စံးထီၣ်ပတြၢၤ ၁၀၄:၁-၃၅
၁၀၄ မ်ယစံးထီၣ်ပတြၢၤ ယဟိဝၤယွၤတက့ၢ်.+
အိ ကစၢ်ယဟိဝၤယွၤဧၢ, နစိကမီၤဒိၣ်ဝဲဒိၣ်မး.+
နကူကၤ တၢ်လၤတၢ်ကပီၤ ဒီးတၢ်ကဟုကညီၢ်လီၤ.+
၂ နကၤတၢ်ကပီၤ+ ဒ်ဆ့ကၤဖးထီတဘ့ၣ်အသိး,နသလၣ်ထီၣ်မူခိၣ်ဒ် ဒဲတဖျၢၣ်အသိးလီၤ.+
၃ ဒီးနသူၣ်ထီၣ် နဒၢးတဖၣ်လၢ ထးခီလၢ တၢ်အၢၣ်အဖီခိၣ်လီၤ.+
နဒိးတၢ်အၢၣ်တဖၣ် ဒ်နလ့ၣ်ကဟၣ်အသိး+ဒီးနလဲၤတၢ်လၢ ကလံၤအဒံးဆ့ အဖီခိၣ်လီၤ.+
၄ နဒုးကဲထီၣ် နမူခိၣ်ကလူးတဖၣ်လၢ ပှၤနီၢ်သးဖိလၢ အဂံၢ်ဆူၣ်ဘါဆူၣ်ဒီးနခ့နပှၤတဖၣ်လၢ မ့ၣ်အူလၢအအီၣ်တၢ်လီၤ.+
၅ နပာ်လီၤ ဟီၣ်ခိၣ်အခီၣ်ထံး ကျၢၤကျၢၤ+ဒီးအတသုးအသး လၢအလီၢ် နီတဘျီဘၣ်.+
၆ နမၤဘၢ ဟီၣ်ခိၣ်ဒီး ထံယိာ်ပူၤ ဒ်ဆ့ကၤအသိး+ဒီးထံတဖၣ်ဘၢဝဲ ကစၢၢ်တဖၣ်လီၤ.
၇ လၢနတၢ်သိၣ်ဃီၣ်အဃိ ထံတဖၣ် ယွၤလီၤကွံာ်ဝဲ,+လၢနလီသီၣ်ထီၣ်အဃိ ထံတဖၣ် ပျံၤတၢ်ဖုးတၢ်ဒီး ယွၤလီၤဝဲချ့မးလီၤ.
၈ ဒီးကစၢၢ်ကလိတဖၣ် ထီထီၣ်ဝဲ+ ဒီးတၢ်တြီၤတဖၣ်လီၤဝဲဆူတၢ်လီၢ်လၢ နပာ်ပနီၣ်လၢ အဝဲသ့ၣ်အဂီၢ်လီၤ.
၉ ဒ်သိးထံတဖၣ် သုတလုၢ်ဘၢ ဟီၣ်ခိၣ်နီတဘျီလၢၤတဂ့ၤအဂီၢ်နပာ်လီၤတၢ်အဆၢလၢ ထံတဖၣ် တကြၢးလဲၤဝဲဘၣ်.+
၁၀ နအိးထီၣ် ထံထီၣ်ပၢၢ်တဖၣ်လၢ တၢ်တြီၤတဖၣ်အပူၤဒီးလၢကစၢၢ်တဖၣ် အကဆူးန့ၣ် ထံကျိဖိတဖၣ် ဆဲးယွၤလီၤဝဲလီၤ.
၁၁ လၢထံကျိဖိတဖၣ်န့ၣ်အဃိ ဆၣ်ဖိကီၢ်ဖိလၢ ပျီပူၤခဲလၢာ် အီဘၣ်ထံဒီးကသ့ၣ်ယီၤမံၤတဖၣ် အီဘၣ်ထံဘျဲဘျဲလီၤ.
၁၂ ထိၣ်တဖၣ်လၢ မူခိၣ်န့ၣ် တ့ထီၣ်အသွံလၢ ထံထီၣ်ပၢၢ်တဖၣ် အဖီခိၣ်ဒီးပှ့ၤသီၣ်ထီၣ်ဝဲလၢ သ့ၣ်ဒ့လၢ အပှဲၤဒီးအလၣ်တဖၣ်အလိၤလီၤ.
