PES 3
Lelaa ni nla sañgal mindañ
“Ni lôôhaga gwéhna bé ni bé, inyule gwéha i nhô ngandak bibéba.”
Ngéda we ni nlô woñ tole ñwaa woñ ni mbôdôl niñ ntôñ, mindañ mi ngwé ndigi. Mi nla gwé inyule ni nôgda bé mam nya yada, ni nhoñol bé nya yada, ni ntehe bé ki to niñ nya yada. Mindañ mi nla gwé ngéda mam ma mpuhe bé. Mi nla ki lôl ni bôt ba mbégdé.
U nla bana ngôñ i yip mis, i boñ wengoñle u ntehe bé ngim mindañ. Ndi Bibel i nkal le di nlama nigil i sañgal mindañ. (Matéô 5:23, 24) Maéba mape ma nlel bé matiñ Bibel i nti inyu sañgal mindañ.
1 KWÉLÉL MU NDAÑ U
JAM BIBEL I NKAL: “Hiki hop u gwé ngéda.” (Ñañal 3:1, 7) Ni yoñ ngéda i kwélél inyu mindañ minan. Yible ñwaa woñ tole nlô woñ ñem woñ ni maliga inyu kal nye lelaa u nôgda ni lelaa u nhoñol. Hiki ngéda, pôdôs ñwaa woñ tole nlô woñ ni “maliga.” (Efésô 4:25) Ngéda liyot li mbet we, gwel nyu le u bédés bañ kiñ. Litimbhe ni ñem ñwee li nla hôla le nkwel u yila bañ jômôl.
To ibale u neebe bé yom a nkal, u gwélél bañ bibuk bi mbabaa, ndi gwélél bibuk bi ñunda gwéha ni lipém u nti nye. (Kôlôsé 4:6) Ni pala sañgal mindañ. U tjél bañ i pôdôs nye.
JAM U NLA BOÑ:
-
Pohol loñge ngéda i kwélél ni sañgal ndañ
-
Ibale ngéda yoñ i emble i nkola, hôtnyu le u kit bañ nye hop. Ngéda yoñ i yoñ hop, i nke lo
2 EMBLE LOÑGE, TIBIL KI NOK
JAM BIBEL I NKAL: “Gwéha nan bé ni bé kiki lisañ li bôt i ba yaga gwéha ñem nyu; wada a bôgôk ti numpe lipém.” (Rôma 12:10) Lisédi ôô inyu emble loñge li yé nseñ ngandak. Noode tibil nok mahoñol ma ñwaa woñ tole nlô woñ. Emble nduña yé ni suhulnyu. (1 Pétrô 3:8; Yakôbô 1:19) U boñ bañ wengoñle u yé emble, ki le u ta toi bé emble nye. Ibale u nla, nwas mam momasôna u bak u mboñ, u ti nye maôô moñ. Ndi ibale u nla bé, bat nye le ni kwélél mu lisañ lipe. Ibale u nyoñ ñwaa woñ tole nlô woñ kiki liwanda joñ, ha kiki ñoo woñ bé, u ga pala bé “nok liyot i mbuu woñ.”
JAM U NLA BOÑ:
-
U waag bañ yoñ ngéda i emble loñge ilole u mpot, to ibale yom u yé emble i nlémél bé we
-
U nok ndigi bañ bibuk bi nlô woñ tole bi ñwaa woñ, ndi noode wan mahoñol mé. Yimbe maboñog mé, u emble ki kiñ a ngwélél, inyu tibil nok nye
3 JÔP I BÔLÔ
JAM BIBEL I NKAL: “Ngweege yosôna i gwé yéñe, ndi yanga hop i nlona ndik njelel.” (Bingéngén 14:23) Ni nlama ndigi bé yén inyu yoñ makidik lôñ, ndi ni nlama ki boñ i yom ni nkit ntôñ. Hala a mbat ngandak bôlô ni biliya bi ngui, ndi i lisuk nyen ni ga tehe nseñ i boñ hala. (Bingéngén 10:4) Ibale ni nsal ntôñ, ni ga kôhna “loñge bom” inyu biliya binan.
JAM U NLA BOÑ:
-
Ni kit ntôñ mam hiki wada nan a nlama boñ inyu sañgal ndañ nan
-
Mbus ndék ngéda, ni yén ki inyu béñge mahôl ni ma boñ
