မၤတၢ် ၁၅:၁-၄၁
-
တၢ်တဲအါလိာ်သး ဘၣ်ဃးဒီး တၢ်ကူးတရံးလၢ ဝ့ၢ်အၣ်တံၤအီာ်အပူၤ (၁, ၂)
-
ဆှၢထီၣ်တၢ်သံကွၢ်လၢ ဝ့ၢ်ယရူၤၡလ့ၣ် (၃-၅)
-
တၢ်အိၣ်ဖှိၣ်သးပှၢ်ဒီး တၢ်မၢဖိတဖၣ် အိၣ်ဖှိၣ်ဝဲ (၆-၂၁)
-
လံာ်ပရၢလၢ အဟဲလၢ ပှၤပၢဆှၢတၢ်ကမံးတံာ်အအိၣ် (၂၂-၂၉)
-
ဟးဆှဲးတၢ်သွံၣ် (၂၈, ၂၉)
-
-
တၢ်အိၣ်ဖှိၣ်တဖၣ် ဒိးန့ၢ်ဘၣ် တၢ်ဟ့ၣ်ဂံၢ်ဟ့ၣ်ဘါ ခီဖျိလၢလံာ်ပရၢ (၃၀-၃၅)
-
စီၤပီလူးဒီးစီၤဘၢ်နါဘၤ လဲၤကျဲတဂၤတဘိ (၃၆-၄၁)
၁၅ ပိာ်ခွါတနီၤလၢ အအိၣ်ဟဲလၢ ယူဒၤအဟီၣ်ကဝီၤန့ၣ် ဟဲလီၤဝဲဒီး သိၣ်လိဝဲ ဒီပုၢ်ဝဲၢ်ခွါတဖၣ်လၢ “သုမ့ၢ်တဒိး တၢ်ကူးတရံးဒ် စီၤမိၤၡ့ အတၢ်သိၣ်တၢ်သီ အိၣ်ဝဲအသိးဘၣ်န့ၣ်+ သုဒိးန့ၢ်ဘၣ် တၢ်အုၣ်က့ၤခီၣ်က့ၤ တသ့ဘၣ်.”
၂ ဘၣ်ဆၣ် စီၤပီလူးဒီး စီၤဘၢ်နါဘၤ အသးတလီၤပလိာ်ဒီး အဝဲသ့ၣ်ဘၣ် ဒီးတဲအါလိာ်အသး ဒီးအဝဲသ့ၣ်အါမး ဝံၤအလီၢ်ခံ ပှၤရဲၣ်ကျဲၤဝဲလၢ စီၤပီလူး, စီၤဘၢ်နါဘၤ ဒီးဒီပုၢ်ဝဲၢ်ခွါအဂၤတနီၤ ကလဲၤတဲသကိး တၢ်ဂ့ၢ်တခါအံၤဒီး တၢ်မၢဖိဒီး တၢ်အိၣ်ဖှိၣ် သးပှၢ်တဖၣ်လၢ ဝ့ၢ်ယရူၤၡလ့ၣ်+ အပူၤလီၤ.
၃ ဒီးတၢ်အိၣ်ဖှိၣ်လဲၤဆှၢ အဝဲသ့ၣ်လၢ ကျဲတကူာ်ဝံၤဒီး က့ၤကဒါဝဲလီၤ. အဝဲသ့ၣ် ဆဲးလဲၤခီဂာ်ဝဲ ကီၢ်ဖံၤနံက့ၤ ဒီးကီၢ်ၡၤမရံ ဒီးတဲဝဲဘၣ်ဃးဒီး ပှၤကလုာ်အဂၤတဖၣ် လၢအစးထီၣ်ဘူၣ်ထီၣ်ဘါထီၣ် ကစၢ်ယွၤအဂ့ၢ် လီၤတံၢ်လီၤဆဲးလီၤ. အဃိ ဒီပုၢ်ဝဲၢ်ခဲလၢာ် သးခုဝဲဒိၣ်မးလီၤ.
၄ ဖဲအဝဲသ့ၣ် လဲၤတုၤလၢ ဝ့ၢ်ယရူၤၡလ့ၣ်အခါ တၢ်အိၣ်ဖှိၣ်, တၢ်မၢဖိဒီး တၢ်အိၣ်ဖှိၣ်သးပှၢ်တဖၣ် တူၢ်လိာ်မုာ် အဝဲသ့ၣ်ဂ့ၤဂ့ၤ ဒီးအဝဲသ့ၣ် တဲဖျါထီၣ် တၢ်ခဲလၢာ်လၢ ကစၢ်ယွၤမၤတ့ၢ်ဝဲ ခီဖျိလၢ အဝဲသ့ၣ်လီၤ.
