စံးထီၣ်ပတြၢၤ ၁၁၉:၁-၁၇၆
-
တၢ်စံးဘျုးစံးဖှိၣ်လၢ ကစၢ်ယွၤ အကလုၢ်ကထါ လၢအလုၢ်ဒိၣ်ပှ့ၤဒိၣ်အဃိ
-
“ပိာ်ခွါသးစၢ်တဂၤ အိၣ်မူတၢ်အိၣ်မူလၢ အကဆှီ ကသ့ဒ်လဲၣ်” (၉)
-
“ယဘၣ်သူၣ်ဘၣ်သး နတၢ်ဒုးသ့ၣ်နီၣ်ထီၣ်က့ၤတဖၣ်” (၂၄)
-
“ယအဲၣ် နတၢ်သိၣ်တၢ်သီဒိၣ်မး” (၉၇)
-
“တၢ်သ့ၣ်ညါနၢ်ပၢၢ် အါန့ၢ်ဒံး ယသရၣ်ကိးဂၤဒဲး” (၉၉)
-
“နကလုၢ်ကထါန့ၣ် မ့ၢ်ဝဲမ့ၣ်အူဒၢတဖျၢၣ်လၢ အဟံးစုနဲၣ်ကျဲယခီၣ်” (၁၀၅)
-
“နကလုၢ်ကထါခဲလၢာ်န့ၣ် မ့ၢ်တၢ်မ့ၢ်တၢ်တီ” (၁၆၀)
-
ပှၤလၢအအဲၣ် ကစၢ်ယွၤ အတၢ်သိၣ်တၢ်သီန့ၣ် အိၣ်ဒီး တၢ်ဃူတၢ်ဖိး (၁၆၅)
-
א *
၁၁၉ ပှၤလၢ ပှၤပာ်ဒ့ၣ်ပာ်ကမၣ်အီၤ အလီၢ်တအိၣ်ဘၣ်*ဒီးပှၤလၢအအိၣ်မူမၤထွဲ ယဟိဝၤယွၤ အတၢ်သိၣ်တၢ်သီန့ၣ် ကသးခုဝဲလီၤ.+
၂ ပှၤလၢ အမၤထွဲ ကစၢ်ယွၤ အတၢ်ဒုးသ့ၣ်နီၣ်ထီၣ်က့ၤတဖၣ်+
ဒီးပှၤလၢအဃု ကစၢ်ယွၤ အတၢ်ဟံးစုနဲၣ်ကျဲလၢ အသးဒီဖျၢၣ်ညါန့ၣ် ကသးခုဝဲလီၤ.+
၃ အဝဲသ့ၣ် တမၤတၢ် တတီတလိၤ နီတမံၤဘၣ်.
ဒီးအဝဲသ့ၣ် မၤဝဲဒ်ကစၢ်ယွၤ အတၢ်ဘၣ်သးအသိးလီၤ.+
၄ အိ ကစၢ်ယွၤဧၢ, နမၤလိာ်တ့ၢ်ပှၤလၢပကဘၣ်မၤထွဲ နတၢ်မၤလိာ်တဖၣ် လီၤတံၢ်လီၤဆဲးလီၤ.+
၅ ဒ်သိး ယကအိၣ်မူမၤထွဲ နတၢ်ဘျၢတဖၣ် ထီဘိအဂီၢ်ယမုၢ်လၢ်သပှၢ်တၢၢ်လၢ ယကဆၢထၢၣ်ဂၢၢ်ကျၢၤလီၤ.+
၆ ယမၤဒ်န့ၣ် မ့ၢ်သ့န့ၣ် ဖဲယသမံသမိးကွၢ် နတၢ်မၤလိာ် ခဲလၢာ်အခါယတဒိးန့ၢ်ဘၣ် တၢ်မဲာ်ဆှးဘၣ်.+
၇ ဖဲယမၤလိ နတၢ်စံၣ်ညီၣ်ဆၢတဲာ်လၢ အတီအလိၤတဖၣ်အခါယကစံးထီၣ်ပတြၢၤနၤလၢ တၢ်သူၣ်ဘျၢသးဘျၢ အပူၤလီၤ.
၈ ယကအိၣ်မူမၤထွဲ နတၢ်ဘျၢတဖၣ်လီၤ.
တဘၣ်ပာ်တ့ၢ်ကွံာ်ယၤ နီတဘျီတဂ့ၤ.
ב
၉ ပိာ်ခွါသးစၢ်တဂၤ အိၣ်မူတၢ်အိၣ်မူလၢ အကဆှီ ကသ့ဒ်လဲၣ်.
အဝဲကဘၣ် အိၣ်ပလီၢ်အသး ဒီးမၤထွဲ ဒ်နကလုၢ်ကထါ အိၣ်ဝဲအသိးလီၤ.+
၁၀ ယဃု နတၢ်ဟံးစုနဲၣ်ကျဲလၢ ယသးဒီဖျၢၣ်ညါလီၤ.
တဘၣ်ပျဲလၢ ယကယံၤထီၣ်ဒီး နတၢ်မၤလိာ်တဖၣ်တဂ့ၤ.+
၁၁ ဒ်သိး ယသုတမၤကမၣ်ဘၣ် နၤတဂ့ၤအဂီၢ်+
ယပာ်ဖှိၣ်ဃာ် တၢ်လၢနတဲတဖၣ်န့ၣ် လၢယသးပူၤ ဒ်တၢ်လုၢ်ဒိၣ်ပှ့ၤဒိၣ် အသိးလီၤ.+
၁၂ အိ ယဟိဝၤယွၤဧၢ, မ်ပှၤစံးထီၣ်ပတြၢၤနၤတက့ၢ်.
သိၣ်လိယၤလၢ နတၢ်ဘျၢတဖၣ်တက့ၢ်.
၁၃ တၢ်စံၣ်ညီၣ်ဆၢတဲာ်တဖၣ်လၢ နတဲပာ်စၢၤန့ၣ်ယကတဲဖျါထီၣ်အီၤလၢ ယထးခိၣ် ခဲလၢာ်လီၤ.
၁၄ ယသးခုလၢ နတၢ်ဒုးသ့ၣ်နီၣ်ထီၣ်က့ၤတဖၣ်အဃိ+အါန့ၢ်ဒံး ယသးခုလၢ တၢ်လုၢ်ဒိၣ်ပှ့ၤဒိၣ် အဂၤခဲလၢာ် အဃိလီၤ.+
၁၅ ယကဆိကမိၣ်ထံက့ၤ* နတၢ်မၤလိာ်တဖၣ်+ဒီးယကသးစၢၢ်ဆၢ နကျဲတဖၣ်လီၤ.+
၁၆ ယဘၣ်သူၣ်ဘၣ်သး နတၢ်သိၣ်တၢ်သီတဖၣ်လီၤ.
ယတသးပ့ၤနီၣ် နကလုၢ်ကထါဘၣ်.+
ג
၁၇ မၤဂ့ၤယၤ ဒ်သိးယကဆဲးမူဒီးမၤထွဲ နကလုၢ်ကထါ အဂီၢ်တက့ၢ်.+
၁၈ အိးထီၣ်ယမဲာ် ဒ်သိး ယကထံၣ်ဘၣ် တၢ်လၢအလီၤလိၢ်လီၤလးတဖၣ်လၢနတၢ်သိၣ်တၢ်သီအပူၤ ၡဲၡဲတက့ၢ်.
၁၉ ယလီၤဂာ်ဒ် ပှၤထံဂၤကီၢ်ဂၤဖိလၢ ကီၢ်ပူၤလီၤ.+
တဘၣ်ပာ်ခူသူၣ်ကွံာ် နတၢ်မၤလိာ်တဖၣ်လၢ ယအိၣ်တဂ့ၤ.
၂၀ ယဆၢသ့ၣ်ညါ နတၢ်စံၣ်ညီၣ်ဆၢတဲာ်တဖၣ်ကိးဆၢကတီၢ်ဒဲးလီၤ.
