစဲး ဒီးစီၤယၤကိာ်အယွၤလီၤ.’+ ဒီးစီၤမိၤၡ့ကနိးဝဲ ဒီးကွၢ်ဝဲ တဘူၣ်လၢၤဘၣ်.
၃၃ ယဟိဝၤယွၤ တဲအီၤလၢ ‘တၢ်လီၢ်လၢ နဆၢထၢၣ်အံၤ မ့ၢ်တၢ်လီၢ်လၢ အစီဆှံအဃိ ဘ့ၣ်လီၤကွံာ် နခီၣ်ဖံးတက့ၢ်.
၃၄ ယပှၤဂီၢ်မုၢ်တဖၣ် ဘၣ်တၢ်ဆီၣ်တံၢ်မၤနၢၤအီၤ လၢကီၢ်အဲၤကူပတူးအပူၤ ဒ်လဲၣ်န့ၣ် ယထံၣ်ဘၣ်လံ. အဝဲသ့ၣ် အတၢ်ကအုကစွါန့ၣ် ယနၢ်ဟူဘၣ်လံ.+ ဒီးယဟဲလီၤဒ်သိး ယကမၤပူၤမၤဖျဲး အဝဲသ့ၣ်အဂီၢ်လီၤ. အဃိခဲအံၤ ဟဲ, ယကဆှၢလီၤနၤလၢ ကီၢ်အဲၤကူပတူးလီၤ.’
၃၅ အဝဲမ့ၢ် စီၤမိၤၡ့လၢ အဝဲသ့ၣ်ဂ့ၢ်လိာ်ဝဲ ခီဖျိတဲဝဲလၢ ‘မတဂၤ ဃုထၢထီၣ်နၤလၢ ပှၤခိၣ်ပှၤနၢ် ဒီးစံၣ်ညီၣ်ကွီၢ်လဲၣ်.’+ အဝဲမ့ၢ် ပှၤတဂၤဃီလၢ ကစၢ်ယွၤမၢလီၤအီၤ+ ခီဖျိ မူခိၣ်ကလူးလၢ အလီၣ်ဖျါထီၣ်အသးလၢ သပှီာ်တၤဆှုၣ် တခိၣ်အပူၤ ဒ်သိး ကတီခိၣ်ရိၤမဲ အပှၤဂီၢ်မုၢ် ဒီးကမၤပူၤဖျဲး အဝဲသ့ၣ်အဂီၢ်လီၤ.
၃၆ ပှၤတဂၤအံၤ ဒုးဟးထီၣ် အဝဲသ့ၣ်+ ဒီးမၤတၢ်လီၤလိၢ်လီၤလးတဖၣ် ဒီးတၢ်ပနီၣ်တဖၣ်လၢ ကီၢ်အဲၤကူပတူးအပူၤ+ ဒီးဖဲပီၣ်လဲၣ်ဂီၤ+ ဒီးလၢပှၢ်မုၢ်ကနၢအပူၤ အနံၣ် ၄၀ လီၤ.+
၃၇ “အဝဲမ့ၢ်စီၤမိၤၡ့လၢ အတဲပှၤအံၣ်စရ့လးဖိတဖၣ်လၢ ‘လၢသုဒီပုၢ်ဝဲၢ်တဖၣ် အကျါန့ၣ် ကစၢ်ယွၤ ကဃုထၢထီၣ်န့ၢ်သု ဝံတဂၤလၢအလီၤဂာ်ဒီး ယၤလီၤ.’+
