Ngéda Yéhôva a bi heg lihaa, a bi ti bagwal kunde i ngii bon bap. (Kôlôsé 3:20) Kiki ngwal man, bôlô yoñ i yé le u niiga man woñ i gwés Yéhôva ni i yila nañak mut nu a nla yoñ makidik malam. (2 Timôtéô 1:5; 3:15) U nlama ki nigil i yi yom i yé ikété ñem u man woñ munlôm tole muda. Yi ki le yak ndémbél u nti, i yé nseñ ngandak. U nla ndigi niiga man woñ Bañga i Djob ibale u mbôk u ha yo ikété ñem woñ wemede.—Tjémbi 40:9.

JAM BIBEL I NKAL: “Hi mut a hook noga, a tiñhaga i pot.” (Yakôbô 1:19) Ibale u ngwés le man woñ a nôgda ngôñ i kwélés we ngi woñi, u nlama ba bebee i emble nye ngéda a gwé ngôñ i kal we jam. Boñ le nsañ u ba i ndap. U sol bañ mañge, u bana bañ to lem i nyai ngandak, tiga le mañge a kon woñi i kwélés we. (Yakôbô 3:18) Ibale u gwé lem i kônd nye tole i kwés nye nkaa we ngi to emble nye, a nla bé yiblene we ñem wé. Bana wongut ngéda u nkwel ni nye. Bana ki lem i unda le u ngwés nye.—Matéô 3:17; 1 Korintô 8:1.

JAM U NLA BOÑ:

• Ba bebee i emble nye ngéda a gwé ngôñ i pôdôs we

• Bana lem i kwel ni nye. Bem bañ le ndañ u ba inyu kwélés nye

JAM BIBEL I NKAL: “Nu a ntéñ ñem inyu lipôdôl a’ kôs loñge.” (Bingéngén 16:20) Ngim mangéda, u emble ndigi bañ yom bon boñ ba mpot, ndi noode gwélél yi yoñ inyu nok lelaa ba nôgda toi. Boñge bawanda ba mbéna kéñbaha mam tole ba mpot mam ba nhoñol toi bé. Jon Bibel i nkal le: “Nu a ntimbhe nye ngi nok, hala a yé nye bijôñ ni wonyu.” (Bingéngén 18:13) U béna bañ pala unup.—Bingéngén 19:11.

JAM U NLA BOÑ:

• Yoñ makidik mu ñem woñ le to i ba yaga le man woñ a mpot kii, u kit bañ nye hop, u bep bañ to unup

• Noode hoñol lelaa yak we u bé nôgda i ngéda u bééna ñwii ñwé, bigda ki mam ma bé nseñ inyu yoñ ha ngéda i

JAM BIBEL I NKAL: “A man wem, emble maéba ma isoñ, u yék bañ biniigana bi nyuñ.” (Bingéngén 1:8) Kunde i niiga boñge, Yéhôva a bi ti yo isañ bo nyañ. Ni nlama niiga bon banan i nôgôl bé ni i ti bé lipém. (Efésô 6:1-3) Boñge ba mpala nôgda le bagwal bap ba ntibil bé “adba ikété hoñol yada ni kiñ yada.” (1 Korintô 1:10) Ibale ni nôgla bé inyu ngim jam, ni unda bañ hala i bisu bi bon banan, tiga le hala a suhus lipém ba nti bé kiki bagwal bap.

JAM U NLA BOÑ:

• Kwela, ni nôgla ki lelaa ni ga kodol bon banan

• Ibale we ni ñwaa woñ ni gwé bé mahoñol mada i yi lelaa ni ga néñés bon banan, ni kwélél mu

JAM BIBEL I NKAL: “Niiga mañge njel a nlama nôñôl.” (Bingéngén 22:6) Linéñés boñge le ba yila bôt ba nla yoñ makidik malam li nlo ndigi bé hala. Ni nlama nôgla lelaa ni ga néñés boñge, ni lelaa ni ga kodol bo. (Tjémbi 127:4; Bingéngén 29:17) Likodol mañge li nkobla bé ndigi le u kokse nye, ndi yoñ ngéda i kal nye inyuki u ntéé mambén. (Bingéngén 28:7) Niiga bo i gwés Bañga i Yéhôva ni i yi matiñ mé. (Tjémbi 1:2) Hala a ga hôla bo i bana kiñ ñem i ntibil tehe maselna ipôla yom i yé loñge ni yom i yé béba.—Lôk Héber 5:14.

JAM U NLA BOÑ:

• Hôla mañge i tehe Yéhôva kiki Isañ wé nu a nla bôdôl ñem

• Hôla ki nye i yimbe ni keñgle mam ma nla ôbôs bilem gwé bilam, tole mawanda a nla léba nyoo ikété internet. Hôla nye i keñgle bôt ba ñôbôs boñge