၂၁ ပှၤလၢအမၤဖဲအသးလၢ တၢ်ပာ်ထီၣ်ထီသးအပူၤ,ပှၤလၢအဘၣ်တၢ်ဆိၣ်အၢ ခီဖျိလၢအယံၤထီၣ်ဒီး နတၢ်မၤလိာ်တဖၣ်န့ၣ် နသိၣ်ဃီၣ် အဝဲသ့ၣ်လီၤ.+
၂၂ ယမၤထွဲ နတၢ်ဒုးသ့ၣ်နီၣ်ထီၣ်က့ၤတဖၣ်အဃိမၤဒ်သိး အဝဲသ့ၣ် သုတဒုၣ်ဒွဲၣ် ဒီးပာ်ဆံးယၤလၢၤတဂ့ၤ.
၂၃ ဖဲပဒိၣ်ဖးဒိၣ်တဖၣ် ဆ့ၣ်နီၤ တဲအၢတဲသီယၤအခါဒၣ်လဲာ်ယဆိကမိၣ်ထံ* နတၢ်ဘျၢတဖၣ်လီၤ.
၂၄ ယဘၣ်သူၣ်ဘၣ်သး နတၢ်ဒုးသ့ၣ်နီၣ်ထီၣ်က့ၤတဖၣ်လီၤ.+
နတၢ်ဒုးသ့ၣ်နီၣ်ထီၣ်က့ၤတဖၣ်န့ၣ် လီၤဂာ်ဒ် ယပှၤဟ့ၣ်ကူၣ်တၢ်တဖၣ်လီၤ.+
ד
၂၅ ယမံနီၤအီထီလာ်လၢ ဟီၣ်ခိၣ်ကမူၣ်ကျါလီၤ.+
ပာ်မူယၤဒ် နတဲပာ်စၢၤ အသိးန့ၣ်တက့ၢ်.+
၂၆ ယတဲဘၣ်နၤ တၢ်လၢယမၤခဲလၢာ် ဒီးနဟံးစုနဲၣ်ကျဲယၤလီၤ.
သိၣ်လိယၤလၢ နတၢ်ဘျၢတဖၣ်တက့ၢ်.+
၂၇ ဒ်သိး ယကဆိကမိၣ်ထံ* နတၢ်မၤလၢ အလီၤလိၢ်လီၤလးတဖၣ်အဂ့ၢ်အဂီၢ်+မၤစၢၤယၤ ဒ်သိးယကနၢ်ပၢၢ် နတၢ်မၤလိာ်တဖၣ် အခီပညီအဂီၢ်တက့ၢ်.
၂၈ လၢတၢ်သးအုးအဃိ ယမံတန့ၢ်ဘၣ်.
မၤဆူၣ်ထီၣ်က့ၤ ယဂံၢ်ယဘါ ဒ်နတဲပာ်စၢၤယၤ အသိးန့ၣ်တက့ၢ်.
၂၉ ဒ်သိး ယသုတကဲပှၤလၢ အလံၣ်တၢ်လီတၢ်တဂ့ၤအဂီၢ် မၤစၢၤယၤတက့ၢ်.+
ပာ်ဖျါထီၣ်လၢ နဘၣ်သူၣ်ဘၣ်သးယၤ ဒီးဟ့ၣ်လီၤယၤ နတၢ်သိၣ်တၢ်သီန့ၣ်တက့ၢ်.
၃၀ ယဃုထၢ တၢ်သးတီအကျဲလံ.+
ယသ့ၣ်ညါလၢ နတၢ်စံၣ်ညီၣ်ဆၢတဲာ်တဖၣ်န့ၣ် ဘၣ်ဝဲလီၤ.
၃၁ အိ ယဟိဝၤယွၤဧၢ, ယဖီၣ်တံၢ်ဃာ် နတၢ်ဒုးသ့ၣ်နီၣ်ထီၣ်က့ၤတဖၣ်လီၤ.+
တဘၣ်ပျဲလၢ ယတၢ်မုၢ်လၢ် ကဟးဂီၤ* တဂ့ၤ.+
၃၂ ယကလူၤပိာ်ထွဲ နတၢ်မၤလိာ်တဖၣ်လၢ တၢ်သးဆူၣ်အပူၤမ့ၢ်လၢ နအိးထီၣ်ယသးလၢ ယကသ့ၣ်ညါ အါထီၣ်အီၤအဃိလီၤ.
ה
၃၃ အိ ယဟိဝၤယွၤဧၢ,+ သိၣ်လိယၤ နတၢ်ဘျၢတဖၣ်ဒီးယကမၤထွဲအီၤတုၤလၢ အကတၢၢ်လီၤ.+
၃၄ ဟ့ၣ်ယၤ တၢ်သ့ၣ်ညါနၢ်ပၢၢ်ဒ်သိးယကအိၣ်မူမၤထွဲ နတၢ်သိၣ်တၢ်သီဒီးဟံးဃာ်အီၤလၢ ယသးဒီဖျၢၣ်ညါတက့ၢ်.
၃၅ ဟံးစုနဲၣ်ကျဲယၤ ဒ်သိးယကမၤထွဲ နတၢ်မၤလိာ်တဖၣ်*+မ့ၢ်လၢ ယဘၣ်သူၣ်ဘၣ်သးအီၤ အဃိလီၤ.
၃၆ ထိၣ်ဟူးထိၣ်ဂဲၤထီၣ်ယသး ဒ်သိးယက ဘၣ်သူၣ်ဘၣ်သး နတၢ်ဒုးသ့ၣ်နီၣ်ထီၣ်က့ၤတဖၣ်ဒီးဒ်သိးယသုတဃု ယနီၢ်ကစၢ်အဘျုးတဂ့ၤ အဂီၢ်တက့ၢ်.+
၃၇ ဒ်သိး ယသုတကွၢ်တၢ်လၢ အဘျုးတအိၣ်ဘၣ်တဖၣ် တဂ့ၤအဂီၢ် မၤစၢၤယၤတက့ၢ်.+
ဒီးဒုးလဲၤယၤ လၢနကျဲ ဒ်သိးယကဆဲးမူအဂီၢ် န့ၣ်တက့ၢ်.
၃၈ ဒ်သိး ပှၤကပျံၤနၤအဂီၢ်မၤလၢပှဲၤ တၢ်လၢနအၢၣ်လီၤယၤ* န့ၣ်တက့ၢ်.
၃၉ နတၢ်စံၣ်ညီၣ်ဆၢတဲာ်တဖၣ်န့ၣ် ဂ့ၤဝဲအဃိ+ထုးထီၣ်ကွံာ် တၢ်မဲာ်ဆှးလၢ ယပျံၤအီၤန့ၣ်တက့ၢ်.
၄၀ ကွၢ်မီၤ, ယလီကီ နတၢ်မၤလိာ်တဖၣ် ဒိၣ်မးလီၤ.
နမ့ၢ်ပှၤလၢအတီအလိၤအဃိ ပာ်မူယၤတက့ၢ်.
ו
၄၁ အိ ယဟိဝၤယွၤဧၢ, ဒ်နအၢၣ်လီၤ* ပာ်စၢၤအသိး+မ်နပာ်ဖျါထီၣ် နတၢ်အဲၣ်လၢအတီလၢ ယဖီခိၣ် ဒီးအုၣ်က့ၤခီၣ်က့ၤယၤတက့ၢ်.+
၄၂ တၢ်မ့ၢ်မၤသးဒ်န့ၣ်မး ယကစံးဆၢ ပှၤလၢအဒုၣ်ဒွဲၣ်ယၤမ့ၢ်လၢ ယနာ်န့ၢ် နကလုၢ်ကထါ အဃိလီၤ.
၄၃ ယခိးကွၢ်လၢ် နတၢ်စံၣ်ညီၣ်ဆၢတဲာ်အဃိမၤစၢၤယၤ ဒ်သိး ယကဆဲးတဲ တၢ်မ့ၢ်တၢ်တီတက့ၢ်.
