လံာ်​စီဆှံ​န့ၣ်​ အိၣ်ဒီး​တၢ်​ကစီၣ်​လၢ အ​ဟဲ​လၢ ကစၢ်​ယွၤ​အ​အိၣ်​ ဒီး​မ့ၢ်​ဝဲ​လၢ​ပဂီၢ်​လီၤ. လံာ်စီဆှံ​မၤစၢၤ​ပှၤ​ဒ်သိး ပ​က​သ့ၣ်ညါ​လၢ ပ​က​ဘၣ်​အိၣ်မူ​ဒ်လဲၣ်​ ဒီး​ပ​ဒိးန့ၢ်​ဘၣ်​ ကစၢ်​ယွၤ​အ​တၢ်ဘၣ်သး က​သ့​ဒ်လဲၣ်. တကး​ဒံးဘၣ်​ လံာ်စီဆှံ ပာ်ဖျါ​ထီၣ်ဝဲ တၢ်​သံကွၢ်​လၢ တၢ်​ဖီလာ်​တဖၣ်​အံၤ အ​တၢ်​စံးဆၢ​လီၤ–

လံာ်စီဆှံ​န့ၣ်​ ​ဘၣ်​တၢ်​ပာ်ဖှိၣ်​ထီၣ်​အီၤ​လၢ​လံာ် ၆၆ ကတြူၢ်​လီၤ. ဒီး​ဘၣ်​တၢ်​နီၤဖး​က့ၤ​အီၤ ခံ​ကတြူၢ် လၢ​အမ့ၢ် လံာ်စီဆှံ​လၢ ဧ့ၤဘြံၤ-အရၣ်​မ့း​ကျိာ်​တ​ကတြူၢ် (“လံာ်​တၢ်​အၢၣ်​လီၤ​အီ​လီၤ​အ​လီၢ်လံၤ”) ဒီး​လံာ်စီဆှံ​လၢ ကြံး​ကျိာ်​တ​ကတြူၢ် (“လံာ်​တၢ်​အၢၣ်​လီၤ​အီ​လီၤ​အသီ”) လီၤ. လံာ်စီဆှံ​အ​ကတြူၢ်​ခဲလၢာ်​န့ၣ်​ ​ဘၣ်​တၢ်​နီၤဖး​က့ၤ​အီၤ​လၢ အ​ဆၢဒိၣ်​ဒီး အ​ဆၢဖိ​တဖၣ်​လီၤ. ဖဲ​တၢ်​ပာ်ဖျါ​ထီၣ်​ လံာ်စီဆှံ​အဆၢ​အခါ နီၣ်ဂံၢ်​အဆိ​ကတၢၢ်​လၢ လံာ်​အ​မံၤ အလီၢ်​ခံ​န့ၣ်​ မ့ၢ်​အ​ဆၢဒိၣ်​ ဒီး​နီၣ်ဂံၢ်​လၢခံ​တဖၣ်​န့ၣ်​ မ့ၢ်​အ​ဆၢဖိ​တဖၣ်​လီၤ. အဒိ, စံးထီၣ်​ပတြၢၤ ၁:၁ န့ၣ်​အဲၣ်ဒိး​တဲဝဲ စံးထီၣ်​ပတြၢၤ အ​ဆၢဒိၣ်​ ၁, အ​ဆၢဖိ ၁ လီၤ.