၁၃ နအိၣ်လၢနဒၢးတဖၣ် လၢထးခီ ဒီးနဒုးစူၤလီၤ မူခိၣ်ထံလၢ ကစၢၢ်ကလိတဖၣ်အလိၤလီၤ.+
ဒီးနတၢ်မၤအတၤသၣ်တဖၣ် အိၣ်ပှဲၤလၢ ဟီၣ်ခိၣ်ချၢလီၤ.+
၁၄ နဒုးမဲထီၣ် နီၣ်တဖၣ်လၢ ဆၣ်ဖိကီၢ်ဖိတဖၣ်အဂီၢ်ဒီးတၢ်မုၢ်တၢ်ဘိတဖၣ်လၢ ပှၤဟီၣ်ခိၣ်ဖိ ကသူဝဲအဂီၢ်လီၤ.+
နမၤဒ်န့ၣ်န့ၣ် ဒ်သိးကဒုးဟဲထီၣ် တၢ်အီၣ်တၢ်အီလၢ ဟီၣ်ခိၣ်,
၁၅ စပံးထံလၢ အမၤဖှံထီၣ်ပှၤသး,+သိလၢအမၤကတြ့ၣ်ထီၣ်ပှၤမဲာ်,ဒီးကိၣ်လၢ အကဲဂံၢ်ကဲဘါလၢ ပှၤဂီၢ်လီၤ.+
၁၆ ယဟိဝၤယွၤ အသ့ၣ်ထူၣ်တဖၣ်လၢ အသူၣ်လီၤဝဲ လၢအမ့ၢ်လဘၤနိၣ် အသ့ၣ်ဆှိအ့ရ့းတဖၣ်န့ၣ် ဒိးန့ၢ်ဘၣ် ထံလၢလၢပှဲၤပှဲၤလီၤ.
၁၇ ဖဲန့ၣ်န့ၣ် ထိၣ်တဖၣ် တ့ထီၣ်အသွံဒီးသ့ၣ်ကၠူနံးဖၢၤမ့ၢ်ဝဲ ထိၣ်ထီကိာ်+ အတၢ်အိၣ်တၢ်ဆိးအလီၢ်လီၤ.
၁၈ ကစၢၢ်ဖးထီတဖၣ်န့ၣ် မ့ၢ်ဝဲ မဲာ်တဲးလဲးမံၤတဖၣ် အတၢ်အိၣ်တၢ်ဆိးအလီၢ်+ဒီးလ့တဖၣ်န့ၣ် မ့ၢ်ဝဲ ယုၢ်ၡဖၣ်* အတၢ်အိၣ်သဒၢအလီၢ်လီၤ.+
၁၉ နတ့လီၤလါ ဒ်သိးကပာ်ပနီၣ် တၢ်ဆၢကတီၢ်အဂီၢ်ဒီးမုၢ်သ့ၣ်ညါဝဲ ဂ့ၤဂ့ၤလၢ အကဘၣ်လီၤနုာ်လၢ အဆၢကတီၢ်ဖဲလဲၣ်န့ၣ်လီၤ.+
၂၀ နတ့လီၤ တၢ်ခံးသူဒီး အကဲထီၣ်ဝဲမုၢ်နၤခီ+ဖဲဆၣ်ဖိကီၢ်ဖိအမံၤ ခဲလၢာ်လၢ ပှၢ်ကျါ ဟးဝ့ၤဝီၤ ဃုအီၣ်အဆၣ် အခါန့ၣ်လီၤ.
၂၁ ဖဲခ့ယုၢ်ဖိတဖၣ် ဟးဃုအီၣ်အဆၣ်အခါ အဝဲသ့ၣ်ကညီၤတၢ်+ဒီးဟးဃုဝဲ အတၢ်အီၣ်တဖၣ်လၢ ကစၢ်ယွၤ ကတဲာ်ကတီၤဝဲလီၤ.+
၂၂ ဖဲမုၢ်ဟဲထီၣ်အခါအဝဲသ့ၣ် က့ၤမံနီၤကဒါဝဲလၢ အပူၤလီၤ.
၂၃ ပှၤဟီၣ်ခိၣ်ဖိ လဲၤမၤအတၢ်မၤဒီးမၤတၢ်တုၤလၢ မုၢ်ဟါလီၤ.
၂၄ အိ ယဟိဝၤယွၤဧၢ, တၢ်လၢ နမၤတ့ၢ်တဖၣ် အိၣ်အါမး+ဒီးနတ့လီၤတၢ်ခဲလၢာ် ပှဲၤဒီးတၢ်ကူၣ်သ့+ဒီးဟီၣ်ခိၣ်န့ၣ် ပှဲၤဝဲဒီး တၢ်လၢနတ့လီၤတဖၣ်လီၤ.