၄၄ ယကအိၣ်မူမၤထွဲ နတၢ်သိၣ်တၢ်သီ ထီဘိလီၤထူလီၤယိာ်လီၤ.+
၄၅ ယဂုာ်ကျဲးစၢး အိၣ်မူမၤထွဲ ဒ်နတၢ်မၤလိာ်တဖၣ် အဃိဖဲယလဲၤ တပူၤဂ့ၤတပူၤဂ့ၤန့ၣ် ယကအိၣ်ဒီး တၢ်ဘံၣ်တၢ်ဘၢလီၤ.+
၄၆ လၢစီၤပၤတဖၣ် အမဲာ်ညါဒၣ်လဲာ် ယကတဲဘၣ်ဃးဒီး နတၢ်ဒုးသ့ၣ်နီၣ်ထီၣ်က့ၤတဖၣ်အဂ့ၢ်ဒီးယတမဲာ်ဆှးဘၣ်.+
၄၇ ယဘၣ်သူၣ်ဘၣ်သး နတၢ်မၤလိာ်တဖၣ်ဒီးယအဲၣ်အီၤဒိၣ်မးလီၤ.+
၄၈ ယအဲၣ် နတၢ်မၤလိာ်တဖၣ် အဃိ ယကဃ့ထုကဖၣ် ဒီးယူာ်ထီၣ်ယစုလီၤ.+
ဒီးယကဆိကမိၣ်ထံ* ဘၣ်ဃးဒီး နတၢ်ဘျၢတဖၣ် အဂ့ၢ်လီၤ.+
ז
၄၉ တၢ်ကတိၤလၢ နတဲယၤလၢအဒုးအိၣ်ထီၣ် ယတၢ်မုၢ်လၢ်န့ၣ် သ့ၣ်နီၣ်ထီၣ်အီၤတက့ၢ်.
၅၀ အဝဲန့ၣ် မ့ၢ်တၢ်လၢ အမၤမုာ်ထီၣ်က့ၤယသးလၢ ယတၢ်နးတၢ်ဖှီၣ်အပူၤ+မ့ၢ်လၢ တၢ်လၢနတဲန့ၣ် ပာ်မူယၤအဃိလီၤ.
၅၁ ပှၤလၢအပာ်ထီၣ်ထီအသးန့ၣ် ဒုၣ်ဒွဲၣ်ယၤ နးမးဘၣ်ဆၣ် ယမၤထွဲ နတၢ်သိၣ်တၢ်သီ ထီဘိလီၤ.+
၅၂ အိ ယဟိဝၤယွၤဧၢ, ယသ့ၣ်နီၣ်ထီၣ်က့ၤ နတၢ်စံၣ်ညီၣ်ဆၢတဲာ် လၢပျၢၤတဖၣ်+ဒီးနတၢ်စံၣ်ညီၣ်ဆၢတဲာ်တဖၣ်န့ၣ် မၤမုာ်ထီၣ်က့ၤယသးလီၤ.+
၅၃ ခီဖျိပှၤအၢပှၤသီတဖၣ်လၢ အတကနၣ်ဃုာ် နတၢ်သိၣ်တၢ်သီလၢၤဘၣ်အဃိ+ယသးပှံၢ်ထီၣ်ဒိၣ်မးလီၤ.
၅၄ ဖဲယအိၣ်တပူၤဂ့ၤတပူၤဂ့ၤ နတၢ်ဘျၢတဖၣ်န့ၣ်မ့ၢ်ယတၢ်သးဝံၣ်လီၤ.
၅၅ အိ ယဟိဝၤယွၤဧၢ, ဒ်သိးယကအိၣ်မူမၤထွဲ နတၢ်သိၣ်တၢ်သီအဂီၢ်လၢမုၢ်နၤခီန့ၣ် ယသ့ၣ်နီၣ်ထီၣ်က့ၤ နမံၤလီၤ.+
၅၆ ယမၤဒ်န့ၣ်ထီဘိမ့ၢ်လၢ ယမၤထွဲ နတၢ်မၤလိာ်တဖၣ်အဃိလီၤ.
ח
၅၇ ယဟိဝၤယွၤဧၢ, နဟ့ၣ်ယၤ တၢ်လၢယလိၣ်ဘၣ် ခဲလၢာ်.+
ယအၢၣ်လီၤတ့ၢ်လၢ ယကအိၣ်မူမၤထွဲ တၢ်လၢနတဲတဖၣ်လီၤ.+
၅၈ ယဃ့ကညးနၤလၢ ယသးဒီဖျၢၣ်ညါ+လၢနကသးကညီၤယၤ+ ဒ်နတၢ်အၢၣ်လီၤ* အသိးလီၤ.
၅၉ ဒ်သိး ယကဟဲက့ၤကဒါက့ၤ ဒီးအိၣ်မူမၤထွဲ နတၢ်ဒုးသ့ၣ်နီၣ်ထီၣ်က့ၤတဖၣ်အဂီၢ်+ယသမံသမိးလီၤက့ၤ ယတၢ်အိၣ်မူလံ.
၆၀ ယမၤချ့ချ့ ဒီးယတမၤယံာ်မၤနီၢ်ယသးဒ်သိး ယကအိၣ်မူမၤထွဲ နတၢ်မၤလိာ်တဖၣ်အဂီၢ်ဘၣ်.+
၆၁ ပှၤအၢပှၤသီ ဆီၣ်တံၢ်မၤနၢၤယၤဘၣ်ဆၣ် ယတသးပ့ၤနီၣ် နတၢ်သိၣ်တၢ်သီတဖၣ်ဘၣ်.+
၆၂ ခီဖျိလၢ နတၢ်စံၣ်ညီၣ်ဆၢတဲာ်လၢ အတီတဖၣ်အဃိယဂဲၤဆၢထၢၣ် စံးဘျုးနၤလၢ ဖးဖီမုၢ်လီၤ.+
၆၃ ပှၤလၢအပျံၤနၤဒီးပှၤလၢအအိၣ်မူမၤထွဲ နတၢ်မၤလိာ်တဖၣ်န့ၣ် ယဒီသကိးဒီး အဝဲသ့ၣ် ကိးဂၤဒဲးလီၤ.+
၆၄ အိ ယဟိဝၤယွၤဧၢ, နတၢ်အဲၣ်လၢအတီန့ၣ် အိၣ်ပှဲၤဝဲလၢ ဟီၣ်ခိၣ်လီၤ.+
သိၣ်လိယၤလၢ နတၢ်ဘျၢတဖၣ်တက့ၢ်.
ט
၆၅ အိ ယဟိဝၤယွၤဧၢ, နမၤဂ့ၤယၤဒ်နတဲပာ်စၢၤ အသိးလီၤ.
၆၆ မ့ၢ်လၢ ယနာ်န့ၢ် နတၢ်မၤလိာ်တဖၣ်အဃိသိၣ်လိယၤ ဒ်သိးယကအိၣ်ဒီး တၢ်သ့ၣ်ညါ ဒီးယပဲာ်ထံနီၤဖးတၢ် ကသ့ဂ့ၤဂ့ၤ အဂီၢ်တက့ၢ်.+
၆၇ တချုးလၢ ယဘၣ်နးဘၣ်ဖှီၣ်ဒံးဘၣ်န့ၣ် ယဟးဖျိးကျဲလီၤ.
ဘၣ်ဆၣ် ခဲအံၤ ယမၤထွဲ တၢ်လၢနတဲတဖၣ်လီၤ.+
၆၈ နမ့ၢ်ပှၤလၢအဂ့ၤ+ ဒီးနတၢ်မၤတဖၣ်န့ၣ် မ့ၢ်တၢ်လၢအဂ့ၤလီၤ.
သိၣ်လိယၤလၢ နတၢ်ဘျၢတဖၣ်တက့ၢ်.+
၆၉ ပှၤလၢ အပာ်ထီၣ်ထီအသးန့ၣ် တဲဟးဂီၤယဂ့ၢ် သပှၢ်တၢၢ်,ဘၣ်ဆၣ် ယမၤထွဲ နတၢ်မၤလိာ်တဖၣ် လၢယသးဒီဖျၢၣ်ညါလီၤ.
