PES 1
Ni nôgôl maéba ma Djob inyu boñ le libii linan li bana maséé
“Nu a hek bo iloo yaga bibéé, a hek bo munlôm ni muda.”
Yéhôva * Djob a bi at libii li bisu. Bibel i nkal bés le ngéda a bi heg muda nu bisu, “a lona nye yak mut.” Ngandak maséé i bi boñ le Adam a kal le: “Hés i bihés gwem ini, yak nsôn u minsôn nwem.” (Bibôdle 2:22, 23) Yéhôva a ngwés le babiina ba ba maséé.
Ngéda mut a mbiiba, a yé a hoñol le mam momasôna ma ga ba ndik loñge ni loñge. Ndi maliga ma yé le, yak munlôm ni muda ba ba ngwéhna ngandak, ba ga kôhna mindañ. (1 Korintô 7:28) Ikété man kaat nunu, u ga léba matiñ ma Bibel. Ibale u nôgôl mo, libii ni lihaa joñ b’a ba maséé.
1 NEEBE BÔLÔ YÉHÔVA A NTI WE
JAM BIBEL I NKAL: Nlôm nyen a yé ño u ndap lihaa.
Ibale wen u yé nlôm, Yéhôva a ngwés toi le u tôñgôl nwaa woñ ni longeñem. (1 Pétrô 3:7) Djob a bi heg muda kiki nhôla woñ. A nsômbôl le u gwés nye, u ti ki nye lipém. (Bibôdle 2:18) U nlama gwés nye kayéle u tôñ nye iloo kiki u ntôñ wemede.
Ibale wen u yé ñwaa, Yéhôva a nsômbôl le u tibil nôgôl nlô woñ ni hôla nye i yônôs bôlô yé. (1 Korintô 11:3; Efésô 5:33) Nit makidik mé. Sal ni nye ntôñ ni ñem woñ wonsôna. (Kôlôsé 3:18) Ngéda u mboñ hala, u ga kônde lama i mis ma nlô woñ ni i mis ma Yéhôva.
JAM U NLA BOÑ:
-
Bat nlô woñ lelaa u nla ba loñge ñwaa tole bat ñwaa woñ lelaa u nla ba loñge nlôm. Tibil emble ndimbhe yé, u boñ ki biliya gwoñ gwobisôna inyu héñha
-
Bana wongut. I mbéda ngandak ngéda inyu boñ le bé bo iba ni nigil i yi kii i nla boñ le nu numpe a ba maséé
2 NI TÔÑNA TOI BAÑGA LITÔÑÔG
JAM BIBEL I NKAL: U nlama tôñ inyu mam ma yéne nlô woñ tole ñwaa woñ nseñ. (Filipi 2:3, 4) Diihe nlô woñ tole ñwaa woñ ngandak. Bigda le Yéhôva a mbat hiki ngwélél wé le a ba minyaô tole a “bôihege ndigi bôt bobasôna.” (2 Timôtéô 2:24) “Mut wada a mpot bipopoda kiki pansoñ i mbabaa, ndi hilémp hi mut pék hi yé mbôô nyu.” Jon, soho, tep biloñge bi bibuk ngéda u mpôdôs ñwaa woñ tole nlô woñ. (Bingéngén 12:18) Mbuu u Yéhôva u ga hôla we i pot ni gwéha, ni longeñem.
JAM U NLA BOÑ:
-
Soohe inyu bana ñem ñwee ni inyu emble loñge, ilole ni nkwélél bañga mam ni ñwaa woñ tole nlô woñ
-
Yoñ ngéda inyu hoñol jam u ga pot ni lelaa u ga ke i pot jo
3 BOÑÂ MAM NTÔÑ
JAM BIBEL I NKAL: Ngéda u mbiiba, we ni ñwaa woñ tole nlô woñ ni nyila “nsôn wada.” (Matéô 19:5) Ndi, kiki ni yé mahéñha, bé bo iba ni nla bé bana minlélém mi mahoñol hiki ngéda. Jon ni nlama nigil i nok mahoñol ma nu numpe, ni yi lelaa a nôgda mu ñem wé, inyu tééda maada malam ipôla nan. (Filipi 2:2) Ni nlama yoñ makidik ntôñ. Bibel i nkal le: “Mahoñol ma nlédhana ni maéba.” (Bingéngén 20:18) Ni nwas le matiñ ma Bibel ma éga bé ngéda ni nyén inyu yoñ makidik makeñi.
JAM U NLA BOÑ:
-
U pot ndigi bañ i ngii ni ngii, ndi yible ñwaa woñ tole nlô woñ ñem woñ inyu toñol mahoñol moñ
-
Ilole u neebe ngim jam, bôk ndugi u pôdôl mu jam li ni ñwaa woñ tole ni nlô woñ
^ liboñ 4 Ikété Bibel, jôl li Djob le Yéhôva.