၃၈ အဝဲ အိၣ်ဘၣ်လၢ ပှၤအံၣ်စရ့လးဖိတဖၣ် အကျါလၢ ပှၢ်မုၢ်ကနၢအပူၤလီၤ. ဒီးအဝဲအိၣ်ဖဲန့ၣ် ဃုာ်ဒီး မူခိၣ်ကလူးတဂၤလၢ+ အတဲတၢ်ဒီးအီၤလၢ+ ကစၢၢ်စံၤနါအလိၤ တကးဒံးဘၣ် အဝဲအိၣ်ဒီး ပမိၢ်ပၢ်ဖံဖု လၢပျၢၤတဖၣ် စ့ၢ်ကီးလီၤ. ဒီးအဝဲဒိးန့ၢ်ဘၣ် ကစၢ်ယွၤ အကလုၢ်ကထါလၢ အစီဆှံဒီးအမူဝဲတဖၣ် ဒ်သိး ကဟ့ၣ်လီၤက့ၤ ပှၤအဂီၢ်လီၤ.+
၃၉ ပမိၢ်ပၢ်ဖံဖု လၢပျၢၤတဖၣ် တအဲၣ်ဒိး ဒိကနၣ် အကလုၢ်ဘၣ်. ဒီးအဝဲသ့ၣ် တတူၢ်လိာ်အီၤဘၣ်,+ ဒီးအဝဲသ့ၣ် သးအိၣ်မၤကဒါက့ၤတၢ် ဒ်ပှၤမၤဝဲလၢ ကီၢ်အဲၤကူပတူးအပူၤအသိး+
၄၀ ဒီးတဲစီၤအၤဟရိၣ်လၢ ‘တၢ်လၢ စီၤမိၤၡ့တဂၤအံၤ လၢအဒုးဟးထီၣ်ပှၤလၢ ကီၢ်အဲၤကူပတူး အပူၤန့ၣ် တၢ်မၤအသးဒီးအီၤ ဒ်လဲၣ် ပတသ့ၣ်ညါဘၣ်. အဃိ တ့ထီၣ်န့ၢ်ပှၤ ယွၤတဖၣ်လၢ အကလဲၤတၢ်လၢ ပမဲာ်ညါသၢၤ.’+
၄၁ အဃိ ဖဲမုၢ်နံၤတဖၣ်န့ၣ် အတီၢ်ပူၤ အဝဲသ့ၣ်တ့ထီၣ်ဝဲ ကျီၢ်ဖိတဒု ဒီးအဝဲသ့ၣ် လုၢ်ထီၣ်တၢ်လၢ တၢ်ဂီၤအဝဲန့ၣ်အအိၣ် ဒီးမၤသူၣ်ဖှံသးညီအသးဒီးတၢ်လၢ အဝဲသ့ၣ်တ့ထီၣ်လၢ အစုတဖၣ်လီၤ.+
၄၂ အဃိ ကစၢ်ယွၤ ဃၣ်ကွံာ်အသးလၢ အဝဲသ့ၣ်အအိၣ် ဒီးပျဲလၢ အဝဲသ့ၣ် ကဘူၣ်ထီၣ်ဘါထီၣ် မုၢ်, လါ ဒီးဆၣ်တဖၣ် လၢမူခိၣ်+ ဒ်တၢ်ကွဲးအသးလၢ ဝံတဖၣ် အလံာ်ပူၤအသိးလီၤ. ဖဲန့ၣ်န့ၣ်တဲဝဲလၢ ‘အိ အံၣ်စရ့လးအပှၤဂီၢ်မုၢ်ဧၢ, ဖဲသုအိၣ်လၢ ပှၢ်မုၢ်ကနၢ အနံၣ် ၄၀ အတီၢ်ပူၤန့ၣ် သုတလုၢ်ထီၣ် ဆၣ်ဖိကီၢ်ဖိ ဒီးတၢ်လုၢ်တၢ်ပာ်တဖၣ် လၢယအိၣ်ဘၣ်.
