မၤတၢ် ၅:၁-၄၂
-
စီၤအနၤနံ ဒီးနီၢ်စးဖံးရး (၁-၁၁)
-
တၢ်မၢဖိတဖၣ် မၤဝဲတၢ်ပနီၣ်လီၤလးအါမံၤ (၁၂-၁၆)
-
လီၤလၢဃိာ်ပူၤ ဒီးထူၣ်ဖျဲးထီၣ် (၁၇-၂၁)
-
ဘၣ်တၢ်လဲၤကိးကဒီးအီၤလၢ ပှၤယူဒၤဖိအကွီၢ်ဘျီၣ်လၢ အဒိၣ်ကတၢၢ်အမဲာ်ညါ (၂၁-၃၂)
-
‘လၢပကဒိကနၣ် ပှၤကညီအလီၢ် ဘၣ်ဒိကနၣ် ကစၢ်ယွၤအကလုၢ်’ (၂၉)
-
-
စီၤကမၤလ့လး အတၢ်ဟ့ၣ်ကူၣ် (၃၃-၄၀)
-
စံၣ်တဲၤတဲလီၤတၢ်လၢ တဟံၣ်ဘၣ်တဟံၣ် (၄၁, ၄၂)
၅ ပှၤတဂၤလၢ အမံၤမ့ၢ် စီၤအနၤနံ ဒီးအမါ နီၢ်စးဖံးရးန့ၣ် ဆါလီၤဝဲ အဟီၣ်ခိၣ်လီၤ.
၂ ဘၣ်ဆၣ် စီၤအနၤနံ ပာ်ခူသူၣ်ဝဲ စ့တနီၤလၢ အနီၢ်ကစၢ်အဂီၢ် ဒီးဟဲစိာ်ဝဲထဲတနီၤ ဒီးအးလီၤဝဲလၢ တၢ်မၢဖိတဖၣ် အစုပူၤ ဒီးအမါသ့ၣ်ညါထွဲဝဲ စ့ၢ်ကီးလီၤ.+
၃ ဒီးစီၤပ့းတရူး တဲဝဲလၢ “စီၤအနၤနံဧၢ, ဘၣ်မနုၤအဃိ နဟ့ၣ်အခွဲးလၢ မုၣ်ကီၤလံၢ်* ကထိၣ်ဟူးထိၣ်ဂဲၤထီၣ်နသးလၢ နကလံၣ်အီၣ်လီအီၣ်+ သးစီဆှံ+ ခီဖျိလၢ နပာ်ခူသူၣ်ဃာ် စ့လၢနမၤန့ၢ်အီၤ ဖဲနဆါလီၤကွံာ် ဟီၣ်ခိၣ်တကဝီၤ အခါန့ၣ်လဲၣ်.
၄ တချုး နဆါအီၤဒံးဘၣ်န့ၣ် အကဲနတၢ် တမ့ၢ်ဧီၤ. ဒီးနဆါအီၤ ဝံၤအလီၢ်ခံန့ၣ် စ့တဖၣ်န့ၣ် နသူအီၤဖဲ နအဲၣ်ဒိးသူအီၤသ့ တမ့ၢ်ဧီၤ. ဘၣ်မနုၤအဃိ နကူၣ်ထီၣ်တၢ်လၢ နကမၤဒ်အံၤလဲၣ်. တမ့ၢ်လၢ နလံၣ်အီၣ်လီအီၣ် ပှၤဟီၣ်ခိၣ်ဖိဘၣ်, မ့ၢ်ဒၣ် နလံၣ်အီၣ်လီအီၣ် ကစၢ်ယွၤလီၤ.”
၅ ဖဲစီၤအနၤနံ နၢ်ဟူဝဲ တၢ်ကတိၤတဖၣ်အံၤအခါ အဝဲလီၤဃံၢ် ဒီးသံဝဲလီၤ. ပှၤခဲလၢာ် လၢအနၢ်ဟူ တၢ်ဂ့ၢ်တခါအံၤစ့ၢ်ကီး ပျံၤတၢ် ဒိၣ်မးလီၤ.
၆ ဒီးပိာ်ခွါသးစၢ်တဖၣ် ဟဲဘိၣ်ထီၣ်အီၤလၢ တၢ်ကံးညာ်ဒီး စိာ်ထီၣ်ကွံာ်အီၤ ဒီးခူၣ်လီၤအီၤလီၤ.
