Ligwéé li man li nla lona ngandak maséé ni ngandak nduña ikété ndap libii. Ngéda ba ntip bana man, ñwaa bo nlôm ba nla hel i tehe le libim li ngéda ni li ngui yap li nke inyu tééda nkéñéé wap man. Ni man i ndap, bagwal ba nla bôdôl lal pé. Yak mahoñol ni maboñog map ma nla héñha. Jon ba nlama béñge mambe mam ba nla boñ inyu tééda man wap loñge ni lédés libii jap. Lelaa Bibel i nla hôla bo i boñ hala?

JAM BIBEL I NKAL: “Gwéha i nwéha ngut, i gwé ki longeñem.” Bibel i nkal ki le “gwéha i nyiñil bé ndigi yomede, i ñakla bé.” (1 Korintô 13:4, 5) Ngéda u ntip gwal man, ñem woñ wonsôna u yé ndigi inyu man woñ. Ndi, nlô woñ a nla bôdôl nôgda wengoñle u nyôi nye. Jon, u hôiga bañ le yak nye a gwé ngôñ ni gwéha yoñ. Ibale u gwé bini bilem bilam kiki bo wongut ni longeñem, hala a ga hôla nlô woñ i nôgda le a gwé mahee i mis moñ ni le yak nye a nla ti mahôla inyu tééda man.

“A balôm, yéna ni baa banan lôñni yi.” (1 Pétrô 3:7) Yi le ñwaa woñ a ga gwélél libim li ngui yé ni ngéda yé inyu tééda man. Nano kiki bôlô i nkôndba nye, a mba a mbéna tjelel, a nogok ngandak waa, a nôgdaga ki le bôlô i nloo nye ngui. Ngim mangéda a nla yak uñbene we, ndi noode yén ñwee inyule “nu a mpala bé nyai a nloo mpémba mut.” (Bingéngén 16:32) Jon, noode nok nye, u nit nye, u ti ki nye mahôla ma mbéda.—Bingéngén 14:29.

JAM U NLA BOÑ:

• A isañ man: Hôla ñwaa woñ i tééda man, yak ni juu. Hubus ngéda u ngwélél i boñ mam mape inyu tégbaha jôga li ngéda ni ñwaa woñ, lôñni man woñ

• A nyañ man: Ngéda nlô woñ a nyéñ hôla we i tééda man, u tjél bañ mahôla mé. To ibale a nyi bé tééda mañge, u leñ bañ nye bibuk bibe, ndi unda nye ni gwéha lelaa a nla tibil boñ bôlô i

JAM BIBEL I NKAL: “Boba b’a ba nsôn wada.” (Bibôdle 2:24) To hala kiki mut numpe a nkôndba mu ndap nan lihaa, ni hôiga bañ le bé bo iba ni ngi yii “nsôn wada.” Ni boñ hiki jam ni nla inyu lédés maada manan.

A bôda, tina balôm banan mayéga inyu mahôla map ni inyu nit ba nit bé. Ibale ni ngwélél dilémb dinan kiki bôt ba pék, ni ga ti balôm banan “mbôô.” (Bingéngén 12:18) A balôm, kala baa banan le ni ngwés bo ngandak, ni unda ki bo le ba yé nseñ i mis manan. Béghana baa banan inyu litôñôg ba ntôñ ndap nan.—Bingéngén 31:10, 28.

“Mut nye ki nye a yiñil bañ ndigi nyetama loñge, ndi a yiñlak ki yo numpe.” (1 Korintô 10:24) Hiki ngéda, u boñog ndigi mam ma nlémél nlô woñ tole ñwaa woñ. Kiki babiina, yoña ngéda i kwel, i tina bibégés ni i tibil emblana. Ngéda we ni nlô woñ tole ñwaa woñ ni nlal, u tôñ ndigi bañ wetama, ndi yéñ yak yéñe yé. Jon Bibel i nkal le: “Ni yégna bañ wada ni nu, egle wee ni mboñ hala ngéda hogi  . . . ibale bé boba ni neebe.” (1 Korintô 7:3-5) Jon, bé bo iba, ni yibil miñem minan, ni pôdôl mu jam li loñge loñge. Ibale u nhôt nyu yoñ, u tibil ki nok nlô woñ tole ñwaa woñ, hala a ga lédés maada manan.

JAM U NLA BOÑ:

• U hôya bañ i téé ngim mangéda inyu bé bo iba ndigi

• U nla boñ disii di mam inyu ha line i gwéha nan. Kii héga, tilna nye man léta tole buk i gwéha, tole ti nye man likébla

JAM BIBEL I NKAL: “U nyi bitilna bipubi ibôdôl yaga we nkéñéé man, gwon bi nti we ngui le u bana pék inyu tohi.” (2 Timôtéô 3:15) Ni nôgla lelaa ni ga niiga man nan ibôdôl nye nkéñéé. Iloo yaga le a ngwéé, nkéñéé man u mpala kapda mam. Ngéda a ngi yii ikété libum li nyañ, nkéñéé man u nla yimbe makiñ ma bôt, a nôgda ki too nyañ a yé ñunbak tole a yé maséé. Ni soñglene nye miñañ, a bak a ngi yii nye nkéñéé. To ibale a nok bé kii bibañga bi bi nkôbla, hala a ga hôla nye i gwés lisoñgol ngéda a ga nañ.

U hoñlak bañ le mañge a yé nkéñéé ngandak inyu pôdôl nye mam ma Djob. Boñ le a emble we u nsoohe Yéhôva. (Ndiimba Mbén 11:19) To ngéda u ntuk ni man woñ, pôdôl nye inyu mam Djob a bi heg. (Tjémbi 78:3, 4) Kiki a mba a nañ, man woñ a ga nôgda le u ngwés Yéhôva, hala a ga boñ le yak nye a gwés Yéhôva.

JAM U NLA BOÑ:

• Soohe Yéhôva le a ti we pék, téntén inyu niiga man woñ

• Tiimba sima minlélém mi bibuk ni minlélém mi mahoñol inyu boñ le a pala bôdôl nigil