၄၃ သုဟးစိာ် ကစၢ်မိၤလးအဒဲ+ ဒီးကစၢ်ရၣ်ဖၣ်အဆၣ် လၢအမ့ၢ် တၢ်ဂီၤတဖၣ်လၢ သုတ့ထီၣ်အီၤ ဒ်သိး သုကဘါထီၣ်အီၤ အဂီၢ်လီၤ. အဃိ ယကနီဟးထီၣ်ကွံာ်သု တုၤလၢ တၢ်လီၢ်လၢ အယံၤန့ၢ်ဒံး ကီၢ်ဘၤဘူၤလိၣ်လီၤ.’+
၄၄ “ပမိၢ်ပၢ်ဖံဖု လၢပျၢၤတဖၣ် အိၣ်ဒီး တၢ်အုၣ်အသး အဒဲတဖျၢၣ်လၢ ပှၢ်မုၢ်ကနၢအပူၤလီၤ. ဒဲတဖျၢၣ်အံၤ စီၤမိၤၡ့တ့ထီၣ်အီၤ ဒ်ကစၢ်ယွၤ မၤလိာ်အီၤအသိး ဒီးဒ်အဝဲထံၣ်တ့ၢ် တၢ်အဒိအသိးလီၤ.+
၄၅ ပမိၢ်ပၢ်ဖံဖု လၢပျၢၤတဖၣ် ဒိးန့ၢ်ဘၣ်ဝဲဒဲအံၤ ဒီးဖဲအဝဲသ့ၣ် ဒီးစီၤယိၤၡူ လဲၤနုာ်လီၤမၤန့ၢ်ဝဲ ပှၤကလုာ်လၢ ကစၢ်ယွၤ နီဟးထီၣ်ကွံာ်အီၤတဖၣ်+ အထံအကီၢ်အခါ+ အဝဲသ့ၣ် လဲၤစိာ်ဃုာ်ဝဲ ဒဲအံၤလီၤ. ဒဲအံၤ အိၣ်ဝဲဖဲန့ၣ် တုၤလီၤလၢ စီၤဒၤဝံးအစိၤလီၤ.
၄၆ ကစၢ်ယွၤ ဘၣ်သူၣ်ဘၣ်သး စီၤဒၤဝံး ဒီးစီၤဒၤဝံးဃ့ဝဲ တၢ်ခွဲးတၢ်ယာ်လၢ ကသူၣ်ထီၣ်ဝဲ တၢ်အိၣ်တၢ်ဆိးအလီၢ်လၢ* စီၤယၤကိာ် အယွၤအဂီၢ်လီၤ.+
၄၇ သနာ်က့ ပှၤလၢ အသူၣ်ထီၣ်ဟံၣ်လၢ ကစၢ်ယွၤအဂီၢ်န့ၣ် မ့ၢ်ဝဲ စီၤၡလိၤမိၤလီၤ.+
၄၈ ဘၣ်ဆၣ် ကစၢ်ယွၤလၢ အထီကတၢၢ်တဂၤန့ၣ် တအိၣ်ဝဲဆိးဝဲလၢ ဟံၣ်တဖၣ်လၢ ပှၤတ့အီၤလၢပှၤစုဘၣ်.+ ဒ်ဝံတဲဝဲအသိး
၄၉ ‘မူခိၣ် မ့ၢ်ယလီၢ်ပစိာ်+ ဒီးဟီၣ်ခိၣ် မ့ၢ်ယခီၣ်ယီၢ်လီၤ အလီၢ်လီၤ.+ ဒီးယဟိဝၤယွၤ တဲဝဲလၢ သုကတ့ထီၣ်န့ၢ်ယၤဟံၣ် ဒ်လဲၣ်တကလုာ်လဲၣ်. ဒီးယတၢ်အိၣ်တၢ်ဆိးအလီၢ် ကအိၣ်လၢ တၢ်လီၢ်ဖဲလဲၣ်.
၅၀ ယတ့လီၤ တၢ်သ့ၣ်တဖၣ်အံၤခဲလၢာ် လၢယစု တမ့ၢ်ဧီၤ.’+
၅၁ “ပှၤလၢအခိၣ်ကိၤ ဒီးပှၤလၢအသး တဘၣ်တၢ်ကူးတရံးအီၤဘၣ် ဒီးအနၢ်က့ၣ်သ့ၣ်ဧၢ, ဒ်သုမိၢ်ပၢ်ဖံဖု လၢပျၢၤတဖၣ်အသိး သုတြီစ့ၢ်ကီး သးစီဆှံထီဘိလီၤ.+
၅၂ ဝံလၢ သုမိၢ်ပၢ်ဖံဖု လၢပျၢၤတဖၣ် တမၤအၢမၤနးအီၤဘၣ်န့ၣ် အိၣ်တဂၤဂၤဧါ.+ မ့ၢ်လီၤ, အဝဲသ့ၣ်န့ၣ် မၤသံဝဲပှၤလၢ အတဲဖျါထီၣ်ဆိ ပှၤတီပှၤလိၤလၢ အကဟဲဝဲတဂၤအဂ့ၢ်+ ဒီးဆၢကတီၢ်ခဲအံၤ သုမ့ၢ်ပှၤလၢ အဟ့ၣ်လီၤကွံာ် ပှၤတဂၤန့ၣ် ဒီးမၤသံအီၤလီၤ.+
၅၃ သုဝဲသ့ၣ်အံၤ သုန့ၢ်ဘၣ် စီၤမိၤၡ့ အတၢ်သိၣ်တၢ်သီ ခီဖျိလၢ မူခိၣ်ကလူးတဖၣ်+ ဘၣ်ဆၣ် သုတမၤထွဲအီၤဘၣ်.”
