လံာ်စီဆှံ​န့ၣ်​ မ့ၢ်ဝဲ လံာ်​တ​ဘ့ၣ်​လၢ ကစၢ်​ယွၤ​သူဝဲ ဒ်သိး အ​က​တဲ​တၢ်​ဒီး ပ​ဝဲ​ကိးဂၤ​ဒဲး​အဂီၢ်​လီၤ. ဒ်သိး ပ​က​သ့ၣ်ညါ ပှၤလၢ​အ​ဒုးအိၣ်​ထီၣ်​ လံာ်စီဆှံ​တဂၤ​အံၤ​အဂ့ၢ်​န့ၣ်​ ပ​က​ဘၣ်​မၤလိ​အီၤ​လီၤ. (ယိၤဟၣ်​ ၁၇:၃; ၂ တံၤမသ့း ၃:၁၆) လၢ​လံာ်စီဆှံ​အ​ပူၤ​န့ၣ်​ ယဟိဝၤ​ယွၤ ပာ်ဖျါ​ထီၣ်​ အ​တၢ်​တိာ်ပာ်​လၢ ပှၤ​ဟီၣ်ခိၣ်​ဖိ ဒီး​ဟီၣ်ခိၣ်​အဂီၢ်​လီၤ.​—⁠၁ မိၤၡ့ ၃:၁၅; လီၣ်ဖျါ ၂၁:​၃, ၄.

လံာ်​အဂၤ​လၢ အ​ကဲဘျုး​လၢ ပှၤ​ဟီၣ်ခိၣ်​ဖိ​အဂီၢ် ဒ်သိး​ဒီး လံာ်စီဆှံ​န့ၣ်​ တအိၣ်​နီ​တ​ဘ့ၣ်ဘၣ်. လံာ်စီဆှံ ထိၣ်ဟူး​ထိၣ်ဂဲၤ​ထီၣ်​ပှၤလၢ ပ​က​ပာ်ဖျါ​ထီၣ်​က့ၤ ယဟိဝၤ​ယွၤ အ​တၢ်ဂ့ၤ​တၢ်ဝါ​တဖၣ်​ လၢ​အမ့ၢ် တၢ်အဲၣ်​တၢ်ကွံ, တၢ်​သးကညီၤ ဒီး​တၢ်​ဒိသူၣ်​ဒိသး​လီၤ. လံာ်စီဆှံ ဟ့ၣ်​ပှၤ​တၢ်​မုၢ်လၢ် ဒီး​မၤစၢၤ​စ့ၢ်ကီး​ပှၤလၢ ပ​လဲၤ​ခီဖျိ​ဘၣ်​ တၢ်ကီ​တၢ်ခဲ​လၢ အ​နး​ကတၢၢ်​ဒၣ်လဲာ် က​န့ၢ်​အဂီၢ်​လီၤ. ဒီး​တုၤ​ခဲအံၤ​န့ၣ်​ လံာ်စီဆှံ ပာ်ဖျါ​ထီၣ်ဝဲ တၢ်အိၣ်​လၢ​ဟီၣ်ခိၣ်​ချၢ​လၢ အ​တ​လီၤ​ပလိာ်​ဒီး ကစၢ်​ယွၤ အ​တၢ်ဘၣ်သး​ဘၣ်.​—⁠စံးထီၣ်​ပတြၢၤ ၁၁၉:၁၀၅; ဧ့ၤဘြံၤ ၄:၁၂; ၁ ယိၤဟၣ်​ ၂:​၁၅-၁၇.

လၢ​အ​ခီၣ်ထံး​န့ၣ်​ ပှၤ​ကွဲး​လံာ်စီဆှံ​လၢ ဧ့ၤဘြံၤ, အရၣ်မ့း ဒီး​ကြံး​ကျိာ်​လီၤ. လံာ်စီဆှံ ဒီ​တ​ဘ့ၣ်​မ့ၢ်ဂ့ၤ အ​ကတြူၢ်​တနီၤ​မ့ၢ်ဂ့ၤ ပှၤ​ကွဲးကျိာ်ထံ​က့ၤ​ဝဲ​လၢ ကျိာ် ၃,၀၀၀ ဘျဲၣ်​ညါ. လံာ်စီဆှံ​န့ၣ်​ မ့ၢ်ဝဲ လံာ်​တ​ဘ့ၣ်​လၢ ပှၤ​ကွဲးကျိာ်ထံ​အီၤ ဒီး​ပှၤ​ထုးထီၣ်​ရၤ​လီၤ​အီၤ အါ​ကတၢၢ်​လီၤ. ဒ်​ပ​ထံၣ်​ဘၣ်​အသိး လံာ်စီဆှံ တဲဆိ​ပာ်စၢၤ​ဝဲ​လၢ “ဘီမုၢ် တၢ်​သးခု​ကစီၣ်​ (တၢ်​ကစီၣ်​အရ့ဒိၣ်​လၢ အ​အိၣ်​လၢ လံာ်စီဆှံ​အ​ပူၤ) န့ၣ်​က​ဘၣ်​ တၢ်​စံၣ်တဲၤ​တဲ​လီၤ​အီၤ လၢ​ဟီၣ်ခိၣ်​ဒီဘ့ၣ်​ညါ ဒ်သိး က​ကဲထီၣ်​ တၢ်အုၣ်​အသး​လၢ ပှၤ​ကလုာ်​ခဲလၢာ် အဂီၢ်​လီၤ. ဝံၤဒီး တၢ်​အ​ကတၢၢ်​န့ၣ်​ က​တုၤ​ဝဲ​လီၤ.”​—⁠မးသဲ ၂၄:⁠၁၄.