၇၀ အဝဲသ့ၣ်အသးကိၤဝဲ ဒ်လၢၢ်အသိးအဃိ အတတူၢ်ဘၣ် တၢ်နီတမံၤလၢၤဘၣ်.+
ဘၣ်ဆၣ် မ့မ့ၢ်ယၤန့ၣ် ယဘၣ်သူၣ်ဘၣ်သး နတၢ်သိၣ်တၢ်သီလီၤ.+
၇၁ ယဘၣ်တၢ်နးတၢ်ဖှီၣ်န့ၣ် ဂ့ၤဝဲလၢယဂီၢ်+ခီဖျိလၢ အမၤစၢၤယၤ ဒ်သိးယကမၤလိ နတၢ်ဘျၢတဖၣ်အဂီၢ်လီၤ.
၇၂ တၢ်သိၣ်တၢ်သီလၢ နတဲဖျါထီၣ်န့ၣ် ဂ့ၤလၢယဂီၢ်+ဒိၣ်န့ၢ်ဒံး ထူဒီးစ့ညၣ် အဘ့ၣ်လၢ အကထိတဖၣ်လီၤ.+
י
၇၃ နစုတ့ယၤ ဒီးကတဲာ်ကတီၤပာ်စၢၤယၤလီၤ.
ဟ့ၣ်ယၤတၢ်နၢ်ပၢၢ်ဒ်သိးယမၤလိ နတၢ်မၤလိာ်တဖၣ် ကသ့အဂီၢ်တက့ၢ်.+
၇၄ မ့ၢ်လၢ ယမုၢ်လၢ်တၢ်လၢ နကလုၢ်ကထါပူၤအဃိ+ပှၤလၢအပျံၤနၤန့ၣ် အထံၣ်ယၤဒီး သးခုဝဲလီၤ.
၇၅ အိ ယဟိဝၤယွၤဧၢ, ယသ့ၣ်ညါလၢ နတၢ်စံၣ်ညီၣ်ဆၢတဲာ်တဖၣ်န့ၣ် တီဝဲလိၤဝဲ+ဒီးနသိၣ်ယၤ ခီဖျိလၢ နသးတီအဃိလီၤ.+
၇၆ ဝံသးစူၤ မ်နတၢ်အဲၣ်လၢအတီန့ၣ်+ မၤမုာ်ထီၣ်ယသးဒ်နအၢၣ်လီၤ* ပာ်စၢၤယၤ အသိးန့ၣ်တက့ၢ်.
၇၇ မ့ၢ်လၢ ယဘၣ်သူၣ်ဘၣ်သး နတၢ်သိၣ်တၢ်သီအဃိ+ဒ်သိး ယကဆဲးမူအဂီၢ် ပာ်ဖျါထီၣ် တၢ်သးကညီၤ လၢယဖီခိၣ်တက့ၢ်.+
၇၈ ပှၤလၢအပာ်ထီၣ်ထီအသးတဖၣ်န့ၣ် ယတမၤအဝဲသ့ၣ် နီတမံၤဘၣ်သနာ်က့ အဝဲသ့ၣ်မၤကမၣ်ယၤလီၤ.
အဃိ မ်အဝဲသ့ၣ် ဒိးန့ၢ်ဘၣ် တၢ်မဲာ်ဆှးတက့ၢ်.
ဘၣ်ဆၣ် မ့မ့ၢ်ယၤန့ၣ် ယကဆိကမိၣ်ထံ* နတၢ်မၤလိာ်တဖၣ်လီၤ.+
၇၉ ပှၤလၢအပျံၤနၤ ဒီးပှၤလၢအသ့ၣ်ညါ နတၢ်ဒုးသ့ၣ်နီၣ်ထီၣ်က့ၤတဖၣ်န့ၣ်မ်အဝဲသ့ၣ် ဟဲက့ၤကဒါလၢ ယအိၣ်တက့ၢ်.
၈၀ ဒ်သိး ယသုတဒိးန့ၢ်ဘၣ် တၢ်မဲာ်ဆှးတဂ့ၤအဂီၢ်+မ်ယအိၣ်မူမၤထွဲ နတၢ်ဘျၢတဖၣ်လၢ ယသးဒီဖျၢၣ်ညါတက့ၢ်.+
כ
၈၁ ယမုၢ်လၢ်တၢ်လၢ နကလုၢ်ကထါပူၤအဃိယခိးကွၢ်လၢ် နတၢ်အုၣ်က့ၤခီၣ်က့ၤလီၤ.+
၈၂ ဖဲယခိးကွၢ်လၢ်လၢ နတၢ်အၢၣ်လီၤ ကလၢထီၣ်ပှဲၤထီၣ်အခါ ယမဲာ်ချံလီၤဘှံးဝဲ+ဒီးယသံကွၢ်လၢ “နကမၤမုာ်ထီၣ်ယသး ဆံးယံာ်လဲၣ်.”+
၈၃ ယလီၤဂာ်ဒ်သိးဒီး ထၢၣ်တၢ်ဖံးလၢ အဃ့ထီဝဲလၢ မ့ၣ်အူခုၣ်အကျါအသိးဘၣ်ဆၣ် ယတသးပ့ၤနီၣ် နတၢ်ဘျၢတဖၣ်ဘၣ်.+
၈၄ နကစံၣ်ညီၣ် ပှၤလၢအမၤအၢမၤနးယၤတဖၣ် ဆံးယံာ်လဲၣ်.+
ယကဘၣ်အိၣ်ခိး ယံာ်ဒံးထဲလဲၣ်.
၈၅ ပှၤလၢအပာ်ထီၣ်ထီအသး ဒီးပှၤလၢအတအိၣ်မူမၤထွဲ နတၢ်သိၣ်တၢ်သီဘၣ်န့ၣ်ခူၣ်လီၤတၢ်ပူၤလၢ ယဂီၢ်လီၤ.
၈၆ နတၢ်မၤလိာ်ခဲလၢာ်န့ၣ် ပနာ်န့ၢ်အီၤသ့လီၤ.
ယတမၤပှၤ တၢ်နီတမံၤဘၣ်သနာ်က့ ပှၤမၤအၢမၤနးယၤအဃိ မၤစၢၤယၤတက့ၢ်.+
၈၇ အဝဲသ့ၣ် ဘူးကမၤလီၤမၢ်ကွံာ်ယၤလၢ ဟီၣ်ခိၣ်ချၢညါ.
ဘၣ်ဆၣ် ယတပာ်တ့ၢ်ကွံာ် နတၢ်မၤလိာ်တဖၣ်ဘၣ်.
၈၈ ခီဖျိလၢ နတၢ်အဲၣ်လၢအတီအဃိ ပာ်မူယၤဒ်သိး ယကအိၣ်မူမၤထွဲ နတၢ်ဒုးသ့ၣ်နီၣ်ထီၣ်က့ၤလၢ နတဲတ့ၢ်တဖၣ်တက့ၢ်.
ל
၈၉ အိ ယဟိဝၤယွၤဧၢ,နကလုၢ်ကထါ ကအိၣ်ဝဲ လီၤထူလီၤယိာ် ဒ်မူခိၣ်အသိးလီၤ.+
၉၀ နတၢ်သးတီန့ၣ် အိၣ်ဝဲဆိးဝဲ အစိၤစိၤအဃၣ်ဃၣ်လီၤ.+
ဒ်သိးဟီၣ်ခိၣ် ကဆဲးအိၣ်ဝဲအဂီၢ် နပာ်လီၤအီၤကျၢၤကျၢၤလီၤ.+
၉၁ ခီဖျိလၢ နတၢ်စံၣ်ညီၣ်ဆၢတဲာ်တဖၣ်အဃိ အဝဲသ့ၣ်* အိၣ်တုၤလၢ မုၢ်မဆါတနံၤအံၤလီၤ.
အဝဲသ့ၣ်ခဲလၢာ်န့ၣ် မ့ၢ်နခ့နပှၤလီၤ.