၅၄ ဖဲအဝဲသ့ၣ် နၢ်ဟူ တၢ်ကတိၤတဖၣ်အံၤအခါ အဝဲသ့ၣ် သးဒိၣ်ထီၣ်တၢ် ဒီးကွၢ်အီၤ ဒီးအ့ၣ်တဃံးအမဲလီၤ.
၅၅ ဘၣ်ဆၣ် စီၤစတ့းဖၣ် လၢအပှဲၤဒီးသးစီဆှံန့ၣ် ကွၢ်ထီၣ်တၢ်လၢ မူခိၣ်ဒီး ထံၣ်ဝဲ ကစၢ်ယွၤအလၤကပီၤ ဒီးထံၣ်ဝဲ ယ့ၣ်ၡူးဆၢထၢၣ်လၢ ကစၢ်ယွၤ အစုထွဲတခီလီၤ.+
၅၆ ဒီးအတဲဝဲလၢ “ယထံၣ်မူခိၣ် အိးထီၣ်အသး ဒီးပှၤကညီဖိခွါ+ ဆၢထၢၣ်ဝဲလၢ ကစၢ်ယွၤ အစုထွဲတခီလီၤ.”+
၅၇ ဖဲန့ၣ်န့ၣ် အဝဲသ့ၣ် ကိးပသူထီၣ်လၢ အကလုၢ်ဖးဒိၣ် ဒီးမၤဘၢဃာ် အနၢ်လၢအစု ဒီးအဝဲသ့ၣ်ခဲလၢာ် လဲၤဃ့ၢ်သဖှိဝဲ လၢအအိၣ် တဘျီဃီလီၤ.
၅၈ ဒီးအဝဲသ့ၣ် လဲၤကိးအီၤလၢ ဝ့ၢ်ချၢဝံၤဒီး ကွံာ်အီၤလၢလၢၢ်လီၤ.+ ဒီးပှၤအုၣ်အသးတဖၣ်+ ပာ်လီၤအနီၢ်ကစၢ် အဆ့ကၤတဖၣ် လၢပိာ်ခွါတဂၤလၢ အမံၤမ့ၢ် စီၤစီလူး အခီၣ်ထံးလီၤ.+
၅၉ ဖဲအဝဲသ့ၣ် ကွံာ်စီၤစတ့းဖၣ်လၢလၢၢ်အခါ အဝဲဃ့ကညးဝဲလၢ “ကစၢ်ယ့ၣ်ၡူးဧၢ, ယအးလီၤယသးလၢ နစုပူၤလီၤ.”
၆၀ ဒီးအဝဲချံးလီၤအခီၣ် ဒီးကိးပသူထီၣ်လၢ အကလုၢ်ဖးဒိၣ်လၢ “ယဟိဝၤယွၤဧၢ, တဘၣ်စံၣ်ညီၣ် အဝဲသ့ၣ်လၢ တၢ်ဒဲးဘးအံၤ အဃိတဂ့ၤ.”+ ဒီးဖဲအတဲဝဲဒ်န့ၣ် ဝံၤအလီၢ်ခံ အသံဝဲလီၤ.*
တၢ်ဂ့ၢ်အဘျဲၣ်တဖၣ်
^ မ့ၢ်စ့ၢ်ကီး “နူၢ်.”
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ မ့ၢ်စ့ၢ်ကီး “တၢ်လုၢ်ဟံၣ်.”
^ အခီပညီလိၤလိၤ “မံဝဲ.”