Зәбүр 55:1—23
Ән-күй жетекшісіне. Ішекті аспаптың сүйемелдеуімен орындалуға арналған. Маскил*. Дәуіттің жыры.
55 Дұғамды ести көрші, уа, Құдайым+,Мейіріміңді түсіруді сұраған өтінішімді елеусіз қалдырмашы*+.
2 Маған назарыңды салып, жауап бере көрші+.
Уайымым маған тыным берер емес+,Әбден мазам қашты.
3 Дұшпанымның айтқан сөзінен,Зұлымның қыспаққа алғанынан солай болды.
Олар азабыма азап қосуын қояр емес,Ашуға мініп, жауласуын тыяр емес+.
4 Жүрегім кеудемде аласұрып қиналады+,Бойымды өлім қорқынышы биледі+.
5 Үрейленіп, діріл қағамын,Тұла бойым қалтырайды.
6 Мен былай деп тілеймін: “Шіркін, кептердікіндей қанатым болса ғой!
Ұшып кетіп, қауіпсіз жерге тұрақтар ем.
7 Шалғай жаққа ұшып кетер ем+,Шөл далаға барып қонақтар ем+. (Села)
8 Долы желден, сұрапыл дауылданПаналайтын жерге асығар ем”.
9 Уа, Ехоба, оларды абыржытып, жоспарларын бұзшы+,Өйткені мен қалада болып жатқан зорлық пен толқуды көрдім.
10 Олар күні-түні қала қабырғасының үстінде аңдып жүреді,Қала ішін зымияндық пен пәле жайлаған+.
11 Қала іші тас-талқан,Оның алаңынан зорлық пен жалғандық арылған емес+.
12 Себебі мені мазақ етіп жатқан — жауым емес+,Әйтпесе бұған шыдар ем.
Маған қарсы бас көтерген — дұшпаным емес,Әйтпесе одан жасырынып қалар ем.
13 Сен өзіммен тең адамсың+,Өзім жақсы білетін серігімсің+.
14 Екеуміз жақсы дос едік,Жұртпен бірге Құдай үйіне де бірге барушы едік.
15 Дұшпандарым тас-талқан боп күйресе екен+!
Тірідей көрге* кірсе екен.
Себебі араларында да, көңілдерінде де зұлымдық мекендейді.
16 Ал мен Құдайды көмекке шақырамын,Сонда Ехоба мені құтқарады+.
17 Таңертең де, түсте де, кешке де тыным таппаймын, ыңқылдаймын+,Құдай болса үніме құлақ салады+.
18 Ол құнымды өтеп алады, шайқасқан жауымнан жанымды аман сақтайды.
Өйткені көп адам маған қарсы шықты+.
19 Ежелден тағында отырған Құдай+ мені естіп, оларға қарсы шығады+. (Села)
Құдайдан қорықпайтын олар өзгеруден бас тартады+.
20 Ол* өзімен тату болғандарға шабуылдады+,Жасасқан келісімін бұзды+.
21 Айтқан сөздері адамға майдай жағады+,Бірақ жүрегі қастыққа толы.
Айтқан сөздері зәйтүн майынан да жағымды,Бірақ семсердей өткір+.
22 Бар ауыртпалығыңды Ехобаға арт+,Ол сені демейді+.
Әділ жанның құлауына ол ешқашан жол бермейді+.
23 Бірақ сен, уа, Құдайым, зұлымдарды терең орға түсіресің+.
Қан төгушілер мен алдамшылар ұзақ жасамай, өмірден өтеді+.
Ал мен өзіңе арқа сүйеймін.
Сілтемелер
^ Түсіндірмені қараңыз.
^ Немесе “Көмек сұрағанымда, менен жасырынбашы”.
^ Еврейше “шеол”. Түсіндірмені қараңыз.
^ Яғни 13, 14-те айтылған бұрынғы досы.