၉၂ ယမ့ၢ်တဘၣ်သူၣ်ဘၣ်သး နတၢ်သိၣ်တၢ်သီဘၣ်န့ၣ်ယဟးဂီၤလၢ ယတၢ်နးတၢ်ဖှီၣ်အပူၤလံ.+
၉၃ နပာ်မူယၤ ခီဖျိလၢ နတၢ်မၤလိာ်တဖၣ်အဃိ+ယတသးပ့ၤနီၣ် နတၢ်မၤလိာ်တဖၣ် နီတဘျီဘၣ်.
၉၄ ယဂုာ်ကျဲးစၢး အိၣ်မူမၤထွဲ ဒ်နတၢ်မၤလိာ်တဖၣ်လံ.+
အဃိ ယကဲနတၢ်လီၤ. မၤပူၤဖျဲးယၤတက့ၢ်.+
၉၅ ပှၤအၢပှၤသီ အဲၣ်ဒိးမၤဟးဂီၤယၤ,ဘၣ်ဆၣ် ယသးစၢၢ်ဆၢဒံး နတၢ်ဒုးသ့ၣ်နီၣ်ထီၣ်က့ၤတဖၣ်လီၤ.
၉၆ ယထံၣ်လၢ တၢ်လၢတၢ်ပှဲၤခဲလၢာ်န့ၣ် အတၢ်လီၤတူာ်လီၤကာ်အိၣ်ဝဲဘၣ်ဆၣ် နတၢ်မၤလိာ်တဖၣ်န့ၣ် အတၢ်လီၤတူာ်လီၤကာ် တအိၣ်ဘၣ်.
מ
၉၇ ယအဲၣ် နတၢ်သိၣ်တၢ်သီဒိၣ်မး+ဒီးယဆိကမိၣ်ထံ* အီၤ ဒီတနံၤကျၢၤလီၤ.+
၉၈ နတၢ်မၤလိာ်တဖၣ်န့ၣ် အိၣ်ဒီးယၤထီဘိ,အဃိ အဒုးကူၣ်သ့ယၤ တုၤဒၣ်လဲာ် ယကူၣ်တၢ်သ့ အါန့ၢ်ဒံး ယဒုၣ်ယဒါတဖၣ်လီၤ.+
၉၉ ခီဖျိလၢ ယဆိကမိၣ်ထံ* နတၢ်ဒုးသ့ၣ်နီၣ်ထီၣ်က့ၤတဖၣ်အဃိယအိၣ်ဒီး တၢ်သ့ၣ်ညါနၢ်ပၢၢ် အါန့ၢ်ဒံး ယသရၣ်ကိးဂၤဒဲးလီၤ.+
၁၀၀ ခီဖျိလၢ ယမၤထွဲ နတၢ်မၤလိာ်တဖၣ်အဃိယအိၣ်ဒီး တၢ်နၢ်ပၢၢ် အါန့ၢ်ဒံး ပှၤလၢအသးပှၢ်တဖၣ်လီၤ.
၁၀၁ ဒ်သိး ယအိၣ်မူမၤထွဲ နကလုၢ်ကထါ ကသ့အဂီၢ်ယတလဲၤလၢ ကျဲအၢကျဲသီ နီတဘိဘၣ်.+
၁၀၂ မ့ၢ်လၢ နသိၣ်လိတ့ၢ်ယၤအဃိယမၤထွဲဒ် နတၢ်စံၣ်ညီၣ်ဆၢတဲာ်တဖၣ် အိၣ်ဝဲအသိး ထီဘိလီၤ.
၁၀၃ နတၢ်ကတိၤတဖၣ်န့ၣ် ဆၢဝဲဒိၣ်မးလၢ ယပျ့ၤလိၤ,ဆၢဒိၣ်န့ၢ်ဒံး ကနဲစီလၢ ယကိာ်ပူၤလီၤ.+
၁၀၄ ခီဖျိလၢ နတၢ်မၤလိာ်တဖၣ်အဃိ ယအိၣ်ဒီး တၢ်နၢ်ပၢၢ်လီၤ.+
လၢတၢ်န့ၣ်အဃိ ယသးဟ့ကျဲလၢအကမၣ် ကိးဘိဒဲးလီၤ.+
נ
၁၀၅ နကလုၢ်ကထါန့ၣ် မ့ၢ်ဝဲမ့ၣ်အူဒၢတဖျၢၣ်လၢ အဟံးစုနဲၣ်ကျဲယခီၣ်ဒီးတၢ်ကပီၤတခါလၢ အမၤကပီၤထီၣ် ယကျဲလီၤ.+
၁၀၆ ယမၤတ့ၢ် တၢ်အၢၣ်လီၤလၢ ယကအိၣ်မူမၤထွဲနတၢ်စံၣ်ညီၣ်ဆၢတဲာ် လၢအတီအလိၤတဖၣ် ဒီးယကမၤလၢပှဲၤအီၤလီၤ.
၁၀၇ အိ ယဟိဝၤယွၤဧၢ, ယဘၣ်နးဘၣ်ဖှီၣ်ဒိၣ်မး.+
ပာ်မူယၤဒ် နတဲပာ်စၢၤ အသိးန့ၣ်တက့ၢ်.+
၁၀၈ အိ ယဟိဝၤယွၤဧၢ, ယထးခိၣ် အတၢ်လုၢ်စံးထီၣ်ပတြၢၤတဖၣ်လၢ တၢ်သးအိၣ်အပူၤန့ၣ် ဝံသးစူၤ တူၢ်လိာ်အီၤတက့ၢ်.+
ဒီးသိၣ်လိယၤ နတၢ်စံၣ်ညီၣ်ဆၢတဲာ်တဖၣ်တက့ၢ်.+
၁၀၉ တၢ်ဘၣ်ယိၣ်အလီၢ်အိၣ်ဝဲလၢ ယသးသမူအဂီၢ်ထီဘိဘၣ်ဆၣ် ယတသးပ့ၤနီၣ် နတၢ်သိၣ်တၢ်သီဘၣ်.+
၁၁၀ ပှၤအၢပှၤသီ ဒိးလီၤ ပျံၤသကွီၤ လၢယဂီၢ်ဘၣ်ဆၣ် ယတဟးယံၤဒီး နတၢ်မၤလိာ်တဖၣ်ဘၣ်.+
၁၁၁ နတၢ်ဒုးသ့ၣ်နီၣ်ထီၣ်က့ၤတဖၣ်န့ၣ် မ့ၢ်တၢ်လၢ အမၤသးခုယသးအဃိ+ယကပာ်လုၢ်ပာ်ပှ့ၤအီၤ ထီဘိလီၤ.*
၁၁၂ ယဆၢတဲာ်လီၤယသး ဂၢၢ်ဂၢၢ်ကျၢၤကျၢၤလၢ ယကဒိကနၣ် နတၢ်ဘျၢတဖၣ်တစိၤလၢယသး တုၤလၢအကတၢၢ်လီၤ.
