Steven, wa vyaka 28, wakati: “Vikaniŵinya chomene chibwezi chati chamar. Kakaŵa kakwamba kujipulika nthena pa umoyo wane.”

 Kasi nawe vili kukuchitikirapo? Usange ni nthena, nkhani iyi yikovwirenge.

•  Umo vikuŵira para chibwezi chamara

•  Ivyo ukwenera kuchita

 Para chibwezi chamara vikuŵinya mose mwaŵaŵiri.

•   Usange ndiwe ukapangiska kuti chibwezi chimare, panji ungayowoya nga ni Jasmine, msungwana wa vyaka 28, uyo wakati, “Nati namanya kuti nachita vinthu vyakukwenyerezga munyane uyo nkhamutemwanga, njuŵi yane yikanisuzga chomene ndipo nkhukhumba yayi kuwerezgaso.”

•   Usange ukapangiska ndiwe yayi kuti chibwezi chimare, ungapulikiska chifukwa icho ŵanyake ŵakuyowoyera kuti kumara kwa chibwezi, ni nyifwa padera. Msungwana munyake wa vyaka 21, zina lake Janet, wakati: “Nkhakhaliranga waka kulira, kukwiya, kweniso kusuzgika maghanoghano. Kwa chaka chathunthu, nkhapulikiska yayi kuti chibwezi chamara nadi.”

 Manya kuti: Para chibwezi chamara, ukwamba kujiwona wawakawaka kweniso ukukondwa yayi. Baibolo likuyowoya kuti: “Mzimu wakuphyoka ukukamuska nkhongono.”—Zintharika 17:22.

•  Phalira munthu mulara uyo ukumugomezga. Baibolo likuti: “Mubwezi wanadi wakutemwa nyengo zose, ndipo ni mubali uyo wali kubabikira kovwira mu suzgo.” (Zintharika 17:17) Kuphalirako mupapi panji mubwezi wako uyo ngwakukhwima vingakovwira kuwona mwakwenelera ivyo vyachitika.

   “Kwa myezi yinandi nkhakhumbanga yayi kuphalira waliyose umo nkhajipulikiranga ndipo nkhatemwanga kukhala waka panekha. Kweni para waphalira ŵanyako ivyo vyakuchitikira vikovwira. Nkhaŵaphalira umo nkhajipulikiranga ndipo nkhamba kujipulika makora.”—Janet.

•  Sambirapo kanthu pa ivyo vyakuchitikira. Baibolo likuti: “Usange vinjeru, upulikiskenge vinthu.” (Zintharika 4:5) Masuzgo ghakutovwira kuti tijimanye makora. Ghangatovwira kumanya umo tikuchitira para takhuŵara.

   “Chibwezi chati chamara, munyane wakanifumba kuti, ‘Kasi wasambirapo vichi, ndipo uzamuchita wuli para wasanga chibwezi chinyake?’”—Steven.

•  Upempherenge. Baibolo likuti: “Katundu wako umuthwikiske Yehova, ndipo wakovwirenge.” (Salimo 55:22) Pemphero lingakovwira para uli na chitima, ndipo lingakovwira kuti wambe kuwona mwakwenelera ivyo vyachitika.

   “Lutilira kulomba. Yehova wakupulikiska umo ukujipulikira ndipo wakumanya makora suzgo lako kuluska wamwene.”—Marcia

•  Wovwira ŵanyako. Baibolo likuti: “Kulaŵiska pa ivyo imwe mukukhumba pera yayi, kweniso ivyo ŵanyinu ŵakukhumba.” (Ŵafilipi 2:4) Para walutilira kovwira ŵanyako, wambenge kuwona mwakwenelera nkhani iyi.

   “Para chibwezi chamara ukuwona nga kako palije, ndipo vikuŵinya chomene. Ndipouli, para pajumpha nyengo vikusintha. So nkheneranga kuzikira.”—Evelyn