Ñañal 7:1-29
7 Jôl lilam li nloo loñge mbon,+ yak hilo hi nyemb hi nloo hilo ligwéé.
2 I yé nseñ le u ke i ndap maéya iloole u ke i ndap ngand,+ inyule lisuk li bôt bobasôna li, bayômi ba nlama tééda i jam li i ñem.
3 Njiiha i yé loñge iloo hiol,+ i ngéda mut a môdi,* hala a nyilha nye loñge mut.+
4 Ñem u mut pék u yéne i ndap maéya, ndi ñem u jôñ mut u yéne i ndap ngand.*+
5 I yé nseñ le u emble mut pék nu a nkônd we+ iloole u emble jôñ mut i ntubul we tjémbi di bibégés.
6 Kiki dikaha* di di nloñ isi hibee, hala nyen hiol hi jôñ mut hi yé;+ yak hala a yé yañga.
7 Ndi ndééñga i nla boñ le mut pék a boñ wee mut njék, yak bitek bi ñôbôs ñem.+
8 Lisuk li jam li yé nseñ iloo bibôdle gwé. I yé nseñ le u bana wongut iloole u bana ngôk.+
9 U pala bañ unup,*+ inyule bijôñ bi bôt gwon bi mpala unup.*+
10 U kal bañ le: “Inyuki dilo di kôba di bé dilam iloo dini?” Inyule pék bé yon i ntinde we i bat hala.+
11 I ngéda mut pék a nkôhna ngababum, hala a yé loñge. I pék ini i yé ki nseñ inyu bôt ba yé i niñ.*
12 Pék i nsôñ mut+ kiki yak moni mi nsôñ+ mut, ndi nseñ u yi u yé le: pék i nsôñ niñ i nu a gwé yo.+
13 Béñge nson u bañga Nyambe, inyule njee a nla kodol i jam a bi kôdi?+
14 I kel mam ma yé malam,+ yak we boñ loñge; ndi i kel ndutu, yi le Nyambe nyen a bi boñ i kel ini yo iba,+ inyu boñ le bôt ba binam ba pam bañ i yi i mam ma ga lo.+
15 Me bi tehe mam momasôna munu niñ yem i i gwé bé nseñ wo ki wo:+ mut a téé sép a nwo, to hala kiki a mboñ mam ma téé sép;+ ndi béba mut i nom, to hala kiki i mboñ mam mabe.+
16 U ba bañ mut a téé sép+ iloo hihéga, u ba bañ to mut pék iloo hihéga,+ tiga le u boñ wemede béba.+
17 U ba bañ béba mut iloo hihéga, u ba bañ to jôñ mut,+ tiga le u wo ngéda ngi kola.+
18 I yé loñge le u emble mabéhna ma bisu,* ndi u nwas bañ to mana mape;*+ inyule i mut a nkon Nyambe woñi a ga emble mo ima.
19 Mut pék a gwé ngui iloo jôm li mimpémba mi bôt ikété tison.+
20 Inyule mut telepsép a ta bé munu ’isi le a mboñ ndigi loñge, ndi a boñ bé béba.+
21 U emble bañ to hiki jam bôt ba mpot;+ tiga le u nok ngwélél woñ a ntiihe we;*
22 inyule wemede u nyi ikété ñem woñ le u ma tiihe bôt bape ngandak ngélé.+
23 Me bi noode wan mam momasôna ni pék, me kal le: “M’a bana pék.” Ndi i bi loo me ntel.
24 I mam ma bi bôña, di ta bé le di yi mo, ma yé ki ndip ngandak. Njee a nla nok mo?+
25 Me bi yoñ makidik i yi pék, i wan yo ni i yéñ yo; i yi inyuki mam ma mbôña, ni i nok maboñok mabe ma bijôñ bi bôt, ni bijôñ bi mut njék.+
26 Ha nyen me bi tehe le: i muda a yé kiki mbunja nsômbi a nlol iloo nyemb, ñem wé u yé kiki pése, moo mé ma yé kiki minsañ mi bikei mi ndap mok. I mut a nkon bañga Nyambe woñi, i muda nu a ga gwel bé nye,+ ndi a ga gwel mboñbéba.+
27 Nkot bôt+ a nkal le: “I jam lini jon me bi léba. Me bi wan mam momasôna jada ni jada ipam lisuk,
28 ndi jam me bi téñbe i yéñ, me bi léba bé jo. Ikété hikôô hi bôt, me bi léba munlôm wada nu a téé sép, ndi me bi léba bé muda nu a téé sép.
29 I jam lini jon me bi léba: bañga Nyambe a bi hek bôt ba téé sép,+ ndi ba bi noñ manjel map bomede.”+
Ndoñi
^ Ni hop Lôk Héber, “su u yé nkañak.”
^ Tole “maséé.”
^ Tole “biloo.”
^ I nla ki ba, “hiun hi yé yimbne i bijôñ bi bôt.”
^ Ni hop Lôk Héber, “U pala bañ nok liyot i mbuu woñ.”
^ Ni hop Lôk Héber, “bôt ba ntehe mapubi ma kel.”
^ Hala wee, mabéhna ma yé i nlôñ 16.
^ Hala wee, mabéhna ma yé i nlôñ 17.
^ Tole “a mpot we béba.”