ס
၁၁၃ ပှၤလၢအသးတတီဒီးနၤလၢ အသးဒီဖျၢၣ်ဘၣ်န့ၣ် ယသးဟ့အဝဲသ့ၣ်လီၤ.+
မ့မ့ၢ် နတၢ်သိၣ်တၢ်သီန့ၣ် ယအဲၣ်အီၤလီၤ.+
၁၁၄ ယမုၢ်လၢ်တၢ်လၢ နကလုၢ်ကထါပူၤအဃိ+နမ့ၢ် ယတၢ်အိၣ်သဒၢအလီၢ် ဒီးယကတီၤလီၤ.+
၁၁၅ ဒ်သိး ယအိၣ်မူမၤထွဲ ယကစၢ်ယွၤ အတၢ်မၤလိာ်တဖၣ် ကသ့အဂီၢ်သုဝဲပှၤအၢပှၤသီသ့ၣ်ဧၢ, အိၣ်ယံၤဒီးယၤတက့ၢ်.+
၁၁၆ အိ ကစၢ်ယွၤဧၢ, ဒ်သိးယကဆဲးမူအဂီၢ်ဆီၣ်ထွဲယၤ ဒ်နအၢၣ်လီၤပာ်စၢၤအသိးတက့ၢ်.+
တဘၣ်ပျဲလၢ ယတၢ်မုၢ်လၢ် ကဟးဂီၤတဂ့ၤ.+
၁၁၇ ဒ်သိး ယကပူၤဖျဲးအဂီၢ် ဆီၣ်ထွဲယၤတက့ၢ်.+
ဒီးယကသးစၢၢ်ဆၢ နတၢ်ဘျၢတဖၣ် ထီဘိလီၤ.+
၁၁၈ ပှၤလၢ အဟးယံၤဒီး နတၢ်ဘျၢတဖၣ်န့ၣ် နတတူၢ်လိာ် အဝဲသ့ၣ် နီတဂၤဘၣ်.+
အဝဲသ့ၣ်မ့ၢ် ပှၤတတီတလိၤဘၣ် ဒီးပှၤလံၣ်တၢ်လီတၢ်လီၤ.
၁၁၉ ပှၤအၢပှၤသီလၢ ဟီၣ်ခိၣ်ချၢခဲလၢာ်န့ၣ် နတၢၤကွံာ် အဝဲသ့ၣ် ဒ်တၢ်ကမှံၤအသိးလီၤ.+
လၢတၢ်န့ၣ်အဃိ ယအဲၣ် နတၢ်ဒုးသ့ၣ်နီၣ်ထီၣ်က့ၤတဖၣ်လီၤ.
၁၂၀ ယ* ကနိးလၢ တၢ်ပျံၤနၤအဃိဒီးယယူးယီၣ်ပာ်ကဲ နတၢ်စံၣ်ညီၣ်ဆၢတဲာ်တဖၣ်လီၤ.
ע
၁၂၁ ယမၤတ့ၢ် တၢ်လၢအဘၣ် ဒီးယမၤတၢ်တီတီလိၤလိၤအဃိတဘၣ်ဟ့ၣ်လီၤကွံာ်ယၤလၢ ပှၤလၢအဆီၣ်တံၢ်မၤနၢၤယၤတဖၣ် အစုပူၤတဂ့ၤ.
၁၂၂ အၢၣ်လီၤလၢ နကမၤစၢၤ နခ့နပှၤယၤအံၤတက့ၢ်.
ပှၤလၢအပာ်ထီၣ်ထီအသးန့ၣ် မ်အသု တဆီၣ်တံၢ်မၤနၢၤယၤတဂ့ၤ.
၁၂၃ ယအိၣ်ခိး နတၢ်အုၣ်က့ၤခီၣ်က့ၤ+ ဒီးနတၢ်အၢၣ်လီၤ* လၢအတီအလိၤ+တုၤဒၣ်လဲာ် ယမဲာ်ချံ ကဒုလီၤလၢာ်လံ.
၁၂၄ ပာ်ဖျါထီၣ် နတၢ်အဲၣ်လၢအတီလၢ နခ့နပှၤယၤအံၤ အဖီခိၣ်+ဒီးသိၣ်လိယၤလၢ နတၢ်ဘျၢတဖၣ်တက့ၢ်.+
၁၂၅ ယမ့ၢ်နခ့နပှၤလီၤ. ဟ့ၣ်ယၤ တၢ်သ့ၣ်ညါ+ဒ်သိး ယကနၢ်ပၢၢ် နတၢ်ဒုးသ့ၣ်နီၣ်ထီၣ်က့ၤတဖၣ်တက့ၢ်.
၁၂၆ အိ ယဟိဝၤယွၤဧၢ, အဝဲသ့ၣ် မၤဟးဂီၤ နတၢ်သိၣ်တၢ်သီအဃိတၢ်ဆၢကတီၢ်လၢ နကမၤတၢ်တမံၤမံၤန့ၣ် ဟဲတုၤဝဲလံ.+
၁၂၇ လၢတၢ်န့ၣ်အဃိ ယအဲၣ် နတၢ်မၤလိာ်တဖၣ်ဒိၣ်န့ၢ်ဒံးထူ ဒီးထူစီလီၤ.+
၁၂၈ အဃိ နတၢ်ဟံးစုနဲၣ်ကျဲ*ကိးမံၤဒဲးန့ၣ် ယထံၣ်အီၤဒ်တၢ်လၢအဘၣ်+ဒီးယသးဟ့ ကျဲလၢအကမၣ် ကိးဘိဒဲးလီၤ.+
פ
၁၂၉ နတၢ်ဒုးသ့ၣ်နီၣ်ထီၣ်က့ၤတဖၣ်န့ၣ် လီၤကမၢကမၣ်ဒိၣ်မး.
လၢတၢ်န့ၣ်အဃိ ယအိၣ်မူမၤထွဲအီၤလီၤ.
၁၃၀ ဖဲတၢ်ပာ်ဖျါထီၣ် နတၢ်ကတိၤတဖၣ် အခီပညီအခါ အဟ့ၣ်ထီၣ်တၢ်ကပီၤ+ဒီးအဟ့ၣ်တၢ်နၢ်ပၢၢ်လၢ ပှၤလၢအတၢ်လဲၤခီဖျိစှၤတဖၣ် အအိၣ်လီၤ.+
၁၃၁ မ့ၢ်လၢ ယလီကီ နတၢ်မၤလိာ်တဖၣ်အဃိ+ယအိးထီၣ် ယထးခိၣ် ဒီးသါသဖှိထီၣ်လီၤ.
၁၃၂ ဃၣ်နသးဆူယအိၣ် ဒီးသးကညီၤယၤ+ဒ်နတၢ်စံၣ်ညီၣ်ဆၢတဲာ်လၢ ပှၤလၢအအဲၣ်နမံၤအဂီၢ် အိၣ်ဝဲအသိးန့ၣ်တက့ၢ်.+
၁၃၃ ဒ်သိး ယကလဲၤတၢ် ပူၤပူၤဖျဲးဖျဲးအဂီၢ် ဟံးစုနဲၣ်ကျဲယၤ ခီဖျိ တၢ်လၢနတဲတဖၣ်န့ၣ်တက့ၢ်.
မ်တၢ်အၢတၢ်သီ သုတဒိၣ်စိလၢ ယဖီခိၣ် နီတမံၤတဂ့ၤ.+
၁၃၄ မၤပူၤဖျဲး* ယၤလၢ ပှၤလၢအဆီၣ်တံၢ်မၤနၢၤတၢ်တဖၣ် အစုပူၤတက့ၢ်.
ဒီးယကအိၣ်မူမၤထွဲ နတၢ်မၤလိာ်တဖၣ်လီၤ.
၁၃၅ ပာ်ဖျါထီၣ်လၢ နဘၣ်သူၣ်ဘၣ်သး နခ့နပှၤ ယၤအံၤတက့ၢ်.+
ဒီးသိၣ်လိယၤလၢ နတၢ်ဘျၢတဖၣ်တက့ၢ်.
၁၃၆ မ့ၢ်လၢ ပှၤတအိၣ်မူမၤထွဲ နတၢ်သိၣ်တၢ်သီဘၣ်အဃိ+ယမဲာ်ထံတဖၣ် ယွၤလီၤဝဲ ဒ်ထံကျိဖိအသိးလီၤ.
צ
၁၃၇ အိ ယဟိဝၤယွၤဧၢ, နမ့ၢ်ပှၤလၢ အတီအလိၤ+
ဒီးနတၢ်စံၣ်ညီၣ်ဆၢတဲာ်တဖၣ်န့ၣ် ကြၢးဝဲဘၣ်ဝဲလီၤ.+
၁၃၈ နတၢ်ဒုးသ့ၣ်နီၣ်ထီၣ်က့ၤတဖၣ်န့ၣ် တီဝဲလိၤဝဲဒီးပှၤသန့ၤသးလၢအီၤ သ့ဝဲလၢာ်လၢာ်ဆ့ဆ့လီၤ.
