မၤတၢ် ၃:၁-၂၆
၃ ဖဲဟါလီၤခီ ၃ နၣ်ရံၣ် ဃၣ်ဃၣ်န့ၣ်* စီၤပ့းတရူး ဒီးစီၤယိၤဟၣ် လဲၤဝဲလၢတၢ်လုၢ်ဟံၣ် ဖဲတၢ်ဃ့ထုကဖၣ်တၢ် အဆၢကတီၢ်လီၤ.
၂ ဒီးပှၤလဲၤစိာ် ပှၤလၢ အခီၣ်ဟးဂီၤလၢ အအိၣ်ဖျဲၣ်ထီၣ် လံၤလံၤတဂၤ ဖဲန့ၣ်လီၤ. ပှၤပာ်လီၤအီၤ ဖဲတၢ်လုၢ်ဟံၣ် အတြဲၤခီၣ်ထံး ကိးနံၤဒဲး ဒ်သိး အကဃ့တၢ်လၢ ပှၤလၢအဟဲနုာ်လီၤလၢ တၢ်လုၢ်ဟံၣ်ပူၤတဖၣ် အဂီၢ်လီၤ. တၢ်လုၢ်ဟံၣ်အတြဲၤအံၤ ပှၤကိးအီၤလၢ တြဲၤဃံလၤလီၤ.
၃ ဖဲပှၤတဂၤန့ၣ် ထံၣ်ဝဲလၢ စီၤပ့းတရူး ဒီးစီၤယိၤဟၣ် ကလဲၤနုာ်လီၤလၢ တၢ်လုၢ်ဟံၣ်ပူၤအခါ အဝဲဃ့တၢ်လီၤ.
၄ ဘၣ်ဆၣ် စီၤပ့းတရူး ဒီးစီၤယိၤဟၣ် ကွၢ်အီၤလိၤလိၤ ဒီးတဲဝဲလၢ “ကွၢ်လၢပအိၣ်မီၤ.”
၅ ဒီးအဆိကမိၣ်ဝဲလၢ အကဒိးန့ၢ်ဘၣ် တၢ်တမံၤမံၤလၢ အဝဲသ့ၣ်အိၣ်အဃိ အကွၢ်အဝဲသ့ၣ် ထံထံလီၤ.
၆ ဘၣ်ဆၣ် စီၤပ့းတရူး တဲဝဲလၢ “ယထူဒီးယစ့ တအိၣ်ဘၣ်. ဘၣ်ဆၣ် တၢ်လၢ အအိၣ်ဒီးယၤန့ၣ် ယကဟ့ၣ်လီၤနၤလီၤ. လၢပှၤနစၤရ့းဖိ ယ့ၣ်ၡူးခရံာ် အမံၤအပူၤန့ၣ် ယကတဲနၤ, ဆၢထၢၣ်ဟးတက့ၢ်.”+
၇ ဒီးစီၤပ့းတရူး ဖီၣ်ထီၣ်ဝဲအစုထွဲတခီ ဒီးဝံၣ်ဆၢထၢၣ်အီၤလီၤ.+ တဘျီဃီန့ၣ် အခီၣ်ဒီး အခီၣ်ကမဲာ်တဖၣ် ဆှိၣ်ထီၣ်ဝဲလီၤ.+
၈ အဃိ အဝဲဖုကဆဲးထီၣ်*+ လၢအခီၣ်ဒီး အဝဲစးထီၣ်ဟးဝဲ ဒီးလဲၤနုာ်လီၤဒီး အဝဲသ့ၣ်လၢ တၢ်လုၢ်ဟံၣ်ပူၤလီၤ. ဒီးအဝဲဟးဖုကဆဲးထီၣ် ဒီးစံးထီၣ်ပတြၢၤ ကစၢ်ယွၤလီၤ.
၉ ပှၤခဲလၢာ်ထံၣ်လၢ အဝဲဟးဒီး စံးထီၣ်ပတြၢၤ ကစၢ်ယွၤလီၤ.
၁၀ ဒီးအဝဲသ့ၣ် သ့ၣ်ညါဝဲလၢ အဝဲမ့ၢ် ပှၤတဂၤဃီလၢ အဆ့ၣ်နီၤဃ့တၢ် လၢတၢ်လုၢ်ဟံၣ် တြဲၤဃံလၤ အခီၣ်ထံးလီၤ.+ ဒီးမ့ၢ်လၢအဝဲ ဟးသ့လံအဃိ အဝဲသ့ၣ် ဖုးဘၣ်အသး ဒီးကမၢကမၣ်ဝဲ ဒိၣ်မးလီၤ.