၅ ဘၣ်ဆၣ် ပှၤဖၤရံၤၡဲတနီၤလၢ အကဲထီၣ် ပှၤစူၢ်က့ၤနာ်က့ၤတၢ်န့ၣ် ဂဲၤဆၢထၢၣ်ဒီး တဲဝဲလၢ “ပှၤတဖၣ်န့ၣ် ကဘၣ်ဒိးတၢ်ကူးတရံး ဒီးပကဘၣ်မၤလိာ် အဝဲသ့ၣ်လၢ ကမၤထွဲစီၤမိၤၡ့ အတၢ်သိၣ်တၢ်သီလီၤ.”+
၆ အဃိ တၢ်မၢဖိ ဒီးတၢ်အိၣ်ဖှိၣ်သးပှၢ်တဖၣ် ပာ်ဖှိၣ်ထီၣ်အသး ဒ်သိးကတဲသကိးဝဲ တၢ်ဂ့ၢ်အံၤအဂီၢ်လီၤ.
၇ ဒီးအဝဲသ့ၣ် တဲအါလိာ်သး ဖးယံာ်ဝံၤဒီး စီၤပ့းတရူးဂဲၤဆၢထၢၣ် ဒီးတဲဘၣ်အဝဲသ့ၣ်လၢ “ဒီပုၢ်ဝဲၢ်သ့ၣ်ဧၢ, သုသ့ၣ်ညါလၢ အပူၤကွံာ်ဖးယံာ်န့ၣ် ကစၢ်ယွၤ ဃုထၢယၤ လၢသုကျါ ဒ်သိး ပှၤကလုာ်အဂၤတဖၣ် ကနၢ်ဟူဘၣ်တၢ်သးခုကစီၣ် ဒီးကစူၢ်က့ၤနာ်က့ၤတၢ် ခီဖျိလၢ ယတၢ်ကတိၤတဖၣ်အဃိလီၤ.+
၈ ဒီးကစၢ်ယွၤလၢ အသ့ၣ်ညါပှၤသးန့ၣ်+ ပာ်ဖျါထီၣ်ဝဲ တၢ်အုၣ်သးခီဖျိ အဟ့ၣ်လီၤ အဝဲသ့ၣ်သးစီဆှံ+ ဒ်အဟ့ၣ်လီၤပှၤအသိးလီၤ.
၉ ဒီးအဝဲသ့ၣ်မ့ၢ်ဂ့ၤ, ပဝဲဒၣ်အံၤမ့ၢ်ဂ့ၤ, ကစၢ်ယွၤထံၣ်ဝဲ ဒ်သိးသိးလီၤ.+ ဒီးအဝဲ မၤကဆှီထီၣ်က့ၤ အဝဲသ့ၣ်အသး ခီဖျိလၢ အဝဲသ့ၣ် အတၢ်နာ်အဃိလီၤ.+
၁၀ မ့မ့ၢ်ဒ်န့ၣ်န့ၣ် ခဲအံၤ ဘၣ်မနုၤအဃိ သုမၤကွၢ်ကစၢ်ယွၤ ခီဖျိလၢ သုအဲၣ်ဒိးပာ်ထီၣ် နီၣ်ယိးဘိလၢ ယ့ၣ်ၡူးအပျဲၢ် အဘီၣ်တဖၣ်အံၤ အလိၤလဲၣ်.+ နီၣ်ယိးဘိအံၤ ပမိၢ်ပၢ်ဖံဖု လၢပျၢၤမ့ၢ်ဂ့ၤ, ပဝဲသ့ၣ်တဖၣ်အံၤမ့ၢ်ဂ့ၤ, ပယိးအီၤ တန့ၢ်ဘၣ်.+
၁၁ မ့မ့ၢ်ပဝဲန့ၣ် ပနာ်လၢ ပဘၣ် တၢ်အုၣ်က့ၤခီၣ်က့ၤပှၤခီဖျိ ကစၢ်ယ့ၣ်ၡူး အတၢ်သးကညီၤ ဒိၣ်ဒိၣ်မုၢ်မုၢ် အဃိလီၤ.+ ဒီးပနာ်လၢ အဝဲသ့ၣ်စ့ၢ်ကီး ဘၣ်တၢ် အုၣ်က့ၤခီၣ်က့ၤအီၤလၢ ကျဲဒ်န့ၣ် စ့ၢ်ကီးလီၤ.”+
၁၂ ဖဲန့ၣ်န့ၣ် ပှၤကိးဂၤဒဲးအိၣ်ဘှ့ၣ်ဝဲ ဒီးဒိကနၣ်ဝဲ စီၤဘၢ်နါဘၤ ဒီးစီၤပီလူး တဲဖျါထီၣ် တၢ်ပနီၣ်လီၤလး ဒီးတၢ်လီၤလိၢ်လီၤလးတဖၣ်လၢ ကစၢ်ယွၤမၤတ့ၢ်ဝဲ လၢပှၤကလုာ်တဖၣ် အကျါ ခီဖျိလၢ အဝဲသ့ၣ်လီၤ.