၁၃၉ ယတၢ်သးဆူၣ်န့ၣ် မၤသးဒ်မ့ၣ်အူ လၢအအီၣ်တၢ်လၢ ယပူၤအသိး+မ့ၢ်လၢ ယဒုၣ်ယဒါတဖၣ် တကနၣ်ဃုာ် နတၢ်ကတိၤတဖၣ်ဘၣ် အဃိလီၤ.
၁၄၀ တၢ်လၢနတဲန့ၣ် စီဆှံဝဲ+ဒီးယဘၣ်သူၣ်ဘၣ်သး တၢ်လၢနတဲဒိၣ်မး.+
၁၄၁ ပှၤဆိကမိၣ်ဆံးယၤ ဒီးပှၤသးဘၣ်အၢယၤ+ဘၣ်ဆၣ် ယတသးပ့ၤနီၣ် နတၢ်မၤလိာ်တဖၣ်ဘၣ်.
၁၄၂ နတၢ်တီတၢ်လိၤန့ၣ် မ့ၢ်တၢ်တီတၢ်လိၤ အထူအယိာ်+ဒီးနတၢ်သိၣ်တၢ်သီန့ၣ် မ့ၢ်တၢ်မ့ၢ်တၢ်တီလီၤ.+
၁၄၃ တၢ်ကိၢ်တၢ်ဂီၤ ဒီးတၢ်ကီတၢ်ခဲ ဟဲဘၣ်ယၤ သနာ်က့ယဘၣ်သူၣ်ဘၣ်သးဒံး နတၢ်မၤလိာ်တဖၣ်လီၤ.
၁၄၄ နတၢ်ဒုးသ့ၣ်နီၣ်ထီၣ်က့ၤတဖၣ်န့ၣ် မ့ၢ်တၢ်လၢ အတီအလိၤ လီၤထူလီၤယိာ်လီၤ.
ဟ့ၣ်ယၤ တၢ်သ့ၣ်ညါနၢ်ပၢၢ်+ ဒ်သိး ယကဆဲးမူအဂီၢ်တက့ၢ်.
ק
၁၄၅ ယကိးထီၣ်နၤလၢ ယသးဒီဖျၢၣ်ညါလီၤ. အိ ယဟိဝၤယွၤဧၢ, စံးဆၢယၤတက့ၢ်.
နတၢ်ဘျၢတဖၣ်န့ၣ် ယကအိၣ်မူမၤထွဲအီၤလီၤ.
၁၄၆ ယကိးထီၣ်နၤလီၤ. မၤပူၤဖျဲးယၤတက့ၢ်.
ယကအိၣ်မူမၤထွဲ နတၢ်ဒုးသ့ၣ်နီၣ်ထီၣ်က့ၤတဖၣ်လီၤ.
၁၄၇ မ့ၢ်လၢ နတၢ်ကတိၤတဖၣ်န့ၣ် မ့ၢ်ဝဲ ယတၢ်မုၢ်လၢ်အဃိတချုး မုၢ်ဝါထီၣ်ဒံးဘၣ်န့ၣ် ယပၢၢ်ထီၣ်ဒ်သိး ယကဃ့ နတၢ်မၤစၢၤ အဂီၢ်လီၤ.+
၁၄၈ ယပၢၢ်ထီၣ်လၢ ဖးဖီမုၢ်ဒ်သိး ယကဆိကမိၣ်ထံ* တၢ်လၢနတဲတဖၣ်လီၤ.+
၁၄၉ မ့ၢ်လၢ နတၢ်အဲၣ်လၢအတီအဃိ ဒိကနၣ်ယၤတက့ၢ်.+
အိ ယဟိဝၤယွၤဧၢ, ပာ်မူယၤ ဒ်နတၢ်စံၣ်ညီၣ်တီ အိၣ်ဝဲအသိးတက့ၢ်.
၁၅၀ ပှၤလၢအမၤတၢ်လၢ အလီၤမဲာ်ဆှးန့ၣ် ဟဲသုးဘူးထီၣ်အသး ဒ်သိး ကမၤအၢမၤသီယၤ.
အဝဲသ့ၣ် အိၣ်ယံၤဝဲဒီး နတၢ်သိၣ်တၢ်သီလီၤ.
၁၅၁ အိ ယဟိဝၤယွၤဧၢ, နအိၣ်ဘူးဒီးယၤလီၤ.+
ဒီးနတၢ်မၤလိာ်ခဲလၢာ်န့ၣ် မ့ၢ်တၢ်မ့ၢ်တၢ်တီလီၤ.+
၁၅၂ လၢအပူၤကွံာ်ဖးယံာ်န့ၣ် ယသ့ၣ်ညါဘၣ်လၢနတၢ်ဒုးသ့ၣ်နီၣ်ထီၣ်က့ၤတဖၣ်န့ၣ် နဒုးအိၣ်ဂၢၢ်ဆိးကျၢၤအီၤ လီၤထူလီၤယိာ်လီၤ.+
ר
၁၅၃ ယတသးပ့ၤနီၣ် နတၢ်သိၣ်တၢ်သီဘၣ်.
အဃိ ကွၢ်လီၤယတၢ်နးတၢ်ဖှီၣ် ဒီးမၤပူၤဖျဲးယၤတက့ၢ်.+
၁၅၄ ဒီသဒၢယၤဒီး မၤပူၤဖျဲးယၤတက့ၢ်.+
ဒ်နတၢ်အၢၣ်လီၤ* အိၣ်ဝဲအသိးန့ၣ် ပာ်မူယၤတက့ၢ်.
၁၅၅ ပှၤအၢပှၤသီ တအဲၣ်ဒိး အိၣ်မူမၤထွဲ ဒ်နတၢ်ဘျၢတဖၣ် အိၣ်ဝဲအသိးဘၣ်အဃိ+တၢ်အုၣ်က့ၤခီၣ်က့ၤ အိၣ်ယံၤဒီး အဝဲသ့ၣ်လီၤ.
၁၅၆ အိ ယဟိဝၤယွၤဧၢ, နတၢ်သးကညီၤန့ၣ် ဒိၣ်ဝဲလီၤ.+
ပာ်မူယၤ ဒ်နတၢ်စံၣ်ညီၣ်တီ အိၣ်ဝဲအသိးတက့ၢ်.
၁၅၇ ယဒုၣ်ယဒါတဖၣ် ဒီးပှၤလၢအမၤနးမၤဖှီၣ်ယၤန့ၣ် အိၣ်ဝဲဒီဒူၣ်.+
ဘၣ်ဆၣ် ယမၤထွဲ နတၢ်ဒုးသ့ၣ်နီၣ်ထီၣ်က့ၤတဖၣ် ထီဘိလီၤ.
၁၅၈ ယသးဘၣ်အၢ ပှၤလၢအသးတတီဘၣ်တဖၣ်မ့ၢ်လၢ အဝဲသ့ၣ် တမၤထွဲ တၢ်လၢနတဲတဖၣ်ဘၣ် အဃိလီၤ.+
၁၅၉ ကွၢ်မီၤ, ယအဲၣ် နတၢ်မၤလိာ်တဖၣ် ဒိၣ်မး.
အိ ယဟိဝၤယွၤဧၢ, ခီဖျိလၢ နတၢ်အဲၣ်လၢအတီအဃိ ပာ်မူယၤတက့ၢ်.+
၁၆၀ နကလုၢ်ကထါခဲလၢာ်န့ၣ် မ့ၢ်တၢ်မ့ၢ်တၢ်တီလီၤ.+
ဒီးနတၢ်စံၣ်ညီၣ်ဆၢတဲာ်လၢ အတီအလိၤ ခဲလၢာ်န့ၣ် ကအိၣ်ဂၢၢ်ဆိးကျၢၤဝဲ လီၤထူလီၤယိာ်လီၤ.