၇ တၢ်ဆၢကတီၢ်ကအိၣ်ဝဲ သၢနၣ်ရံၣ် ဝံၤအလီၢ်ခံ အမါဟဲဝဲလီၤ. ဘၣ်ဆၣ် အဝဲတသ့ၣ်ညါ တၢ်ကဲထီၣ်အသး နီတမံၤဘၣ်.
၈ စီၤပ့းတရူး တဲအီၤလၢ “သုခံဂၤဆါဟီၣ်ခိၣ် န့ၢ်ထဲအံၤလီၤဧါ.” အဝဲတဲဝဲလၢ “မ့ၢ်, ထဲန့ၣ်လီၤ.”
၉ အဃိ စီၤပ့းတရူး တဲဘၣ်အီၤလၢ “ဘၣ်မနုၤအဃိ သုခံဂၤလၢာ် သးလီၤပလိာ်လၢ သုကမၤကွၢ် ယဟိဝၤယွၤ* အသးစီဆှံလဲၣ်. ပှၤလၢ အလဲၤခူၣ်လီၤ နဝၤန့ၣ် ဟဲက့ၤဘူးထီၣ်လၢ တြဲၤခီၣ်ထံးလံ. ဒီးအဝဲသ့ၣ် ကစိာ်ထီၣ်ကွံာ်နၤ စ့ၢ်ကီးလီၤ.”
၁၀ ဒီးအဝဲလီၤဃံၢ်ဝဲလၢ စီၤပ့းတရူး အခီၣ်ထံး တဘျီဃီ ဒီးသံဝဲလီၤ. ဖဲပိာ်ခွါသးစၢ်တဖၣ် ဟဲနုာ်လီၤအခါ အဝဲသ့ၣ် ထံၣ်ဝဲလၢ အသံဝဲလံအဃိ အဝဲသ့ၣ် စိာ်ထီၣ်အီၤ ဒီးခူၣ်လီၤအီၤလၢ အဝၤကပၤလီၤ.
၁၁ အဃိ တၢ်အိၣ်ဖှိၣ်ဒီဖျၢၣ် ဒီးပှၤခဲလၢာ်လၢ အနၢ်ဟူ တၢ်ဂ့ၢ်တဖၣ်အံၤန့ၣ် ပျံၤတၢ်ဖုးတၢ် ဒိၣ်မးလီၤ.
၁၂ တကးဒံးဘၣ် ခီဖျိလၢ တၢ်မၢဖိတဖၣ်အစုအဃိ တၢ်ပနီၣ်ဒီး တၢ်လီၤလိၢ်လီၤလး ဟဲကဲထီၣ်အသး အါမံၤလၢ ပှၤဂီၢ်မုၢ်အကျါလီၤ.+ ဒီးအဝဲသ့ၣ်ခဲလၢာ် ထံၣ်ဖှိၣ်လိာ်အသးလၢ စီၤၡလိၤမိၤ အကျဲလၢ အအိၣ်ဒီးအခိၣ်ဒုး အဖီလာ်လီၤ.+
၁၃ မ့မ့ၢ် ပှၤအဂၤတဖၣ်န့ၣ် တအိၣ်ဒီးတၢ်သးဒူလၢ ကဟဲမၤဃုာ်တၢ်ဒီး အဝဲသ့ၣ်ဘၣ်. ဘၣ်ဆၣ် ပှၤပတြၢၤအဝဲသ့ၣ် အါမးလီၤ.