၁၃ အဝဲသ့ၣ် တဲတၢ်ဝံၤအလီၢ်ခံ စီၤယၤကိာ် တဲဝဲလၢ “ဒီပုၢ်ဝဲၢ်သ့ၣ်ဧၢ, ဒိကနၣ်ယၤတက့ၢ်.
၁၄ ဖဲမကၢာ် စီၤစူၤမ့းအိး*+ ပာ်ဖျါထီၣ်ဝဲ လီၤတံၢ်လီၤဆဲးလၢ ကစၢ်ယွၤ တူၢ်လိာ် ပှၤကလုာ်တဖၣ် အဆိကတၢၢ်တဘျီ ဒ်သိး ကဃုထၢထီၣ် ပှၤလၢ အဝဲသ့ၣ်အကျါလၢ အမံၤအဂီၢ်လီၤ.+
၁၅ ဒီးတၢ်ကတိၤတဖၣ်အံၤ လီၤပလိာ်လိာ်အသးဒီး ဝံတဖၣ် အတၢ်ကွဲးလၢ အတဲဝဲလၢ
၁၆ ‘တၢ်သ့ၣ်တဖၣ်အံၤ ဝံၤအလီၢ်ခံ ယကဟဲက့ၤ ဒီးသူၣ်ထီၣ်ကဒီး စီၤဒၤဝံးအဒဲလၢ အလီၤပှီၢ်လီၤ. ယကဘှီဂ့ၤထီၣ်က့ၤ တၢ်လၢအဟးဂီၤ ဒီးမၤဂ့ၤထီၣ်က့ၤအီၤလၢ အသီတဘျီလီၤ.
၁၇ ယကမၤဒ်န့ၣ် ဒ်သိးပှၤလၢ အအိၣ်တ့ၢ်တဖၣ် ဒီးပှၤကလုာ်ခဲလၢာ်လၢ အဘၣ် တၢ်ကိးအီၤလၢ ယမံၤန့ၣ် ကဃုယၤ, ယဟိဝၤယွၤ* လၢအသးဒီဖျၢၣ်လီၤ. ယၤ, ယဟိဝၤယွၤန့ၣ် ယတဲတၢ်ဂ့ၢ်တဖၣ်အံၤ ဒီးယကမၤ တၢ်သ့ၣ်တဖၣ်အံၤ+
၁၈ လၢအမ့ၢ် တၢ်လၢယဆၢတဲာ်ပာ်စၢၤအီၤ ဖးယံာ်လံလီၤ.’+
၁၉ အဃိ မ့မ့ၢ်ယတၢ်ထံၣ်န့ၣ် တဘၣ်မၤတံာ်တာ် ပှၤကလုာ်တဖၣ် လၢအအဲၣ်ဒိးဘူၣ်ထီၣ်ဘါထီၣ် ကစၢ်ယွၤတဂ့ၤ.+
၂၀ လၢတၢ်န့ၣ်အလီၢ် ပကကွဲးန့ၢ် အဝဲသ့ၣ်ဒ်သိး အကဟးဆှဲးတၢ်လၢ အဘၣ်ထွဲလိာ်သး ဒီးတၢ်ဘါတၢ်ဂီၤတၢ်ဖှီၣ်တဖၣ်,+ တၢ်မၤကမၣ်မုၣ်ကမၣ်ခွါ,*+ ဆၣ်ဖိကီၢ်ဖိလၢ တၢ်စံၢ်သံအီၤ* ဒီးတၢ်သွံၣ်လီၤ.+