၂၅ လၢပီၣ်လဲၣ် ဖးဒိၣ်ဖးလဲၢ် အပူၤန့ၣ်အိၣ်ဒီး တၢ်သးသမူလၢ အဒိၣ်မ့ၢ်ဂ့ၤ အဆံးမ့ၢ်ဂ့ၤ လၢပှၤဂံၢ်ထီၣ်အီၤ တလၢာ်ဘၣ်.+
၂၆ ကဘီတဖၣ် လဲၤတၢ်လၢ ပီၣ်လဲၣ်ပူၤဒီးလဝံးအသၤ*+ လၢနတ့လီၤအီၤန့ၣ် ဂဲၤလိာ်ကွဲလၢ အပူၤလီၤ.
၂၇ အဝဲသ့ၣ် ခဲလၢာ်သန့ၤအသးလၢနၤဒ်သိးနကဟ့ၣ်အီၤ တၢ်အီၣ်တၢ်အီ ဘၣ်ဆၢဘၣ်ကတီၢ်လီၤ.+
၂၈ တၢ်လၢနဟ့ၣ်အဝဲသ့ၣ်န့ၣ် အဝဲသ့ၣ် ပာ်ဖှိၣ်ဝဲ+ဒီးဖဲနအိးသလၣ်ထီၣ်နစုအခါ အဝဲသ့ၣ် ဒိးန့ၢ်ဘၣ်ဝဲ တၢ်လၢအဂ့ၤအါမးလီၤ.+
၂၉ ဖဲနပာ်သဒၢနမဲာ်အခါ အဝဲသ့ၣ် သးဘၣ်တံာ်တာ်လီၤ.
နမ့ၢ်ထုးကွံာ် အဝဲသ့ၣ် အတၢ်သါန့ၣ်* အဝဲသ့ၣ်ကသံဝဲ ဒီးကကဲထီၣ်ကဒါက့ၤ ဟီၣ်ခိၣ်ကမူၣ်လီၤ.+
၃၀ နမ့ၢ်ဆှၢလီၤ နသးစီဆှံန့ၣ် တၢ်သးသမူ ဘၣ်တၢ်တ့လီၤအီၤ+ဒီးနဟ့ၣ်တၢ်မူအသီလၢ ဟီၣ်ခိၣ်လီၤ.
၃၁ ယဟိဝၤယွၤ အလၤအကပီၤန့ၣ် ကအိၣ်ဝဲဆိးဝဲ လီၤထူလီၤယိာ်လီၤ.
ယဟိဝၤယွၤ ကသးခုဝဲလၢ တၢ်လၢအမၤဝဲတဖၣ် အဖီခိၣ်လီၤ.+
၃၂ ဖဲနကွၢ်ဟီၣ်ခိၣ်အခါ ဟီၣ်ခိၣ် ကနိးကစုာ်,ဖဲနထိးကစၢၢ်တဖၣ်အခါ ကစၢၢ်တဖၣ် ခုၣ်ထီၣ်ဝဲလီၤ.+
၃၃ ယကသးဝံၣ်ထီၣ် ယဟိဝၤယွၤ+ လၢယတၢ်အိၣ်မူ ဒီတစိၤဒီးဖဲယအိၣ်မူဒံးအခါ ယကသးဝံၣ် စံးထီၣ်ပတြၢၤ ယကစၢ်ယွၤလီၤ.+
၃၄ မ်ယတၢ်ဆိကမိၣ်တဖၣ်န့ၣ် ဘၣ်နသးတက့ၢ်.
ယကသးခုလၢ ယဟိဝၤယွၤအပူၤလီၤ.
၃၅ ပှၤတၢ်ဒဲးဘးဖိတဖၣ် ကလီၤမၢ်ကွံာ်ဝဲလၢ ဟီၣ်ခိၣ်ချၢဒီးပှၤအၢပှၤသီတဖၣ် တအိၣ်လၢၤဘၣ်.+
မ်ယစံးထီၣ်ပတြၢၤ ယဟိဝၤယွၤတက့ၢ်. ဟါလ့ၤလူယၤ.*
တၢ်ဂ့ၢ်အဘျဲၣ်တဖၣ်
^ ယုၢ်ၡဖၣ်န့ၣ် မ့ၢ်ဝဲ ဆၣ်ဖိကီၢ်ဖိ တကလုာ် လၢအလီၤဂာ်ဒ် ပဒဲအသိး ဒီးအခံမဲၢ်တအိၣ်ဘၣ် ဒီးအဝဲသ့ၣ်အိၣ်လၢ လၢၢ်ကဆူးလ့ကဆူး.
^ ကွၢ် တၢ်ကတိၤအခီပညီ.
^ မ့ၢ်စ့ၢ်ကီး “သး.”
^ လၢဧ့ၤဘြံၤကျိာ်န့ၣ် အခီပညီမ့ၢ်ဝဲ “စံးထီၣ်ပတြၢၤ ယဟိဝၤ.”