၁၄ တကးဒံးဘၣ် ပိာ်မုၣ်ဒီးပိာ်ခွါလၢ အစူၢ်က့ၤနာ်က့ၤ ကစၢ်န့ၣ် အါထီၣ်ဝဲကွ့ၢ်ကွ့ၢ်လီၤ.+
၁၅ အဝဲသ့ၣ် လဲၤစိာ်ဝဲ ပှၤဆူးပှၤဆါတဖၣ်လၢ ကျဲမုၢ်ဖးဒိၣ်အပူၤ ဒီးဒုးမံနီၤအဝဲသ့ၣ်လၢ လီၢ်မံဒီးချီၣ်တဖၣ်အလိၤ ဒ်သိး ဖဲစီၤပ့းတရူး လဲၤတလၢအဝဲသ့ၣ်အခါ အကဒုကလီၤဘၣ်လၢ အဝဲသ့ၣ်တနီၤ အလိၤအဂီၢ်လီၤ.+
၁၆ တကးဒံးဘၣ် ပှၤဂီၢ်မုၢ်တဖၣ်လၢ အအိၣ်လၢ ဝ့ၢ်တဖၣ်လၢ ယရူၤၡလ့ၣ် အခိၣ်အဃၢၤန့ၣ် ဟဲကိးဝဲပှၤဆူးပှၤဆါ ဒီးပှၤလၢ တၢ်ဝံတၢ်နါ မၤကီမၤခဲအီၤတဖၣ် ဒီးအဝဲသ့ၣ် ဘၣ်တၢ်မၤဘျါက့ၤအီၤ ခဲလၢာ်လီၤ.
၁၇ ဘၣ်ဆၣ် ပှၤလုၢ်တၢ်ခိၣ် အဒိၣ်ကတၢၢ် ဒီးပှၤခဲလၢာ်လၢ အအိၣ်ဒီးအီၤ လၢအမ့ၢ် ပှၤစးဒူၤကဲတဖၣ်န့ၣ် သူၣ်က့ၣ်သးက့ၣ်ထီၣ်တၢ် ဒိၣ်မးအဃိ အဝဲသ့ၣ် ဂဲၤဆၢထၢၣ်
၁၈ ဒီးဖီၣ်န့ၢ် တၢ်မၢဖိတဖၣ် ဒီးဖၢနုာ် အဝဲသ့ၣ်လၢ ကမျၢၢ်အဃိာ်ပူၤလီၤ.+
၁၉ ဘၣ်ဆၣ် လၢမုၢ်နၤခီ အဆၢကတီၢ်န့ၣ် ယဟိဝၤယွၤ အမူခိၣ်ကလူး အိးထီၣ်ဝဲ ဃိာ်အတြဲၤတဖၣ်,+ ဆှၢထီၣ်အဝဲသ့ၣ်လၢတၢ်ချၢ ဒီးတဲဝဲလၢ
၂၀ “လဲၤဆၢထၢၣ်လၢ တၢ်လုၢ်ဟံၣ်အပူၤ ဒီးဆဲးတဲဘၣ်ပှၤဂီၢ်မုၢ် တၢ်လၢအဘၣ်ဃးဒီး တၢ်မူအဂ့ၢ်ခဲလၢာ် တက့ၢ်.”
၂၁ ဖဲအဝဲသ့ၣ် နၢ်ဟူဝဲဒ်န့ၣ်အခါ အဝဲသ့ၣ် လဲၤနုာ်လီၤဝဲလၢ တၢ်လုၢ်ဟံၣ်အပူၤဂီၤဂီၤ ဒီးသိၣ်လိတၢ်လီၤ.
ဖဲပှၤလုၢ်တၢ်ခိၣ် အဒိၣ်ကတၢၢ် ဒီးပှၤလၢ အအိၣ်ဒီးအီၤတဖၣ် ဟဲတုၤအခါ အဝဲသ့ၣ်ကိးဖှိၣ်ဝဲ ပှၤယူဒၤဖိ အကွီၢ်ဘျီၣ် လၢအဒိၣ်ကတၢၢ် အပှၤဘၣ်မူဘၣ်ဒါတဖၣ် ဒီးပှၤအံၣ်စရ့လးဖိ အပှၤသူၣ်က့သးပှၢ်တဖၣ် အတၢ်အိၣ်ဖှိၣ်ဒီတဖုလီၤ. ဒီးအဝဲသ့ၣ် ဆှၢလီၤဝဲ ပှၤပၢၤတၢ်ဖိတဖၣ်လၢ ဃိာ်ပူၤဒ်သိး ကဟဲကိးထီၣ်ဝဲ တၢ်မၢဖိတဖၣ်လၢ အဝဲသ့ၣ် အမဲာ်ညါလီၤ.