၁၁ ဖဲအဝဲဖီၣ်တံၢ်ဃာ်ဒံး စီၤပ့းတရူးဒီးစီၤယိၤဟၣ်အခါ ပှၤခဲလၢာ်ကမၢကမၣ် ဒိၣ်မးအဃိ လဲၤဃ့ၢ်ဝဲ တပူၤဃီလၢ အဝဲသ့ၣ်အအိၣ် ဖဲစီၤၡလိၤမိၤ အကျဲလၢ အအိၣ်ဒီးအခိၣ်ဒုးလီၤ.+
၁၂ ဖဲစီၤပ့းတရူး ထံၣ်အဝဲသ့ၣ်အခါ အတဲဘၣ် အဝဲသ့ၣ်လၢ “ပှၤအံၣ်စရ့လးဖိသ့ၣ်ဧၢ, ဘၣ်မနုၤအဃိ သုကမၢကမၣ်လဲၣ်. ဒီးဘၣ်မနုၤအဃိ သုကွၢ်ထံပှၤဒီး ဆိကမိၣ်လၢ ပဒုးဟးပှၤတဂၤအံၤ ခီဖျိလၢ ပနီၢ်ကစၢ် အတၢ်စိတၢ်ကမီၤ မ့တမ့ၢ် ပတၢ်သးတီဒီးကစၢ်ယွၤ အဃိလဲၣ်.
၁၃ စီၤအၤဘြၤဟၣ်, စီၤအံၤစဲး ဒီးစီၤယၤကိာ်အယွၤ+ လၢအမ့ၢ် ပမိၢ်ပၢ်ဖံဖု လၢပျၢၤတဖၣ်အယွၤန့ၣ် မၤလၤကပီၤဝဲ အခ့အပှၤ+ ယ့ၣ်ၡူးလံ.+ လၢညါ စီၤပံၤလး ဆၢတဲာ်ဝဲလၢ ကပျၢ်ကွံာ်ယ့ၣ်ၡူး ဘၣ်ဆၣ် သုဟ့ၣ်လီၤကွံာ်အီၤ+ ဒီးသုသမၢအီၤလၢ စီၤပံၤလး အမဲာ်ညါလီၤ.
၁၄ သုသမၢ ပှၤလၢအစီဆှံဒီး အတီအလိၤတဂၤန့ၣ် ဒီးသုမၢ ပှၤပျၢ်ကွံာ်န့ၢ်သုလၢ ပှၤမၤသံတၢ်တဂၤလီၤ.+
၁၅ မ့မ့ၢ် တၢ်မူအခိၣ်တဂၤန့ၣ် သုမၤသံအီၤ+ ဘၣ်ဆၣ် ကစၢ်ယွၤ ဒုးဂဲၤဆၢထၢၣ်က့ၤအီၤလၢ တၢ်သံလီၤ. ဒီးပဝဲဒၣ်အံၤ ပမ့ၢ်ပှၤအုၣ်အသးလၢ တၢ်ဂ့ၢ်အဝဲအံၤလီၤ.+
၁၆ ခီဖျိလၢ ယ့ၣ်ၡူးအမံၤ ဒီးပနာ်အမံၤအဃိ ပှၤလၢသုထံၣ်ဒီး သုသ့ၣ်ညါအီၤတဂၤအံၤန့ၣ် အဂံၢ်ဆူၣ်ထီၣ်ဝဲလံ. ပတၢ်နာ်လၢ ပဒိးန့ၢ်ဘၣ်အီၤ ခီဖျိလၢယ့ၣ်ၡူးန့ၣ် မၤဘျါက့ၤပှၤတဂၤအံၤဂ့ၤဂ့ၤ လၢသုဝဲခဲလၢာ် အမဲာ်ညါလီၤ.
၁၇ ဘၣ်ဆၣ် ဒီပုၢ်ဝဲၢ်သ့ၣ်ဧၢ, ယသ့ၣ်ညါလၢ သုဝဲသ့ၣ်ဒီး သုခိၣ်သုနၢ်တဖၣ်+ တသ့ၣ်ညါဝဲဘၣ်အဃိ မၤဘၣ်တၢ်ဒ်န့ၣ်လီၤ.+
၁၈ ဒ်လဲၣ်ဂ့ၤဒ်လဲၣ်ဂ့ၤ တၢ်လၢကစၢ်ယွၤ တဲဆိပာ်စၢၤဝဲခီဖျိလၢ ဝံခဲလၢာ်အထးခိၣ် လၢအဘၣ်ဃးဒီး ခရံာ်ကဘၣ်တူၢ် တၢ်နးတၢ်ဖှီၣ်အဂ့ၢ်န့ၣ် ကစၢ်ယွၤ မၤလၢထီၣ်ပှဲၤထီၣ်ဝဲ လၢကျဲဒ်အံၤလီၤ.+
၁၉ “အဃိ ဒ်သိးသုတၢ်ဒဲးဘး ကဘၣ်တၢ်ထူးသံကွံာ်အီၤ+ ဒီးဒ်သိးသုကဒိးန့ၢ်ဘၣ် တၢ်မၤမုာ်ထီၣ်က့ၤလၢ ယဟိဝၤယွၤ* အအိၣ်အဂီၢ် ပီၢ်ယၢ်လီၤက့ၤသုသး+ ဒီးဃၣ်ကဒါက့ၤ သုသးတက့ၢ်.+
၂၀ ဒီးအဝဲ ကဆှၢလီၤခရံာ်လၢ အဘၣ်တၢ်ဃုထၢထီၣ်အီၤလၢ သုဂီၢ်တဂၤန့ၣ်လီၤ. ဒီးအဝဲမ့ၢ်ဝဲ ယ့ၣ်ၡူးလီၤ.
