Ko e Tohi Tapu Māʻoniʻoní ʻoku fetuʻutaki tohi mai ai ʻa e ʻOtuá kiate kitautolu hono kotoa. Kuo pau ke tau ako ia ke tau hoko ai ʻo ʻiloʻi ʻa hono Tokotaha Faʻutohí. (Sione 17:3; 2 Tīmote 3:16) ʻOku fakahaaʻi mai ʻe Sihova ko e ʻOtuá ʻi hono ngaahi pēsí ʻa ʻene taumuʻa ki he faʻahinga ʻo e tangatá pea mo honau ʻapi ko e foʻi māmaní.—Sēnesi 3:15; Fakahā 21:3, 4.

ʻOku ʻikai ha toe tohi ʻe hangē ko e tohí ni ʻi heʻene maongo ki he moʻui ʻa e kakaí. ʻOku ueʻi kitautolu ʻe he Tohi Tapú ke tau tapua atu ʻa e ngaahi ʻulungaanga ʻo Sihova ko e ʻofa, meesi, mo e manavaʻofa. ʻOku ʻomai ai ʻa e ʻamanaki, pea tokoniʻi ʻa e kakaí ke nau kātekina ʻo aʻu ki he faingataʻa kovi tahá. Pea ʻoku hokohoko atu ʻene fakaeʻa ʻa e ngaahi meʻa ʻi he māmani ko ení ʻa ia ʻoku ʻikai ke fehoanaki mo e finangalo haohaoa ʻo e ʻOtuá.—Saame 119:105; Hepelū 4:12; 1 Sione 2:15-17.

Naʻe fuofua hiki ʻa e Tohi Tapú ʻi he lea faka-Hepeluú, mo e faka-Alameá, mo e lea faka-Kalisí, pea kuo liliu kakato ia pe ʻi hano konga ʻi he lea ʻe 3,000 tupu. Kuo hoko ia ko e tohi kuo liliu mo tufaki lahi taha ʻi he hisitōliá. Pea ʻoku totonu pē ke tau ʻamanekina ʻa e meʻa ko iá. ʻOku pehē ʻe he kikite ʻa e Tohi Tapú: “Ko e ongoongo lelei ko ʻeni ʻo e Puleʻangá [ʻa e pōpoaki tefito ʻoku ʻi he Tohi Tapú] ʻe malangaʻi ia ʻi he kotoa ʻo e māmani kuo nofoʻí ko ha fakamoʻoni ki he ngaahi puleʻanga kotoa pē, pea ʻe toki hoko mai leva ʻa e ngataʻangá.”—Mātiu 24:14.

ʻI hono ʻiloʻi ʻa e mahuʻinga ʻo e pōpoaki ʻi he Tohi Tapú, ko ʻemau taumuʻá ke ʻoatu ha liliu ʻoku ʻikai ngata pē ʻi heʻene tonu ʻo fakatatau ki he muʻaki potutohí kae toe mahino foki mo faingofua hono laú. Ko e ngaahi kupu ko eni ʻi he Fakamatala Fakalahí, “Ngaahi Tefitoʻi Moʻoni ʻo e Liliu Tohi Tapú,” “Ngaahi Tafaʻaki ʻo e Pulusinga ko Ení,” mo e “Founga ʻo e Aʻu Mai Kiate Kitautolu ʻa e Tohi Tapú,” ʻoku lāulea ai ki he niʻihi ʻo e ngaahi tefitoʻi moʻoni fakaeliliu lea naʻe fai ʻa e muimui ki ai, pea pehē ki he ngaahi fakamatala ʻo fekauʻaki mo e ngaahi tafaʻaki ʻo e pulusinga ko ení.

Ko e faʻahinga ʻoku nau ʻofa kia Sihova ko e ʻOtuá mo lotu kiate iá ʻoku nau holi ki ha liliu ʻo e Folofola ʻa e ʻOtuá ʻoku tonu mo mahinó. (1 Tīmote 2:4) Ke aʻusia ʻa e taumuʻa ko iá, kuo mau ʻai ai ke ala maʻu ʻa e pulusinga ko ení ʻi he lea faka-Tongá, ʻo fehoanaki mo ʻemau taumuʻa ʻi hono liliu ʻa e Liliu Māmani Foʻoú ki he ngaahi lea lahi taha ʻe ala lavá. ʻOku mau ʻamanaki mo lotu ʻe hoko ʻo ʻaonga kiate koe, siʻi tokotaha lautohi, ʻa e pulusinga ko eni ʻo e Tohi Tapu Māʻoniʻoní ʻi hoʻo feinga ke “kumi ki he ʻOtuá . . . ʻo maʻu moʻoni ia.”—Ngāue 17:27.