၂၂ ဘၣ်ဆၣ် ဖဲပှၤပၢၤတၢ်တဖၣ် လဲၤတုၤဖဲန့ၣ်အခါ အဝဲသ့ၣ်တထံၣ် တၢ်မၢဖိတဖၣ်န့ၣ် အိၣ်လၢဃိာ်ပူၤလၢၤဘၣ်. အဃိ အဝဲသ့ၣ် က့ၤတဲဖျါထီၣ် တၢ်ဂ့ၢ်အံၤ
၂၃ ဒီးတဲဝဲလၢ “ပထံၣ်လၢ ဃိာ်အတြဲၤတဖၣ်န့ၣ် ကးပံးဃာ်အသးကျၢၤကျၢၤ ဒီးပှၤခိးတၢ်ဖိတဖၣ် ဆၢထၢၣ်ဝဲလၢ တြဲၤအခီၣ်ထံးလီၤ. ဘၣ်ဆၣ် ဖဲပအိးထီၣ်တြဲၤအခါ ပတထံၣ် ပှၤအိၣ်ဖဲန့ၣ် နီတဂၤလၢၤဘၣ်.”
၂၄ ဖဲပှၤကွၢ်ထွဲ တၢ်လုၢ်ဟံၣ်အခိၣ် ဒီးပှၤလုၢ်တၢ်ဒိၣ်အခိၣ်တဖၣ် နၢ်ဟူဘၣ်ဝဲ တၢ်ကတိၤတဖၣ်အံၤအခါ တၢ်ကကဲထီၣ် အသးလၢခံ ဒ်လဲၣ်ဒ်လဲၣ်န့ၣ် အဝဲသ့ၣ်ဆိကမိၣ်ဝဲ တဘၣ်လၢၤဘၣ်.
၂၅ ဘၣ်ဆၣ် ပှၤတဂၤ ဟဲတဲဘၣ် အဝဲသ့ၣ်လၢ “ပှၤလၢ သုဖၢနုာ်လီၤ လၢဃိာ်ပူၤန့ၣ် သိၣ်လိပှၤအဂၤတဖၣ် လၢတၢ်လုၢ်ဟံၣ် အပူၤလံ.”
၂၆ ဒီးပှၤကွၢ်ထွဲ တၢ်လုၢ်ဟံၣ်အခိၣ် ဒီးအပှၤပၢၤတၢ်ဖိတဖၣ် လဲၤဝဲဒီးဟဲက့ၤကိးဝဲ တၢ်မၢဖိတဖၣ်လီၤ. ဘၣ်ဆၣ် မ့ၢ်လၢ အဝဲသ့ၣ်ပျံၤဝဲလၢ ပှၤဂီၢ်မုၢ်တဖၣ် ကကွံာ်အဝဲသ့ၣ်လၢ လၢၢ်အဃိ ဖဲအဝဲသ့ၣ် ဟဲက့ၤကိး တၢ်မၢဖိတဖၣ်အခါ တမၤဆူးမၤဆါ အဝဲသ့ၣ်ဘၣ်.+
၂၇ အဝဲသ့ၣ် ဟဲက့ၤကိးဝဲ တၢ်မၢဖိတဖၣ် ဒီးဒုးဆၢထၢၣ် အဝဲသ့ၣ်လၢ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ် အပှၤဘၣ်မူဘၣ်ဒါတဖၣ် အမဲာ်ညါလီၤ. ပှၤလုၢ်တၢ်ခိၣ် အဒိၣ်ကတၢၢ် သံကွၢ်သံဒိး အဝဲသ့ၣ်
၂၈ ဒီးတဲဝဲလၢ “ပမၤလိာ်သု လီၤတံၢ်လီၤဆဲး ဒ်သိး သုတဆဲးသိၣ်လိတၢ်လၢ ယ့ၣ်ၡူး အမံၤအပူၤတဂ့ၤ အဂီၢ်လီၤ.+ ဘၣ်ဆၣ် ကွၢ်မီၤ, သုမၤပှဲၤ ယရူၤၡလ့ၣ်ဒီး သုတၢ်သိၣ်လိတဖၣ် ဒီးသုပာ်လီၤသုသးလၢ သုကပာ်ဒ့ၣ်ပာ်ကမၣ်ပှၤလၢ ပှၤတဂၤအံၤ အတၢ်သံအဃိလီၤ.”+
