Kaat Kôlôsé 4:1-18
4 A bet, téédana minkol minan i nya i téé sép ni i nya i kôli, ni yik le yak bé ni gwé Nwet i ngii.+
2 Téñbana ni masoohe,+ le ndi ni yén péé, ni tinak Nyambe mayéga.*+
3 I nlélém ngéda, soohana yak inyu yés,+ inyu boñ le Nyambe a yible bés nwemel i añal bañga, le ndi di pam i añal jimb lipubi inyu Kristô; inyu jimb lipubi lini nyen me yéne i mok,+
4 le me añal jo loñge kiki i mbéda.
5 Kena ni bisu i boñ mam* ni pék lôñni i bôt ba ta bé ikété likoda,* ni tiblak gwélél ngéda nan.*+
6 Bibuk binan bi ba bilam ngéda yosôna, nnéhak ni bas,+ le ndi ni yi lelaa ni nlama timbhe hiki mut.+
7 Tikikô,+ mankéé wem nu gwéha, ni ngwelnson nu maliga lôñni so nkol wem i Nwet, a’ kal bé mam momasôna ma mbéñge me.
8 Me yé i om nye i bééni inyu boñ le ni yi lelaa di yé, ni le a hôgbaha miñem minan.
9 A yé i lo lôñni Ônésimô,+ mankéé nu maliga ni nugwéha, nu a nlôl nyoo bééni; ba ga añle bé mam momasôna ma yé i tabge nyono.
10 Aristarkô,+ nu a yé i mok lôñni me, a ñômle bé mayéga, nlélém jam ni Markô,+ mut lihaa* nu Barnabas (inyu yé nyen di bi ômle bé biniigana le ibale a nlo nyoo i bééni, leegana+ nye loñge),
11 yak Yésu nu ba nsébél le Yustô; i bôt ba, ba yé ikété minkweebaga. Botama bon ba yé baso bagwelnson bem inyu Ane Nyambe, ba nyilna ki me lingen li ngandak hogbe.*
12 Épafras,+ nkol u Kristô Yésu u u nlôl nyoo i bééni, a ñômle bé mayéga mé. A nligip i soohe inyu nan ngéda yosôna, le ndi ni pam i ba nyonok, ni bak yaga nkwoog nkaa ni sômbôl i Nyambe yosôna.
13 Inyule me mbok mbôgi inyu yé le a ntumbba ngandak inyu nan, ni inyu bôt ba yé i Laôdikéa lôñni i Hiérapôli.
14 Lukas,+ dokta nu gwéha, a ñômle bé mayéga mé, yak Démas.+
15 Yégnana me lôk kéé i Laôdikéa, yégnana yak Nimfa lôñni likoda li yé i ndap yé.+
16 I ngéda n’a mal añ i kaat ini nyoo i bééni, yoña bitelbene le ba añ+ yak yo i likoda li bôt ba Laôdikéa, yak bé ni añ kaat i nlôl i Laôdikéa.
17 Kala yak Arkipô+ le: “Yoñ yihe ni nson u bi neebe i Nwet, kayéle u yônôs wo loñge.”
18 Mayéga mem mana, me Paul, ni woo wem memede.+ Ni hôiga bañ le me yé i mok.+ Konangoo i mbuma ñañ i Nyambe i ba lôñni bé.
Ndoñi
^ Tole “Ni yénak péé ni i ti mayéga.”
^ Ni hop Grikia, “i hiôm.”
^ Tole “bôt ba mbégdé.”
^ Ni hop Grikia, “ni sombok ntéak ngéda.”
^ Lok i mut lihaa nu bagwal ba Barnabas.
^ Tole “mahôla ma ma nlédhana.”