၂၁ နီၢ်ကီၢ်န့ၣ် စးထီၣ်လၢပျၢၤလံၤလံၤ ပှၤစံၣ်တဲၤတဲလီၤ စီၤမိၤၡ့ အတၢ်ကွဲးအသးလၢ အအိၣ်ဒီး တၢ်သိၣ်တၢ်သီတဖၣ်အံၤလၢ ဝ့ၢ်တဝ့ၢ်ဘၣ် တဝ့ၢ်အပူၤလီၤ. ပှၤမၤဒ်န့ၣ် ခီဖျိ ဖဲမုၢ်အိၣ်ဘှံးနံၤ ကိးဘျီဒဲးန့ၣ် ပှၤဖးထီၣ် စီၤမိၤၡ့ အတၢ်ကွဲးအသးလၢ ကလုၢ်ဖးဒိၣ် လၢဘူၣ်ဘျီၣ်ပူၤလီၤ.”+
၂၂ တၢ်မၢဖိ ဒီးတၢ်အိၣ်ဖှိၣ်သးပှၢ်တဖၣ် ဒီးတၢ်အိၣ်ဖှိၣ်ဒီတဖျၢၣ် ဆၢတဲာ်ဝဲလၢ ကဆှၢလီၤဝဲ ပိာ်ခွါခံဂၤလၢ အဘၣ်တၢ်ဃုထၢထီၣ်အီၤလၢ အဝဲသ့ၣ်အကျါ ဃုာ်ဒီးစီၤပီလူး ဒီးစီၤဘၢ်နါဘၤ ဒ်သိးကလဲၤလၢ ဝ့ၢ်အၣ်တံၤအီာ် အဂီၢ်လီၤ. ဒီးအဝဲသ့ၣ် ဆှၢလီၤဝဲ စီၤယူဒၤလၢ ပှၤကိးအီၤလၢ စီၤဘၢ်စဘါ ဃုာ်ဒီးစီၤစံလၤလီၤ.+ အဝဲသ့ၣ် မ့ၢ်ပှၤလၢ အတီခိၣ်ရိၤမဲတၢ်လၢ ဒီပုၢ်ဝဲၢ်တဖၣ် အကျါလီၤ.
၂၃ ဒီးအဝဲသ့ၣ် ဆှၢလီၤလံာ်ခီဖျိ ပှၤတဖၣ်န့ၣ် ဒီးကွဲးဝဲလၢ,
“ဆူဒီပုၢ်ဝဲၢ်ခွါတဖၣ်လၢ အအိၣ်လၢ ဝ့ၢ်အၣ်တံၤအီာ်,+ ကီၢ်စူၤရံ ဒီးကံၤလံၤကံ အကီၢ်ရ့ၣ် လၢအမ့ၢ် ပှၤကလုာ်အဂၤသ့ၣ်ဧၢ, ပဝဲတၢ်မၢဖိဒီး တၢ်အိၣ်ဖှိၣ်သးပှၢ်တဖၣ် လၢအမ့ၢ် သုဒီပုၢ်ဝဲၢ်တဖၣ်န့ၣ် ဆၢဂ့ၤဆၢဝါသုလီၤ.
၂၄ ပနၢ်ဟူဘၣ်လၢ ပှၤတနီၤလၢပကျါ လဲၤလၢသုအိၣ် ဒီးမၤကီမၤခဲသုလၢ အတၢ်ကတိၤတဖၣ် ဒ်သိးကဆှၢကမၣ်သု အဂီၢ်လီၤ.+ နီၢ်ကီၢ်န့ၣ် ပတဟံးစုနဲၣ်ကျဲ အဝဲသ့ၣ်လၢ ကမၤဝဲ ဒ်အံၤဘၣ်.
၂၅ အဃိ လၢတၢ်သးတဖျၢၣ်ဃီအပူၤ ပဆၢတဲာ်လၢ ပကဃုထၢထီၣ် ပိာ်ခွါခံဂၤ ဒ်သိးကဆှၢလီၤ အဝဲသ့ၣ်လၢသုအိၣ် ဃုာ်ဒီးဒီပုၢ်ဝဲၢ်သးဘိခံဂၤ လၢအမ့ၢ်စီၤဘၢ်နါဘၤ ဒီးစီၤပီလူးလီၤ.