၂၁ ယ့ၣ်ၡူးကဘၣ်အိၣ်ခိးလၢ မူခိၣ်တုၤလၢ တၢ်မၤဂ့ၤထီၣ်က့ၤ တၢ်ခဲလၢာ် အဆၢကတီၢ်ဘၣ်ဝဲ ဒ်ကစၢ်ယွၤ တဲဆိပာ်စၢၤဝဲခီဖျိလၢ ဝံစီဆှံလၢညါတဖၣ် အထးခိၣ်အသိးလီၤ.
၂၂ နီၢ်ကီၢ်န့ၣ် စီၤမိၤၡ့တဲဝဲဒၣ် ‘လၢသုဒီပုၢ်ဝဲၢ်တဖၣ် အကျါန့ၣ် သုကစၢ် ယဟိဝၤယွၤ ကဃုထၢထီၣ်န့ၢ်သု ဝံတဂၤလၢအလီၤဂာ်ဒီး ယၤလီၤ.+ သုကဘၣ်ဒိကနၣ် တၢ်ခဲလၢာ်လၢ အတဲဘၣ်သုလီၤ.+
၂၃ ဒီးပှၤလၢအတဒိကနၣ် ဝံတဂၤန့ၣ် အကလုၢ်ဘၣ်န့ၣ် ကဘၣ် တၢ်မၤဟးဂီၤကွံာ်အီၤလီၤ.’+
၂၄ နီၢ်ကီၢ်န့ၣ် စးထီၣ်လၢ ဝံၡမူၤအ့လး ဒီးဝံလၢ အလီၢ်ခံ ကိးဂၤဒဲးန့ၣ် တဲဖျါထီၣ်မုၢ်နံၤတဖၣ်အံၤ အဂ့ၢ်ပျီပျီလီၤ.+
၂၅ သုမ့ၢ် ဝံအစၢၤအသွဲၣ်တဖၣ် ဒီးတၢ်အၢၣ်လီၤလၢ ကစၢ်ယွၤမၤဝဲဒီး သုမိၢ်ပၢ်ဖံဖု လၢပျၢၤတဖၣ်န့ၣ်+ အဘၣ်ဃးဒီး သုစ့ၢ်ကီး, မ့ၢ်လၢ ကစၢ်ယွၤ တဲဘၣ် စီၤအၤဘြၤဟၣ်လၢ ‘ပှၤကိးကလုာ်ဒဲး* လၢဟီၣ်ခိၣ်ချၢန့ၣ် ကဘၣ်တၢ်ဆိၣ်ဂ့ၤ ခီဖျိလၢ နချံနသၣ်အဃိလီၤ.’+
၂၆ ကစၢ်ယွၤ ဒုးဂဲၤဆၢထၢၣ်က့ၤ အခ့အပှၤတဂၤ ဝံၤအလီၢ်ခံ ဆှၢလီၤဆိဝဲလၢသုအိၣ်+ ဒ်သိး အကမၤစၢၤသုဝဲ ကိးဂၤဒဲးလၢ သုကပီၢ်ယၢ်လီၤသုသးလၢ သုတၢ်မၤလၢ အအၢအသီတဖၣ်လီၤ. တၢ်အဝဲန့ၣ် မ့ၢ်တၢ်ဆိၣ်ဂ့ၤလၢ သုဂီၢ်လီၤ.”
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “မုၢ်ဟဲထီၣ်ဝံၤအလီၢ်ခံ ၉ နၣ်ရံၣ်ဃၣ်ဃၣ်.”
^ မ့ၢ်စ့ၢ်ကီး “စံၣ်ထီၣ်.”
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ အခီပညီလိၤလိၤ “ဒူၣ်ဖိထၢဖိခဲလၢာ်.”