၂၉ စီၤပ့းတရူး ဒီးတၢ်မၢဖိအဂၤတဖၣ် တဲဆၢက့ၤဝဲလၢ “လၢပကဒိကနၣ် ပှၤကညီအလီၢ် ပကဘၣ်ဒိကနၣ် ကစၢ်ယွၤ အကလုၢ်လီၤ.*+
၃၀ ယ့ၣ်ၡူးလၢ သုမၤသံအီၤ ခီဖျိ သုပျၤထီအီၤ* လၢသ့ၣ်တၢၣ်* အလိၤန့ၣ် ပမိၢ်ပၢ်ဖံဖု လၢပျၢၤတဖၣ် အကစၢ်ယွၤ ဒုးဂဲၤဆၢထၢၣ် သမူထီၣ်က့ၤအီၤလီၤ.+
၃၁ ဒီးကစၢ်ယွၤ ပာ်ထီၣ်ထီအီၤ လၢအစုထွဲတခီ+ ဒ်တၢ်အခိၣ်+ ဒီးတၢ်အုၣ်က့ၤခီၣ်က့ၤကစၢ်တဂၤ+ ဒ်သိး ပှၤအံၣ်စရ့လးဖိတဖၣ် ကပီၢ်ယၢ်လီၤက့ၤအသး ဒီးအဝဲသ့ၣ်အတၢ်ဒဲးဘး ကပျၢ်အဂီၢ်လီၤ.+
၃၂ ပဝဲဒၣ်အံၤ ပမ့ၢ်ပှၤအုၣ်အသးလၢ တၢ်ဂ့ၢ်တဖၣ်အံၤလီၤ.+ ဒီးသးစီဆှံလၢ+ ကစၢ်ယွၤ ဟ့ၣ်လီၤ ပှၤလၢအဒိကနၣ် အကလုၢ်န့ၣ်* အုၣ်အသးစ့ၢ်ကီးလီၤ.”
၃၃ ဖဲအဝဲသ့ၣ် နၢ်ဟူဝဲအခါ အဝဲသ့ၣ် သးဒိၣ်ထီၣ်တၢ် ဒီးအဲၣ်ဒိးမၤသံ တၢ်မၢဖိတဖၣ်လီၤ.
၃၄ ဘၣ်ဆၣ် ပှၤဖၤရံၤၡဲတဂၤလၢ အမံၤမ့ၢ် စီၤကမၤလ့လးန့ၣ်+ ဂဲၤဆၢထၢၣ်လၢ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ်တဖျၢၣ်အပူၤလီၤ. အဝဲမ့ၢ် သရၣ်လၢအသိၣ်လိ စီၤမိၤၡ့ အတၢ်သိၣ်တၢ်သီ ဒီးပှၤခဲလၢာ် ယူးယီၣ်ပာ်ကဲအီၤ ဒိၣ်မးလီၤ. အဝဲဟ့ၣ်လီၤ တၢ်ကလုၢ်လၢ ပှၤကဆှၢထီၣ် တၢ်မၢဖိတဖၣ်လၢ တၢ်ချၢတစိၢ်ဖိလီၤ.
၃၅ ဒီးအတဲဘၣ် အဝဲသ့ၣ်လၢ “ပှၤအံၣ်စရ့လးဖိသ့ၣ်ဧၢ, သုကမၤ ပှၤတဖၣ်အံၤ ဒ်လဲၣ်န့ၣ် ပလီၢ်သုသးသၢၤ.
၃၆ အဒိ လၢအပူၤကွံာ်န့ၣ် စီၤသူဒါ ဟဲထီဒါတၢ် ဒီးတဲလီၤအသး လၢအမ့ၢ် ပှၤလၢအရ့ဒိၣ်တဂၤလီၤ. ဒီးပှၤပိာ်ခွါအဂၤ ၄၀၀ ဃၣ်ဃၣ် ပိာ်ထီၣ်အခံလီၤ. ဘၣ်ဆၣ် ပှၤမၤသံအီၤ ဒီးပှၤလၢ အပိာ်အခံခဲလၢာ်န့ၣ် လီၤမုၢ်ပြံပြါဝဲ ဒီးအဝဲသ့ၣ် အတၢ်ရဲၣ်တၢ်ကျဲၤ ဟးဂီၤကွံာ်ဝဲလီၤ.
