Usange

•   nyengo zose ukukhumba kuŵa wakwamba

•   ukakana kuchita vinthu vinyake chifukwa chakopa kutondeka

•   ukukana kususkika

 . . . ndikuti zgoro la fumbo ilo lili pachanya ndakuti enya. Kweni chifukwa wuli ntchiheni kuchita nthena?

•  Kasi pali uheni wuli usange nyengo zose ukukhumba kuchita vinthu ndendende?

•  Kasi ukwenera kuchita vichi?

•  Ivyo ŵanyako ŵakuyowoya

 Ntchiheni yayi kukhumba kuchita makora vinthu. Kweni buku linyake likuti: “Pali mphambano pakati pa kukhumba kuchita makora vinthu na kukhumba kuchita makora vyose kwambura kubudiskapo.” Likuyowoyaso kuti: “Ntchakofya kuŵa na mtima wakukhumba kuchita vinthu ndendende, chifukwa tose tikubudiska.”—Perfectionism—What’s Bad About Being Too Good?

 Baibolo likuti: “Pa charu chapasi palije munthu murunji uyo nyengo zose wakuchita uwemi pera.” (Mupharazgi 7:20) Chifukwa chakuti ndiwe wakwananga, ni vyose yayi ivyo ungachita ndendende nga umo ukukhumbira.

 Kasi vikukusuzga kuzomerezga para wabudiska? Usange ni nthena, wona nthowa zinayi izi izo zikulongora uheni wakukhumba kuchita vinthu ndendende nyengo zose.

1.   Umo ukujiwonera. Munthu uyo nyengo zose wakukhumba kuchita vinthu ndendende, wakujiŵikira vinthu vyakuti wangakwaniska yayi ndipo para wandakwaniske, wakukhuŵara waka. Alicia wa vyaka 25, wakayowoya kuti: “Kuyowoya unenesko, vingachitika yayi kuti nyengo zose tichitenge vinthu makora. Para watondeka kuchita vyose ndendende ukujiwona wawakawaka. Ntheura ungamba kusuzgika maghanoghano.”

2.   Umo ukuwonera ulongozgi uwo wapika. Munthu uyo nyengo zose wakukhumba kuchita vinthu ndendende, para wapika ulongozgi wakuwona nga kuti ŵakumuchitira waka sanji. Munyamata munyake wa vyaka 24, zina lake Jeremy, wakati: “Para napika ulongozgi, vikuniŵinya chomene. Para nyengo zose ukukhumba kuchita vinthu ndendende, vikukusuzga kumanya ivyo ungakwaniska kweniso kupokera ulongozgi.”

3.   Umo ukuwonera ŵanyako. Munthu uyo nyengo zose wakukhumba kuchita vinthu ndendende, wakukolerana yayi na ŵanyake. Chifukwa wuli? Msungwana munyake wa vyaka 18, zina lake Anna, wakati: “Usange nyengo zose ukukhumba kuchita vinthu ndendende, ukukhazga kuti ŵanyako nawo ndimo ŵachitirenge. Kweni para ŵanyako ŵatondeka kuchita nthena, ukukhalira waka kukhuŵara.”

4.   Umo ŵanyako ŵakukuwonera. Para nyengo zose ukukhumba kuti ŵanyako ŵachitenge vinthu ndendende, kuzizwa yayi para ŵamba kukugega panji kukugwentha! Mwanakazi munyake wa vyaka 29, zina lake Beth, wakati: “Palije uyo wangatemwa kukhala na munthu uyo nyengo zose wakukhumba kuchita vinthu ndendende, chifukwa ntchakusuzga kufiska ivyo wakukhumba!”

 Baibolo likuti: “Mahara ghinu ghamanyikwe ku ŵanthu wose.” (Ŵafilipi 4:5) Ŵanthu ŵamahara ŵakumanya ivyo iwo kweniso ŵanyawo ŵangafiska.

 “Charu chikukhumba kale vinandi kufuma kwa ine. So chakujisuzgiraso ntchivichi kukhumba kuchita vinthu ndendende? Ningakwaniska cha!”—Nyla, wa vyaka 19.

 Baibolo likuti: ‘Yenda mwakujiyuyura na Chiuta wako!’ (Mika 6:8) Ŵanthu ŵakujiyuyura ŵakumanya ivyo ŵangafiska. Ŵakulimbana na ivyo ŵangatondeka kufiska yayi, nesi kumalirapo nyengo yawo.

 “Usange nkhukhumba kuchita makora vinthu vinyake, nkhusankha vyekha ivyo ningafiska.”—Hailey, wa vyaka 23.

 Baibolo likuti: “Chilichose icho woko lako lasanga kuti lichite, uchichite na nkhongono zako zose.” (Mupharazgi 9:10) So para ukukhumba kuchita makora vinthu, ukwenera kulimbikira, ukata yayi. Kweni kuluwa yayi kuti ukwenera kuchita vinthu mwamahara na kuŵa wakujiyuyura.

 “Nkhuŵikapo mtima kuchita makora ntchito yane. Nkhumanya kuti ningachita vyose ndendende yayi, kweni nkhukondwa para nachita na mtima wose.”—Joshua, wa vyaka 25.