၂၆ စီၤဘၢ်နါဘၤ ဒီးစီၤပီလူးန့ၣ် မ့ၢ်ပှၤလၢ အဟ့ၣ်လီၤအသး လၢာ်လၢာ်ဆ့ဆ့လၢ ပကစၢ် ယ့ၣ်ၡူးခရံာ် အမံၤအဂီၢ်လီၤ.+
၂၇ ဒီးပဆှၢလီၤ စီၤယူဒၤဒီးစီၤစံလၤ ဒ်သိး အဝဲသ့ၣ်ကတဲဘၣ်သု တၢ်ဂ့ၢ်တခါအံၤလၢ အထးခိၣ်စ့ၢ်ကီးလီၤ.+
၂၈ သးစီဆှံ+ ဒီးပဝဲသ့ၣ်တဖၣ် တအဲၣ်ဒိးပာ်ထီၣ် တၢ်ဝံတၢ်ယိးအဂၤလၢ သုလိၤနီတမံၤဘၣ်, ဘၣ်ဆၣ် ထဲဒၣ်တၢ်လၢ အလီၢ်အိၣ်ဝဲ သပှၢ်တၢၢ်လၢ လာ်တဖၣ်အံၤလီၤ.
၂၉ တၢ်လၢအဘၣ် တၢ်လုၢ်ထီၣ်အီၤလၢ တၢ်ဂီၤတၢ်ဖှီၣ်,+ တၢ်သွံၣ်,+ ဆၣ်ဖိကီၢ်ဖိလၢ တၢ်စံၢ်သံအီၤ+ ဒီးတၢ်မၤကမၣ်မုၣ်ကမၣ်ခွါန့ၣ်+ ဟးဆှဲးအီၤ ထီဘိတက့ၢ်. သုမ့ၢ်ဟးဆှဲး တၢ်သ့ၣ်တဖၣ်အံၤ လီၤတံၢ်လီၤဆဲးန့ၣ် ကကဲဘျုးလၢ သုဂီၢ်လီၤ. မ်သုအိၣ်ဆူၣ်အိၣ်ချ့တက့ၢ်.”
၃၀ ဖဲပိာ်ခွါတဖၣ်အံၤ ဘၣ်တၢ်ပျဲက့ၤအီၤအခါ အဝဲသ့ၣ် လဲၤလီၤလၢ ဝ့ၢ်အၣ်တံၤအီာ်လီၤ. ဒီးအဝဲသ့ၣ် ကိးဖှိၣ်ဝဲ ယ့ၣ်ၡူးအပျဲၢ်အဘီၣ်ခဲလၢာ် ဒီးဟ့ၣ်လီၤ အဝဲသ့ၣ် လံာ်ပရၢလီၤ.
၃၁ ဖဲအဝဲသ့ၣ်ဖးလံာ်အံၤ ဝံၤအလီၢ်ခံ အဝဲသ့ၣ် ပှဲၤဒီးတၢ်သးခု ခီဖျိလၢ ဒိးန့ၢ်ဘၣ် တၢ်ဟ့ၣ်ဂံၢ်ဟ့ၣ်ဘါ အဃိလီၤ.
၃၂ ဒီးစီၤယူဒၤဒီး စီၤစံလၤန့ၣ် မ့ၢ်လၢအဝဲသ့ၣ် မ့ၢ်စ့ၢ်ကီးဝံအဃိ ဟ့ၣ်ဂံၢ်ဟ့ၣ်ဘါဝဲ ဒီပုၢ်ဝဲၢ်တဖၣ် လၢတၢ်ကတိၤအါမံၤ ဒီးဒုးဆူၣ်ထီၣ် အဝဲသ့ၣ် အဂံၢ်အဘါလီၤ.+
၃၃ အဝဲသ့ၣ် အိၣ်ဝဲဒီး ဒီပုၢ်ဝဲၢ်ဖဲန့ၣ်တဖၣ် တတီၤဖိလီၤ. ဒီးဒီပုၢ်ဝဲၢ်တဖၣ် ဆၢဂ့ၤဆၢဝါ အဝဲသ့ၣ် ဝံၤဒီးအဝဲသ့ၣ် က့ၤကဒါက့ၤလၢ ပှၤလၢအဆှၢလီၤ အဝဲသ့ၣ်တဖၣ်အအိၣ်လီၤ.
