Kaat Éfésô 4:1-32
4 Jon me, mut mok+ inyu Nwet, me nsoohe bé le ni boñ mam* i nya i kôli+ ni nsébla ba bi sébél bé,
2 ni suhulnyuu yosôna,*+ ni ñemlima, lôñni wongut;+ ni nihbanaga bé ni bé ikété gwéha,+
3 ni boñok biliya bi ngui i tééda adna i mbuu mpubi ikété maada ma nsañ.+
4 Nyuu i yé ndik yada,+ mbuu u bak ki wada,+ kiki yak botñem+ inyu nsébla ni bi kôhna i yé yada;
5 Nwet a yé wada,+ hémle yada, sôble yada,
6 Nyambe wada nu a yé Isañ bobasôna, nyen a yé i ngii bobasôna, a ngwel nson ni njel bobasôna, yak ngui yé i nsal ikété bobasôna.
7 Ndi konangoo i mbuma ñañ i bi tina hiki wada wés inoñnaga ni kiki Kristô a bi kébél nye likébla a nti yañga.+
8 Inyule Bitilna bi nkal le: “I ngéda a bi bet i ngii, a bi kena bôt i minkôm; a ti bôt kiki makébla.”+
9 Nano bini bibañga le “a bi bet” bi nkobla le kii? Handugi le a bi bôk ndugi a sôs i mambok ma hisi, hala wee nkoñ ’isi.
10 Nu yaga a bi sôs, nye ki nyen a bi bet+ yaga i ngingii,+ le ndi a yônôs mam momasôna.
11 A bi ti bahogi kiki baôma,+ bape kiki bapôdôl,+ bape kiki baañal ñañ nlam,*+ bape ki kiki batééda bémba ni baniiga,+
12 inyu kodol* bapubhaga, inyu gwel nson u likoda, inyu mahol ma nyuu Kristô,+
13 letee bésbobasôna di pam i bana adna* i hémle ni i bañga yi i Man Nyambe, inyu ba yaga nhôôlak mut,*+ inyu pam i bana libak li Kristô i nya i yôni.
14 Jon di nlama ha bé ba boñge batitigi le mangudga ma ndéñgés, hiki mbebi biniigana i ken-ga bo bahoma bahoma+ ni njel mandon ma bôt ba binam, ni njel likeñge i bot bitembee.
15 Ndi di pot maliga, di holok ki ni njel gwéha ikété mam momasôna isi nu a yé ño le Kristô.+
16 I nyeni nyen nyuu yosôna+ i yé yaga noñgaga loñge, i salak ikété adna hala kiki hiki jô* i nti yom i mbéda. I ngéda hiki jô i nsal loñge, hala a nhôla nyuu i hôlôl, mu kiki i nhol ikété gwéha.+
17 Jon i jam lini jon me nkal, me bogok ki mbôgi ikété Nwet, le ni nlama bé boñ mam* kiki bôt ba matén ba mboñ,+ inyule ba nhoñol ndik gwañga* bi mam.+
18 Mahoñol map ma yé ikété jiibe, ba bak mbaglak ni niñ Nyambe a nti, inyu ngiyi yap, ni inyule miñem nwap nkwo tuduk.*
19 Kiki ba nkon ha bé hison, bomede ba nsôôbe ikété maboñok mabe ngi wonyuu,*+ le ba boñ mintén mi mam ma nyega nwominsôna ni huluk ñem.
20 Ndi ni bi nigil bé le hala nyen Kristô a yé,
21 ibale ni bi emble toi nye, ni kôhna ki biniigana ni njel yé, ndik kiki maliga ma yéne yak Yésu.
22 Ni bi nigil i héya nlômbi mut+ u u nkiha ni minlômbi minan mi maboñok, u ñôbi ki inoñnaga ni minheña nwé mi malôga.+
23 Ndi ni nlama ke ni bisu i yila yondo ikété ngui i ñénél mahoñol manan,*+
24 ni haba ki mut yondo+ nu a bi héga inoñnaga ni sômbôl i Nyambe ikété bañga telepsép ni bañga ndéñbe.
25 Jon, nano kiki ni mal nwas bitembee, hiki wada nan a kal mut wé libôk maliga,+ inyule ni yé bijô bi nyuu bi bi édi gwo ni gwo.+
26 Unbana, ndi ni boñ bañ béba;+ ni nwas bañ le hiañgaa hi nañal, hiun hi bak bé i ñem;+
27 ni ti bañ Nsohop pôla.*+
28 I mut a nibik, a nip ha bañ; ndi a sal bôlô ni ngui, a boñok bôlô ilam ni moo mé,+ le ndi a bana yom le a nla kébél i mut a gwé bé.+
29 Buk ibe yo ki yo i pémél bañ i manyo manan,*+ ndi ndik mam ma nlédhana i ngéda hala a mbéda, inyu ti baemble mam ma yé nseñ.+
30 Ni unbaha bañ ki to mbuu mpubi u Nyambe,*+ lôñni wo nyen Nyambe a bi band bé+ inyu kel kobla ni njel binoñ.+
31 Ni héya mintén mi lôlha ñem nwominsôna+ ikété nan, ni hiun, ni nyayak, ni nlondok, ni bisol,+ lôñni béba ñem yosôna.+
32 Ndi ni bana loñgeñem bé ni bé, ni ñem konangoo,+ ni nwéhlana ki bé ni bé ni ñem wonsôna, kiki yak Nyambe a bi nwéhél bé ni ñem wé wonsôna ni njel Kristô.+
Ndoñi
^ Ni hop Grikia, “Ni hiôm.”
^ Tole “ni ñem nsôhga.”
^ Tole “batéé likalô.”
^ Tole “niiga.”
^ Ni hop Grikia, “i ba wada.”
^ Ni hop Grikia, “nañak mut.”
^ Ni hop Grikia, “môñga.”
^ Tole “bihôlô bi mam; biyôglô bi mam.”
^ Ni hop Grikia, “ni nlama bé hiôm.”
^ Tole “miñem nwap mi nok ha bé njôghe.”
^ Tole “i bana bihiumul bibe ngi wonyuu.” Buk i hop Grikia le aselgéia. Béñge Ndoñi bibuk.
^ Tole “ni yilha mahoñol manan yondo.” Ni hop Grikia, “mbuu u mahoñol manan.”
^ Tole “ni yible bañ Nsohop njel.”
^ Tole “ni bana bañ nyo mbe.”
^ Tole “ni gwélha bañ ki to mbuu mpubi u Nyambe njôô.”