ပ​သ့ၣ်ညါ​ဘၣ်​လၢ လံာ်စီဆှံ အ​တၢ်​ကစီၣ်​န့ၣ်​ မ့ၢ်​တၢ်​လၢ​အရ့ဒိၣ်​ အဃိ ပ​ဖီတၢၣ်​န့ၣ်​ မ့ၢ်​ဒ်သိး ပ​က​ကွဲးကျိာ်ထံ​လံာ်စီဆှံ​လၢ အ​လီၤ​ပလိာ်​လိာ်သး​ဒီး တၢ်ကွဲး​အသး​အ​ခီၣ်ထံး ဒီး​ဒ်သိး ပှၤ​ဖး​ဘၣ်​အီၤ ဒီး​နၢ်ပၢၢ်​အီၤ​ကညီ အဂီၢ်​လီၤ. တကး​ဒံးဘၣ်​ တၢ်ဂ့ၢ်​ဘၣ်ထွဲ​လိာ်သး အ​ခိၣ်တီ​တဖၣ်​ လၢ​အမ့ၢ် “တၢ်ဘျၢ​တဖၣ်​လၢ တၢ်​ကွဲးကျိာ်ထံ လံာ်စီဆှံ​အဂီၢ်,” “လံာ်စီဆှံ​တ​ဘ့ၣ်​အံၤ အ​တၢ်ဂ့ၢ်​လီၤဆီ​တဖၣ်” ဒီး “ပ​ဒိးန့ၢ်​ဘၣ်​ လံာ်စီဆှံ​ဒ်လဲၣ်” န့ၣ်​ပာ်ဖျါ​ထီၣ်ဝဲ တၢ်​ကွဲးကျိာ်ထံ အ​တၢ်ဘျၢ​တနီၤ​လၢ ပ​မၤထွဲ​အီၤ ဒီး​တၢ်​အဂၤ​တဖၣ်​လၢ အ​အိၣ်​လၢ လံာ်စီဆှံ​တ​ဘ့ၣ်​အံၤ​အ​ပူၤ​လီၤ.

ပှၤလၢ​အ​အဲၣ်​ ယဟိဝၤ​ယွၤ ဒီး​ဘူၣ်ထီၣ်​ဘါထီၣ်​အီၤ​န့ၣ်​ လီကီဝဲ ကစၢ်​ယွၤ အ​ကလုၢ်​ကထါ လံာ်စီဆှံ​လၢ ပှၤ​ကွဲးကျိာ်ထံ အခီ​ပညီ​ဘၣ်​လီၤတံၢ်​လီၤဆဲး ဒီး​ပှၤ​နၢ်ပၢၢ်​အီၤ​ညီ​တ​ဘ့ၣ်​လီၤ. (၁ တံၤမသ့း ၂:⁠၄) ဒ်​ပ​ဖီတၢၣ်​အိၣ်​ဝဲ​လၢ ပ​က​ကွဲးကျိာ်ထံ ဟီၣ်ခိၣ်​သီ​တၢ်​ကွဲးကျိာ်ထံ​လံာ်စီဆှံ လၢ​ကျိာ်​အါ​ကျိာ်​အသိး​န့ၣ်​ ပ​ထုးထီၣ်​ လံာ်စီဆှံ​တ​ဘ့ၣ်​အံၤ​လၢ ကညီ​စှီၤကျိာ်​စ့ၢ်ကီး​လီၤ. ပ​မုၢ်လၢ် ဒီး​ပ​ဃ့​ထုကဖၣ်​လၢ တၢ်​ကွဲးကျိာ်ထံ​လံာ်စီဆှံ တ​ဘ့ၣ်​အံၤ က​ကဲဘျုး​လၢ သု​ဝဲ​ပှၤ​ဖးလံာ်​ဖိ​တဖၣ်​က ‘ဃု​ကစၢ်​ယွၤ. . . ဒီး​က​ထံၣ်​န့ၢ်​အီၤ သပှၢ်​ကတၢၢ်’ အဂီၢ်​လီၤ.​—⁠မၤတၢ် ၁၇:၂၇.