၃၄ *—
၃၅ ဘၣ်ဆၣ် စီၤပီလူးဒီး စီၤဘၢ်နါဘၤအိၣ်တ့ၢ်လၢ ဝ့ၢ်အၣ်တံၤအီာ် ဒီးသိၣ်လိတၢ် ဒီးစံၣ်တဲၤတဲလီၤဝဲ ယဟိဝၤယွၤ အကလုၢ်ကထါ အတၢ်သးခုကစီၣ် ဃုာ်ဒီး ဒီပုၢ်ဝဲၢ်အါဂၤလီၤ.
၃၆ အါနံၤအါသီ ဝံၤအလီၢ်ခံ စီၤပီလူးတဲဘၣ် စီၤဘၢ်နါဘၤလၢ “ခဲအံၤ ပကက့ၤအိၣ်သကိး ဒီပုၢ်ဝဲၢ်တဖၣ် လၢဝ့ၢ်ကိးဖျၢၣ်ဒဲးလၢ ပစံၣ်တဲၤတဲလီၤတ့ၢ် ယဟိဝၤယွၤ အကလုၢ်ကထါ ဒ်သိး ပကထံၣ်ဘၣ်လၢ အဝဲသ့ၣ် မၤသးဒ်လဲၣ်” လီၤ.+
၃၇ စီၤဘၢ်နါဘၤ ပာ်လီၤအသး သပှၢ်တၢၢ် လၢအကလဲၤကိးဝဲ စီၤယိၤဟၣ်လၢ ပှၤကိးအီၤလၢ စီၤမၢ်ကူးလီၤ.+
၃၈ မ့မ့ၢ် စီၤပီလူးန့ၣ် တအဲၣ်ဒိးလဲၤကိးဃုာ်ဝဲ စီၤမၢ်ကူးဘၣ်, မ့ၢ်လၢ စီၤမၢ်ကူးပာ်တ့ၢ်ကွံာ် အဝဲသ့ၣ်လၢ ပၣ်ဖူၤလံ ဒီးတလဲၤဒီးအဝဲသ့ၣ် ဒီးတမၤလၢပှဲၤ အမူဒါဘၣ်အဃိလီၤ.+
၃၉ ဖဲန့ၣ်န့ၣ် အဝဲသ့ၣ် သးပှံၢ်ထီၣ်လိာ်သး ဒိၣ်မးအဃိ အဝဲသ့ၣ် လဲၤကျဲတဂၤတဘိလီၤ. ဒီးစီၤဘၢ်နါဘၤန့ၣ်+ ကိးဃုာ်ဝဲ စီၤမၢ်ကူး ဒီးဒိးထီၣ်ကဘီ ဒီးလဲၤလၢ ကီးကူပြူးလီၤ.
၄၀ မ့မ့ၢ် စီၤပီလူးန့ၣ် ဃုထၢထီၣ် စီၤစံလၤလီၤ. ဒီးဖဲဒီပုၢ်ဝဲၢ်တဖၣ် ဃ့ထုကဖၣ်လၢ ယဟိဝၤယွၤ ကပာ်ဖျါထီၣ် တၢ်သးကညီၤဒိၣ်ဒိၣ်မုၢ်မုၢ် လၢစီၤပီလူးအဖီခိၣ် ဝံၤအလီၢ်ခံ အဝဲလဲၤတၢ်လီၤ.+
၄၁ အဝဲလဲၤခီဂာ် ကီၢ်စူၤရံ ဒီးကံၤလံၤကံ အကီၢ်ရ့ၣ် ဒီးမၤဂၢၢ်မၤကျၢၤထီၣ် တၢ်အိၣ်ဖှိၣ်တဖၣ်လီၤ.
တၢ်ဂ့ၢ်အဘျဲၣ်တဖၣ်
^ မ့ၢ်ဝဲ စီၤၡံမိၣ် (ပ့းတရူး). အမံၤဘၣ်တၢ်ကွဲးအီၤလီၤဆီတစဲး.
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ မ့ၢ်စ့ၢ်ကီး “တၢ်လၢပှၤမၤသံအီၤလၢ တဒုးဟးထီၣ်အသွံၣ်ဘၣ်.”
^ ကြံးကျိာ် မ့ၢ်ဝဲ ဖီနံယၤ. ကွၢ် တၢ်ကတိၤအခီပညီ.
^ ကွၢ် တၢ်ဂ့ၢ်ဘၣ်ထွဲလိာ်သး က၃.