၃၇ တၢ်န့ၣ်ဝံၤအလီၢ်ခံ ဖဲတၢ်ထၢ ထံဖိကီၢ်ဖိအနီၣ်ဂံၢ် အမုၢ်နံၤတဖၣ်အတီၢ်ပူၤ စီၤယူဒၤ လၢအမ့ၢ် ပှၤကၤလံၤလါဖိတဂၤ ဟဲထီဒါတၢ် ဒီးကွဲန့ၢ်လွဲန့ၢ်တၢ် ဒ်သိး ပှၤကပိာ်အခံအဂီၢ်လီၤ. အဝဲစ့ၢ်ကီးသံဝဲ ဒီးပှၤလၢ အပိာ်အခံခဲလၢာ် လီၤမုၢ်ပြံပြါဝဲလီၤ.
၃၈ အဃိ ခဲအံၤ ယကတဲဘၣ်သု, မၤတံာ်တာ် ပှၤတဖၣ်အံၤတဂ့ၤ. ပျဲအဝဲသ့ၣ်ဟီ, တၢ်ရဲၣ်တၢ်ကျဲၤတခါအံၤ ဒီးတၢ်မၤအံၤ မ့ၢ်ဟဲလၢ ပှၤဟီၣ်ခိၣ်ဖိ အအိၣ်န့ၣ် အကဟးဂီၤကွံာ်ဝဲလီၤ.
၃၉ ဘၣ်ဆၣ် အမ့ၢ်ဟဲလၢ ကစၢ်ယွၤ အအိၣ်န့ၣ် သုမၤဟးဂီၤအီၤ တန့ၢ်ဘၣ်,+ တကးဒံးဘၣ် ဘၣ်သ့ၣ်သ့ၣ် သုကကဲထီၣ်ပှၤလၢ အထီဒါ ကစၢ်ယွၤလီၤ.”+
၄၀ ဒီးအဝဲသ့ၣ်တူၢ်လိာ် အတၢ်ဟ့ၣ်ကူၣ် ဒီးကိးန့ၢ်က့ၤ တၢ်မၢဖိတဖၣ် ဒီးတီၢ်ဝဲ+ ဒီးမၤလိာ် အဝဲသ့ၣ်ဒ်သိး အသုတဆဲး စံၣ်တဲၤတဲလီၤတၢ်လၢ ယ့ၣ်ၡူးအမံၤ အပူၤတဂ့ၤ ဝံၤဒီးပျၢ်ကွံာ် အဝဲသ့ၣ်လီၤ.
၄၁ မ့ၢ်လၢအဝဲသ့ၣ် ဒိးန့ၢ်ဘၣ် တၢ်ခွဲးတၢ်ယာ်လၢ ကတူၢ်ဘၣ် တၢ်မဲာ်ဆှးလၢ ယ့ၣ်ၡူးအမံၤအဃိ အဝဲသ့ၣ် ဟးထီၣ်လၢ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ် အပှၤဘၣ်မူဘၣ်ဒါတဖၣ် အမဲာ်ညါ ပှဲၤဒီးတၢ်သးခုလီၤ.+
၄၂ ဒီးအဝဲသ့ၣ်ဆဲးသိၣ်လိတၢ် ဒီးစံၣ်တဲၤတဲလီၤ တၢ်သးခုကစီၣ် လၢအဘၣ်ဃးဒီး ယ့ၣ်ၡူးခရံာ်လၢ+ တၢ်လုၢ်ဟံၣ်ပူၤ ဒီးလၢတဟံၣ်ဘၣ်တဟံၣ် ကိးနံၤဒဲးလီၤ.+
တၢ်ဂ့ၢ်အဘျဲၣ်တဖၣ်
^ အခီပညီလိၤလိၤ “စၤတၣ်.” မံၤအံၤအခီပညီမ့ၢ်ဝဲ “ပှၤလၢအထီဒါတၢ်.”
^ ကွၢ် တၢ်ဂ့ၢ်ဘၣ်ထွဲလိာ်သး က၅.
^ မ့ၢ်စ့ၢ်ကီး “ဒိကနၣ်ကစၢ်ယွၤ ဒ်တၢ်ပၢကစၢ်အသိး.”
^ မ့ၢ်စ့ၢ်ကီး “သ့ၣ်ထူၣ်.”
^ အခီပညီလိၤလိၤ “ဘျးလီၤကစဲၤအီၤ.”
^ မ့ၢ်ဝဲ ဒ်ပှၤဒိကနၣ် ပှၤပၢတၢ်တဂၤအသိး.