ש
၁၆၁ ယတမၤကမၣ်တၢ် နီတမံၤဘၣ်သနာ်က့ ပဒိၣ်ဖးဒိၣ်တဖၣ် မၤအၢမၤနးယၤလီၤ.+
ဘၣ်ဆၣ် တၢ်လၢနတဲတဖၣ်န့ၣ် ဒုးကမၢကမၣ်ယၤလီၤ.+
၁၆၂ တၢ်လၢနတဲတဖၣ်န့ၣ် မၤသးခုယသး+ဒ်သိးဒီး ပှၤတဂၤ လၢအထံၣ်န့ၢ် တၢ်လုၢ်ဒိၣ်ပှ့ၤဒိၣ် ဒီဒူၣ်လီၤ.
၁၆၃ ယသးဟ့ တၢ်လံၣ်တၢ်လီ ဒီးယသးဘၣ်အၢအီၤလီၤ.+
ဘၣ်ဆၣ် ယအဲၣ် နတၢ်သိၣ်တၢ်သီလီၤ.+
၁၆၄ ခီဖျိလၢ နတၢ်စံၣ်ညီၣ်ဆၢတဲာ်လၢ အတီအလိၤတဖၣ်အဃိယစံးထီၣ်ပတြၢၤနၤ တနံၤနွံဘျီလီၤ.
၁၆၅ ပှၤလၢအအဲၣ် နတၢ်သိၣ်တၢ်သီန့ၣ် အိၣ်ဒီးတၢ်ဃူတၢ်ဖိး* အါအါဂီၢ်ဂီၢ်+ဒီးတၢ်မၤလီၤဃံၢ်အဝဲသ့ၣ် တသ့နီတမံၤဘၣ်.
၁၆၆ အိ ယဟိဝၤယွၤဧၢ, ယမုၢ်လၢ် နတၢ်အုၣ်က့ၤခီၣ်က့ၤဒီးယအိၣ်မူမၤထွဲ နတၢ်မၤလိာ်တဖၣ်လီၤ.
၁၆၇ ယအိၣ်မူမၤထွဲ နတၢ်ဒုးသ့ၣ်နီၣ်ထီၣ်က့ၤတဖၣ်ဒီးယအဲၣ်အီၤ ဒိၣ်မးလီၤ.+
၁၆၈ မ့ၢ်လၢနသ့ၣ်ညါ တၢ်လၢယမၤခဲလၢာ်အဃိ+ယအိၣ်မူမၤထွဲ နတၢ်မၤလိာ် ဒီးနတၢ်ဒုးသ့ၣ်နီၣ်ထီၣ်က့ၤတဖၣ်လီၤ.
ת
၁၆၉ အိ ယဟိဝၤယွၤဧၢ, မ်ယတၢ်ကိးပသူထီၣ်လၢ တၢ်မၤစၢၤအဂီၢ်န့ၣ် ဟူထီၣ်တုၤလၢနအိၣ်တက့ၢ်.+
ဒ်သိးယကနၢ်ပၢၢ်တၢ်အဂီၢ် မၤစၢၤယၤ ခီဖျိနကလုၢ်ကထါတက့ၢ်.+
၁၇၀ မ်နဒိကနၣ် ယတၢ်ဃ့ကညးလၢ တၢ်သးကညီၤအဂီၢ်တက့ၢ်.
မၤပူၤဖျဲးယၤ ဒ်နအၢၣ်လီၤ အသိးတက့ၢ်.
၁၇၁ မ့ၢ်လၢ နသိၣ်လိယၤလၢ နတၢ်ဘျၢတဖၣ်အဃိယထးခိၣ် ကစံးထီၣ်ပတြၢၤနၤ ထီဘိလီၤ.+
၁၇၂ နတၢ်မၤလိာ်ခဲလၢာ်န့ၣ် တီဝဲလိၤဝဲအဃိမ်ယပျ့ၤ သးဝံၣ်ဘၣ်ဃးဒီး တၢ်လၢနတဲအဂ့ၢ်တက့ၢ်.+
၁၇၃ ခီဖျိလၢ ယဃုထၢလၢ ယကဒိကနၣ် နတၢ်မၤလိာ်တဖၣ်အဃိ+မ်နမၤစၢၤယၤတက့ၢ်.+
၁၇၄ အိ ယဟိဝၤယွၤဧၢ, ယခိးကွၢ်လၢ် နတၢ်အုၣ်က့ၤခီၣ်က့ၤ
ဒီးယဘၣ်သူၣ်ဘၣ်သး နတၢ်သိၣ်တၢ်သီလီၤ.+
၁၇၅ ဒ်သိး ယစံးထီၣ်ပတြၢၤနၤ ကသ့အဂီၢ် ပာ်မူယၤတက့ၢ်.+
မ်နတၢ်စံၣ်ညီၣ်ဆၢတဲာ်တဖၣ် မၤစၢၤယၤတက့ၢ်.
၁၇၆ ယဟးဖျိးကျဲ ဒ်သိးဒီး သိလၢအလီၤမၢ်တဒုလီၤ.+
မ့ၢ်လၢ ယတသးပ့ၤနီၣ် နတၢ်မၤလိာ်တဖၣ်ဘၣ်+ အဃိ လူၤဃုက့ၤနခ့နပှၤ ယၤအံၤတက့ၢ်.
တၢ်ဂ့ၢ်အဘျဲၣ်တဖၣ်
^ မ့ၢ်ဝဲ ဧ့ၤဘြံၤ အလံာ်မိၢ်ပှၢ် အဆိကတၢၢ်တဖျၢၣ်လီၤ. လၢအခီၣ်ထံးခါန့ၣ် စံးထီၣ်ပတြၢၤတယုၢ်အံၤ ဘၣ်တၢ်ကွဲးအီၤ ဒ်လံာ်မိၢ်ပှၢ်အဖျၢၣ် အိၣ်ရဲၣ်လီၤအသးအသိး.
^ မ့ၢ်စ့ၢ်ကီး “ပှၤလၢအပၢၤဃာ် အတၢ်သးတီ.”
^ မ့ၢ်စ့ၢ်ကီး “မၤလိ.”
^ မ့ၢ်စ့ၢ်ကီး “မၤလိ.”
^ မ့ၢ်စ့ၢ်ကီး “မၤလိ.”
^ မ့ၢ်စ့ၢ်ကီး “ဒိးန့ၢ်ဘၣ်တၢ်မဲာ်ဆှး.”
^ မ့ၢ်စ့ၢ်ကီး “ဒုးလဲၤယၤလၢ နတၢ်မၤလိာ်တဖၣ်အကျဲ.”
^ မ့ၢ်စ့ၢ်ကီး “တၢ်လၢနတဲ.”
^ မ့ၢ်စ့ၢ်ကီး “တၢ်လၢနတဲ.”
^ မ့ၢ်စ့ၢ်ကီး “မၤလိ.”
^ မ့ၢ်စ့ၢ်ကီး “တၢ်လၢနတဲ.”
^ မ့ၢ်စ့ၢ်ကီး “တၢ်လၢနတဲ.”
^ မ့ၢ်စ့ၢ်ကီး “မၤလိ.”
^ မ့ၢ်ဝဲ အတၢ်ဘၣ်တ့ခဲလၢာ်.
^ မ့ၢ်စ့ၢ်ကီး “မၤလိ.”
^ မ့ၢ်စ့ၢ်ကီး “မၤလိ.”
^ မ့ၢ်စ့ၢ်ကီး “ယတၢ်န့ၢ်သါ လီၤထူလီၤယိာ်.”
^ အခီပညီလိၤလိၤ “ဖံးညၣ်.”
^ မ့ၢ်စ့ၢ်ကီး “တၢ်လၢနတဲ.”
^ မ့ၢ်စ့ၢ်ကီး “တၢ်မၤလိာ်.”
^ အခီပညီလိၤလိၤ “ပှ့ၤက့ၤ.”
^ မ့ၢ်စ့ၢ်ကီး “မၤလိ.”
^ မ့ၢ်စ့ၢ်ကီး “တၢ်လၢနတဲ.”
^ မ့ၢ်စ့ၢ်ကီး “တၢ်သူၣ်မံသးမုာ်.”